MARIKO 6

1AKIUMA kũndũ kũu, agĩthiĩ bũrũri wao; nao arutwo ake makĩmũrũmĩrĩra. 2Na mũthenya wa thabatũ wakinya akĩgwata kũruta andũ ũhoro thunagogi-inĩ: na andũ aingĩ maamũigua makĩgega, makĩũria atĩrĩ, Mũndũ ũyũ akĩrutĩte maũndũ maya kũ? na ningĩ makĩũria, Nĩ atĩa ũũgĩ ũyũ mũndũ ũyũ aheetwo; o na ciĩko icio cia hinya mũnene ũũ ciĩkĩtwo na moko make? 3Ũyũ anga towe mũtharamara, o we mũrũ wa Mariamu, na mũrũ wa nyina na Jakubu na Jose na Juda na Simoni? nao airĩtu a nyina anga matitũire o gũkũ gwitũ? Magĩkĩhĩngwo nĩ ũndũ wake. 4#Joh 4.44.Nake Jesu akĩmera atĩrĩ, Mũnabii kũndũ aagaga gũkumio no bũrũri wake, na kwa andũ ao, na gwake nyũmba. 5Agĩkĩremwo nĩ gwĩka wĩko wa hinya kũu, tiga nĩ andũ amwe arũaru matarĩ aingĩ aaigĩrĩire moko make, akĩmahonia. 6Na nĩaagegire nĩ ũrĩa maaregete gwĩtĩkia.

Agĩcoka gũceeranga mĩciĩ-inĩ akĩrutaga andũ ũhoro.

7Agĩcoka agĩĩta arĩa ikũmi na erĩ, akĩrika kũmatũma o erĩ erĩ; akĩmahe wathani wa gwatha ngoma thũku; 8na akĩmera matigakuue kĩndũ kĩa njĩra, no mũtirima wiki; matigathiĩ na irio, kana mburungo, kana makuue mbia ndoho-inĩ ciao; 9na mathiĩ mekĩrĩte iratũ: akĩmera ningĩ, Na mũtikehumbe nguo igĩrĩ. 10Agĩcoka akĩmera atĩrĩ, O kũndũ mwatonya mũciĩ raaragai kũu nginya mũkoima kuo. 11#Atũm 13.51.#Luk 10.4-11.Na kũrĩa andũ matakamũgwata ũgeni, na marege kũmũigua-rĩ, mũkiuma kuo, thukiai magũrũ manyu rũkũngũ rũitĩke, rũtuĩke ũira kũrĩ o. 12Nao magĩthiĩ, makĩhunjia ũhoro atĩ andũ merire. 13#Jak 5.14.Na magĩtũma ndaimono nyingĩ ciume andũ, na magĩitĩrĩria andũ aingĩ maguta, arĩa maarĩ arũaru, makĩmahonia.

14 # Mat 16.14; Mar 8.28; Luk 9.19. Nake mũthamaki Herode akĩigua ũhoro ũcio; tondũ rĩĩtwa rĩa Jesu nĩrĩagĩĩte na ngumo. Akiuga atĩrĩ, Johana Mũbatithania nĩariũkĩte akoima kwĩ arĩa akuũ, na nĩkĩo mahinya macio marutaga wĩra thĩinĩ wake. 15Andũ angĩ makiuga, Nĩwe Elija. Angĩ nao makiuga, Nĩ mũnabii, ta arĩ ũmwe wa anabii arĩa a tene. 16No Herode-rĩ, aaigua ũhoro wake, akiuga atĩrĩ, Johana, ũrĩa ndoigire atinio mũtwe, nĩwe ũcokete muoyo.

17 # Luk 3.19,20. Tondũ rĩrĩ, Herode we mwene nĩaarekanĩtie, akĩnyitithia Johana, akĩmuohithia korokoro nĩ ũndũ wa Herodia, nĩwe mũtumia wa mũrũ wa ithe, Filipu: nĩ gũkorũo nĩaamũhikĩtie. 18Tondũ Johana nĩeraga Herode atĩrĩ, Ndũrĩ na rũtha ũtware mũtumia wa mũrũ wa thoguo. 19Nake Herodia akĩmũtuma ũthũ, akĩenda amũũragithie, na ndahote; 20nĩ gũkorũo Herode nĩetigĩrĩte Johana, nĩ kũmenya nĩ mũndũ mũthingu na nĩ mũtheru, akĩmũmenyerera wega. Na aaheo ũhoro nĩwe nĩaathanganagia, arigĩtwo mũno nĩ ũrĩa egwĩka; na nĩaathikagĩrĩria ũhoro wake akenete. 21Na gũgĩkinya mũthenya mwagĩrĩru, ũrĩa Herode aarugithĩirie andũ ake iruga, nĩguo warĩ mũthenya wa gũciarũo gwake, agĩkĩrugithĩria anene ake, na atongoria a mbũtũ cia ita, na athuri arĩa maarĩ igweta kũu Galili. 22Nake mwarĩ wa Herodia aatonya kũu marĩ, aaina, agĩkenia Herode o na arĩa maaikaire nao irio-inĩ: nake mũthamaki akĩĩra mũirĩtu ũcio atĩrĩ, Hoya o kĩrĩa ũkwenda, na nĩngũkũhe. 23Akĩĩhĩta akĩmwĩra atĩrĩ, O kĩrĩa ũngĩnjĩtia nĩngũkũhe, o na kũngĩkorũo nĩ kũgayana nawe bũrũri wakwa. 24Nake akiuma, akĩũria nyina, Nĩ kĩ ngwĩtia? Nake akiuga, Ĩtia arĩ, mũtwe wa Johana Mũbatithania. 25Kahinda o kau agĩcoka agĩtonya narua kwĩ mũthamaki, akĩmwĩtia, akiuga atĩrĩ, Nĩngwenda ũ’he o rĩu mũtwe wa Johana Mũbatithania wĩ kiuga-inĩ. 26Nake mũthamaki akĩigua kĩeha mũno; no ndangĩĩtĩkĩra kũrega ũhoro wake, nĩ ũndũ wa mĩĩhĩtwa yake, na tondũ wa arĩa maaikaire nake irio-inĩ. 27Ihinda o rĩu mũthamaki akĩrekia mũthigari ũmwe wa arĩa maamũrangagĩra, agĩathana atĩ mũtwe wake ũrehwo: nake agĩthiĩ akĩmũtinia mũtwe kũu korokoro-inĩ, 28akĩrehe mũtwe wake na kiuga, akĩnengera mũirĩtu; nake mũirĩtu akĩnengera nyina. 29Na arutwo ake maaigua ũhoro ũcio magĩthiĩ makĩoya kĩimba gĩake, magĩkĩiga thĩinĩ wa mbĩrĩra.

30Nao atũmwo magĩcoka kũũngana kwĩ Jesu; na makĩmwĩra maũndũ mothe o marĩa mekĩte, na marĩa maarutĩte andũ. 31Nake akĩmera atĩrĩ, Ũkai inyuĩ inyuiki kũrĩa gũtarĩ andũ, mũkahurũke hanini. Tondũ andũ nĩ aingĩ mokaga magĩthiaga, nao makaaga hingo o na ya kũrĩa irio. 32Magĩgĩthiĩ na marikabu kũndũ gũtaarĩ andũ, o oiki. 33Nao andũ makĩmona magĩthiĩ, na aingĩ makĩmamenya, magĩtwarana kuo na magũrũ mahanyũkĩte moimĩte matũũra mothe makĩmahĩta. 34#Ndar 27.17; 1 Ath 22.17; 2 Maũ 18.16; Ezek 34.5; Mat 9.36.Nake akiuma marikabu akĩona kĩrĩndĩ kĩingĩ, agĩkĩiguĩra tha, tondũ maatariĩ ta mbũri ciagĩte mũrĩithi: agĩitĩka kũmaruta mohoro maingĩ. 35Na gwatua gũtuka, arutwo ake magĩũka harĩ we, makiuga atĩrĩ, Gũkũ nĩ werũ-inĩ, na rĩu gũkiriĩ gũtuka: 36mere mathiĩ, nĩguo makinye mĩgũnda-inĩ na mĩciĩ-inĩ ĩrĩa ĩĩ gũkuhĩ, makegũrĩre irio. 37Nake agĩcokia ũhoro akĩmera atĩrĩ, Mahei irio arĩ inyuĩ. Nao makĩmũũria, Tũthiĩ tũkagũre mĩgate ya ciringi#6.37 Ciringi: rora karatathi ka 1,418. magana merĩ tũmahe marĩe? 38Nake akĩmera atĩrĩ, Mwĩ na mĩgate ĩigana? Ta thiĩni mũrore. Na maarĩkia kũmenya, makiuga, Nĩ ĩtano, na ciũngũyũ igĩrĩ. 39Nake agĩathana atĩ andũ othe maikare thĩ ikundi ikundi nyeki-inĩ ĩrĩa yarĩ ho nduru. 40Magĩgĩikara thĩ mĩhari, ĩmwe ya andũ igana hamwe, na ĩngĩ ya andũ mĩrongo ĩtano hamwe. 41Nake akĩoya mĩgate ĩo ĩtano na ciũngũyũ icio cierĩ, akĩrora Igũrũ, akĩrathima, agĩcoka akĩenyũranga mĩgate; akĩnengera arutwo matwarĩre andũ; ciũngũyũ icio cierĩ nacio akĩmagayania othe. 42Magĩkĩrĩa othe, makĩhũna. 43Magĩcoka makĩoya cienyũ, ikĩiyũra ciondo ikũmi na igĩrĩ, irĩ na cia ciũngũyũ. 44Na andũ arĩa maarĩire mĩgate ĩo nĩ arũme ngiri ithano.

45Na rĩrĩ, o ũhoro ũcio wathira, akĩhatĩrĩria arutwo ake matonye marikabu, mathiage mũrĩmo ũrĩa, kũndũ gwĩtagwo Bethisaida, mũira wa ere andũ mainũke. 46Ningĩ aarĩkia kũmoigĩra ũhoro, agĩthiĩ kĩrĩma-inĩ kũhoya Ngai.

47Na hwaĩ-inĩ ũgĩkinya marikabu yarĩ iria gatagatĩ, nake aarĩ wiki rũgongo. 48Na ona mekũnoga nĩ gũtwara marikabu, tondũ rũhuho nĩrũamagiragia, ta thaa kenda cia ũtukũ agĩthiĩ kũrĩ o agĩkinyaga maĩ igũrũ: na nĩangĩamahĩtũkire. 49Nao maamuona agĩthiĩ agĩkinyaga maĩ igũrũ, makiuga nĩ ngoma yonekete, magĩkaya: 50amu nĩmaamuonire othe, makĩmaka. Nake akĩmaarĩria o ro rĩmwe, akĩmera, Ũmĩrĩriai: nĩ niĩ; tigai gwĩtigĩra. 51Akĩmathengerera agĩtonya marikabu; naruo rũhuho rũgĩtuĩka. Nao makĩgegeara mũno na ngoro ciao: 52amu matiamenyete wega ũhoro wa mĩgate ĩrĩa, no ngoro ciao ciarĩ nyũmũ.

53Na maarĩkia kũringa, magĩkinya thĩ kũrĩa gwĩtagwo Genesareti, makĩoha marikabu hũgũrũrũ-inĩ. 54Na maarĩkia kuuma marikabu-inĩ, o rĩmwe andũ makĩmũmenya, 55makĩrika kũhanyũkanga bũrũri ũcio wothe, makĩgwata gũkuua arĩa maarũarĩte na ibarĩ ciao, makĩmatwaraga o harĩa maiguĩte nĩho arĩ. 56Na kũndũ o guothe aatonya, akorũo nĩ tũmĩciĩ, kana akorũo nĩ matũũra, kana akorũo nĩ mĩgũnda-inĩ, makaiga arĩa arũaru iharo-inĩ, na makamũhoya areke mamũhutie, o na akorũo no ciohe cia ndigi cia nguo yake: na arĩa othe maamũhutirie makĩhona.

Currently Selected:

MARIKO 6: OGKBIBLE

Highlight

Copy