KORINTOEK 2 6
6
1Kisome achek che keboisiei ak Jehovah kele amotaach mieindab Jehovah buch 2(amu mwaei kele, Kiagasin eng’ betut ne bo chamjinet,
Ak kiatoretin eng’ betut ne bo sorunet:
Ogeero, nguno ko betut ne bo chamjinet; ogeero, nguno ko betut ne bo yetunet):
3ama kiyai kiy age tugul ne bo kanagut, si ma kimwaitae boisiennyo yaitio; 4ago eng’ tuguk tugul kibortoige, ko u kiboitinikab Jehovah, eng’ muitaet ne o, eng’ bichiinwek, eng’ kagiigosiek, eng’ tiritinwek, 5eng’ birutik, eng’ ratisiosiek, eng’ bolatosiek, eng’ boisionik che uuen, eng’ ripsosiek, eng’ rugutosiek; 6eng’ tililindo, eng’ naet, eng’ mutyonet, eng’ talasiet, eng’ Tamirmiriet ne Tilil, eng’ chamnyet ne matinyei kenisiet, 7eng’ ng’olyotab imanit, eng’ kamuktaetab Jehovah; eng’ karikab imanda eng’ eutab tai ak eng’ eutab katam, 8eng’ torornatet ak tewernatet, eng’ ng’alek che yaach che kimwaitaenech, ak eng’ ng’alek che miachen; ko u kaberberik, ago ki bo iman; 9ko u che ma naotin, ago kingenech komie; ko u che machei kobek, ak ogeero, kisoptosi; ko u che kitigoni, ago magibarech; 10ko u che arogendos, ago che boiboi kotugul; ko u che bonondos, ago imogornoni che chang’; ko u che matinyei kiy, ago tinyei tuguk tugul.
Kimakyin che kigowalogis chamnyet
11Kagiyatwok kutuswekyok, ee Korintoechu, kabaraitu mugulelwekyok. 12Ma ogiigotin eng’ achek, ago ogiigotin eng’ chamnyeng’wong’. 13Ak eng’ kageeret ne te ne kigigonok (ang’alali ko u ye ang’alaljini lagokyuk), ingobartaitu mugulelwekwok.
Kiteechin che iyanotin si manamgei ak che maiyanotin
14Amot oratge ak che ma iyanotin: tinyei imanda yamdao nee ak tengekto? Anan tinyei yamdao nee lapkeiyet ak mesundeito? 15Anan kasyindos eng’ nee Kristo ak Belial? Anan ting’egei nee ne iyanat ak ne ma iyanat? 16Ak ting’egei nee hekalut ne bo Jehovah ak kanamonik? Amu ki hekalut ne bo Jehovah ne sobei; ago ko u ye kimwa Jehovah kole,
Amenye ichek, ak awendote ichek;
Ak aegu Jehovah nenywa,
Ak koek ichek bikyuk.
17Noto anyun omong’u eng’ kwenunywa,
Ak otabange, mwaei Kiptaiyat,
Amotwa kiy ne bo simdo;
Si ataachak,
18Ak aegu Kwanda eng’ okwek,
Ak oegu werik ak tibik eng’ ane,
Mwaei Kiptaiyat ne bo Kamuktaet.
Currently Selected:
KORINTOEK 2 6: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
