ATŨMWO 12

1NA rĩrĩ, ta hĩndĩ ĩo Herode ũrĩa mũthamaki agĩitĩka kũnyarira andũ amwe a kanitha. 2Akĩũragithia Jakubu mũrũ wa nyina na Johana na rũhiũ. 3Na rĩrĩa onire atĩ ũguo ekire nĩũgũkenia Ayahudi, agĩcoka akĩnyitithia Petero o nake. Namo matukũ macio maarĩ ma kũrĩa mĩgate ĩtarĩ mĩĩkĩre ndawa ya kũimbia. 4#Thama 12.1-27.Na aarĩkia kũmũnyitithia, akĩmũikia korokoro-inĩ, akĩmũneana kwĩ athigari ikundi inya arĩa maarangaga camu ana ana, mamũrangĩre; na nĩendete atĩ gĩathĩ kĩa Bathaka gĩathira amũrute hau amũrehe mbere ya kĩrĩndĩ.

5Tondũ wa ũguo Petero agĩikario korokoro-inĩ, no andũ a kanitha nĩmaamũhoyagĩra Ngai na kĩyo. 6Na rĩrĩa Herode aatigairie hanini amũrute, ũtukũ o ro ũcio Petero agĩkorũo akomete gatagatĩ ga athigari erĩ, ohetwo na mĩnyororo ĩĩrĩ: na nĩkwarĩ andũ a kũrangĩra korokoro kĩhingo-inĩ. 7Na atĩrĩrĩ, mũraika wa Mwathani akĩmuumĩrĩra, akĩrũgama harĩ we, naguo ũtheri ũkĩara kanyũmba karĩa aarĩ. Nake akĩgũtha Petero mwena, akĩmwarahũra akĩmwĩra atĩrĩ, Ũkĩra narua. Nayo mĩnyororo ĩrĩa ohetwo nayo moko ĩkĩgathũka ĩkĩgũa thĩ. 8Nake mũraika akĩmwĩra atĩrĩ, Wĩhotore, na wĩohe iratũ ciaku. Nake agĩĩka o ũguo. Agĩcoka akĩmwĩra atĩrĩ, Wĩhumbe nguo yaku, ũnũmĩrĩre. 9Nake Petero akiuma nja, akĩmũrũmĩrĩra, na ndaamenyaga atĩ ũndũ ũcio wĩkagwo nĩ mũraika nĩ wa ma, no kwĩgereria egeragĩria atĩ nĩ kĩoneki onete. 10Na maarĩkia kũhĩtũka arangĩri arĩa a mbere o na arĩa a kerĩ, magĩkinya kĩhingo-inĩ gĩa kĩgera kĩrĩa gĩa kuumĩra itũũra-inĩ; nakĩo gĩkĩmahingũkĩra kĩo kĩene, magĩkiuma nja magĩthiĩra njĩra o ĩmwe; na kahinda o kau mũraika akĩmũtiga, agĩthiĩ. 11Na rĩrĩa Petero eiguire, akiuga atĩrĩ, Rĩu ndĩ kũmenya na ma atĩ Mwathani nĩareketie mũraika wake, aka’honokia kũrĩ Herode na kũrĩ maũndũ marĩa kĩrĩndĩ kĩa Ayahudi gĩtanyĩte kuona.

12Na rĩrĩ, aarĩkia gwĩciria ũhoro ũcio, agĩthiĩ kwa Mariamu, nyina wa Johana ũrĩa wetagwo rĩĩtwa rĩngĩ Mariko, nakuo nĩkuo andũ aingĩ monganĩte makahoya Ngai. 13Na rĩrĩa aaringaringire kĩhingo gĩa thome, mũirĩtu wetagwo Roda agĩũka kũmenya ũrĩa wĩ ho. 14Nake aamenya atĩ mũgambo ũcio waaria nĩ wa Petero, ndaigana kũhingũra kĩhingo nĩ ũndũ wa ũrĩa aakenete, no gũcoka agĩcoka na thĩinĩ ateng’erete, akĩheana ũhoro atĩ Petero arũgamĩte thome-inĩ. 15Nao makĩmwĩra atĩrĩ, Wee nĩ kũgũrũka ũgũrũkĩte! Nowe akiuga agwatĩirie atĩ ũguo nĩguo. Nao makiuga, Nĩ mũraika wake. 16Nowe Petero agĩikara o akĩringaringaga kĩhingo: nao maarĩkia kũhingũra makĩmuona, makĩgegeara mũno. 17Nake aarĩkia kũmakiria na guoko, agĩcoka akĩmahe ũhoro wa ũrĩa Mwathani aamurutithirie korokoro-inĩ. Akĩmera atĩrĩ, Ĩrai Jakubu na ariũ a Ithe witũ maũndũ macio. Agĩkĩmatiga agĩthiĩ kũndũ kũngĩ.

18Na rĩrĩ, kwarĩkia gũkĩa, athigari makĩgĩa na inegene mũno, makĩũrania harĩa Petero agĩthiĩte. 19Na rĩrĩa Herode aarĩkirie kũmũcaria, akĩmwaga-rĩ, agĩcoka gũtuĩria ũhoro ũcio kũrĩ andũ arĩa maamũrangagĩra, agĩathana atĩ moragwo. Nake agĩtherera oimĩte Judea, agĩthiĩ Kaisarea agĩikara kuo.

20Na rĩu-rĩ, Herode nĩaatũire arakarĩire andũ a Turo na Sidoni mũno: nao magĩũka harĩ we marĩ na ngoro ĩmwe, na maarĩkia kũrĩkanĩra na Blasito, ũrĩa mũrori wa nyũmba ĩrĩa aaraaraga, atuĩke wa mwena wao, makĩhoya hagĩe thayũ, nĩ ũndũ wa ũrĩa bũrũri wao watũũragio nĩ bũrũri wa mũthamaki ũcio. 21Na gũgĩtuĩka atĩrĩ, atĩ mũthenya ũrĩa wararĩirio, Herode akĩĩhumba nguo ciake cia ũthamaki, agĩikarĩra gĩtĩ kĩrĩa gĩa ũthamaki, akĩheana ũhoro kũrĩ o. 22Nao andũ acio makĩanĩrĩra makiuga, Nĩ mũgambo wa ngai, ti wa mũndũ! 23Na kahinda o kau akĩringwo nĩ mũraika wa Mwathani, nĩ ũndũ ndaigana gũtũma Ngai agoocwo: agĩkĩrĩo nda nĩ njoka, agĩtuĩkana.

24No rĩrĩ, Ũhoro wa Ngai ũgĩikara o ũkĩongererekaga, na ũkĩingĩhaga.

25Nao Baranaba na Saulu, maarĩkia kũhingia ũtungati ũrĩa maatũ-mĩirũo, makiuma Jerusalemu makĩinũka, na magĩthiĩ na Johana ũrĩa wetagwo rĩĩtwa rĩngĩ Mariko.

Currently Selected:

ATŨMWO 12: OGKBIBLE

Highlight

Copy