KĨAMBĨRĨRIA 27

1Na gũgĩkinya atĩrĩ, atĩ rĩrĩa Isaaka aakorirũo arĩ mũkũrũ, o namo maitho make magĩkorũo nĩmaaitĩkĩte kũũra, akaaga kuona namo, agĩĩta Esau mũriũ ũrĩa mũkũrũ, akĩmwĩra atĩrĩ, Mũrũ wakwa; nake Esau agĩcokia atĩrĩ, Niĩ ũyũ haha. 2Isaaka agĩkĩmwĩra atĩrĩ, Rĩu ndĩ gũgĩkũra, na ndiũĩ mũthenya ũrĩa ngakua. 3Tondũ ũcio ũkĩra, ndagũthaitha, woe indo ciaku iria ũguĩmaga nacio, thiaka waku o na ũta, uumagare ũthiĩ werũ, ũkandathĩre nyamũ; 4ũcoke ũ’thondekere irio irĩ mũrĩo, o ta iria nyenda mũno, ũndehere, ndĩe, nĩ getha ngwĩrathimĩre niĩ mwene, itanakua. 5Nake Rebeka akĩigua ũhoro ũkĩheanwo hĩndĩ ĩrĩa Isaaka aaragĩria Esau, mũriũ. Nake Esau agĩgĩthiĩ werũ kũguĩma nyamũ, ainũke nayo.

6Rebeka agĩgĩcoka akĩarĩria Jakubu, mũriũ, akĩmwĩra atĩrĩ, Nĩndaigua thoguo akĩaria na Esau, mũrũ wa nyũkwa, aamwĩra atĩrĩ, 7Ndehere nyamũ ya werũ ũ’thondekere irio irĩ mũrĩo, ndĩe, nĩ getha ngũrathime, ngĩonagwo nĩ Jehova, itanakua. 8Tondũ ũcio mũrũ wakwa, njigua, wĩke o ta ũrĩa ndĩrĩkwĩra. 9Thiĩ, o ro rĩu, rũũru-inĩ ũngĩrĩre tũũri twĩrĩ twĩ nyama njega, na niĩ ’thondekere thoguo irio irĩ mũrĩo, o ta iria enda mũno; 10nawe ũcoke ũcitwarĩre thoguo, arĩe, nĩguo akũrathime atanakua. 11Nake Jakubu akĩĩra Rebeka, nyina, atĩrĩ, Esau, mũrũ wa maitũ, nĩ wa mwĩrĩ wĩ guoya, na niĩ ndĩ wa mwĩrĩ mũhoro. 12Hihi baba aahota kũ’hambata, nake anyone ta ndĩ mũhenania; na tondũ wa ũhoro ũcio, ndĩĩreherere kĩrumi, ithenya rĩa kĩrathimo. 13Nyina agĩkĩmũcokeria atĩrĩ, Kĩrumi kĩu gĩaku kĩronjokerera, mũrũ wakwa; wee-rĩ, igua o ũhoro wakwa, ũthiĩ ũgĩre tũũri tũu, ũndehere. 14Agĩgĩthiĩ agĩtũgĩra, agĩtũtwarĩra nyina; nake nyina agĩthondeka irio irĩ mũrĩo, o ta iria ithe wa Jakubu endaga.

15Ningĩ Rebeka akĩoya nguo iria ciarĩ njega cia Esau, mũriũ ũrĩa mũkũrũ, iria ciarĩ gwake nyũmba, agĩciĩkĩra Jakubu, mũriũ ũrĩa mũnyinyi. 16Agĩcoka akĩmũhumba moko, o na ngingo, kũrĩa kwarĩ kũhoro, na njũa cia tũũri tũu. 17Thutha wa ũguo akĩnengera Jakubu, mũriũ, irio icio irĩ mũrĩo o na mũgate, icio aathondekete, 18nake agĩgĩthiĩ kũrĩ ithe, akĩmwĩra atĩrĩ, Baba, nake ithe akiuga atĩrĩ, Niĩ ũyũ haha; nĩwe ũ, mũrũ wakwa? 19Jakubu agĩkĩĩra ithe atĩrĩ, Nĩ niĩ Esau, mũrũguo wa irigithathi; nĩnjĩkĩte o ta ũrĩa ũnjĩrire; ũkĩra, ndagũthaitha, ũikare thĩ, ũrĩe nyama ici ndĩ nacio wĩĩndathimĩre wee mwene. 20Nake Isaaka akĩũria mũriũ atĩrĩ, Kaĩ wona narua atĩa, mũrũ wakwa? Nake akiuga atĩrĩ, Nĩ ũndũ Jehova Ngai waku nĩwe ũndũngirie mũnyaka. 21Nake Isaaka akĩĩra Jakubu atĩrĩ, Ta ’thengerera hakuhĩ, ngũhambate mwĩrĩ, mũrũ wakwa, nĩguo ’menye kana ti-itherũ wee nĩwe mũrũ wakwa Esau na ma, kana aca. 22Jakubu agĩgĩthengerera ithe Isaaka, nake ithe akĩmũhambatanga, agĩkiuga atĩrĩ, Mũgambo-rĩ, nĩ wa Jakubu; no rĩrĩ, moko nĩ ma Esau. 23Nake Isaaka ndaigana kũmũmenya, nĩ ũndũ moko make maarĩ na guoya, o ta moko ma mũrũ wa nyina Esau; agĩkĩmũrathima. 24Agĩcoka akĩmũũria atĩrĩ, Wee ti-itherũ nĩwe mũrũ wakwa Esau? Nake akiuga atĩrĩ, Ĩĩ, nĩ niĩ. 25Isaaka agĩkĩmwĩra atĩrĩ, Kĩndeharehere hakuhĩ, na niĩ ndĩe nyama ĩo ya iguĩma rĩa mũrũ wakwa, ngwĩrathimĩre niĩ mwene. Nake akĩmũtwaratwarĩra hakuhĩ, akĩrĩa; o na akĩmũtwarĩra ndibei, akĩnyua. 26Ningĩ Isaaka, ithe, akĩmwĩra atĩrĩ, Rĩu no gĩokoke hakuhĩ ũ’mumunye, mũrũ wakwa. 27#Ahib 11.20.Agĩkĩmũthengerera akĩmũmumunya; nake Isaaka akĩigua kĩhera kĩrĩa nguo ciake ciarĩ nakĩo, akĩmũrathima, akiuga atĩrĩ,

One! One! Kĩhera kĩa mũrũ wakwa

Gĩtariĩ ta kĩhera kĩa werũ kũndũ kũrĩa kũrathimĩtwo nĩ Jehova.

28Ngai arotũma wonage ireera rĩrĩa riumaga igũrũ,

O na ũnoru wa thĩ,

O na ngano nyingĩ na ndibei.

29 # Kĩam 12.3. Andũ a ndũrĩrĩ marogũtungatagĩra,

Nayo mĩhĩrĩga ya ndũrĩrĩ ĩrokũinamagĩrĩra;

Ningĩ wee mwene ũrotuĩka mũnene wa gwathaga ariũ a thoguo,

O nao ariũ a nyũkwa marokũinamagĩrĩra.

Mũndũ o wothe ũrĩa ũgakũgwatia kĩrumi-rĩ, arocokagĩrĩrũo nĩkĩo;

No rĩrĩ, kũrathimwo-rĩ, nĩ mũndũ o wothe ũrĩa ũgakũrathima.

30Na gũgĩkinya atĩrĩ, atĩ Isaaka aarĩkia kũrathima Jakubu, nake Jakubu agĩkorũo no hĩndĩ oima aathenga harĩ Isaaka, ithe, kahinda o kau, Esau, mũrũ wa nyina, agĩgĩũka oimĩte iguĩma. 31O nake agĩthondeka irio irĩ mũrĩo, agĩcitwarĩra ithe; agĩkĩĩra ithe atĩrĩ, Rĩu baba ta gĩũkĩre, ũrĩe nyama cia iguĩma rĩa mũrũguo, nĩguo wĩĩndathimĩre wee mwene. 32Nake Isaaka, ithe, akĩmũũria atĩrĩ, Nĩwe ũ? Nake akiuga atĩrĩ, Nĩ niĩ mũrũguo ũrĩa wa irigithathi, Esau. 33Nake Isaaka akĩinaina o mũno ma, akĩmũũria atĩrĩ, Nũ ũcio ũkũguĩmĩte nyamũ, aandehere nyama ciayo, ndarĩa ciothe mbere ũtanoka, na rĩu nĩndamũrathima? Na ti-itherũ nĩekũrathimwo!

34Nake Esau, rĩrĩa aaiguire ũhoro ũrĩa ithe oiga, akĩrĩra kĩrĩro kĩnene mũno kĩa ruo rũa ngoro, agĩkĩĩra ithe atĩrĩ, Niĩ o na niĩ ndagũthaitha, baba, ndathima! 35Ithe agĩkĩmũcokeria atĩrĩ, Mũrũ wa nyũkwa nĩwe ũũkire na wara, na nĩaagũtunya kĩrathimo gĩaku. 36#Kĩam 25.29-34.Nake Esau akiuga atĩrĩ, Githĩ ti-itherũ rĩĩtwa rĩu etagwo Jakubu rĩtikĩrĩ kĩhooto? Nĩ ũndũ rĩu mahinda maya merĩ-rĩ, aa’henia na ũndũ wa kũnjũhĩgĩrĩra. Rĩa mbere nĩ kũndunya aandunyire ũrigithathi wakwa, na rĩu ningĩ kĩone, ekũndunya kĩrathimo gĩakwa; agĩkĩũria ithe atĩrĩ, Anga hatikĩrĩ kĩrathimo o na kĩmwe niĩ o na niĩ ũndigĩirie? 37Nake Isaaka agĩgĩcokia akĩĩra Esau ũũ: Atĩrĩrĩ, nĩndamũtua mũnene wa gũgwathaga, nao ariũ a ithe othe nĩndamũhe matuĩke ndungata ciake, na ndamũhe ngano ya kũmũtũũria, o na ndibei; kuona nĩ ũguo-rĩ, wee ngũgĩgwĩka atĩa, mũrũ wakwa? 38#Ahib 12.17.Nake Esau akĩũria ithe atĩrĩ, Githĩ kĩrathimo kĩu nokĩo ũkiuma nakĩo giiki, baba? O na niĩ ndathima, baba. Esau agĩkĩanĩrĩra na mũgambo mũmene, akĩrĩra.

39 # Ahib 11.20. Nake Isaaka, ithe, agĩcokia akĩmwĩra ũũ:

Atĩrĩrĩ, wee kũndũ kũrĩa ũrĩtũũraga-rĩ, nĩ kũrĩa kũraihanĩrĩirie na ũnoru wa thĩ.

O na ũtũũrage kũndũ kũrĩa kũraihanĩrĩirie na ireera rĩrĩa riumaga ĩgũrũ;

40 # Kĩam 36.8; 2 Ath 8.20. Naruo rũhiũ rũaku rũa njora nĩruo rũgagũtũũragia, na nĩũgatungatagĩra mũrũ wa nyũkwa;

Na nĩgũgakinya atĩrĩ, atĩ rĩrĩa ũgatua mĩkwa,

Nĩũkeruta mũtĩ wake ngingo ũrĩa aagwĩkĩrire, ũũte.

41Nake Esau agĩthũũra Jakubu nĩ ũndũ wa kĩrathimo kĩu aarathimirũo nĩ ithe, Esau agĩkĩĩĩra na ngoro atĩrĩ, Rĩu matukũ ma kũrĩrĩra gĩkuũ kĩa baba makiriĩ gũkinya; hĩndĩ ĩo nĩguo ngoraga Jakubu, mũrũ wa maitũ.

42Nacio ciugo icio cia Esau, mũrũwe ũcio mũkũrũ, ikĩĩrũo Rebeka; nake agĩkĩrekania, agĩĩta Jakubu, mũrũwe ũcio mũnyinyi, akĩmwĩra ũũ: Atĩrĩrĩ, ha ũhoro waku-rĩ, mũrũ wa nyũkwa, Esau, nĩacirĩire gũkũũraga ehorerie marakara nawe. 43Tondũ ũcio, mũrũ wakwa, igua ũhoro ũrĩa ngũkwĩra; ũkĩra ũthiĩ, ũkinye Harani, ũũrĩre kwa Labani mũrũ wa maitũ, 44ũikare gwake matukũ manyinyi, o nginya rĩrĩa mũrũ wa nyũkwa agathirũo nĩ mang’ũrĩka, 45o na atige gũkũroria marakara, ariganĩrũo nĩ ũrĩa ũmwĩkĩte; na niĩ hĩndĩ ĩo, nĩngarekania, ngũiyĩrithie uume kũu. Kaĩ ingĩkĩũrũo nĩ inyuĩ inyuerĩ, o mũthenya ũmwe, nĩ ũndũ kĩ?

46Nake Rebeka akĩĩra Isaaka atĩrĩ, Ũhoro wa airĩtu aya a Hethi ũnogetie ngoro yakwa o nginya ngenda gũkua. Ĩ hihi Jakubu nake angĩhikia mũka wa airĩtu a Hethi ũtariĩ o ta airĩtu aya a bũrũri ũyũ-rĩ, ũhoro wakwa wa gũtũũra muoyo wakĩng’una na kĩ?

Currently Selected:

KĨAMBĨRĨRIA 27: OGKBIBLE

Highlight

Copy