KĨAMBĨRĨRIA 37

1Nake Jakubu agĩgĩtũũra bũrũri ũcio ithe aatũũrĩte e mũgeni, na nĩguo bũrũri wa Kanaani. 2Naguo ũhoro wa njiaro cia Jakubu nĩguo ũyũ: Jusufu e wa mĩaka ikũmi na mũgwanja-rĩ, aarĩithagia mbũri cia ithe me na ariũ a ithe; na aarĩ mwanake mũnyinyi wa thiritũ ya ariũ a Biliha, na ariũ a Zilipa, atumia a ithe; nake Jusufu agĩkĩhe ithe wao ũhoro wa ũrĩa acio angĩ maacukĩtwo. 3Na atĩrĩ, Isiraeli nĩendete Jusufu mũno gũkĩra ciana iria ingĩ ciake ciothe, nĩ ũndũ nĩwe mũriũ ũrĩa aaciarĩte e mũkũrũ; na nĩaamũtumithĩirie kanjũ wa rangi wa mĩthemba mĩingĩ. 4Nao ariũ arĩa angĩ a ithe makĩona atĩ ithe wao nĩamwendete gũkĩra acio angĩ othe, magĩkĩmũthũũra, na makĩremwo nĩ gũcoka kũmwarĩria na wega. 5Nake Jusufu agĩkĩrota kĩroto, akĩhe ariũ a ithe ũhoro wakĩo; nao magĩkĩrĩrĩria kũmũthũũra nĩ ũndũ wa ũhoro ũcio. 6Agĩkĩmera atĩrĩ, Ta thikĩrĩriai, ndamũthaitha, kĩroto gĩkĩ ndotete: 7atĩrĩrĩ, nĩ kuoha tũrohaga itĩya cia ngano tũrĩ mũgũnda; na atĩrĩ, gĩtĩya gĩakwa kĩrehanda na igũrũ, nacio itĩya cianyu irathiũrũrũkĩria gĩakwa na mbarĩ ciothe irakĩinamĩrĩra ikĩĩ’nyihĩrie. 8Nao ariũ a ithe magĩkĩmũũria atĩrĩ, Anga gũthamaka waya gũgĩtũthamakĩra wee? O na kana ũgagĩtwatha? Magĩgĩkĩrĩrĩria kũmũthũũra mũno nĩ ũndũ wa iroto ciake, o na nĩ ũndũ wa ndeto iria aaragia. 9Ningĩ akĩrota kĩroto kĩngĩ, agĩkĩhe ariũ a ithe ũhoro wakĩo, akiuga ũũ: Atĩrĩrĩi, rĩu ndĩ kũrota kĩroto kĩngĩ na nĩkĩo gĩkĩ, atĩrĩ, Riũa na mweri, o na njata ikũmi na ĩmwe, ikĩnyinamĩrĩra ciĩĩ’nyihĩrie. 10Nake Jusufu akĩĩra ithe, o na ariũ a ithe, ũhoro wakĩo; ithe agĩkĩmũkaania, akĩmũũria atĩrĩ, Kaĩ kĩroto kĩu ũrotete gĩgĩtariĩ atĩa? Anga niĩ, na nyũkwa, o na ariũ a thoguo twaya gũkũinamĩrĩra, wee? 11#Atũm 7.9.Ariũ a ithe magĩkĩmũiguĩra ũiru; no rĩrĩ, ithe agĩtũũra aigĩte kiugo kĩu ngoro. 12Ningĩ ariũ a ithe magĩgĩthiĩ kũrĩi-thia mbũri cia ithe wao mwena wa Shekemu. 13Nake Isiraeli akĩĩra Jusufu atĩrĩ, Githĩ ariũ a thoguo matirarĩithia mbũri Shekemu? Ta gĩũkĩre ngũtũme kũrĩ o. Nake Jusufu akĩmũcokeria, akiuga atĩrĩ, Niĩ ũyũ haha. 14Isiraeli agĩkĩmwĩra atĩrĩ, Ũkĩra ũkarore kana ariũ a thoguo makĩrĩ o ahoro, o na kana mbũri nacio ikĩrĩ o ho, ũcoke ũ’he ũhoro. Agĩkĩmũrekia, nake agĩkiuma kũu gĩtuamba kĩa Hebironi, agĩkinya Shekemu.

15Na rĩrĩ, mũndũ ũmwe agĩkĩmũkora agĩcanga kũu werũ-inĩ, agĩkĩmũũria atĩrĩ, Nĩ kĩ ũracaria? 16Jusufu agĩkĩmwĩra atĩrĩ, Nĩ ariũ a awa ndĩracaria; ta njĩrĩra harĩa mekũrĩithia. 17Nake mũndũ ũcio akĩmwĩra atĩrĩ, Nĩmaathiĩ maathenga haha, tondũ ndaigua makiuga atĩrĩ, Nĩtũthiĩi Dothani. Jusufu agĩkĩrũmĩrĩra ariũ a ithe, akĩmakora kũu Dothani. 18Nao magĩkĩmuona e haraya; na atanamakuhĩhĩria, makĩmũcirĩra, makiuga mamũũrage. 19Magĩkĩaranĩria, makiuga atĩrĩ, Onei mũnene wa iroto nĩagĩũkire! 20Rĩu-rĩ, kĩrekei tũmũũrage, tũmũikie irima rĩmwe rĩa marima maya, tũkoiga atĩrĩ, Nĩ nyamũ njũru ĩmũrĩĩte; tũgakĩona ũrĩa iroto ciake igakinya! 21Nake Reubeni aaigua ũhoro ũcio, akĩmũhonokia harĩ moko mao, akiuga atĩrĩ, Nĩtũtigei kũmũruta muoyo. 22Ningĩ Reubeni akĩmera atĩrĩ, Tigai gũita thakame; mũikiei irima rĩrĩ rĩĩ haha werũ-inĩ, no ti wega mũmũhutie na moko manyu. Nake oigire ũguo nĩ getha amũhonokie amũrute moko-inĩ mao, amũcokerie ithe. 23Na gũgĩkinya atĩrĩ, atĩ Jusufu aakinya harĩ ariũ a ithe, magĩkĩmwaũra kanjũ wake, o kanjũ ũcio wa rangi wa mĩthemba mĩingĩ ũcio ehumbĩte, 24magĩkĩmũnyita, makĩmũikia irima; narĩo irima rĩu rĩarĩ itheri, rĩtiarĩ maĩ thĩinĩ. 25Nao magĩikara thĩ marĩe irio; magĩgĩtiira maitho magĩcũthĩrĩria, makĩona Aishumaeli gĩkundi magĩthiĩ rũgendo, moimĩte Gileadi, marĩ na ngamĩra ciao ikuuĩte mahuti marĩa manungaga wega, na ubani, na ũũkĩ-wa-ngoma wĩtagwo manemane, magĩciikũrũkia macitware Misiri. 26Juda agĩkĩũria ariũ a ithe atĩrĩ, Hakĩrĩ kĩguni kĩrĩkũ tũngĩũraga mũrũ wa ithe witũ, tũhithe ũhoro wa thakame yake ĩrĩa tũitĩte? 27Ũkai tũmwenderie Aishumaeli aya tũtige kũmũhutia na moko maitũ; nĩ ũndũ nĩ mũrũ wa ithe witũ, na tũrĩ a mũthimo ũmwe nake. Nao ariũ a ithe magĩkĩmũigua. 28#Atũm 7.9.Naho hau maarĩ hagĩkĩhĩtũkĩra Amidiani a wonjorithia. Makĩmũgucia, makĩmũruta irima, makĩmwendia cekeri mĩrongo ĩĩrĩ cia betha harĩ Aishumaeli acio. Nao andũ acio magĩthiĩ na Jusufu makĩmũkinyia Misiri. 29Nake Reubeni aacoka irima-inĩ, agĩkĩona atĩ Jusufu ndarĩ irima; agĩtembũranga nguo ciake. 30Agĩcoka harĩ ariũ a ithe, akĩmera atĩrĩ, Mwana ũrĩa ndarĩ ho; na niĩ-rĩ, ngũkĩgera kũ? 31Magĩkĩoya kanjũ wa Jusufu, magĩthĩnja thenge, makĩũtobokia thakame-inĩ yayo; 32magĩgĩtwarithia kanjũ ũcio wa rangi wa mĩthemba mĩingĩ makĩũhirĩra ithe wao; makĩmwĩra atĩrĩ, Kanjũ ũyũ nĩ kuona twawona; rĩu ta no kĩmenye kana nĩguo kanjũ wa mũrũguo, kana tiguo. 33Nake Jakubu akĩũmenya, akiuga atĩrĩ, Ti-itherũ nĩguo kanjũ wa mũrũ wakwa; nĩ nyamũ njũru ĩmũrĩĩte; hatirĩ nganja Jusufu nĩ mũtinangie nĩ nyamũ. 34Jakubu agĩgĩtembũranga nguo ciake, akĩĩhotora tama wa ikũnia njohero, agĩkĩrĩrĩra mũriũ matukũ maingĩ. 35Nao ariũ ake othe, na airĩtu ake othe, magĩũkĩra makamũkirie maithori; no akĩrega gũkirio, akiuga atĩrĩ, Aca-ni, ngũtũũra ndĩ o na maithori o nginya rĩrĩa ngathikwo, nũmĩrĩre mũrũ wakwa o kũu Kwa-ngoma. Ithe agĩkĩmũrĩrĩra.

36Nao Amidiani acio magĩkĩendia Jusufu kũu Misiri, makĩmwenderia Potifaru, mũnene wa athigari a kũrangĩra korokoro, wehokeirũo wĩra wa nyũmba ya Firauni.

Currently Selected:

KĨAMBĨRĨRIA 37: OGKBIBLE

Highlight

Copy