KORINTOEK 2 8
8
Tuguk che kiyumjin kibananok che mi Jerusalem
1Kiboruok anyun, che kitupche, mieindab Jehovah ne kigigochi kanisosiekab Makedonia; 2ale ye kingetiem ichek eng’ nyalilda ne o, ko kitesak boiboindanywa ne siirtoot ak banandanywa ne o kot kotesyi ichek magornatetab aiyebindanywa. 3Amu abaoriani ale kiigoito eng’ chamnyenywa ko u kamugenywa, ak ne siirei kamugenywa, 4kosomech eng’ kagaigaet ne o agobo mieini ak yamdaet eng’ boisiet ne kiboisiechin che tililen: 5ak ma ko u ye kigimang’u, ago kisib kogochigei icheget Kiptaiyat, ak kigoneigei eng’ magetab Jehovah; 6agoi kigiil Tito, kele ko u ye kisib kotoi, komachei kosulda eng’ okwek mieinito agine. 7Ago ko u ye otinye aiyebindo eng’ kiy age tugul, eng’ kayanet, ak twegunet, ak naet, ak eng’ kagiiletab ge tugul, ak eng’ chamnyeng’wong’ ne oting’enech, ingonyiiak anyun mieinito agine.
8Mang’alali eng’ ng’atutiet, ago atieme eng’ kagiiletab ge ne bo alak, ngo bo iman chamnyeng’wong’.
Kaborunetab Jesu
9Amu ongen mieindab Kiptaiyandennyo Jesu Kristo ole, agot nganda ki magorio, ko kiek kibanania agobo okwek, si kobiit oegu magorek eng’ banandanyi. 10Ak eng’ nito aboruok kabwatutikyuk: amu nyolu nito eng’ okwek, che kigosib otau eng’ kenyit agenge ne kogosiirto, ma kityo oyai, ago ochame agine. 11Ago ogesu anyun nguno boisiet; amu ko u ye kio chobotin ochame oyai ko u noto, komitei ko u noto kasuldaet ne bo kamugeng’wong’. 12Amu ngo chobot kabwatetab chi, ko taachaksei ko u ye tinyei chi, ma ko u ye matinyei. 13Amu ma ale si kinyamnyumji alak, kinyalilak okwek; 14ago koaechin; toreti nguno anyun chang’indang’wong’ terterindanywa, si kotoret chang’indanywa terterindang’wong’; si kobiit kogergeit: 15ko u ye kigisir kele, Inendet ne kiiyum che chang’ ko masiirto kiy; ak inendet ne kiiyum che ng’ering’ ko mararji kiy.
Ng’alek che kigiyoktoe Tito ak bik alak
16Ago kongoi eng’ Jehovah, ne indoi muguleldab Tito ko u noto kagiiletab ge agobo okwek. 17Amu kitaach iman kagiilennyo, ago amu igiilegei kot, kogonyo anyun ole omi eng’ chamnyennyi. 18Ak kogiyokte tupchet age koboto inendet ne toogunot kalosunennyi agobo logoiywek che miach eng’ kanisosiek tugul; 19ak ma noto kityo, ago kilewen kanisosiek inendet kebendate tugul agobo mieini, ne kiyae achek keyachini torornatetab Kiptaiyat, ak kiboru chobennyo bo ge ne kitinye:
20keistoege ng’olyondonito kele, si kobiit mamwaitaenech chi age tugul kiy ne ya agobo aiyebini kiyaati: 21amu kibwati tuguk che bo teegisto, ma eng’ taitab Kiptaiyat kityo, ago eng’ taitab bik agichek.
22Ak kogiyokte koboto ichek tupchennyo, ne kogegeer konyil che chang’ kele igiilegei eng’ tuguk che chang’, ago nguno kogiilegei mising’ kosiir, amu kamang’unet ne ting’enok mising’. 23Ngo teebenak chi agobo Tito, inendet ko kiboitiot ne kimi tuwai, ak kiboisiei tuwai agobo okwek; anan agobo tupchosiekyok, icheget ko che kiyoktoi che bo kanisosiek, choto ko torornatetab Kristo. 24Noto anyun oborji icheget eng’ taitab kanisosiek kit ne iboru chamnyeng’wong’, ak kalosunennyo bo ge agobo okwek.
Currently Selected:
KORINTOEK 2 8: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
