BOISIONIKAB CHE KIYOKTOI 18
18
Komi Korinto
1Kingobata tuguchu kwo Paulo eng’ Atene, ak koit Korinto. 2Ak kinyor Yahudiot age ne kiguure Akula, chito ne bo Ponto, ne kita kobunu Italia, koboto osotiondennyi Prisila, amu kiga ng’at Klaudio kole koba Yahudik tugul eng’ Rom: ak kinyo ole mi ichek; 3amu ki kergei boisiennyi ak nenywa, kotebi anyun koboto ichek, ak kobois tugul; amu ki nabik che bo emaisiek icheget. 4Ak king’alali eng’ sunagogit sabato age tugul, ak kochuutu Yahudik ak Yunanik.
5Ago ye kingochorgei Sila ak Timoteo kobunu Makedonia, konyonji Paulo kachirjiret ne bo ng’olyot, kobaorianjin Yahudik kole Jesu ko Kristo. 6Ak ye kingogirindagei ak inendet, ak komwa ng’alek kochubis, koleglekta ngoriennyi, ak kolenji, Ingotebi korotikwok eng’ metowekwok; a tilil ane: koboch nguno ko kawe oldab Bororiosiek. 7Ak kiwa eng’ oloto, ak kwo gotab chito age ne kiguure Tito Justo, chito ne kiilosu Jehovah, ne kinamegei gonnyi ak sunagogit. 8Ak kiiyan Krispo Kiptaiyat, ne ki bounindetab sunagogit, koboto gonnyi tugul; ak kingogas che chang’ che bo Korintoek, koyan, ak kigibatisan.
9Ak kilenji Kiptaiyat Paulo kemoi eng’ ng’ang’utiet, Ameiywei, ago ng’alal inye, amat isis: 10amu ami koboten, ama mi chi ne twain koyaun ne ya: amu atinye bik che chang’ eng’ nganasani. 11Ak kimeny oloto kenyit agenge ak arawek lo, koneti ng’olyotab Jehovah eng’ kwenunywa.
12Ago ye kingo kiruogindetab Akayo Galio, kong’eetyi Yahudik Paulo eng’ maget agenge, ak komut inendet kwo taitab ng’echeretab kiruoget, 13kole, Ichuuti chichi bik kole kolos Jehovah eng’ oret ne etei Ng’atutiet. 14Ago ye kimachei Paulo kotwek, kolenji Galio Yahudik, Okwek Yahudichu, nda bo yaitio ng’alechu iman, anan ko bo chalwok ne ya, ta nyolu agaswok: 15ago ngo teebutik agobo ng’alek ak kainaik ak ng’atutieng’wong’ okweget, oyai okwege; mamache aek kiruogindetab ng’alechuto. 16Ak kion ichek koba eng’ oldab ng’echeretab kiruoget. 17Ak kinam tugul Sostene, bounindetab sunagogit, ak kobir inendet eng’ taitab ng’echeranato bo kiruoget. Ak kima mage kiy Galio ng’alechato tugul.
Koweekyingei Paulo Suria
18Ak kingobata ni, ak ko kagotebi Paulo betusiek che chang’, kobagakta inendet tupchosiek kobun melit kwo Suria, koboto Prisila ak Akula; ye kiga kocher metit eng’ Kenkrea: amu kiga koarorta kiy eng’ kayosiet. 19Ak kiit Epeso ak kobagakta ichek eng’ oloto: ago kiwa inendet sunagogit, ak kong’alal ak Yahudik. 20Ak kingomwachi kole, kota kotebi ak ichek, koma kocham; 21ago kingobagaktoi ichek, komwa kole, Aweekyinoge kogeny ngo cham Jehovah, ak kibun melit kwo Epeso.
22Ak ye kingo kagolanda Kaisaria, kotogosta kwo kogat kaniset, ak kochortagei kwo Antiokia. 23Ak kingo kagotebi eng’ oloto betusiek alak, kwo kobunot koret ne bo Galatia ak ne bo Prugia, ko u ye rubegei, kogimitoti alamalaik tugul.
Komi Apolo Epeso
24Ak kinyo Epeso Yahudiot age, ne keguure Apolo, ne bo Aleksandria, chito ne ng’om; ak ki kim eng’ sirutik. 25Kiga kinet chichito oretab Kiptaiyat; ak amu kitinyei kagiiletab ge eng’ tamirmiriennyi, kong’alal ak konet komie ng’alek agobo Jesu, kongen kabatisanetab Johana kityo: 26ak kitoi kong’alal eng’ nyiganatet eng’ sunagogit. Ago ye kingogas Prisila ak Akula, komut inendet kwo oldanywa, ak koborji inendet oretab Jehovah komie kosiir. 27Ak ye kimachei kolanda kwo Akaya, kogimit tupchosiek inendet, ak kosirji alamalyet kole kotaach inendet: ak ye kingo kagoit, kotoret inendet, ichek mising’ che kiga koyan eng’ mieindo: 28amu kiiguiyechi Yahudik komie eng’ kimnatet, eng’ taitab bik, koborjin eng’ sirutik kole Jesu ko Kristo.
Currently Selected:
BOISIONIKAB CHE KIYOKTOI 18: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
