JOHANA 9
9
Kosoobi Jesu chi ne kiga kisich ko korat
1Ak ye kisiirtoi, kogeer chito ne ki korat koboch ko kagisich. 2Ak kiteebe inendet alamalyennyi, kolenji, Rabbi, ng’o ne kiyai tengekto, chichi anan sigikyik, si kesich ko korat? 3Kowol Jesu kole, Kima yai chichi tengekto, anan sigikyik; ago si kobiit kotook boisiosiekab Jehovah eng’ inendet. 4Kanyol keyai boisiosiekab inendet ne kiiyokwa, ko ta ko bet: nyonei kemout, ye ma komuchi chi kobois. 5Ye ta ami ng’ony, ko a lapkeiyetab ng’ony. 6Ye kingo kagomwa ko u noto, kong’utyi ng’ung’unyek, ak kotangwar, ak koiile konyekyik ng’ung’unyechato, 7ak kolenji, Ui iunde eng’ tamboiyotab Siloam (ye kiweech kele, Kiyokto). Kiwa anyun, ak koun, ak konyo kogeertoi.
8Kimwa anyun bikab kokwet, ak che kiga kogeer inendet eng’ tai kole somindet, kole, Tos ma inendet ni ne kicham kotebyei ak kosomsei? 9Kole alage, Inendet: kole alage, Achicha, ago kerge ak inendet. Kole chichoto, A inendet. 10Kilenji anyun ichek inendet, Kagiyatita ano konyeguk? 11Kowol kole, Katangwar ng’ung’unyek chito ne keguure Jesu, ak koiile konyekyuk, ak kolenja, Ui Siloam, ak iunde: kaawe anyun ak aun, ak ageerte. 12Ak kilenji, Mi ano inendet? Kole, Mangen.
13Kiimut ichek chichoto ki korat eng’ tai, kwo ole mi Parisaik. 14Ki sabato betunoto ye kitangwari Jesu ng’ung’unyek, si koyate konyekab chichoto. 15Koteebe anyun Parisaik kogeny inendet kole, Katepto ano si igeerte? Ak kilenji, Kagoiile konyekyuk ng’ung’unyek che katangwar, ak kaaun, ak kaageerte. 16Kole alak che bo Parisaik anyun, Mabunu Jehovah chichi, amu maribei sabato. Ago kile alage, Imuktoi ano chi ne kiptengekyo koyai kaborunoik che u chu? Ak kibiit toiyet eng’ kwenunywa. 17Kilenji anyun kogeny chito ne korat, Imwae nee agobo inendet, amu kayat konyeguk? Ak kile, Maotio.
18Ma iyan anyun Yahudik agobo inendet, kole, ko korat, ak, kagogeerto, agoi koguur sigikab chichoto kagogeerto, 19ak koteebe kolenji, Tos wering’wong’ ni, ne omwae ole kigisich ko korat? Katepto ano si kogeerto nguno? 20Kowol sigikyik kole, Kingen kele werinnyo nito, ak kingen kele kigisich ko korat: 21ago magingen ole katepto si kogeerto nguno; ak magingen inendet ne kayatei konyekyik: oteebe inendet; kogoeet; ingomwa inegei. 22Kimwa ng’alechu sigikyik, amu kiiywei Yahudik: amu kiga sib kochamnyechi Yahudik, kole, ngo ng’any chi age tugul kole Kristo inendet, kibeetoi eng’ sunagogit. 23Kimwa anyun sigikyik amu noto, kole, Oteebe, amu kogoeet inendet.
24Kiguur anyun ne bo aeng’ bichoto chichoto ki korat, ak kolenji, Igochi Jehovah kalosunet: kingen kele kiptengekyo chichi. 25Kowol anyun inendet kole, Ngo kiptengekyo chichoto, ko mangen: angen kit agenge, ale, koa korat, ago ageertoi nguno. 26Kolenji anyun ichek inendet, Kayaun nee? Kayatita ano konyeguk? 27Kowolji ichek kolenji, Kaamwawok, ama ogas: kalya si omach ogas kogeny? Omache koegu ak okwek alamalennyi? 28Ak king’emji kut inendet kole, I alamalyennyi so? Ago ki alamalyetab Musa achek. 29Kingen kele kigong’alalji Jehovah Musa: ago magingen kole bo chichi. 30Kowolji chichoto icheget kolenji, Kwong’ut nito anyun, amu mongen ole bunu, ago kagoyat konyekyuk. 31Kingen kele magasei Jehovah kiptengeginik: ago ngolosu chi age tugul Jehovah, ak koyai magennyi, kogasei inendet. 32Koboch ngetoi ng’ony ko ma kigas kele kiyat chi konyekab chito ne kigisich ko korat. 33Nda ma bunu Jehovah chichi ko magoi imuch koyai kiy. 34Kowolji inendet kolenji, Kigisikten iman tengekwogik, ak inetech? Ak kitoorta inendet kwo sang’.
35Kigas Jesu kole kagetoorta inendet kwo sang’; ak kingonyor inendet, kolenji, Tos iyani Weritab Jehovah? 36Ak kiwol kole, Ng’o noto, Kiptaiyandani, si kobiit ayan inendet? 37Kolenji Jesu, Kaigeer inendet, ak ko inendet ni ng’alali koboten. 38Ak kile, Kiptaiyandani, ayani. Ak kogutung’ji kolos inendet.
39Ak kile Jesu, Kianyo ng’onyuni amu kiruoget, si kobiit kogeerto che mageertoi; ak kogorio che keertoi. 40Kigas tuguchuto alak che bo Parisaik che kimi koboto inendet, ak kolenji, Ki koriotin agachek? 41Kolenji Jesu, Nda o koriotin okwek, ta motinye tengek; ago nguno omwae ole, Kigeertoi: noto anyun, tebyei tengektang’wong’.
Currently Selected:
JOHANA 9: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
