KORINTOEK 1 7
7
Ng’alek che iimi bich agobo katunisiet, agobo che tom kotunis, ak agobo betetab lol
1Nguno anyun agobo tuguk che kiosirwa: ko mie eng’ muren ama twa kobogorio. 2Ago, amu ng’olyotab soksosiek, ko ingotebi chi age tugul ak osotiondennyi, ak ingotebi osotiot age tugul ak manong’otiondennyi. 3Ingogochi manong’otiot osotiondennyi ko u ye nyoljin: ak ko u noto agine osotiot eng’ manong’otiot. 4Matinyei osotiot inegei kamugo eng’ bortanyi, ago manong’otiot: ak ko u noto agine manong’otiot, matinyei kamugo eng’ bortanyi, ago osotiot. 5Amoetege okwege, kobate ye kochamnyechi eng’ betusiek alak, si onyoru boroindo ne bo saet, si otuiyege kogeny, si mayomak Setani amu motinye ribetab ge.
6Ago amwae ni amu chamjinet, ma ng’atutiet. 7Ago kata achame koigei bik tugul ane. Ago tinyei chi age tugul konunennyi ne bunu Jehovah, age ko u ni, ak age ko u no.
8Ago amwachini che tom kotunis ak mosogik, alenjini, Mie eng’ ichek ngo tebi ko u ane. 9Ago ngo matinyei ribetab ge, ko ingotunis ichek: amu kaigai kotunis kosiir maget ne lalei.
10Ago ang’ate che kigotungei ago ma ane, ago Kiptaiyat, ale, Amat kobagakta osotiot manong’otiondennyi 11(ago ngot kometo, komat kitun, anan kogasyin ak manong’otiondennyi); ak amat kometo manong’otiot osotiondennyi.
12Ago amwachini bik alak, ago ma Kiptaiyat, ale, ngo tinyei ne ketupche age tugul osotiot ne maiyanat, ak kochamei kotebi ak inendet, komat kometo. 13Ak kobogoriot ne tinyei manong’otiot ne maiyanat, ak kochamei kotebi ak inendet, ko mat kometo manong’otiondennyi. 14Amu kitilili manong’otiot ne maiyanat eng’ osotiot, ak kitilili osotiot ne maiyanat eng’ manong’otiot: nda ma u noto ta ma tililen lagokwok; ago tililen ichek nguno. 15Ago ngwo ne maiyanat, ko ingwo: ma ratat ne ketupche mureno anan kwony eng’ ng’alek che u chu: ago kiguurech Jehovah eng’ kalyet. 16Amu inaitoi ano inye, ee, osotiondoni, ngo tos mesuru manong’otiondeng’ung’? Anan inaitoi ano inye, ee manong’otiondoni, ngo tos mesoru osotiondeng’ung’?
17Ago, ko u ye kigopchechi Kiptaiyat chi age tugul, ko u ye kigoguur Jehovah age tugul, ingotebi ko u noto. Ak ang’ate anyun ko u noto eng’ kanisosiek tugul. 18Tos kigiguur chi age tugul ko kagimuratan? Ko mat koigei ne tom kimuratan. Tos kigiguur chi age tugul kotom kimuratan? Ko mat ko ta kimuratan. 19Ma kiy kamuratanet, ak ngo ma kimuratan ko ma kiy; ago kerib ng’atutikab Jehovah. 20Ingoteb chi age tugul ko u ole kiteptoi ye kingeguurei. 21Tos kigiguurin ko i otwogin? Ko mat iimge: ago ngimuchi itiagage, ko mie iboisie. 22Amu inendet ne kigiguur eng’ Kiptaiyat, ko otwogin, ko chito ne itiagat ne bo Kiptaiyat: ko u noto, inendet ne kigiguur kotiagat, ko otwogetab Kristo. 23Kigialak eng’ kamanutiet; amat oegu otwogikab bik. 24Tupchosiechu, ingoteb chi age tugul ak Jehovah ko u ole kiteptoi ye kingeguurei.
25Matinye anyun ng’atut eng’ Kiptaiyat agobo bergeinik: ago amwae ko u ole ageertoi, ko u chi ne kigonyor rirenetab Kiptaiyat aek ne kiyani. 26Abwati anyun ale mie nito, amu bichiindo ne mitei nguno, ale mie koteb chi ko u ole teptoi nguno. 27Tos, kigeratyin osotiot? Mecheng’ kitiachin. Tos, itiagat eng’ osotiot? Mecheng’ anyun osotiot. 28Ago, ngot itunisie, ko ma iyai tengek; ak ngitun bergeiyat, ko ma yai inendet tengek. Ago nyoru che u choto nyalilda eng’ borwek: ak amache ale si moiimge.
29Ago amwae ni, anyun, che kitupche, ale, kagonwagitu betusiek; si kotebi, koboch nguno, che tinyei osotik ko u che matinyei; 30ak icheget che rirtos, koigei che marirtos; ak icheget che boiboen, koigei che ma boiboen; ak icheget che alisiei, koigei che matinyei kiy; 31ak icheget che boisie ng’ony, koigei che maboisie mising’: amu siirtoi itondab ng’onyuni.
32Amu amache ale otiagage eng’ kaiimutik. Inendet ne ma itunis kochirjirenjin tuguk che bo Kiptaiyat, ole imuchi kobaibaita Kiptaiyat: 33ago inendet ne kigotunis kochirjirenjin tuguk che bo ng’ony, ole imuchi kobaibaita osotiondennyi. 34Ak mi terjinet agine eng’ osotiot ak bergeiyat. Inendet ne ma kitun kochirjirenjin tugukab Kiptaiyat, si koek ne tilil eng’ borto ak eng’ tamirmiriet: ago inendet ne kigitun kochirjirenjin tugukab ng’ony, ole imuchi kobaibaita manong’otiondennyi.
35Amwae nito anyun agobo keluneng’wong’; ma si atoorjok mestet, ago agobo noto ne nyolu, si kobiit ochuuljige Kiptaiyat ko motinye kiy ne iimok.
36Ago ngobwati chi age tugul kole mayachin bergeiyandennyi ne nyolu, ak ngo kagosiirto kororonindab ming’inatennyi, ak ngo mi kiy ne nyoljin, koyai ko u ye machei; ma yai tengek; ingotungei. 37Ago inendet ne lumdaatgei eng’ muguleldanyi, ko matinyei birjino, ago imuchi koboi magutikyik, ak kagotil ko u nito eng’ muguleldanyi, korib bergeiyandennyi, ko kayai ne mie. 38Noto anyun, inendet ne igoitoi bergeiyandennyi kitun koyaei ne mie; ak inendet ne ma igoito kitun koyaei ne mie kosiir.
39Ratat osotiot kota kosobei manong’otiondennyi: ago ngo me manong’otiot, kotiagat inendet kotun chito ne kacham mosoganato: eng’ Kiptaiyat kityo. 40Ago baibai kosiir ngo teb ko u ye konye, ko u ye abwati: ak alen atinye agane Tamirmirietab Jehovah.
Currently Selected:
KORINTOEK 1 7: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
