JOHANA 2

1NINGĨ mũthenya wa gatatũ gũkĩgĩa na kĩhikanio kũndũ gwĩtagwo Kana ya Galili, nake nyina wa Jesu aarĩ ho; 2o na Jesu nake nĩetirũo, na arutwo ake, mathiĩ kĩhikanio kĩu. 3Nayo ndibei yaaga kũmaigana, nyina wa Jesu akĩmwĩra atĩrĩ, Matirĩ na ndibei. 4Nake Jesu akĩmwĩra, Mũtumia ũyũ, ũhoro nĩ ũrĩkũ witũ nawe? Ihinda rĩakwa rĩtirĩ rĩrakinya. 5Nyina agĩkĩĩra ndungata atĩrĩrĩ, O ũrĩa ekũmwĩra, ĩkai guo. 6Na rĩrĩ, kwarĩ ndigithũ ithathatũ cia mahiga ciaigĩtwo kuo nĩ ũndũ wa mĩtugo ya Ayahudi ya gwĩtheria, ĩmwe no gũthirĩra maĩ ma mũtũngi ũrĩa mũnene maita merĩ kana matatũ. 7Nake Jesu akĩmera atĩrĩ, Iyũriai ndigithũ icio maĩ. Magĩgĩciiyũria o riita. 8Agĩcoka akĩmera atĩrĩ, Rĩu tahiai, mũtwarĩre mũtabania wa iruga. Nao makĩmũtwarĩra. 9Mũtabania wa iruga nake aacama maĩ macio matuĩkĩte ndibei, na ndamenye harĩa yumĩte (ĩndĩ ndungata iria ciatahĩte maĩ, cio nĩciamenyaga), ũcio mũtabania wa iruga agĩĩta mũhikania, 10akĩmwĩra atĩrĩ, Mũndũ aambaga kũruta ndibei ĩrĩa njega; na andũ maarĩkia kũnyua mũno, akaruta ĩrĩa ĩtarĩ njega mũno; wee-rĩ, ũkũigĩte ndibei ĩrĩa njega ũkamĩruta rĩu. 11Jesu nĩekire ũguo kũu Kana ya Galili, akĩambĩrĩria ciama ciake, agĩkĩonania ũnene wake; nao arutuo ake makĩya kũmwĩhoka.

12 # Mat 4.13. Thutha ũcio agĩtherera Kaperinaumu, we, na nyina, na ariũ a nyina, na arutwo ake; na magĩikara kuo tũtukũ tũtarĩ tũingĩ.

13 # Thama 12.1-27. Na rĩrĩ, Bathaka ya Ayahudi nĩyatuĩte gũkinya, nake Jesu akĩambata Jerusalemu. 14Na kũu hekarũ-inĩ agĩkora andũ arĩa mendagia ng’ombe na ng’ondu na ndutura, o na arĩa maakũũranagĩria andũ mbia maikaire thĩ kuo: 15agĩthondeka mũcarica na mĩkanda, akĩmarutũrũra kũu hekarũ othe, o na ng’ondu na ng’ombe; o nacio mbeca cia arĩa maahunjithagia mbia agĩciita thĩ, na akĩgũithia metha ciao; 16akĩĩra arĩa mendagia ndutura atĩrĩ, Umiai ici gũkũ; tigai gũtua nyũmba ya Awa nyũmba ya thogora. 17#Thab 69.9.Nao arutwo ake makĩririkana atĩ nĩ haandĩke atĩrĩ, Nĩ kĩyo kĩrĩa ndĩ nakĩo kĩa nyũmba yaku gĩkandĩa. 18Nao Ayahudi magĩgĩcokia makĩmwĩra atĩrĩ, Rĩu-rĩ, tondũ ũreka maũndũ maya-rĩ, kĩmenyithia nĩ kĩrĩkũ ũgũtuonia? 19#Mat 26.61; 27.40; Mar 14.58; 15.29.Nake Jesu agĩcokia ũhoro akĩmera, Thariai hekarũ ĩno, na mĩthenya ĩtatũ nĩngamĩcokia igũrũ. 20Nao Ayahudi magĩkiuga atĩrĩ, Nyũmba ĩno-rĩ, ĩninĩte mĩaka mĩrongo ĩna na ĩtandatũ ĩgĩakwo, nawe githĩ ũkamĩcokia igũrũ mĩthenya ĩtatũ ĩrĩĩke? 21No we nĩ hekarũ ya mwĩrĩ wake aagwetaga. 22Na tondũ ũcio aarĩkia kũriũkio akoima kwĩ arĩa akuũ, arutwo ake magĩkĩririkana atĩ nĩoigire ũguo; magĩgĩĩtĩkia ũhoro ũrĩa mwandĩke, o na kiugo kĩu Jesu oigire.

23Na rĩrĩ, hĩndĩ ĩo aarĩ kũu Jerusalemu Bathaka-inĩ hingo ya gĩathĩ, andũ aingĩ makĩya kwĩhoka rĩĩtwa rĩake mona ciama ciake iria ekaga. 24No Jesu we ndaigana kwĩhoka ũhoro wao, nĩ gũkorũo nĩoĩ andũ othe, 25na tondũ ndaabataragio nĩ kuumbũrĩrũo ũhoro wa mũndũ; amu we mwene nĩoĩ ngoro ciao.

Currently Selected:

JOHANA 2: OGKBIBLE

Highlight

Copy