BOISIONIKAB CHE KIYOKTOI 6
6
Keleweni kandoik tisab
1Eng’ betusiechoto anyun, ye ki tesoksei koitetab alamalyet, kong’eet kang’unyng’ung’et eng’ Yahudik che ki kutinywa ko Yunanik, kong’unyng’ung’ji Hebranik, amu kiginyasta mosogikwak eng’ tuguk che kicham kigochin kotugul. 2Koguur anyun tamanu ak aeng’ tuiyet ne bo alamalyet, ak kolenji, Ma mie kebagakte ng’olyotab Jehovah ak keboisie eng’ mesosiek. 3Ocheng’ anyun che kitupche bik tisab eng’ okwek che toogunotin kele miachen, che nyiitotin Tamirmiriet ak ng’omnatet, che kimuchi kinde boisioni. 4Ago si kigiiljige achek saet, ak konetisietab ng’olyot.
5Kicham anyun tuiyet komugul ng’olyondonoto: ak kilewen Stepano, chito ne nyiitat kayanet ak Tamirmiriet ne Tilil, ak Pilipu, ak Prokoro, ak Nikanor, ak Timon, ak Parmena, ak Nikola ne bo Antiokia ne kiwalak koek Yahudiot: 6kiinde choto anyun taitab che kiyoktoi: ak ye kingo kagosa, kogonoor ichek eunekwak.
7Kitesak anyun ng’olyotab Jehovah; ak kotesak mising’ koitetab alamalyet eng’ Jerusalem; ak kogas it kayanet tuiyet ne o ne bo tisiik.
Kitaami Stepano
8Ak kinyiitat Stepano mieindo ak kamuget, koyai anyun kwong’utik che eechen ak kaborunoik eng’ kwenutab bik. 9Ago king’eetyo alak che bo sunagogit ne kiguure ne bo Che Itiagotin, ak ne bo Kurenik, ak ne bo Aleksandrianik, ak ne bo bikab Kilikia ak Asia, ak kobelgei ak Stepano. 10Ak kima imuch ichek kogirinda ng’omnatet ak Tamirmiriet ne king’alale inendet. 11Kogaigai anyun bik komwa kole, Kigegas komwaei inendet ng’alek che bo chubisiet agobo Musa, ak Jehovah. 12Kong’eetng’eet anyun bik konerekso ak boisiek, ak sirik, kobwanji inendet, ak konam ak komut kwo kapkiruok, 13ak konde baorinik che bo lembech, che kimwa kole, Mabagaktoi chichi komwa ng’alek che yaach agobo yu tilil, ak Ng’atutiet: 14amu kigegas inendet komwaei kolen, tatun kong’emei yuto Jesu nito bo Nasaret, ak kowal bitonwek che kigonech Musa. 15Kiichiilji kong’ anyun inendet bik tugul che kitebyei eng’ kapkiruok, kogeer togennyi ko u togetab malaikaiyat.
Currently Selected:
BOISIONIKAB CHE KIYOKTOI 6: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
