TAUNET 8
8
Maranet
1Kiibwat anyun Kamuktaindet Noa, ak kiy age tugul ne sobei, ak tuga tugul che kimi koboto inendet eng’ melit: ak kiiyokyi Kamuktaindet usonet kousyi ng’ony, ak kiweeigei beek mutyo; 2ak kigerogis kong’ik che kutune beek che bo riret, ak keger tirisiokab kipsengwet, ak kegirinda ropta ne bunu kipsengwet komugul, si mata korobon; 3ak kiweeigei beek eng’ ng’ony eng’ betusiechoto tugul: ak kingobata betusiek bogolu ak konom kong’ering’itu beek. 4Ak kitebe melit tulonokab Ararat eng’ arawetab tisab, betutab taman ak tisab. 5Kiweeigei beek mutyo kong’ering’itu kotugul kot koit arawetab taman, ak eng’ arawetab taman eng’ betut ne bo tai ne bo arawanato, kotook walisiekab tulonok.
6Ak ye kingobata betusiek artamu, koyat Noa tirisietab melit ne kiga yai. 7Kiimaanda chepkugit, kotirirenot kot kotenyo beek eng’ ng’ony. 8Kiimaanda anyun cheptuget, si kobiit kogeer ngo kagong’ering’itu beek eng’ emet komugul; 9ago kimanyor cheptuget ole namei, ak koweekyigei Noa eng’ melit, amu kita komi beek ng’ony komugul: ak koyogoito eunnyi, konam koib konyo ole mi eng’ melit. 10Ak kita kotebi betusiek alak tisab; yeityo komanda cheptugonoto eng’ melit kogeny. 11Ak koweekyigei inendet cheptugonoto koskoleny; ogeero, kiibune kutinnyi sogot ne tuon ne bo emdit ne kisus: kinai Noa eng’ noto anyun kole, teng’oti beek. 12Kita kotebi betusiek alak tisab; yeityo komaanda cheptugonoto; ak mata koweekyigei inendet kogeny.
13Kitenyo beek anyun eng’ ng’ony eng’ kenyitab bogol lo ak agenge eng’ arawet ne bo tai, betut ne bo tai ne bo arawanato; ak kiisto Noa tuguk che kiga kisiebe melit, ak kogeerot, ogeero, kagosai emet. 14Kiyaam anyun ng’ony arawet ne bo aeng’ eng’ betut ne bo tiptem ak tisab ne bo arawanato. 15King’alalji anyun Kamuktaindet Noa, kolenji, 16Mande eng’ melit, inye ak osotiondeng’ung’, ak weriguk, ak osotikab weriguk. 17Yatu komong’ kiy age tugul ne sobei ne mi koboten ne tinyei borto, taritik, ak tuga, ak kiy age tugul ne ichuutegei ng’ony; si kobiit koiiyo kochang’ait eng’ ng’ony, ak kotesogis eng’ ng’ony. 18Kimanda anyun Noa, ak werikyik, ak osotiondennyi, ak osotikab werikyik: 19kimanda anyun eng’ melit tiony age tugul, ak kiy age tugul ne ichuutegei, ak tarit age tugul, ak tugul che bendote ng’ony; ko u ortinwekwak.
20Kiteekyi Noa Jehovah kaptisisiet, kinam anyun eng’ tiony age tugul ne mie ak eng’ tarit age tugul ne mie, ak kogoito kagochinoik che kibeelei eng’ kaptisisiet. 21Ak king’uuchi Jehovah anyinyindo ne bo nyamdutik; ak kole Jehovah eng’ muguleldanyi, Ma achube ng’ony kogeny agobo chi, amu yaachen kabwatutikab muguleldab chi koboch koming’in; ak ma abare kogeny agoi, tuguk tugul che soptos, ko u ye kiayai. 22Kota komi ng’ony ko mabegu kolset ak kesisiet, kaititiet ak kiptoret, kemeut ak iwot, bet ak kemoi.
Currently Selected:
TAUNET 8: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
