JOHANA 12
12
Koiili Maria kelyekab Jesu eng’ Betania
1Ak kingota komi betusiek lo si koit paska konyo Jesu Bertania, ole kimi Lasaro, ne kiing’eeti Jesu komong’ eng’ che kibek. 2Kichopchi ichek eng’ oloto inendet amitwogik che bo lagat: koboisiechi Marta; ago kimi Lasaro koboto ichek che kiamisiei ak inendet. 3Kiinem anyun Maria mwaita ne nyamdut ne bo ratilit agenge, ne bo kamanutiet ne o, ak koiile kelyekab Jesu, ak kouuse sumeekyik kelyekyik: ak kinyi got nyamdutiet ne bo mwaata. 4Ago kile Judas Iskariot, ne ki agenge ne bo alamalyennyi, ne kimachei kong’wekta inendet, 5Ko amu nee si ma kialdae mwai denarisiek bogol somok, si kigochi kibananok? 6Kimwa ni anyun, ma amu kirire kibananok; ago amu ki chorin, ak kitinyei lolet, ak kiibei tuguk che mi orit. 7Kole Jesu, Obagakte kogonorji betutab tubennyu. 8Amu mi kibananok kobotok kotugul; ago mami ane ak okwek kotugul.
9Kinai anyun bik che chang’ che bo Yahudik kole mi oloto: ak kibwa, ma agobo Jesu inegei, ago si kobiit kogeer Lasaro agine, ne kiga kong’eet inendet eng’ che kibek. 10Ago kiiruoch tisiik che eechen kole kobar Lasaro agine; 11amu kiitabangei che chang’ che bo Yahudik, koba koyan Jesu amu inendet.
Kowendi Jesu Jesrusalem kilosunoti
12Ak eng’ betut ne kiisubi noto, ye kingogas tuiyet ne o ne bo bik che kigabwa igorta, kole nyonei Jesu Jerusalem, 13konam temenik che bo sosik, ak koba kotorokta inendet, ak komwa eng’ kutit ne o kole, Hosanna: Iberurot inendet ne nyonei eng’ kainetab Kiptaiyat, noto Laitoriatab Israel.
14Ak ye kingo kagonyor Jesu moitab sigiriet, kolany; ko u ye kigisir kele, 15Ameiywei, inye, ee, cheptab Sion: keero, nyonei Laitoriandeng’ung’, kobunu moitab sigiriet. 16Kima iguiyo alamalyennyi eng’ tai tuguchuto: ago kingo kagitoror Jesu, kobwat anyun ichek kole kigisir tuguchuto agobo inendet, ak kiga keyachi inendet tuguchuto.
17Kibaorian anyun tuiyet ne kimi koboto inendet ye kiguurei Lasaro komong’ eng’ kererit, ak kiing’eet inendet eng’ che kibek. 18Kiba anyun tuiyet amu noto kotorokta inendet, amu kigas kole kiga koyai kaborunoni. 19Kimwachigei anyun Parisaik ichegei kole, Ogeero, ma oterter eng’ kiy: ogeero, kagosub inendet bik tugul che bo ng’ony.
Sometab Yunanik
20Ak kimi Yunanik alage eng’ che kigaba kotogosta kosa eng’ igorta. 21Kibwa choto anyun ole mi Pilipu, ne bo Betsaida ne bo Galili, ak koteebe inendet kole, Kiptaiyandani, kimache kegeer Jesu. 22Kinyo Pilipu komwachi Andrea: ak kibwa Andrea ak Pilipu komwachi Jesu. 23Ak kiwolji Jesu kolenji, Kait sait, ne kitorore Weritab chi. 24Amwawok, iman, iman, ale, Ngo mame baiywat ne ibutyin ng’ung’unyek, kotebyei inegei; ago ngo me, koiyiei che chang’. 25Inendet ne chamei sobondanyi kobeeti; ak inendet ne wechei sobondanyi eng’ ng’onyuni korib kot koit sobondab koigeny. 26Ngo boisiewa chi age tugul, ko nyolu kosubota; ak si ole ami, komi oloto agine kiboitiondennyu: ngo boisiewa chi, koteechei inendet Kwanda.
27Nyalili nguno sobondanyu; amwae nee anyun? Baba we, sorua eng’ saini? Ago kianyonji saini amu ng’olyondito. 28Baba, itoror kaineng’ung’. Kimong’ anyun kutit eng’ kipsengwet, kole, Kiatoror ak ta atorori kogeny.
29Kimwa anyun tuiyet ne kitononi eng’ oloto kogasei, kole, Katul: kole alak, Kang’alalji malaikaiyat. 30Kowolji Jesu kolenji, Kama nyo kutini agobo ane, ago agobo okwek. 31Kabiit nguno kiruogetab ng’onyuni: ak kagitoorta anyun nguno ne o ne bo ng’ony komanda. 32Ak ye kiuita eng’ ng’ony, amutyige bik tugul. 33Ago kimwa ni, kobortoi meet ole meitoi.
34Kiwolji anyun tuiyet inendet, kolenji, Kigegas eng’ Ng’atutik kele tebyei Kristo koigeny: teptoi ano anyun si imwa ile, Kanyol keuito Weritab chi? Ng’o Weroto bo chi? 35Kolenji Jesu anyun, Ta komi lapkeiyet eng’ kwenung’wong’ eng’ betusiek che matia. Obendoti ye ta otinye lapkeiyet, si ma namak mesundeito: ak inendet ne wendoti eng’ mesundeito ko manaei ole wendi. 36Ye ta otinye lapkeiyet, oyan lapkeiyet, si kobiit oegu werikab lapkeiyet.
Maiyani bik alak eng’ Judea, koyani alak eng’ ung’ot
Kimwa Jesu tuguchu, ak kwo koung’egei ichek.
37Ago nga kiga koyai kaborunoik che chang’ che te cho eng’ tainywa, ko ma iyan inendet: 38si kobiit kosulda ng’olyotab maotiot Isaia, ne kimwa, kole,
Kiptaiyandani, kiiyan ng’o ng’alekyok?
Ak kigeng’ang’ji ng’o eutab Kiptaiyat?
39Ma imuch anyun koyan amu ng’olyondonito, amu kimwa Isaia kogeny, kole,
40Kigotuch inendet konyekwak, ak kigogochi inendet mugulelwekwak kouuegitu;
Si ma keere konyekwak, anan konai eng’ mugulelwekwak,
Ak koweek,
Ak asoob ichek.
41Kimwa tuguchu Isaia, amu kigeer torornatennyi; ak king’alal agobo inendet. 42Ago kiiyan inendet che chang’ agot eng’ bounik; ago ma ng’any inendet amu Parisaik, si ma kion ichek eng’ sunagogit: 43amu kichamei kalosunetab bik kosiir kalosunetab Jehovah.
Koboru eng’ nwagindo konetisiennyi tugul
44Ak kimwa Jesu eng’ kutit ne o, kole, Inendet ne iyana, ko maiyana ane, ago iyani inendet ne kiiyokwa. 45Ak inendet ne keera kogeerei inendet ne kiiyokwa. 46Kianyo aegu lapkeiyet eng’ ng’ony, si ma kotebyei eng’ mesundeito chi age tugul ne iyana. 47Ak ngo kas chi age tugul ng’alekyuk, ama rib, ko maruokyini inendet: amu kima anyo aruokyi ng’ony, ago kianyo asoru ng’ony. 48Inendet ne esioa, ama taachei ng’alekyuk, kotinyei ne iruokyin: ng’olyot ne kiamwa, noto ne iruokyin inendet eng’ betutab let. 49Amu kima amwae anege; ago kigona Kwanda ne kiiyokwa, ng’atutiet, ne kanyol amwa, ak ne kanyol aamda. 50Ak angen ale sobondab koigeny ng’atutiennyi: tuguk che amwae anyun, ko ko u ye kimwawa Kwanda, amwae ko u noto.
Currently Selected:
JOHANA 12: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
