JOHANA 20

1Na rĩrĩ, mũthenya wa kwambĩrĩria kiumia Mariamu Mũmagidali akĩroka mbĩrĩra-inĩ rũcinĩ tene, kũrĩ o nduma, akĩona ihiga rĩĩ ithengie muungu-inĩ. 2Agĩgĩteng’era, agĩthiĩ gwĩ Simoni Petero, na kwĩ mũrutwo ũrĩa ũngĩ, ũrĩa Jesu endete, akĩmera atĩrĩ, Nĩmarutĩte Mwathani muungu-inĩ, na tũtiũĩ harĩa mamũigĩte. 3Petero agĩkiumagara o na mũrutwo ũcio ũngĩ, magĩthiĩ marorete mbĩrĩra-inĩ. 4Makĩgwata gũteng’era o erĩ, nake mũrutwo ũcio ũngĩ agĩkĩria Petero ihenya, agĩkinya muungu-inĩ mbere; 5na aainamĩrĩra aarora thĩinĩ, akĩona matama marĩa ma gatani me maige thĩ, na ndatonye. 6Simoni Petero nake agĩgĩũka, amũrũmĩrĩire, agĩtonya muungu thĩinĩ; nake akĩona matama macio ma gatani me maige thĩ, 7o na gĩtambaya nakĩo kĩrĩa kĩarĩ mũtwe wake, gĩtaigĩtwo hamwe na matama macio ma gatani, nĩ gũkũnjwo gĩakũnjĩtwo gĩkaigwo handũ mwanya. 8Hĩndĩ ĩo mũrutwo ũcio ũngĩ nake agĩgĩtonya, ũcio waambire gũkinya muungu-inĩ, nake akĩona, agĩĩtĩkia. 9Amu nginya hĩndĩ ĩo matiamenyete wega ũhoro ũrĩa wandĩkĩtwo, atĩ no mũhaka acoke ariũke oime kwĩ arĩa akuũ. 10Arutwo acio magĩgĩcoka kũinũka kwao mũciĩ.

11Na rĩrĩ, Mariamu agĩtigwo arũngiĩ muungu-inĩ nja akĩrĩraga; agĩkĩinamĩrĩra o akĩrĩraga, akĩbara muungu thĩinĩ, 12akĩona araika erĩ me na nguo njerũ maikaire thĩ, ũmwe agaikara mũtwe-inĩ, na ũmwe magũrũ-inĩ, harĩa mwĩrĩ wa Jesu waigĩtwo. 13Makĩmũũria, Ũrarĩra nĩ ũndũ kĩ, mũtumia ũyũ? Nake akĩmera atĩrĩ, Nĩ ũndũ nĩmarutĩte Mwathani wakwa, na ndiũĩ harĩa mamũigĩte. 14O aarĩkia kuuga ũguo, akĩĩhũgũra, akĩona Jesu arũngiĩ, na ndamenye nĩwe Jesu. 15Nake Jesu akĩmũũria, Nĩ kĩ gĩtũmĩte ũrĩre, mũtumia ũyũ? nũ ũracaria? Nake akĩmwĩra atĩrĩrĩ, oĩ nĩwe mũrĩmi wa mũgũnda ũcio, Mũthuri ũyũ, akorũo nĩwe ũmũrutĩte haha, njĩra harĩa ũmũigĩte, thiĩ ngamuoe. 16Jesu akĩmwĩra, Mariamu-ĩ. Nake akĩmũhũgũkĩra, akĩmwĩra na Kĩhibirania atĩrĩ, Raboni; naguo no ta kuuga, Mũrutani. 17Nake Jesu akĩmwĩra, Tiga kũ’nyita, amu ndirĩ ndĩraambata thiĩ gwĩ Ithe witũ; thiĩ kũrĩ ariũ a Awa, ũmere atĩrĩ, Ndĩ wa kwambata thiĩ kũrĩ Awa, na nowe Ithe wanyu; na kũrĩ Ngai wakwa, na nowe Ngai wanyu. 18Nake Mariamu Mũmagidali agĩthiĩ akĩĩra arutwo atĩrĩ, Nĩnyonete Mwathani; na akĩmera atĩ nĩwe wamwĩra maũndũ macio. 19Ningĩ mũthenya o ũcio wa kwambĩrĩria kiumia, gũkinyĩte hwaĩ-inĩ, na mĩrango ĩkahingwo kũu arutwo maarĩ, nĩ ũndũ wa gwĩtigĩra Ayahudi, Jesu agĩũka akĩrũgama gatagatĩ-inĩ, akĩmera atĩrĩ, Gĩai na thayũ.

20Na aarĩkia kuuga ũguo, akĩmonia hĩ ciake o na mbaru. Nao arutwo mona Mwathani magĩkena. 21Jesu agĩkĩmera rĩngĩ atĩrĩ, Gĩai na thayũ; o ta ũrĩa Ithe witũ aandekirie niĩ, noguo ndamũrekia inyuĩ. 22Na aarĩkia kuuga ũguo akĩmaheeherera, akĩmera, Iyũkiai Roho Mũtheru; 23#Mat 16.19; 18.18.andũ arĩa othe mwarekera mehia mao, nĩmaarekerũo; arĩa othe mwarega kũrekera mehia mao, megũikara matarekeirũo.

24Na rĩrĩ, ũmwe wa arĩa ikũmi na erĩ, na nĩ Toma ũrĩa wetagwo Wamahatha, ũcio ndaarĩ nao hĩndĩ ĩo Jesu okire. 25Tondũ ũcio arutwo arĩa angĩ makĩmwĩra, Nĩtuonete Mwathani. Nake akĩmera atĩrĩ, Itonete irema cia mĩthumarĩ hĩ ciake, na ngatonyia kĩara gĩakwa irema-inĩ icio cia mĩthumarĩ, na ngatonyia guoko gwakwa mbaru-inĩ ciake-rĩ, ndingĩĩtĩkia o na hanini.

26Ningĩ matukũ maathira anana, arutwo ake maarĩ kuo rĩngĩ kũu nyũmba thĩinĩ, na maarĩ na Toma. Nake Jesu agĩũka, mĩrango ĩrĩ mĩhinge, akĩrũgama gatagatĩ-inĩ, akiuga, Gĩai na thayũ. 27Agĩcoka akĩĩra Toma atĩrĩ, Rehe kĩara gĩaku haha, ũrore hĩ ciakwa; na ũrehe guoko gwaku, ũtonyie mbaru-inĩ ciakwa; na ũtige gũtuĩka wa kũrega gwĩtĩkia, ũtuĩke wa gwĩtĩkia. 28Toma agĩcokia akĩmwĩra atĩrĩ, Mwathani wakwa, Ngai wakwa! 29Nake Jesu akĩmwĩra atĩrĩrĩ, Wee tondũ nĩũnyonete, nĩkĩo wĩtĩkĩtie; gũkena-rĩ, nĩ arĩa matonete, na no metĩkĩtie.

30Gwĩ ciama ingĩ nyingĩ Jesu ekire arutwo me ho, itaandĩkĩtwo mbuku ĩno; 31no icio nĩciandĩkĩtwo nĩ getha mwĩtĩkie atĩ Jesu nĩwe Kristo, Mũrũ wa Ngai; na tondũ wa gwĩtĩkia mũgĩe na muoyo na ũndũ wa rĩĩtwa rĩake.

Currently Selected:

JOHANA 20: OGKBIBLE

Highlight

Copy