KĨAMBĨRĨRIA 48

1Na gũgĩkinya atĩrĩ, atĩ thutha wa maũndũ macio, Jusufu akĩĩrũo ũũ: Atĩrĩrĩ, thoguo nĩ mũrũaru; agĩgĩthiĩ kũmũrora me na ariũ ake erĩ, Manase na Efiraimu. 2Nake Jakubu agĩkĩĩrũo ũũ: Atĩrĩrĩ, mũrũguo Jusufu nĩokĩte gũkũrora; nake Isiraeli akĩĩyũmĩrĩria, agĩĩtiira arĩ ũrĩrĩ. 3#Kĩam 28.13,14.Nake Jakubu akĩĩra Jusufu atĩrĩ, Ngai Mwene-Hinya-Wothe nĩaanyumĩrĩire ndĩ Luzu, bũrũri wa Kanaani, akĩndathima, 4akĩnjĩra ũũ: Atĩrĩrĩ, nĩngatũma ũciarũrũke mũno, na ngũingĩhie, o na ndũme ũtuĩke kĩrĩndĩ kĩa ndũrĩrĩ; naguo bũrũri ũyũ ngaũhe rũciaro rũaku, rũrĩa rũgoka thutha waku, ũtuĩke waruo tene na tene. 5Na rĩrĩ, ariũ aku erĩ, aya maaciarĩirũo bũrũri ũyũ wa Misiri itanoka kũrĩ wee gũkũ Misiri, nĩ akwa; ti-itherũ Efiraimu na Manase megũtuĩka akwa, o ta ũrĩa Reubeni na Simeoni marĩ akwa. 6Nacio njiaro ciaku cia thutha wao nĩcio igũtuĩka ciaku; na rĩrĩ, ha ũhoro wa igai rĩacio-rĩ, irĩĩtanagĩrio na ariũ aya angĩ a ithe wacio. 7#Kĩam 35.16-19.Na rĩrĩ, ha ũhoro wakwa-rĩ, hĩndĩ ĩrĩa ndoimaga Padani, nĩndakuĩrĩirũo nĩ Rakeli njĩra-inĩ, o kũu bũrũri wa Kanaani tũtigairie gatĩĩna karaya tũkinye Efiratha, ngĩkĩmũthika hau njĩra-inĩ ya gũthiĩ Efiratha (na nĩkuo Bethi-lehemu). 8Nake Isiraeli akĩbara ariũ a Jusufu, akĩũria atĩrĩ, Aya nĩ a? 9Jusufu agĩkĩĩra ithe atĩrĩ, Nĩ ariũ akwa arĩa Ngai aa’heire ndĩ gũkũ. Ithe agĩkĩmwĩra atĩrĩ, Ta mareharehe harĩ niĩ, ndĩmarathime. 10Na rĩrĩ, maitho ma Isiraeli nĩmorĩte nĩ gũkũra na tondũ ũcio ndonaga wega. Nake Jusufu agĩkĩmatwaratwara harĩ we, Jakubu agĩkĩmamumunya, na akĩmahĩmbĩria ngingo. 11Ningĩ Isiraeli akĩĩra Jusufu atĩrĩ, Ndiecirĩtie atĩ nĩngacoka kuona ũthiũ waku; no rĩu Ngai nĩatũmĩte atĩ o nayo mbeũ yaku ndĩmĩone. 12Jusufu agĩkĩeheria ariũ ake maru-inĩ ma ithe, agĩcoka akĩinamĩrĩra, agĩturumithia ũthiũ thĩ. 13Ningĩ Jusufu akĩmoya erĩ, akĩnyita Efiraimu na guoko gwake kwa ũrĩo, amwerekeirie guoko-inĩ gwa Isiraeli kwa ũmotho, nake Manase akĩmũnyita na guoko kwa ũmotho, amwerekeirie guoko-inĩ gwa ithe kwa ũrĩo, agĩkĩmatwaratwara harĩ we. 14Isiraeli agĩgĩtambũrũkia guoko gwake kwa ũrĩo, agĩkũigĩrĩra mũtwe wa Efiraimu, ũcio mũnyinyi; nakuo guoko gwake kwa ũmotho agĩkũigĩrĩra mũtwe wa Manase; akĩhĩtũkania moko make ũguo arĩ ũrĩa oĩ; nĩ ũndũ Manase nĩwe warĩ wa irigithathi. 15Agĩkĩrathima Jusufu, akiuga atĩrĩ, Ngai ũrĩa watongoragia aa baba, nao nĩo Iburahimu na Isaaka, o we ũrĩa ũtũire a’heaga irio matukũ mothe ma muoyo wakwa nginya ũmũthĩ, 16na mũraika ũrĩa wangũũrire akĩnduta ũũru-inĩ wothe, arorathima tũmwana tũtũ, narĩo rĩĩtwa rĩakwa na rĩa aa baba, Iburahimu na Isaaka, rĩrogwetanagio natuo; na ningĩ tũroingĩha tũtuĩke kĩrĩndĩ kĩingĩ gũkũ thĩ. 17Na rĩrĩ, Jusufu ona atĩ ithe ekũigĩrĩra guoko gwake kwa ũrĩo mũtwe wa Efiraimu, ũndũ ũcio ũkĩmũiguithia ũũru, agĩkĩoya guoko gwa ithe na igũrũ, akweherie igũrũ rĩa mũtwe wa Efiraimu akũigĩrĩre mũtwe wa Manase. 18Jusufu agĩkĩĩra ithe atĩrĩ, Ũguo tiguo, baba; nĩ ũndũ ũyũ nĩwe wa irigithathi; igĩrĩra guoko gwaku kwa ũrĩo mũtwe wake. 19Ithe agĩkĩrega, akiuga atĩrĩ, Ũndũ ũcio nĩndĩũũĩ, mũrũ wakwa, nĩndĩũũĩ; o nake nĩagatuĩka rũrĩrĩ, na atuĩke mũnene; no rĩrĩ, mũrũ wa nyina ũyũ mũnyinyi, nĩagatuĩka mũnene kũmũkĩra, o nacio njiaro ciake nĩigatuĩka ndũrĩrĩ nyingĩ. 20#Ahib 11.21.Agĩkĩmarathima mũthenya o ro ũcio, akiuga atĩrĩ, Isiraeli akarathimana akĩgwetaga rĩĩtwa rĩaku, akiugaga atĩrĩ, Ngai arogũtua o ta Efiraimu na Manase; hau agĩkĩamba kũgweta Efiraimu mbere ya Manase. 21Isiraeli agĩkĩĩra Jusufu ũũ: Atĩrĩrĩ, niĩ ngiriĩ gũkua, no rĩrĩ, Ngai nĩegũikara hamwe na inyuĩ, na nĩakamũcokia bũrũri wa maithe manyu. 22Ningĩ igai-inĩ rĩaku-rĩ, ngũheete rũgongo rũmwe ũkĩrie ariũ a thoguo; naruo nĩruo rũrĩa ndatunyire Amori na rũhiũ rũakwa rũa njora, o na ũta wakwa.

Currently Selected:

KĨAMBĨRĨRIA 48: OGKBIBLE

Highlight

Copy