ATŨMWO 19

1NA gũgĩkinya atĩrĩ, atĩ rĩrĩa Apolo aarĩ Korintho, Paulo aarĩkia gũtuĩkanĩria ng’ongo cia mwena wa rũgũrũ, agĩkinya Efeso, agĩkora arutwo amwe kuo. 2Akĩmoria atĩrĩ, Nĩmwaheirũo Roho Mũtheru hĩndĩ ĩrĩa mwetĩkirie? Nao makĩmwĩra atĩrĩ, Aca, tũtiaheirũo; o na kũigua tũtiigana kũigua kana nĩkũrĩ Roho Mũtheru. 3Agĩcoka akĩmoria atĩrĩ, Mwakĩbatithirio na ũbatithio ũrĩkũ? Nao makĩmwĩra atĩrĩ, Twabatithirio na ũbatithio ũrĩa wa Johana. 4#Mat 3.11; Mar 1.4,7,8; Luk 3.4,16; Joh 1.26,27.Nake Paulo akĩmera atĩrĩ, Ũbatithio ũrĩa Johana aabatithagia andũ naguo warĩ wa kuonania atĩ nĩmerirĩte, akameraga atĩ metĩkie mũndũ ũrĩa ũgũũka thutha wake, nake nĩwe Jesu. 5Nao maaigua ũguo, magĩcoka makĩbatithio thĩinĩ wa rĩĩtwa rĩa Mwathani Jesu. 6Nake Paulo aarĩkia kũmaigĩrĩra moko make, Roho Mũtheru akĩmaikũrũkĩrĩra, magĩgĩitĩka gũthioma thiomi ingĩ, na makarathaga mohoro. 7Nao othe maarĩ ta andũ ikũmi na erĩ.

8Nake agĩtonya thunagogi, agĩikara akĩheanaga ũhoro ihinda rĩa mĩeri ĩtatũ omĩrĩirie, makaaranagĩria na andũ, akĩmaringagĩrĩria metĩkĩre maũndũ marĩa merekanĩrĩire na ũthamaki wa Ngai. 9Ĩndĩ tondũ wa ũrĩa andũ amwe momirie ngoro ciao, makĩrega kũigua, magĩitĩka gũcambia Njĩra ĩo mbere ya kĩrĩndĩ-rĩ, Paulo akĩmeherera, agĩcoka akĩamũra arutwo ake matigane nao, na akaaranagĩria na andũ o mũthenya o mũthenya harĩa haathomithagĩrio andũ nĩ Turano. 10Agĩgĩikara ihinda ta rĩa mĩaka ĩĩrĩ agĩĩkaga ũguo; na tondũ ũcio andũ arĩa othe maatũire bũrũri wa Asia, Ayahudi o na Ayunani, makĩigua Ũhoro wa Mwathani.

11Nake Ngai akĩringa ciama itarĩ cionwo rĩngĩ tacio na moko ma Paulo; 12na nĩ ũndũ ũcio andũ arũaru magĩtwarĩrũo itambaya na nguo ciumĩte mwĩrĩ-inĩ wake, nayo mĩrimũ ĩrĩa maarĩ nayo ĩkĩmatiga, o na makiumwo nĩ ngoma njũru.

13No rĩrĩ, Ayahudi amwe orũri, arĩa maatũire maingataga ndaimono, magĩitĩka kũgweta rĩĩtwa rĩa Mwathani Jesu kũrĩ andũ arĩa maarĩ na ngoma njũru, makoigaga atĩrĩ, Ndakwĩhĩtithia na Jesu ũrĩa ũheanagwo ũhoro wake nĩ Paulo. 14Na nĩkwarĩ andũ mũgwanja, ariũ a Mũyahudi wetagwo Sikeva, warĩ mũthĩnjĩri-Ngai mũnene, arĩa mekaga ũguo. 15Nayo ngoma ĩrĩa njũru ĩkĩmacokeria ĩkĩmera atĩrĩ, Jesu nĩndĩmũũĩ, o na ngamenya Paulo; no inyuĩ mũrĩ a? 16Nake mũndũ ũrĩa wagwatĩtwo nĩ ngoma ĩo njũru akĩmarũũgĩrĩra, akĩmakĩria hinya o erĩ, akĩmatoria, nao magĩkiuma nyũmba ĩo, makĩũra marĩ njaga, na matihangĩtio.

17Naguo ũhoro ũcio ũkĩmenyeka nĩ arĩa othe maatũire Efeso, Ayahudi o na Ayunani; nao othe makĩgwatwo nĩ guoya, narĩo rĩĩtwa rĩa Mwathani Jesu rĩgĩkumio. 18Nao andũ aingĩ arĩa metĩkĩtie magĩgĩũka makiumbũra mehia mao matekũhithĩrĩra ũrĩa maatũire mekaga. 19O na andũ aingĩ arĩa maatũire maragũraga makĩũngania mabuku mao, makĩmacina andũ othe makĩĩonagĩra: magĩcoka magĩtara mbia iria mangĩoimire, makĩona atĩ nĩ mbia ciakuo ngiri mĩrongo ĩtano. 20Ũguo noguo Ũhoro wa Mwathani wakirĩrĩirie kũingĩha na kũhootana.

21Namo maũndũ macio maathira-rĩ, Paulo agĩtua na ngoro yake atĩ athiĩ Jerusalemu, aarĩkia gũtuĩkanĩria Makedonia na Akaia, na ũrĩa oigire nĩ atĩrĩ, Ndarĩkia gũkinya kuo-rĩ, no mũhaka ngathiĩ kuona Roma o nakuo. 22Na aarĩkia gũtũma andũ erĩ a arĩa maamũtungatagĩra mathiĩ Makedonia, nĩo Timotheo na Erasito, we mwene agĩikaranga bũrũri wa Asia ihinda.

23Na ta hĩndĩ ĩo-rĩ, gũkĩgĩa inegene inene ũhoro-inĩ wa Njĩra ĩo. 24Nĩ gũkorũo nĩkwarĩ mũndũ mũturi wa indo cia betha wetagwo Demeterio, ũrĩa waturaga tũmĩhianano tũnini twa betha twa hekarũ ĩrĩa ya Aritemi, agatũmaga arĩa maarutaga wĩra ũcio mone uumithio mũingĩ. 25Nake akĩũngania andũ acio, hamwe na arĩa maarutaga wĩra ũhaanaine na wao, akĩmera atĩrĩ, Athuri aya, nĩmũũĩ atĩ wĩra ũyũ tũrutaga nĩguo ũtũtongagia. 26Na nĩmũkuona na mũkaigua atĩ mũndũ ũcio Paulo nĩaringĩrĩirie andũ aingĩ, akamagarũra ngoro, akiugaga atĩ ngai iria ithondekagwo na moko ticio ngai; na ti gũkũ Efeso gwiki ekaga ũguo, nĩ ta bũrũri wothe wa Asia. 27Na rĩrĩ, to wĩra ũyũ witũ wiki ũrĩgĩa na ũgwati wa kũmenererio, no makĩria o nayo hekarũ ya ngai ya mũndũ mũka ĩrĩa nene ĩĩtagwo Aritemi nĩĩrĩagio bata; o na ningĩ Ariteme aimwo ũkaru wake, o we ũtũire athathaiyagio nĩ andũ othe a bũrũri wa Asia, o na andũ a thĩ yothe. 28Nao maaigua ũhoro ũcio, magĩitwo nĩ marakara, makĩanĩrĩra na mũgambo mũnene makiugaga atĩrĩ, Aritemi wa Aefeso nĩwe mũnene-ĩ!

29Narĩo itũũra rĩothe rĩgĩkĩiyũra ironjo: nao maarĩkia kũnyita Gaio na Arisitariko, andũ a Makedonia arĩa maathiaga rũgendo na Paulo, makĩrũrũngana magĩtonya nyũmba ĩrĩa yonganagwo nĩ ũndũ wa mĩago, marĩ na ngoro o ro ĩmwe. 30Na rĩrĩa Paulo endaga gũtonya harĩ kĩrĩndĩ kĩu, arutwo ake makĩmũgiria. 31Ningĩ andũ amwe aathani a bũrũri wa Asia, tondũ maarĩ ũrata nake, makĩrekania kũrĩ we makĩmũthaitha atĩ ndakae gweta gũtonya nyũmba ĩo ya mĩago. 32Na rĩrĩ, andũ amwe nĩmaanagĩrĩra makiuga ũũ, na angĩ ũũ, nĩ ũndũ wa ũrĩa andũ arĩa monganĩte maaronjaga, na arĩa aingĩ ao matioĩ kĩrĩa gĩatũmĩte mongane. 33Na rĩrĩ, Alekisandero akĩrutwo thĩinĩ wa kĩrĩndĩ kĩu, akĩrũgamio mbere yakĩo nĩ Ayahudi. Nake Alekisandero akĩgeria gũkiria andũ na guoko, akĩendaga kwĩarĩrĩria kũrĩ kĩrĩndĩ. 34No rĩrĩa maamenyire atĩ nĩ Mũyahudi, othe makĩanĩrĩra na mũgambo o ro ũmwe ihinda ta rĩa thaa igĩrĩ, makiugaga atĩrĩrĩ, Aritemi wa Aefeso nĩwe mũnene-ĩ!

35Na rĩrĩ, rĩrĩa karani wa kĩama gĩa itũũra rĩu aakiririe andũ acio monganĩte, akiuga atĩrĩ, Andũ aya a Efeso, nĩ mũndũ ũrĩkũ ũtakĩũĩ atĩ itũũra rĩrĩ rĩa Aefeso nĩrĩo rĩene hekarũ ĩrĩa ĩtũũragwo nĩ ngai ĩrĩa nene ĩĩtagwo Aritemi, o na atĩ nĩrĩo rĩene mũhianano ũrĩa wagũire thĩ uumĩte Igũrũ? 36Tondũ ũcio, kuona atĩ maũndũ macio matingĩkararĩka, nĩkwagĩrĩire mũkire, na mũtige gwĩka ũndũ na kĩhĩko. 37Nĩ ũndũ-rĩ, mũrehete andũ aya haha, nao ti kũiya maiyĩte indo cia hekarũ, o na kana makaruma ngai ĩo iitũ. 38Hakĩrĩ ũguo-rĩ, Demeterio, o na acio angĩ marutaga wĩra nake, mangĩkorũo marĩ na ũndũ mekwenda gũthitakĩra mũndũ o na ũrĩkũ, mĩthenya ya gũthitakanwo ĩrĩ ho, o nao aciri marĩ ho: nĩmagĩthitakane. 39No mũngĩkĩenda ũndũ ũngĩ-rĩ, nĩũgathondekerũo kĩũngano-inĩ kĩrĩa kĩa ndũire. 40Amu ti-itherũ tũrĩ ũgwati-inĩ wa gũthitakĩrũo ngũĩ ĩno ya ũmũthĩ, nĩ ũndũ ndĩrĩ na gĩtũmi: naho ha ũhoro wayo tũtirĩhota kuonania kĩrĩa gĩtũmĩte andũ marũrũngane ũguo. 41Nake aarĩkia kwaria ũguo, akĩĩra andũ acio monganĩte maharaganie mathiĩ.

Currently Selected:

ATŨMWO 19: OGKBIBLE

Highlight

Copy