KORINTOEK 1 4
4
Jehovah ne bou che kiyoktoi
1Ingoiitech anyun chi kole ki kiboitinikab Kristo, ak ribik che bo ung’otikab Jehovah. 2Eng’ yuto anyun kogeny, kemage ribik kele koek chi age tugul ne kiyani. 3Ago kit ne ming’in mising’ eng’ ane ale ogina okwek, anan eng’ kiruogetab chi: ee, maginege anege. 4Amu mangenjige kiy: ago magiityina imanda eng’ noto: ago inendet ne kina ko Kiptaiyat. 5Noto anyun amat oruokyi kiy kotom koit betut, agoi konyo Kiptaiyat, ne tun ng’anyei tuguk che ung’otin che bo mesundeito, ak kobarta kabwatutik che bo mugulelwek; si konyor chi age tugul anyun kalosunennyi eng’ Jehovah.
6Nguno anyun che kitupche, kaayai tuguchu koek kayaniet eng’ ane ak Apolo agobo okwek; si kobiit onetge eng’ achek si mosiir tuguk che sirotin; si mamenegei chi agobo chi age, kotil let chito age. 7Amu tos ng’o ne kayain iegu ne ter? Ak nee ne itinye inye ne kima itaach? Ago ngo kiitaache, ko amu nee si ilosuge, ko u ye kima itaache?
8O nyiitotin, kooegu magore, koobou ama kimi: ee, achame ale obou, si kobiit kebou agachek kobotok. 9Amu, alen, kigondeech Jehovah achek che kiyoktoi keegu che bo let eng’ tugul, ko u bik che kigiruokyi kobek: amu kigeyaech keegu che kigeerei eng’ ng’ony, ak eng’ malaikaisiek, ak eng’ bik. 10Ki che berberen achek amu Kristo, ago o ng’omen eng’ Kristo; ki nyalulyotin achek, ago o kimen; otinye teegisto okwek, ago mateechech chi. 11Agot sainito ketinye rubet ak melelda ak kimi ach ngor ak kiluiluchech, ama kitinye ole kimenye; 12ak kibirtoige, keboisie eunekyok: ye king’emwech kut, kiberur; ye kiusech, kemuitoi; 13ye kimwaitaenech yaitio, kigoigoi: kiyaech kegergeitu ak busagariekab ng’ony, tuguk che kibuktoi che kilaktoi, agoi nguno.
Kotigonet ne u ne bo kwanda ak kateunet
14Masire tuguchu ale si olilanse, ago si atigonok ko u lagokyuk che achame. 15Amu ndotinye ribik elfusiek taman eng’ Kristo, ago motinye kwanisiek che chang’: amu kiasichok eng’ Kristo Jesu eng’ logoiywek che miach.
16Noto anyun asomok ale oegu kasubikyuk. 17Kaayokwok anyun Timoteo amu ng’olyondonito, ne inendet ko lakwennyu ne achame ak iyani, eng’ Kiptaiyat, ne nyonei kabwatwok ortinwekyuk che mi eng’ Kristo, ko u ye anetoti komosta age tugul eng’ kaniset age tugul.
18Mendos alak anyun, kolen abere manyonjinok. 19Ago negit anyonjok, ngo cham Kiptaiyat; ak aguiye, ma ng’olyotab ichek che meniotin, ago kamugenywa. 20Amu bounatetab Jehovah ko ma eng’ ng’olyot, ago eng’ kamuget. 21Nee ne omache anyun? Anyonjok ak kirokto, anan eng’ chamnyet ak tamirmirietab talasiet?
Currently Selected:
KORINTOEK 1 4: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
