LUKA 12

1 # Mat 16.6; Mar 8.15. NA hĩndĩ ĩo-rĩ, kĩrĩndĩ kĩingĩ gĩgĩkorũo kĩũnganĩte, andũ ngiri nyingĩ, o kinya makĩrangana; nake akĩrika kwĩra arutwo ake, o mbere, atĩrĩ, Wĩmenyagĩrĩrei ndawa ya kũimbia mũgate ĩrĩa ya Afarisai, nayo nĩyo ũhinga. 2#Mar 4.22; Luk 8.17.No rĩrĩ, gũtirĩ ũndũ mũguĩkĩre ũtakaguũrio; o na kana ũndũ mũrinde ũtakamenyeka. 3Nĩ ũndũ ũcio ũhoro o wothe ũrĩa mwanaaria nduma-inĩ, nĩũkaiguwo o ũtheri-inĩ; na ũrĩa mwanaheehana o matũ-inĩ, mwĩ nyũmba thĩinĩ mũno, nĩũkamemerekerio nyũmba igũrũ. 4Na ngũmwĩra atĩrĩ, inyuĩ arata akwa, Tigagai gwĩtigĩra arĩa moragaga mwĩrĩ, na thutha wa ũguo matirĩ ũndũ mangĩhota gwĩka. 5No nĩngũmũtaara mũmenye ũrĩa mwagĩrĩirũo nĩ gwĩtigĩra; Wĩtigagĩrei o ũrĩa ũrĩ na hinya wa gũikia mũndũ Jehanumu-inĩ, aarĩkia kũmũũraga; ngũkĩmwĩra atĩrĩ na ma, Ta gĩĩtigagĩrei ũcio. 6Githĩ tũnyoni tũtano tũtiendagio tũthendi twĩrĩ? Na rĩrĩ, gũtirĩ o na kamwe gatuo kangĩriganĩra Ngai. 7No rĩrĩ, o na njuĩrĩ cianyu cia mũtwe nĩ ndare ciothe. Tigagai gwĩtigĩra: inyuĩ mwĩ bata gũkĩra tũnyoni tũingĩ. 8Na ngũmwĩra atĩrĩ, O mũndũ ũkoimbũra kũrĩ andũ atĩ nĩ wakwa, nĩwe Mũrũ wa Mũndũ o nake akoimbũra kũrĩ araika a Ngai atĩ nĩ wake: 9no rĩrĩ, mũndũ ũrĩa ũngaanaga kũrĩ andũ, nĩwe ũgakaanwo kũrĩ araika a Ngai. 10#Mat 12.32; Mar 3.29.Na mũndũ o wothe ũkaaria kiugo gĩa gũcambia Mũrũ wa Mũndũ nĩakoherũo wĩhia ũcio: no ũrĩa ũkaruma Roho Mũtheru ndakoherũo kũrumana kũu. 11#Mat 10.19,20; Mar 13.11; Luk 21.14,15.Na rĩrĩa andũ makamũtwara kũrĩ ciama cia thunagogi, na kũrĩ aathani, na kũrĩ anene, mũtikanetangĩkĩre nĩ ũndũ wa mĩario ĩrĩa mũgacokanĩria nayo, kana ũhoro ũrĩa mũgacokia, o na kana ciugo iria mũkoiga: 12nĩ ũndũ Roho Mũtheru nĩakamũruta, o thaa ĩo, ũhoro ũrĩa mwagĩrĩirũo nĩ kuuga.

13Na mũndũ ũmwe wa kĩrĩndĩ kĩrĩa kĩarĩ ho akĩmwĩra atĩrĩ, Mũrutani, ĩra mũrũ wa maitũ tũgayane nake igai riitũ 14Nowe akĩmwĩra atĩrĩ, Mũndũ ũyũ, nũ ũnduĩte mũcirĩrĩri, kana mũgayania wa indo cianyu? 15Agĩkĩmera atĩrĩ, Wĩmenyagĩrĩrei nĩguo mũtikanagĩe na riitho rĩraya o na atĩa: nĩ ũndũ muoyo wa mũndũ nduonekaga nĩ ũndũ wa ũrĩa indo ciingĩhĩte iria arĩ nacio. 16Akĩmagerekanĩria ngerekano akiuga atĩrĩ, Mũgũnda wa mũndũ mũna warĩ gĩtonga nĩwaciarire mũno: 17nake akĩĩĩra na ngoro atĩrĩ, Ngũgĩĩka atĩa, nĩ ũndũ ndirĩ na handũ ha kũgethera magetha makwa? 18Agĩcoka akiuga atĩrĩ: Ngwĩka ũũ: nĩngũtharithia makũmbĩ makwa, njoke njakithie mangĩ manene kũrĩ mo; na nĩngaita irio ciakwa ciothe thĩinĩ wamo, o na indo ciakwa ciothe ndĩciige kuo. 19Na ndĩĩre na ngoro yakwa atĩrĩ, Ngoro ĩno, wĩ na indo nyingĩ njige cia kũigana mĩaka mĩingĩ; hurũka, ũrĩage, na ũnyuage, na ũcanjamũkage. 20No rĩrĩ, Ngai akĩmwĩra atĩrĩ, Wee, kĩrimũ gĩkĩ, ũtukũ o ũyũ nĩũgwĩtio ngoro yaku; nacio indo icio wĩhaĩire-rĩ, igagĩtuĩka cia ũ? 21Na rĩrĩ, o ũguo noguo mũndũ atariĩ ũrĩa wĩigagĩra mũthithũ wa indo we mwene, na ndatongete na ũhoro wa Ngai.

22Agĩcoka akĩĩra arutwo ake atĩrĩ, Nĩ ũndũ ũcio ngũmwĩra atĩrĩ, Tigagai gwĩtanga nĩ ũndũ wa muoyo wanyu, o kĩrĩa mũrĩrĩaga; o na kana nĩ ũndũ wa mĩĩrĩ yanyu, o kĩrĩa mũrĩĩhumbaga. 23Nĩ gũkorũo muoyo nĩũkĩrĩte irio, naguo mwĩrĩ nĩũkĩrĩte nguo. 24Taranagiai ũhoro wa mahuru, atĩ matihandaga irio, kana makagetha; na matirĩ na nyũmba cia kũiga indo, o na kana makũmbĩ; nake Ngai nĩamaheaga irio: kaĩ mũtakĩrĩ bata mũno gũkĩra nyoni! 25Na rĩrĩ, nũ wanyu ũngĩhota kwĩongerera kĩũga gĩake mũkono ũmwe nĩ ũndũ wa gwĩtangĩkĩra? 26Tondũ ũcio-rĩ, mũngĩkorũo nĩmũremagwo nĩ gwĩka o ũndũ ũrĩa mũnyinyi, nĩ kĩ gĩtũmaga mũtangĩkĩre maũndũ marĩa mangĩ? 27#1 Ath 10.4-7; 2 Maũ 9.3-6.Taranagiai ũhoro wa itoka, ũrĩa ikũraga: itiĩnogagia ikĩruta wĩra, kana ikogotha ndigi; no ngũmwĩra atĩrĩ, O na Solomoni, arĩ na mwago wake wothe, ndaagemete ta kĩmwe gĩacio. 28Na angĩkorũo Ngai nĩagemagia nyeki ya gĩthaka ũguo, ĩrĩa ĩgũtinda ho ũmũthĩ, na rũciũ ĩgaikio icua-inĩ, githĩ ndangĩkĩria mũno kũmũhe nguo, inyuĩ mwĩtĩkĩtie o hanini? 29Na inyuĩ-rĩ, tigagai gwĩcarĩria kĩrĩa mũrĩrĩaga, na kĩrĩa mũrĩnyuaga, na mũtigatuĩke andũ a mathangania. 30Nĩ gũkorũo indo icio ciothe nĩcio andũ a ndũrĩrĩ cia gũkũ thĩ mecaragĩria: na rĩrĩ, Ithe wanyu nĩoĩ atĩ nĩmũbataragio nĩ indo icio. 31No rĩrĩ, caragiai ũthamaki wa Ngai, nacio indo icio nĩmũgakĩrĩrĩrio. 32Inyuĩ a karũũru gaka kanini, tigagai gwĩtigĩra, nĩ gũkorũo Ithe wanyu nĩeyendeire kũmũhe ũthamaki ũcio. 33Endiai indo iria mũrĩ nacio, mũcoke mũciheanage na tha; mwĩtumĩre tũmondo twa mbia tũrĩa tũtakũraga, nĩ getha mũkagĩa na ũtonga ũrĩa ũtathiraga o Igũrũ, kũrĩa gũtarĩ mũici ũthengagĩrĩra, o na kũrĩa memenyi itaninaga indo. 34Nĩ gũkorũo o kũrĩa ũtonga wanyu ũrĩ, nĩkuo ngoro cianyu nacio ikoragwo irĩ.

35 # Mat 25.1-13. Ikaragai mwĩhotorete, na mũrĩ na matawa manyu magĩakanaga; 36#Mar 13.34-36.na inyuĩ ene mũtuĩke ta andũ metereire mwathani wao, agĩcoka oimĩte iruga-inĩ rĩa kĩhikanio; nĩ getha, rĩrĩa agakinya aringaringe mũrango, mamũhingũrĩre o rĩmwe. 37Gũkena-rĩ, nĩ ngombo iria igakorũo ciĩiguĩte rĩrĩa mwathani wacio agakinya: ngũmwĩra na ma atĩ nĩakehotora aciikarie metha-inĩ irĩe, nake oke acirehere irio. 38Nake angĩkinya ta ũtukũ gatagatĩ kana ta thaa kenda, acikore ciĩiguĩte ũguo, gũkena-rĩ, nĩ ngombo icio. 39#Mat 24.43,44.No rĩrĩ, menyai ũũ, atĩ korũo mwene nyũmba nĩaamenyaga thaa ĩrĩa mũici egũũka, nĩangĩakorirũo eiguĩte, na ndareke nyũmba yake yenjwo. 40O na inyuĩ ikaragai mwĩhaarĩirie: nĩ gũkorũo Mũrũ wa Mũndũ nĩagoka o thaa ĩrĩa mũtegereirie.

41Nake Perero akĩmũũria atĩrĩ, Mwathani, nĩ ithuĩ wera ngerekano ĩo, kana nĩ andũ othe? 42Nake Mwathani akĩmũũria atĩrĩ, Rĩu-rĩ, mũrori indo ũrĩa ũngĩĩhokeka na mũũgĩ-rĩ, o ũrĩa ũgatuwo nĩ mwathani wake wa kũramataga nyũmba yake yothe, na aheage andũ irio ciao o hĩndĩ yakinya, nĩ ũrĩkũ? 43Gũkena-rĩ, nĩ ngombo ĩo, ĩngĩkorũo ĩgĩĩka ũguo mwathani wayo aakinya. 44Ti-itherũ ngũmwĩra atĩrĩ, atĩ nĩakamĩtua ya kũramataga indo ciake ciothe. 45Ĩndĩ ngombo ĩo ĩngĩkorũo ĩĩĩrĩte na ngoro atĩrĩ, Mwathani wakwa ndehiũha gũũka; na ĩitĩke kũhũra ndungata iria cia arũme na cia andũ-a-nja, na kũrĩa na kũnyua, na kũrĩwo-rĩ, 46mwathani wa ngombo ĩo nĩagakinya mũthenya ũrĩa ĩtegereirie, o na thaa ĩrĩa ĩtoĩ, na amĩhũre mũno, na amĩtuĩre cira o ta ũrĩa gũtuagĩrũo arĩa matehokekete. 47Nayo ngombo ĩrĩa yamenyete ũrĩa mwathani wayo endaga, na ndĩigana kwĩhaarĩria, kana gwĩka ũrĩa endaga-rĩ, nĩĩkahũrũo mĩtunda mĩingĩ. 48No ĩrĩa ĩtaamenyete-rĩ, na ĩgĩĩka maũndũ ma gũtũma ĩhũrũo, ĩo nĩĩkahũrũo mĩtunda ĩtarĩ mĩingĩ. Na rĩrĩ, mũndũ ũrĩa ũheetwo indo nyingĩ, nĩwe ũgetio nyingĩ; na ũrĩa ũhithĩtio indo nyingĩ nĩ andũ, nĩwe ũgacoka gwĩtio nyingĩ makĩria.

49Njũkĩte gũikia mwaki thĩ; na rĩrĩ, ngũcoka kwenda kĩ, ũngĩkorũo nĩũrĩkĩtie gwakio? 50#Mar 10.38.No rĩrĩ, ndĩ na ũbatithio ndĩĩbatithio naguo; na kũhinyĩrĩrio ndĩĩhinyagĩrĩrio atĩa ũgĩgakinya! 51Anga mũkwĩgereria atĩ njũkĩte kũrehe thayũ gũkũ thĩ? Ngũmwĩra atĩrĩ, Tiguo, no makĩria nĩ nduĩkano: 52tondũ kuuma rĩu, nĩkũrĩkoragwo andũ atano a nyũmba ĩmwe matuĩkanĩte: atatũ magakararia erĩ, nao erĩ makararie atatũ. 53#Mik 7.6.Nao magakorũo matuĩkanĩte ũũ: mũthuri na mũriũ, o na mũriũ na ithe; ningĩ mũtumia na mwarĩ, o na mũirĩtu na nyina; na ningĩ nyaciara na mũtumia wa mũriũ, ningĩ mũtumia wa mũriũ na nyaciarawe.

54Nake akĩĩra andũ a kĩrĩndĩ nao atĩrĩ, Rĩrĩa muonaga itu rĩkĩambata, riumĩte na kũrĩa ithũĩro, hĩndĩ ĩo muugaga atĩrĩ, Nĩgũkũgĩa mbura; na gũgatuĩka ũguo. 55Na rĩrĩa muonaga rũhuho rũkĩhurutana ruumĩte o kũrĩa gũthini, muugaga atĩrĩ, Nĩgũkũgĩa ũrugarĩ mũnene; na gũgatuĩka ũguo. 56Inyuĩ hinga ici! Nĩmũũĩ gũkũũrana ũrĩa kũrĩhaana gũkũ thĩ, o na matu-inĩ; no rĩrĩ, nĩ kĩ gĩtũmaga mwage gũkũũrana ũhoro wa ihinda rĩrĩ? 57Na mwagaga inyuĩ ene gwĩtuĩra ũhoro ũrĩa wagĩrĩire nĩ ũndũ kĩ? 58Nĩ ũndũ ũcio-rĩ, hĩndĩ ĩrĩa mũgũthiĩ na mũgwĩtia kũrĩ mũnene, mũkĩrĩ njĩra nake, geria mũno kũiguana nake; ndakae gũgũtwara kũrĩ mũtuanĩri cira, nake akũneane kwĩ mwĩtanĩria; nake mwĩtanĩria agũikie korokoro-inĩ. 59Ngũkwĩra atĩrĩ, Ndũrĩ hingo ũkoima ho, ũtarĩhĩte thirĩ wothe, ũkaũnina biũ.

Currently Selected:

LUKA 12: OGKBIBLE

Highlight

Copy