JOHANA 4
4
Jesu koboto kobogoriotab Samaria
1Ye kingonai Kiptaiyat kole kigogas Parisaik kole kiyaei Jesu bik koek alamalyet ak kobatisani che siirei che kiibatisan Johana 2(ago ma Jesu inendet ne kiibatisanisiei, ago alamalyennyi), 3kong’eet eng’ Judea, kwo kogeny Galili. 4Ak ki kanyol kobun Samaria.
5Kiit anyun nganaset ne bo Samaria, ne kiguure Sukar, ne negite koret ne kiigochi Jakobo werinnyi Josep: 6ak kimi oloto keringetab beek ne bo Jakobo. Kitebyei anyun Jesu eng’ ye negite keringetab beek, amu ng’etatetab bandanyi. Ki olo bo sait lo.
7Kinyo kobogoriot ne bo Samaria kosiil beek: kolenji Jesu, Inaga aee. 8Amu kigaba alamalyennyi nganaset koal amitwogik.
9Kilenji anyun kobogoriot ne bo Samaria, Katepto ano si isoma beek che iee, ak inye ko i Yahudiot, ak ane ko a kobogoriotab Samaria? (Amu manamegei Yahudik ak Samarik.) 10Kowolji Jesu kolenji, Nda kengen konunetab Jehovah, ak inendet ne kalenjin, Inaga beek aee; ta kaisom inendet, ak ta kagogonin beekab sobon. 11Kolenji kobogoriot, Kiptaiyandani, metinye kit ne isiile, ak loo keringet: inyorjini ano anyun beechoto bo sobon? 12I o inye eng’ kwandanyo Jakobo, ne kigonech keringoni, ne kiee inendet, ak werikyik, ak tukyik? 13Kowolji Jesu kolenji, Age tugul ne eei beechu ko ta koamei melel kogeny: 14ago age tugul ne eei beek che agochini ko ma koamei melel agoi; ago egu beek che agochini kondab beek eng’ inendet, che kutu agoi sobondab koigeny. 15Kolenji kobogoriot, Kiptaiyandani, inaga beechoto, si ma koama melel, si ma anyone asiile beek eng’ oli loo. 16Kolenji Jesu kobogoriondonoto, Ui, iguur manong’otiondeng’ung’, ak obwa yuto.
17Kowolji kobogoriot kolenji, Matinye manong’otiot. Kolenji Jesu, Kaimwa komie ile, Matinye manong’otiot: 18amu kiotebi ak manong’otaik mut; ak inendet ne omi tuwai nguno ko ma manong’otiondeng’ung’: kaimwa anyun iman nito. 19Kolenji kobogoriot, Kiptaiyandani, kaageer ale i maotio. 20Kisaei kwanisiekyok eng’ tulwoni; ak olen okwek, Jerusalem ole kanyol kosae bik.
21Kolenji Jesu, Kobogoriondoni, iyana, nyonei sait, ye ma kosae Kwanda eng’ tulwoni, anan eng’ Jerusalem. 22Osae ne mongen: kisae achek ne kingen: amu bunu yetunet Yahudik. 23Ago nyonei sait, ak kagoit nguno, ye saei Kwanda saik che bo iman eng’ tamirmiriet ak imanit: amu cheng’oti Kwanda che u choto koek che saei inendet. 24Jehovah ko Tamirmiriet: ak kanyol kosa inendet eng’ tamirmiriet ak iman che saei inendet. 25Kolenji kobogoriot, Angen ale nyonei Mesia (ne keguure Kristo): ye nyo inendet, komwawech tuguk tugul. 26Kolenji Jesu, A inendet ne ang’alalun.
27Kibwa anyun alamalyennyi; ak kikwong’io amu king’alali ak kobogoriot; ago ma mwachi chi kole, Icheng’e nee? Anan, Kalya si ong’alal ak inendet?
28Kibagakta anyun kobogoriot terennyi bo bei, ak kwo nganaset, ak komwachi bik kolenji, 29Obwa ogeer chito ne kamwawa tuguk tugul che kiayai atkinye kora: tos Kristo nito? 30Kimong’ anyun eng’ nganaset kobwa ole mi inendet.
31Kingota kobwanei, kosom alamalyennyi, kole, Rabbi, amisie. 32Ago kilenji ichek, Atinye amitwogik che aame che mongen. 33Kolenjigei anyun alamalyennyi, Tos kagoipchi chi kiy ne amei? 34Kolenji Jesu, Amitwogikyuk ko ayai magetab inendet ne kiiyokwa, ak agesu boisiennyi. 35Momwae okwek ole, Ta komi arawek ang’wanu, si koit kesisiet? Ogeero, amwawok ale, Oyot met, ak ogeer mbarenik, ole kagoleelagitu, kagoyam keges. 36Inendet ne kesei kotaachei melekto, ak koyumi logoek che bo sobondab koigeny; si koboiboitu tuwai ne kolei ak ne kesei. 37Amu bo iman mwaoni eng’ ni, Kolei age, kogesei age. 38Kiayoktok oges che kima onyalilji: kigonyalilji alage, ak kaonam okwek uuindab boisienywa.
39Kiiyan anyun inendet Samarik che chang’ che bo nganasanato amu ng’olyotab kobogoriot, ne kibaorian kole, Kamwawa tuguk tugul che kiayai atkinye kora. 40Noto anyun, ye kingobwanji inendet Samarik, kosom kole kotebi koboto ichek: ak kibeni oloto betusiek aeng’. 41Ak kiiyan alak che chang’ amu ng’olyondennyi; 42ak kilenji kobogoriot, Kiyani nguno, ma amu ng’aleleng’ung’: amu kagegasyige; ak kingen iman kele nito ko Yetindetab ng’ony.
Kosoobi Jesu weritab kiboitiotab kaplaitoriat
43Ak kingobata betusiechoto aeng’u kong’eet eng’ oloto kwo Galili. 44Amu kibaorian Jesu inendet kole, matinyei maotiondo teegisto eng’ emennyi. 45Ak kingonyo anyun Galili, kotaach inendet Galilik, ko kagogeer tuguk tugul che kiyai inendet eng’ Jerusalem eng’ igorta: amu kigaba agichek igorta.
46Kinyo anyun inendet kogeny Kana ne bo Galili, ole kiyae beek koek divaik. Ak kimi kiboitiot age ne bo kaplaitoriat, ne kimiani werinnyi eng’ Kapernaum. 47Ye kingogas kole kagomong’ Jesu eng’ Judea konyo Galili, kwo ole mi inendet, ak kisom kochorgei, kosoob werinnyi; amu ki negit kome. 48Kolenji anyun Jesu inendet, Ngot ko mogeer kaborunoik ak kwong’utik, ko magoi oyan matiny. 49Kolenji kiboitiondonoto, Kiptaiyandani, choruge kotom kome lakwennyu. 50Kolenji Jesu inendet, Ui inye; sobei wering’ung’. Koyan anyun chichoto ng’olyot ne kamwachi Jesu, ak kwo. 51Ak ye kita kochortagei, kotuiyo ak otwogikyik, ak kolenji, Sobei wering’ung’. 52Koteebe anyun kole kogaigaitu ko tia. Kolenji anyun bichoto inendet, Kobagakta eset inendet amut sait tisab. 53Konai anyun kwanda kole ko sainato ne komwachin Jesu kolenjin, Sobei wering’ung’: ak kiiyan inendet, ak gonnyi komugul. 54Noto kaborunet ne bo aeng’ ne kiyai Jesu koboch ng’omong’ eng’ Judea konyo Galili.
Currently Selected:
JOHANA 4: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
