JOHANA 16
16
1Kaamwawok tuguchu, si ma kinachak. 2Onok eng’ sunagogisiek: ee, nyonei sait, ne ibwati chi tugul ne barok kole, Ayachini Jehovah boisiet. 3Ak yaei tuguchu, amu ma nai Kwanda, anan ane. 4Ago kaamwawok tuguchu, si ye nyo sainywa, omuchi obwat ole kiamwawok agobo chuto. Ago kima amwawok tuguchu eng’ taunet, amu kiami kobotok. 5Ago kawe nguno ole mi inendet ne kiiyokwa; ama mi age eng’ okwek ne teebena kole, Iwendi ano? 6Amu kaamwawok tuguchu, ko kanyi mugulelwekwok arogenet. 7Ago amwawok ne bo iman: mie eng’ okwek ngawe: amu ngo mawe, ko manyonjinok Kagaigaindet; ago ngot awe, ayokwok inendet. 8Ak ye kagonyo inendet, kogikyi ng’ony agobo tengekto, ak imanda, ak kiruoget: 9agobo tengekto, amu ma iyana; 10agobo imanda, amu awendi ole mi Kwanda, ama ogeero kogeny; 11agobo kiruoget, amu kigiruokyi ne o ne bo ng’onyuni.
12Ta atinye tuguk che chang’ che kata ta amwawok, ago ma omuchi omuite nguno. 13Ago ye tun kagonyo inendet, Tamirmiriet ne bo imanit, kondoiywok agoi oit imanda tugul: amu mamwaei inegei; ago mwaei tuguk tugul che kasei: ak kong’ang’wok tuguk che bwanei. 14Itorora: amu namei chechuk, ak kong’ang’wok. 15Chechuk tuguk tugul che tinyei Kwanda: noto kaamwa, ale, namei chechuk, ak koboruok.
Ng’alek che bo saisere
16Tomo kitigin, si ma ogeera kogeny; ak mi kitigin kogeny, si ogeero. 17Kong’alaljigei anyun alak eng’ alamalyennyi kole, Nee ni kamwawech kole, Mi kitigin, si ma ogeera; ak mi kitigin kogeny, si ogeera: ak, Amu awendi ole mi Kwanda? 18Kole anyun, Nee ni kamwa kole, Mi kitigin? Magingen kit ne mwaei. 19Kinai Jesu anyun kole, machei koteebe bichoto inendet, ak kilenji, Tos oteebege okwege agobo ng’olyondoni kaamwa ale, Mi kitigin, si ma ogeera, ak mi kitigin kogeny, si ogeera? 20Amwawok, iman, iman, ale, Orirtosi ak oteitosi, ago baibai ng’ony: oarogendosi, ago kiweechi arogeneng’wong’ koek boiboiyet. 21Arogeni tamonet ye machei kosigis, amu kait sainnyi: ago ye kagosich lakwet, ko ma kobwati ng’wanindo kogeny, eng’ boiboiyet amu kagesikyi chi ng’ony. 22Noto anyun otinye arogenet nguno: ago ta ageerok kogeny, ak boiboi mugulelwekwok, ama rebenok chi boiboiyeng’wong’. 23Ama oteebena kiy eng’ betunoto. Amwawok, iman, iman, ale, Ngot osom Kwanda kiy age tugul, kogonok eng’ kainennyu. 24Tom osom kiy eng’ kainennyu: osom, si onyoru, si kobiit kosulda boiboiyeng’wong’.
25Kaamwawok tuguchu eng’ kalewenaik: ago nyonei sait, ye ma ang’alalwok eng’ kalewenaik, ago aboruok komie agobo Kwanda. 26Osome betunoto eng’ kainennyu: amamwawok, ale ateebe Kwanda kiy agobo okwek; 27amu chamok inendet Kwanda, amu kiochama, ak kioyan ole kiabunu Kwanda. 28Kiabunu Kwanda, anyonji ng’ony: abagaktoi ng’ony kogeny, ak agetitege ole mi Kwanda.
29Kolenji alamalyennyi, Keero, ing’alali nguno komie kotook, ama imwae kalewenet. 30Kingen nguno kele ingen tuguk tugul, ama nyoljin chi koteebenen kiy: kiyani eng’ nito kele kiibunu Jehovah. 31Kowolji Jesu kolenji, Oyani nguno? 32Ogeero, nyonei sait, ee, kagonyo nguno, ye kiyestook, kwo chi tugul oldanyi, ak obagakta anege: ago mami anege, amu mi Kwanda kobota. 33Kaamwawok tuguchu, si kobiit onyorunena kalyet. Otinye nyalilda eng’ ng’ony: ago onyiganitu; amu kaaterter ng’ony.
Currently Selected:
JOHANA 16: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
