KĨAMBĨRĨRIA 33

1Na rĩrĩ, Jakubu agĩtiira maitho, agĩcũthĩrĩria, akĩona Esau, arehanĩte na andũ magana mana, agĩkĩgayanĩria Lea na Rakeli na ndungata iria igĩrĩ cia andũ-a-nja ciana. 2Nake akĩiga ndungata icio cia andũ-a-nja na ciana ciacio o mbere, nake Lea na ciana ciake akĩmaiga thutha wao, nake Rakeli me na Jusufu makĩrigia thutha. 3Nake we mwene akĩhĩtũka akĩmatongoria, agĩthiĩ akĩĩinamagĩrĩria na thĩ meinamia mũgwanja, o nginya agĩkinya hakuhĩ na mũrũ wa nyina. 4Esau agĩgĩteng’era akamũtũnge, akĩmũhĩmbĩria ngingo, akĩmũmumunya; makĩrĩranĩra. 5Nake Esau agĩtiira maitho, akĩona atumia na ciana; akĩũria atĩrĩ, Andũ aya wĩ nao nĩ a ũ? Nake Jakubu akiuga atĩrĩ, Nĩ ciana iria Ngai a’heete, niĩ ndungata yaku, nĩ ũndũ wa wega wake. 6Hĩndĩ ĩo ndungata icio cia andũ-a-nja ikĩmũkuhĩhĩria, hamwe na ciana ciacio, igĩkĩĩinamĩrĩria. 7O nake Lea agĩcoka akĩmũkuhĩhĩria, me na ciana ciake, nao makĩĩinamĩrĩria; na thutha wa ũguo Jusufu na Rakeli makĩmũkuhĩhĩria o nao makĩĩinamĩrĩria. 8Esau agĩgĩcoka akĩũria Jakubu atĩrĩ, Ĩ gĩtũmi gĩa gĩkundi kĩu ndatũngana nakĩo, nĩ kĩ? Jakubu agĩkĩmwĩra atĩrĩ, Gĩtũmi nĩ atĩ njĩtĩkĩrĩke nĩwe, mwathi wakwa. 9Esau agĩkĩmwĩra atĩrĩ, Niĩ ndĩ na cia kũnjigana, mũrũ wa iya; ikara na indo ciaku. 10No rĩrĩ, Jakubu akiuga atĩrĩ, Aca, akorũo nĩnjĩtĩkĩrĩkĩte nĩwe-rĩ, ndagũthaitha wĩtĩkĩre kuoya indo ici ngũrehithĩirie niĩ mwene cia gũkũhe, kuona atĩ nĩnguonete ũthiũ waku, o ta mũndũ wonete ũthiũ wa Ngai, nawe ũkangenera. 11Ndagũthaitha wĩtĩkĩre kuoya indo ici ngũrehithĩirie cia gũkũhe; nĩ gũkorũo Ngai nĩanjĩkĩte maũndũ mega mũno, na ningĩ nĩ ũndũ o na niĩ ndĩ na indo cia kũnjigana. Agĩkĩmũringĩrĩria, o nginya agĩcioya. 12Esau agĩkiuga atĩrĩ, Nĩtũgwatei rũgendo, tũthiĩ, ngũtongorie. 13Nake Jakubu akĩmwĩra atĩrĩ, Mwathi wakwa, wee nĩũũĩ atĩ twana tũtũ tũtirĩ na hinya wa gũthiĩ, na mahiũ maya ndĩ namo ma mbũri na ng’ombe nĩmekuongithia; na andũ mangĩcihanyũkia o mũthenya ũmwe, mahiũ mothe hihi nĩmegũkua. 14Ndagũthaitha, wee mwathi wakwa, ũ’thiage mbere, niĩ ndungata yaku; no niĩ-rĩ, njukage o kahora ndongoretie aya angĩ, o ta ũrĩa mahiũ maya ndĩ namo mangĩhota gũthiĩ, na ta ũrĩa ciana ici ndĩ nacio ingĩhota gũthiĩ, o nginya rĩrĩa ngagũkinyĩrĩra, wee mwathi wakwa, o kũu Seiru. 15Esau agĩkĩmwĩra atĩrĩ, Reka ngũtigĩre andũ aya amwe ndĩ nao. Nake Jakubu akĩmwĩra atĩrĩ, Hakĩrĩ bata ũrĩkũ? Reka o njĩtĩkĩrĩke nĩwe, mwathi wakwa. 16Esau agĩkĩĩhũndũkĩra mũthenya o ro ũcio, agĩthiĩ arorete Seiru 17Nake Jakubu akĩgwata rũgendo, agĩkinya Sukothu, akĩĩyakĩra nyũmba kũu, o na akĩirigĩra mahiũ kuo; na tondũ wa ũguo rĩĩtwa rĩa handũ hau rĩgĩĩtwo Sukothu.

18Nake Jakubu oima Padani-aramu agĩkinya itũũra rĩa Shekemu, rĩa bũrũri wa Kanaani, na thayũ; agĩkĩamba hema yake ĩng’etheire itũũra rĩu. 19#Josh 24.32; Joh 4.5.Nakĩo gĩcigo gĩa gĩthaka, kĩu aambire hema yake, agĩkĩgũra he ciana cia Hamoru, ithe wa Shekemu, na mbia igana. 20Agĩgĩaka kĩgongona handũ hau, agĩguta El-elohe-Isiraeli.

Currently Selected:

KĨAMBĨRĨRIA 33: OGKBIBLE

Highlight

Copy