MATHAYO 10

1AGĨGĨĨTA arutwo ake arĩa ikũmi na erĩ moke harĩ we, akĩmahe wathani wa gwathaga ngoma thũku nĩguo matũmage ciume andũ, na wa kũhonanagia mĩrimũ yothe, o na ndũari ciothe.

2Na rĩrĩ, marĩĩtwa ma atũmwo acio ikũmi na erĩ nĩ maya: wa mbere, nĩ Simoni, ũrĩa wetagwo Petero, na Andarea mũrũ wa nyina; na Jakubu, mũrũ wa Zebedi, na Johana mũrũ wa nyina; 3na Filipu, na Baritholomayo; na Toma, na Mathayo, ũrĩa mwĩtia mbia cia igoti; na Jakubu wa Alufayo, na Thadayo; 4na Simoni, ũrĩa Mũkanaani, na Judasi Mũisikariota, o we ũrĩa wamũkunyanĩire.

5Andũ acio ikũmi na erĩ nĩo Jesu aatũmire, akĩmataara, akĩmera atĩrĩ,

Mũtikagwate njĩra ya gũthiĩ kũrĩ andũ a Ndũrĩrĩ iria ingĩ, na mũtigatonye itũũra o rĩothe rĩa Asamaria: 6nĩ kaba mũthiĩ kũrĩ mbũri iria ciũrĩte cia mbarĩ ya Isiraeli. 7Na mũgĩthiĩ-rĩ, heanagai ũhoro, mũkiugaga atĩrĩ, Ũthamaki wa Igũrũ nĩũkuhĩhĩirie. 8Honagiai andũ arĩa arũaru, na mũriũkagie arĩa akuũ, na mũtũmage arĩa marĩ na mangũ mathere, na mũingatage ndaimono ciume andũ. Mũheetwo o ro tũhũ, heanagai o ro tũhũ. 9Mũtigekĩre mbia cia thahabu kana cia betha kana thendi ndoho-inĩ cianyu; 10#1 Kor 9.14; 1 Tim 5.18.o na mũtigekuuĩre mburungo ya rũgendo; na mũndũ wanyu ndagathiĩ na nguo igĩrĩ, kana iratũ, kana mũtirima; nĩ ũndũ mũruti wĩra nĩagĩrĩirũo nĩ kũheagwo irio ciake. 11Na ningĩ o itũũra rĩrĩa mũgatonya kana mũciĩ, tuĩriai mũmenye ũrĩa wĩ kuo wagĩrĩire; na mũikarage gwake nginya o hĩndĩ ĩrĩa mũkoima kuo. 12Na mũgĩtonya nyũmba ĩo, geithiai ene yo. 13Na nyũmba ĩo yakorũo nĩyagĩrĩire, mĩrathimei na kĩrathimo kĩanyu: na yakorũo ndĩagĩrĩire, kĩrathimo kĩanyu nĩkĩmũcokerere. 14#Atũm 13.51.Nake mũndũ ũrĩa ũtakamũgwata ũgeni, kana aigue ũhoro wanyu, mũkiuma nyũmba ĩo, kana o itũũra rĩu, thukiai magũrũ manyu rũkũngũ rũitĩke. 15#Mat 11.24; Kĩam 19.24-28.#Luk 10.4-12.Ngũmwĩra atĩrĩ na ma, atĩ bũrũri ũrĩa wa Sodomu na Gomora nĩgũkagĩa murũ mũthenya ũrĩa wa cira, gũkĩra itũũra rĩu.

16 # Luk 10.3. Atĩrĩrĩ, ndamũrekia ta mbũri o kũrĩa kwĩ njũi: tondũ ũcio gĩagai na ũũgĩ ta nyamũ-cia-thĩ, na mwage ũũru ta ndutura. 17#Mar 13.9-11; Luk 12.11,12; 21.12-15.No rĩrĩ, mwĩmenyagĩrĩrei andũ: nĩ ũndũ nĩmakamũneana gwĩ ciama, na mamũhũrĩre thunagogi-inĩ ciao na iboko irĩ njaaga; 18ningĩ mũgatwarũo kũrĩ athani na athamaki nĩ ũndũ wakwa, nĩ getha mũtuĩke aira kũrĩ o, o na kũrĩ andũ a Ndũrĩrĩ. 19Na rĩrĩa makamũneana-rĩ, mũtikanatangĩkĩre mĩarĩrie ĩrĩa mũkaaria nayo o na kana ndeto iria mũkaaria: nĩ ũndũ thaa ĩo nĩmũkaheo ũhoro wa kwaria. 20Nĩ ũndũ ti inyuĩ mũgakorũo mũkĩaria, no nĩ Roho wa Ithe wanyu ukaaragia arĩ thĩinĩ wanyu. 21#Mar 13.12; Luk 21.16.Ningĩ mũndũ nĩagakunyanĩra mũrũ wa nyina oragwo, na mũthuri akunyanĩre mwana wake oragwo. Nacio ciana nĩigokĩrĩra aciari acio, na imoragithie. 22#Mat 24.9; Mar 13.13; Luk 21.17; Mat 24.13; Mar 13.13.Na mũgathũũrũo nĩ andũ othe nĩ ũndũ wa rĩĩtwa rĩakwa: no ũrĩa wa gũkirĩrĩria o nginya hĩndĩ ya marigĩrĩrio, nĩwe ũkahonoka. 23Na rĩrĩa makamũnyarira itũũra rĩrĩa mũrĩ, ũrĩrai rĩrĩa rĩngĩ: nĩ ũndũ ngũmwĩra atĩrĩ na ma, atĩ mũtigakorũo mũtũnganĩtie matũũra mothe ma Isiraeli, Mũrũ wa Mũndũ atokĩte.

24 # Luk 6.40; Joh 13.16; 15.20. Mũrutwo ti mũnene kũrĩ mũmũruti, o na ngombo ti nene kũrĩ mũmĩathi. 25#Mat 9.34; 12.24; Mar 3.22; Luk 11.15.Mũrutwo angĩiganana na mũmũruti, aiganwo; nayo ngombo ĩngĩiganana na mũmĩathi, yaiganwo. Akorũo andũ nĩmetĩte mwene nyũmba Beelizebuli,#10.25 Beelizebuli: gũtaũrũo nĩ kuuga mũnene wa ngi. Nĩ rĩĩtwa rĩatuirũo mũnene wa ndaimono. githĩ matingĩkĩria mũno gwĩta andũ a nyũmba yake o ũguo? 26#Mar 4.22; Luk 8.17.Nĩ ũndũ ũcio mũtikanametigĩre: nĩ ũndũ gũtirĩ ũndũ mũguĩkĩre ũtakaguũrio; o na kana ũndũ mũrinde ũtakamenyeka. 27Ũhoro ũrĩa ngũmwĩrĩra nduma-inĩ, wĩranĩrei ũtheri-inĩ: na ũrĩa mwaigua na gũtũ, mũhunjanĩrie mwĩ nyũmba igũrũ. 28Ningĩ tigagai gwĩtigĩra arĩa moragaga o mwĩrĩ, na matingĩhota kũũraga ngoro; nĩ kaba mwĩtigagĩre ũrĩa ũngĩhota kũninanĩria mwĩrĩ o na ngoro hamwe Jehanumu thĩinĩ.

29Githĩ tũnyoni twĩrĩ tũtiendagio thendi ĩmwe? Natuo gũtirĩ o na kamwe kangĩgũa thĩ Ithe wanyu atoĩ. 30Na rĩrĩ, o na njuĩrĩ cianyu cia mũtwe nĩ ndare ciothe. 31Hakĩrĩ ũguo-rĩ, mũtikanetigĩre; inyuĩ mũrĩ bata gũkĩra tũnyoni tũingĩ. 32Nĩ ũndũ ũcio-rĩ, o mũndũ ũkoimbũra kũrĩ andũ atĩ nĩ wakwa, niĩ o na niĩ nĩngamuumbũra kũrĩ Awa ũrĩa wĩ Igũrũ atĩ nĩ wakwa. 33#2 Tim 2.12.No mũndũ ũrĩa ũkangaana kũrĩ andũ, o na niĩ nĩngamũkaana kũrĩ Awa ũrĩa wĩ Igũrũ.

34Tigagai kwĩgereria atĩ ndokire kũrehe thayũ gũkũ thĩ: ndiokire kũrehe thayũ, no rũhiũ rũa njora. 35#Mik 7.6.Nĩ gũkorũo ndokire kũmenithania mũndũ na ithe, na mũirĩtu na nyina, o na mũtumia na nyaciarawe; 36o nacio thũ cia mũndũ igatuĩka o andũ a nyũmba yake kĩũmbe. 37Ũrĩa wenda ithe kana nyina kũngĩra, ndaagĩrĩire gũtuĩka wakwa; na ũrĩa wenda mũriũ, kana mwarĩ, kũngĩra, ndaagĩrĩire gũtuĩka wakwa. 38#Mat 16.24; Mar 8.34; Luk 9.23.Na ũrĩa ũtekuoya mũtĩ wake wa kwambĩrũo, anũmĩrĩre, ndaagĩrĩire gũtuĩka wakwa. 39#Mat 16.25; Mar 8.35; Luk 9.24; 17.33; Joh 12.25.Mũndũ ũrĩa ũkwenda gũtũũria muoyo wake, ũcio nĩ kũũrũo akorũo nĩguo; na ũrĩa ũkorũo nĩ muoyo wake nĩ ũndũ wakwa, ũcio nĩakaũtũũria.

40 # Luk 10.16; Joh 13.20; Mar 9.37; Luk 9.48. Mũndũ ũrĩa ũkũmwĩtĩkĩra inyuĩ, nĩ niĩ etĩkĩra, na ũrĩa ũkũnjĩtĩkĩra niĩ, nĩetĩkĩrĩte ũrĩa wandekirie. 41Mũndũ ũrĩa ũgwĩtĩkĩra mũnabii tondũ nĩ mũnabii, nĩakaheo ũtungati o ũrĩa ũheagwo mũnabii; na ũrĩa ũgwĩtĩkĩra mũndũ mũthingu, tondũ nĩ mũndũ mũthingu, nĩakaheo ũtungati o ũrĩa ũheagwo mũndũ mũthingu. 42Nao andũ aya anyinyi-rĩ, mũndũ o wothe ũkahe ũmwe wao o na arĩ gĩkombe kĩa maĩ mahoro anyue, tondũ nĩ mũrutwo, ndakaaga kũheo ũtungati wake, o na atĩa.

Currently Selected:

MATHAYO 10: OGKBIBLE

Highlight

Copy