KORINTOEK 1 10
10
Kiteu eng’ ng’alekab lagokab Israel
1Mamache anyun, che kitupche, ale oegu che mongen, ole kimitei kwanisiekyok tugul ng’onyutab boldet, ak kibun tugul nyanjet: 2ak kigibatisanji tugul Musa eng’ boldet ak eng’ nyanjet; 3ak kiam tugul amdit agenge ne bo tamirmiriet; 4ak kiee tugul eet agenge ne bo tamirmiriet: amu kiee tugul eng’ ruandet ne bo tamirmiriet ne kiisubi ichek: ak ruandanoto ko ki Kristo. 5Ago kima baibaitune mising’ Jehovah che chang’ eng’ ichek: amu kigiserta eng’ ong’atet.
6Kiek tuguchu anyun kaborunoikyok, si magimakyige tuguk che yaachen, ko u ye kimakyigei ichek mising’. 7Amoegu che saei kanamonik, ko u alak eng’ ichek; ko u ye kigisir kele, Kiteb ng’ony bik koamis ak koee, ak kong’eetyo kourerenso. 8Amongesokse, ko u ye kiyai alak eng’ ichek, ak kiibutyo eng’ betut agenge elfusiek tiptemu ak somok. 9Anan ketiem Kiptaiyat, ko u ye kitiem alak eng’ ichek, ak kibar erenok. 10Amat ong’unyng’ung’se, ko u ye kiing’unyng’ung’so alak eng’ ichek, ak kibek eng’ ng’emindet.
11Kiyaak anyun tuguchuto eng’ ichek si koek kaborunet; ak kigisir agobo kateunennyo, achek che kagonyonjech kagesunetab kenyisiek. 12Noto anyun ingoripgei si maibut, inendet ne ibwati kole tononi. 13Kima namak yomset kobate noto ne imuchi komuitae chi tugul: ago bo iman Jehovah ne machamdook keyomak kosiir ne te ne omuchi; ago koboto yomsonoto koyaei agine oret ne ochilile, si kobiit omuch omuite.
Kanyol keesie kalosunetab kanamonik
14Noto anyun, chamanikyuk, omwee biteetab kanamonik. 15Ang’alali ko u ye ang’alaljini bik che ng’omen; obesie kit ne amwae. 16Kikombet ne bo kaberuret ne kiberuri, ko tos ma yamdaet ne bo korotikab Kristo? Makatiat ne kibutuli, ko tos ma yamdaet ne bo bortab Kristo? 17Amu achek che ki bik che chang’, ko ki makatiat agenge, borto agenge: amu kiame achek tugul makatiat agenge. 18Ogeer Israel-o eng’ atebetab borto: tos matinyei yamdaet ak kaptisisiet ichek che amei tiseiywek? 19Amwae nee anyun? Amwa ale kiy kit ne kieng’jin kanamonik, anan tos kiy kanamwet? 20Ago tuguk che igoitoi Bororiosiek koeng’jin oik, ago ma Jehovah: amamache koyai yamdaet ak oik. 21Momuchi oee kikombetab Kiptaiyat, ak kikombetab oik: momuchi oam eng’ mesetab Kiptaiyat, ak mesetab oik. 22Anan kitache Kiptaiyat konyor ng’etkong’? Tos ki kimen kosiir inendet?
23Chamdaat tuguk tugul; ago ma tuguk tugul che nyolu. Chamdaat tuguk tugul; ago ma tuguk tugul che teeksei. 24Amat kocheng’jigei chi chechik inegei, ago che bo chitab kokwennyi.
25Kiy age tugul ne kialdoi eng’ kabany, oam, amoteeb kiy amu kabwatet; 26amu bo Kiptaiyat ng’ony, ak che nyiitat ng’ony. 27Ngo kuurok age eng’ ichek che maiyani kole kobaak, ak omache obe; ko kiy age tugul anyun ne kaginde taing’wong’, oam, amat oteeb amu kabwatet: 28ago ngo lenjok chi age tugul, Kagigoitoi kii koek tiseiywot, ko moam, amu inendet ne kagoborun, ak amu kabwatet: 29kabwatet ne amwae ko ma neng’ung’, ago bo age; amu kalya si koruokyi katiagennyu kabwatet age? 30Ngot ataache eng’ kongoi, ko amu nee si kemwaitaena yaitio eng’ kit ne koagoite kongoi?
31Noto anyun ngoame, anan ngoee, anan agot eng’ kiy age tugul ne oyae, oyai tugul otorori Jehovah. 32Amonach Yahudik anan Yunanik, anan kanisetab Jehovah: 33agot ko u ye aboiboi bik tugul eng’ tuguk tugul, macheng’e kelunennyu anege, ago kelunet ne bo che chang’, si kobiit kesor.
Currently Selected:
KORINTOEK 1 10: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
