ZEKARIA 5
5
1Ningĩ ndĩragĩcoka ndĩratiira maitho rĩngĩ ndĩracũthĩrĩria ndĩrona gĩkũnjo-kĩa-ibuku gĩkwĩbĩra rĩera-inĩ, 2nake aranjũria atĩrĩ, Nĩ kĩ ũrona? Na niĩ ndĩramũcokeria atĩrĩ, Nĩ gĩkũnjo-kĩa-ibuku ndĩrona gĩkwĩbĩra rĩera-inĩ; nakĩo kĩraihĩte mĩkono mĩrongo ĩĩrĩ, na gĩkaarama mĩkono ikũmi. 3Nake aranjĩra atĩrĩ, Rĩrĩ nĩrĩo rĩandĩkĩtwo kĩrumi kĩrĩa gĩgũtambũrũka kĩgwate bũrũri wothe; tondũ mũndũ o wothe ũrĩa ũiyaga nĩekwamũranio na andũ arĩa angĩ nĩ ũndũ wakĩo, o nake mũndũ o wothe ũrĩa wĩhĩtaga na maheni aamũrũo nĩ ũndũ wakĩo. 4Ningĩ Jehova Mũnene wa Ita ekuuga atĩrĩ, Nĩngũgĩtũma gĩtambũrũke mũno, o nginya gĩtonye nyũmba ya mũici, o na nyũmba ya mũndũ ũrĩa wĩhĩtaga na maheni akĩgwetaga rĩĩtwa rĩakwa, na gĩikare kũu nyũmba yake thĩinĩ o nginya kĩmĩnine yothe, hamwe na mĩtĩ yayo o na mahiga mayo.
5Ningĩ thutha wa ũguo mũraika ũcio tũraaranagĩria nake aroimagara aranjĩra atĩrĩ, Ta gĩtiire maitho wone kĩrĩa kĩroimĩra. 6Na niĩ ndĩracoka ndĩramũũria atĩrĩ, Nĩ gĩtũũ kĩu? Nake aranjokeria ũhoro aroiga, Kĩu kĩroka-rĩ, nĩ mwatũ.#5.6 Mwatũ: Kĩhibirania ni eba; nĩ ta ibuba rĩnene rĩa gũthima irio narĩo. Ningĩ aroiga atĩrĩ, Ũyũ nĩguo waganu ũrĩa wĩ bũrũri wothe. 7Na kahinda o kau hengero yaguo ya ngocorai ĩrakĩhingũrũo, ndĩrona mũndũ-wa-nja ũikarĩte mwatũ ũcio thĩinĩ. 8Na ningĩ aroiga atĩrĩ, Ũyũ nĩwe Nyawaganu; nake aramũikia na kũu mwatũ-inĩ ũcio thĩinĩ, aracoka araũhengera na hengero ĩo ya ngocorai. 9Ningĩ ndĩratiira maitho rĩngĩ, ndĩracũthĩrĩria, ndĩrona atumia erĩ makiumagara, mareretio nĩ rũhuho, tondũ maarĩ na mathagu ta ma njũũ, nao maracoka maroya mwatũ ũcio maraũhira rĩera-inĩ. 10Na niĩ ndĩracoka ndĩroria mũraika ũcio tũraaranagĩria nake atĩrĩ, Mwatũ ũcio maraũhira kũ? 11Nake aranjokeria atĩrĩ, Maathiĩ kũmwakĩra gĩthũnũ bũrũri wa Shinaru; nakĩo gĩaakĩka-rĩ, mamũige kuo, gũtuĩke kũndũ gwake kĩũmbe.
Currently Selected:
ZEKARIA 5: OGKBIBLE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
