JOHANA 18
18
Kenamei Jesu
1Ye kingo kagomwa Jesu ng’alechu, koba ak alamalyennyi kolanda eng’ kererut ne kiguure Kedron, ole kimi mbaret, ole kiwa inendet, koboto alamalyennyi. 2Ak kiingen koronoto Judas agine, ne king’wektoi inendet: amu kicham kowendi Jesu yoto koboto alamalyennyi. 3Ak kingo kagonyor Judas lugetab askarik, ak kiptainik che bunu tisiik che eechen ak Parisaik, kobwa kotinyei taisiek ak kegenganik ak karik che bo luget. 4Kwo anyun Jesu, ko kagonai tuguk tugul che bwanjin inendet, ak kolenji, Ocheng’e ng’o? 5Kowolji kolenji, Jesu ne bo Nasaret. Kolenji Jesu, A inendet. Ak kitononi koboto ichek Judas agine, ne king’wektoi inendet.
6Ye kingomwachi anyun kole, A inendet, kobee batai, ak kobutyo. 7Kiteebe anyun ichek kogeny, kole, Ocheng’e ng’o? Ak kole, Jesu ne bo Nasaret. 8Kowol Jesu, kole, Kaamwawok ale a inendet; noto anyun ngocheng’a ounde chu koba; 9si kosulda ng’olyot ne kimwa kole, Ma betena agot agenge eng’ choto kiigona. 10King’us anyun Simon Petero rotwetab chok ne kitinyei, ak koeb otwogindetab tisiindet ne o, koeb itinnyi ne bo tai. Kigiguure otwogindonoto Malko. 11Kolenji Jesu anyun Petero, Weekyi rotwet choget: tos maee kikombet ne kagona Kwanda?
12Konam anyun luget ak kiptaiyat ne o, ak kiptainik che bo Yahudik, Jesu ak korat inendet, 13ak komutyi Anas korok; amu ki kabyugoit ne bo Kaiapa, ne ki tisiindet ne o kenyinoto. 14Kaiapa noto ne kiiborji Yahudik kole, nyolu komechi chito agenge bik.
Kotiitos Petero Jesu
15Kiisub anyun Simon Petero Jesu, ak age ne bo alamalyet. Ak kiingengei tisiindet ne o ak noto ne bo alamalyet, ak kiba got orit koboto Jesu agoi kapkiruogetab tisiindet ne o; 16ago kitononi Petero eng’ sang’ ye negit kurget. Kimanda anyun chichoto, age ne bo alamalyet, ne kiingengei ak tisiindet ne o, ak kong’alalji chepto ne kiribei kurget, ak kiimut Petero konyo go. 17Kolenji anyun chepto ne kiribei kurget Petero, Ma i age eng’ alamalyetab chichi? Kole, Ma ane.
18Ak kitonondos eng’ yoto otwogik ak kiptainik, che kiga kolaal mat ne bo nesek, amu ki kaitit; ak kiyue mat: ak kitononi Petero agine koboto ichek, koyue mat.
19Kiteebe anyun tisiindet ne o Jesu agobo alamalyennyi ak konetisiennyi. 20Kowolji Jesu kolenji, Kiang’alalji ng’ony, amauny ng’olyo; kianetisie kotugul eng’ sunagogisiek, ak eng’ hekalut, ole tuiyechin Yahudik tugul; amamwa kiy eng’ ung’ot. 21Amu nee si iteebena? Teebe ichek che kigas kit ne kiamwachi ichek: keero, ingen chu tuguk che kiamwa. 22Ak ye kingo kagomwa ko u nito, korabach Jesu age eng’ kiptainik che kitonondos eng’ yoto, kole, Iwoljini tisiindet ne o ko u noto? 23Kowolji Jesu kolenji, Ngot ko kaamwa ne ya, ibaorian agobo noto ya: ago ngot ko mie, ko amu nee si irabacha? 24Kiiyokto anyun Anas inendet ko ratat kwo oldab Kaiapa, tisiindet ne o.
25Ak kitononi Simon Petero koyue mat. Kolenji anyun ichek inendet, Ma i age aginye ne bo alamalyennyi? Kotiiyo kole, Ma a inendet. 26Kole otwogindet age ne bo tisiindet ne o ne ki tilionut ak chichoto kiebei Petero itinnyi, Koma ageerin eng’ mbar omi ak inendet. 27Kotiiyo anyun Petero kogeny; ak eng’ sainato kote kipsoiywet.
Komi Jesu taitab Pilato, bounindet ne bo Rom
28Kiimut Jesu anyun kong’eete gab Kaiapa kwo Praitorium: ak kita ko karon mising’; ak maba icheget Praitorium orit, si ma ng’wonegitu, ago si kobiit koam paska. 29Kimanda Pilato anyun kwo ole mi ichek, ak kole, Nee ng’olyo ne oruokyine chichi? 30Kowolji kolenji, Nda ko ma ko chalwogin chichi, ta ko ma kimutu inendet konyo taing’ung’. 31Kolenji Pilato ichek anyun, Onam inendet okwek, ak oruokyi ko u ng’atutieng’wong’. Kolenji anyun Yahudik, Ma chamdaat eng’ achek kebar chi age tugul: 32si kobiit kosulda ng’olyotab Jesu, ne kimwa, koboru meet ole meitoi inendet. 33Kiwa anyun kogeny Pilato Praitorium orit, ak koguur Jesu, kolenji, Tos i Laitoriatab Yahudik? 34Kowolji Jesu kolenji, Imwae ng’olyondoni inyege anan komwaun alak agobo ane? 35Kowol Pilato kole, A Yahudiot? Kagomutun tainnyu bororieng’ung’ ak tisiik che eechen: kiiyai nee? 36Kowol Jesu, kole, Ma bo ng’onyuni laitornatennyu: nda bo ng’onyuni laitornatennyu, ko kata yaei boriet kiboitinikyuk, si ma kindea eunekab Yahudik: ago nguno ko ma bo laitornatennyu oli. 37Kolenji anyun Pilato inendet, Ara, i laitoriat so? Kowol Jesu kole, Imwae ile a laitoriat. Kigisicha amu nito, ak kianyo ng’ony amu nito, si kobiit abaorianji imanit. Kasei kutinnyu chi age tugul ne bo imanit. 38Kolenji Pilato, Nee imanit?
Ak ye kingo kagomwa ko u ni, komanda kogeny ole mi Yahudik, ak kolenji, Ma anyorji ane lelut inendet. 39Ago otinye biteet, ole atiakwok age eng’ paska: ara omache atiakwok Laitoriatab Yahudik? 40Kobolyo anyun kogeny, kole, Ma chichi, ago Baraba. Ago anyun, ki rebindet Baraba.
Currently Selected:
JOHANA 18: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
