BOISIONIKAB CHE KIYOKTOI 8
8
Usisietab Kristianik kot loiye
1Ak kichamei Saul agine meennyi. Ak king’eet betunoto usisiet ne o agobo kaniset ne kimi Jerusalem; ak kiyesta ichek tugul koyom emotinwekab Judea ak Samaria, kobate che kiyoktoi. 2Kotub anyun Stepano bik che kigonyiti Jehovah, ak koteiyo mising’ agobo inendet.
3Ago kiinyalil mising’ Saul kaniset, ak kowendi got age tugul, kochuutu murenik ak kobogorisiek ak kotoorjin korgoret.
Pilipu eng’ Samaria
4Kiba anyun ichek che kiga koyesta, koamdaat ng’olyot. 5Ak kichortagei Pilipu nganaset ne bo Samaria, ak koamji ichek Kristo. 6Ak kiepchi it tuiyosiek eng’ yamdaet agenge ng’alek che kimwaei Pilipu, ye kingogas ak kogeer kaborunoik che kiyai. 7Amu kimanda tamirmirik che muruonen, eng’ che chang’ che kitinyei, kowaaktos eng’ kutit ne o: ak kigisoob che chang’ che meiyotin borwek, ak che kiing’waldos. 8Ak kibiit boiboiyet ne o eng’ nganasanato.
Simon ne ng’orsei
9Ak kimi chito age ne kigiguure Simon, ne kicham kong’orsei eng’ betusiek alak eng’ nganasanato, ak kiigochi bororietab Samaria kokwong’io, komwaei inendet kole, a chito ne o: 10kiepchin it tugul inendet, koboch ne ming’in agoi ne o, kolen, Kimnatetab Jehovah chichi, ne kiguure Ne O. 11Ak kiepchin it inendet, amu kicham kogochin kokwong’io eng’ betusiek che chang’ eng’ ng’orsosiekyik. 12Ago ye kingoyan ng’alekab Pilipu ye kiamdoi logoiywek che miach agobo bounatetab Jehovah ak kainetab Jesu Kristo, kibatisan anyun murenik koboto kobogorisiek. 13Ak kiiyan Simon agine: ak kingo kagibatisan kotebi koboto Pilipu: ak kingogeer koyaogis kaborunoik ak boisionikab kimnatet kokwong’.
Petero ak Johana eng’ Samaria
14Kingogas anyun che kiyoktoi che kimi Jerusalem kole, kogotaach Samaria ng’olyotab Jehovah, koyokyi Petero ak Johana: 15ak ye kingo kagochorgei ichek, kosa agobo ichek, kole, si kotaach Tamirmiriet ne Tilil: 16amu kitom kochorjigei agot agenge eng’ bichoto: kiga kibatisan ichek eng’ kainetab Kiptaiyat Jesu kityo. 17Yeityo kogonoor ichek eunekwak, ak kitaach Tamirmiriet ne Tilil. 18Ye kingogeer anyun Simon kole kaga ngo konoor alamalyet chi eunekwak, kigochi Tamirmiriet ne Tilil, kogochi ichek siling’isiek, 19kole, Ogona agane kimnatoni, si ngagonoor chi age tugul eunekyuk, kotaach Tamirmiriet ne Tilil.
20Ago kilenji Petero inendet, Ingobetyo siling’isieguk koboten, amu kelen inyoru konunetab Jehovah eng’ siling’isiek. 21Metinye kebeberta anan motwet eng’ ng’olyondoni: amu ma mie muguleldang’ung’ eng’ taitab Jehovah. 22Sigu anyun eng’ tengeging’ung’et, ak isa Kiptaiyat, tamangab kenyoun kaat amu kabwatetab muguleldang’ung’. 23Amu ageere ale imi eng’ ng’wanindo ak eng’ ratutietab tengekto. 24Ak kiwol Simon kole, Osaiywa Kiptaiyat, si mabwanja agot agenge tuguk che kaomwawa.
25Ye kingo kagobaorian anyun ak komwa ng’olyotab Kiptaiyat, koweektagei Jerusalem, ak koamji logoiywek che miach nganasok che chang’ che bo Samarik.
Pilipu koboto chitab Etiopia ne kigimoch
26Ago kimwachi Pilipu malaikaiyatab Kiptaiyat, kolenji, Ng’eet ak iwe murot ne bo tai agoi oret ne chortogei ne wendi Gasa kong’eete Jerusalem: ne surkwen. 27Ak king’eet anyun kwo: ak keero, chitab Etiopia, ne kigimoch, ne kitinyei bounatet ne o eng’ eutab Kandake, laitoriat kwondo ne bo Etiopik, ne kiribei tugukyik tugul che bo kamanutiet ne o, ne kiga nyo Jerusalem kosa; 28kiweeksei anyun, kotebe karinnyi, ak kosomani bukuitab maotiot Isaia. 29Ak kilenji Tamirmiriet Pilipu anyun, Ui rikte, onamge ak karina. 30Ak kilabat Pilipu ak kogas inendet kosomani bukuitab maotiot Isaia, ak kilenji, Iguitosi kit ne isomani? 31Ak kile, Amuktoi ano, ngo maiborua chi? Ak kiigaigai Pilipu kole, kolany karit ak kotebi tuwai. 32Ak chu sirutik che kisomanoti,
Kigimut ko u kechiriet ne kikweriei kwo eng’set;
Ak ko u aruetab kechiriet ne sisei eng’ taitab chito ne tilei kororikyik,
U noto agine mang’any kutinnyi:
33Kigiisto kiruogennyi eng’ kaming’inennyi bo ge:
Ng’o ne tun mwaitoi ibindanyi?
Amu kinemu sobondanyi eng’ ng’ony.
34Ak kiwolji chichoto kigimoch, Pilipu, kolenji, Asomin ale, mwaei maotiot ng’olyondoni agobo ng’o? Agobo inendet, anan agobo chito age? 35Kong’any anyun Pilipu kutinnyi, ak kotoi eng’ sirutioni koamji inendet agobo Jesu. 36Ak ye kingota kobendi eng’ oret, koit ye mi beek; kole chichoto, Keer beek-o; nee ne kera si ma kibatisana? 37Ak kile Pilipu, Ngiyan eng’ muguleldang’ung’ tugul, kimuchi kibatisanin. Ak kiwol kole, Ayani ale Jesu Kristo ko Weritab Jehovah. 38Kong’at anyun kotonon karit: ak kichortagei tuwai koba beek, Pilipu ak chichoto; ak kiibatisan inendet. 39Ak ye kingolong’ eng’ beek, komut Tamirmirietab Kiptaiyat Pilipu; ak mata kogeer anyun chichoto kigimoch Pilipu, amu kiwa chichoto eng’ boiboindo. 40Ak kitook Pilipu eng’ Asoto: ak kosiirto, koamjinoti logoiywek che miach nganasok tugul, agoi koit Kaisaria.
Currently Selected:
BOISIONIKAB CHE KIYOKTOI 8: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
