MALAKI 2

1Na rĩu inyuĩ athĩnjĩri-Ngai aya-rĩ, rĩathani rĩrĩ nĩ inyuĩ mwathĩrĩirio. 2Jehova Mũnene wa Ita ekũmwĩra atĩrĩ, Mũngĩrega kũnjigua, na mwage gwĩcũrania rĩathani rĩrĩ na ngoro cianyu, nĩguo mũgoocithagie rĩĩtwa rĩakwa, nĩngamũrehithĩrie kĩrumi mũgwatwo nĩkĩo, o nacio irathimo cianyu iria mũrathimanaga nacio ndĩcigeke; ĩĩ, ti-itherũ o na rĩu nĩndĩkĩtie gũcigeka, nĩ ũndũ nĩmũregete gwĩcũrania rĩathani rĩu rĩakwa na ngoro cianyu. 3Atĩrĩrĩ, maciaro ma thĩ nĩngamarũithia nĩ ũndũ wanyu, na inyuĩ ndĩmũminjĩrie tatha mothiũ-inĩ manyu inyuene, o tatha wa nyamũ iria mũrutĩte cia magongona; o na ningĩ njoke ndĩmũingate muume harĩ niĩ mũhirũo harĩ guo. 4#Ndar 3.11-13.Na inyuĩ nĩmũkamenya atĩ nĩ inyuĩ ndaathĩrĩirie rĩathani rĩu, nĩ getha kĩrĩkanĩro giitũ na Lawii gĩikare kĩrũmĩte; ũguo nĩguo Jehova Mũnene wa Ita ekuuga. 5#Ndar 25.12.Nĩ kĩrĩkanĩro kĩa muoyo o na thayũ twarĩkanĩire nake, na niĩ ngĩkĩmũrathimĩra cio, nĩ getha atũũre eĩndigĩrĩte; nake agĩgĩtũũra o eĩndigĩrĩte na agekĩrĩra rĩĩtwa rĩakwa.

6Ũtaarani wa ma nĩguo woimaga kanua gake,

Na mĩromo yake ndĩigana gũtumũka kaũndũ gatarĩ ga ũthingu.

Twatwaranaga nake na thayũ, e na mĩthiĩre mĩerekereru,

Na nĩaagucagĩrĩria andũ aingĩ, matigane na waganu wao.

7Tondũ-rĩ, nĩ kaba kanua ka mũthĩnjĩri-Ngai gatuĩke kĩgĩĩna kĩa ũmenyo,

Nĩ getha andũ mahoyage ũtaarani harĩ we,

Tondũ nĩwe mũrekio wa Jehova Mũnene wa Ita.

8No inyuĩ nĩmũtigĩte njĩra, mũgakerũra na mwena ũngĩ,

Mũgatũma andũ aingĩ maikare ta mahĩngithĩtio kĩrĩra-inĩ kĩa Ngai.

Nĩmwĩhĩtie kĩrĩkanĩro giitũ na Lawii;

Ũguo nĩguo Jehova Mũnene wa Ita ekuuga;

9Nĩkĩo ndũmĩte mũnyararũo nĩ kĩrĩndĩ gĩothe, na mũmenererio nĩkĩo,

Nĩ ũndũ nĩmũregete gũthiaga na mĩthiĩre yakwa,

Na mũgathurania ũrĩa andũ matariĩ mũgĩtua cira.

10Githĩ tũtirĩ a ithe ũmwe ithuothe? Ningĩ-rĩ, githĩ tũtiombirũo nĩ Ngai o ũmwe? Nĩ kĩ gĩgĩtũmaga tũrĩanĩre ng’ũũrũ mũndũ na mũndũ ũrĩa ũngĩ, tũgagĩthahia kĩrĩkanĩro kĩrĩa kĩa maithe maitũ? 11Juda nĩekanĩte maũndũ ma ũrĩa-ng’ũũrũ, o nakuo Isiraeli na Jerusalemu gũgekwo maũndũ me thahu; tondũ Juda nĩathahĩtie handũ harĩa haamũre ha Jehova, o hau endete mũno, na akahikanĩa na mwarĩ wa ngai ng’eni. 12Mũndũ o wothe ũrĩa wĩkaga maũndũ macio, Jehova nĩakamũninĩra mũndũ wa gũũkĩra na wa gũcokia ũhoro, oimio hema-inĩ cia Jakubu, hamwe na mũndũ wa kũrehe mahaki ma kũrutĩra Jehova Mũnene wa Ita.

13Na rĩrĩ, kũrĩ ũndũ ũngĩ wa kerĩ mwĩkaga. Mũihũgagia kĩgongona kĩa Jehova na maithori manyu o mũkĩrĩraga na mũkagirĩka, tondũ rĩu nĩaregaga kwamũkĩra mahaki, na akaaga gũkenio nĩ indo iria mũmũrutagĩra. 14Ningĩ mũũragia atĩrĩ, Hihi aregete nĩ ũndũ kĩ? Gĩtũmi nĩ ũndũ Jehova nĩwe warĩ mũira wanyu, mwĩ na mũtumia waku ũrĩa wahikirie rĩrĩa warĩ mwanake; na rĩu nĩũmũrĩĩrĩire ng’ũũrũ, ũkaaga kũhingia kĩrĩkanĩro kĩanyu nake, o na harĩa arĩ wa kĩruka kĩanyu, na mũtumia waku ũrĩa mwarĩkanĩire nake, o mũkĩĩhĩtanagĩra mĩĩhĩtwa. 15Gũtirĩ mũndũ o na ũmwe ũngĩeta gwĩka ũguo mwĩkĩte, angĩkorũo atigarĩtie roho wa ma thĩinĩ wake. Rĩu gũgĩtariĩ atĩa? Hihi nĩgũgĩtigarĩte mũndũ o na ũmwe wanyu ũrĩa ũtanyĩte gũciara ciana na kĩhooto, o iria igetigĩra Ngai? Tondũ ũcio wĩmenyererei maroho-inĩ manyu, nĩguo mũndũ ndakananyarare mũtumia wake ũcio aahikirie e mwanake. 16Ningĩ Jehova Ngai wa Isiraeli ekũmwĩra atĩrĩrĩ, Ndigano ya mũndũ na mũtumia nĩndĩmĩthũũrĩte, o na ngathũũra ũhoro wa kwĩhumba ũhinya ta arĩ nguo; ũguo nĩguo Jehova Mũnene wa Ita ekuuga. Tondũ ũcio wĩmenyererei maroho-inĩ manyu, mũtigekanage maũndũ ma ũrĩa-ng’ũũrũ.

17Atĩrĩrĩ, Jehova nĩmũmũnogetie na ndeto cianyu; no mũũragia atĩrĩ, Tũmũnogetie na kĩ? Nĩ rĩrĩ, nĩ ũndũ muugaga atĩ mũndũ o wothe ũrĩa wĩkaga ũũru nĩonagwo ta arĩ mwega nĩ Jehova na agakenerũo nĩwe; na ningĩ nĩ ũndũ mũũragia atĩrĩ, Kaĩ Ngai ũrĩa ũtuaga cira na kĩhooto akĩrĩ ha?

Currently Selected:

MALAKI 2: OGKBIBLE

Highlight

Copy