Luka 12

Yeso ogokuurera aborokigwa baye tibang’aineka

1 # Mat 16:6; Mar 8:15 Ekero ekio omosangererekano bw’abaanto chilifu chinyinge bagachia gosangerereka goika bagatachana. Yeso agachaaka goteebia aborokigwa baye ritang’ani, Mwerende nememera y’Abafarisai, engencho yaye nobong’ainereria. 2#Mar 4:22; Luk 8:17Korende ing’ana rinde tiriri rimumekeirie, ritache koorokigwa, gose eribisekanete ritache komanyekana. 3Nabo onsi aya mogokwana ase omosunte, naigugwe ase omobaso; naro aya mokomonyererana ase ebinyomba ime nararigwe igoro ase ebirama.

Oyogwenerete koirokwa

(Mat 10:28-33)

4Nabatebirie inwe abasani baane, timoiroka abwo bagoita omobere, na magega ase ayio tibari negento baranyare gokora kobua. 5Korende nimbakuurere oyo morairoke: Moiroke oria ore nokobua, magega ase ogoita omonto omoruta ase omorero o kare na kare. Ee, nabateebirie, moiroke oria! 6Inee! Chinchiro isano tichiri koonigwa ase chitaabu ibere? Naende nonya nakamo kabo tikari kwebwa ase obosio bwa Nyasae. 7Nonya nechitukia chi’emetwe yaino chiabarirwe chionsi. Timoiroka; inwe imobuete rigori rie chinchiro chinyinge.

8Inche nigo nkobateebia, kera oyomo oranyatore ase Mwanyabaanto, Omwana‐o‐Mwanyabaanto nere namwatore ase abamalaika ba Nyasae; 9korende oyorankaane ase Mwanyabaanto, nere nakaanwe ase abamalaika ba Nyasae. 10#Mat 12:32; Mar 3:29Na kera oyomo orakwane ring’ana riibe igoro ase Omwana‐o‐Mwanyabaanto, naaberwe; korende ere oyorarame Omoika Omochenu takwaberwa. 11#Mat 10:19,20; Mar 13:11; Luk 21:14,15Naende kobakobaira ase chisinagogi, na ase abagaambi, na ase abare nokobua, timochandeka buna morachie koiraneria gose buna morakwane, 12ekiagera Omoika Omochenu noborokererie ensa eyio eyio ayamogwenerete gokwana.

Okogania ebiabande, na omoreng’anio bw’omonda omoriri

13Omonto oyomo ase omoganda akamoteebia, “Omworokia, teebia momura ominto anyatanere omwando oito.”

14Akamoboria, “Omonto oyo, ning’o ombekire koba omogambi gose omwatanani igoro ase more?” 15Akabateebia, “Rigereria, erende korwa ase okogania okobe, ekiagera obogima bw’omonto tibori ase obonge bw’enibo yaye abwate.” 16Akabateebia omoreng’anio, akabora, “Omogondo bw’omonto omonda okama mono. 17Agachaaka korengereria ase omoyo oye ime: Inki ngokora, ekiagera tindi nase nkobeeka okwama kwane? 18Akabora: Ninkore iga: Nintagore ebiage biane, mbiagache ebinene kobua, na aroro ningache endagera yane yonsi, na ebinto biane. 19Erio ninteebie omoyo one: Aye omoyo, nore nenibo enyinge kwegacheire emonga y’emiaka emenge; timoka, orie, onywe, ogoke. 20Korende Nyasae akamoteebia: Omoriri oyo, obotuko obo omoyo oo oraganigwa, na enibo kwegacheire ang’e, neya ng’o erabe? 21Naboigo are ere oyokwegachera emonga omonyene, na ere tari omonda ase Nyasae.”

Ogwechanda na okomosemeria Nyasae

(Mat 6:25-34)

22Agateebia aborokigwa baye, “Ase aya nabateebirie, timochandeka igoro y’obogima bwaino, eki morarie; gose ase emebere yaino, eki morabeeke. 23Ekiagera obogima nobonene kobua endagera, na omobere nomonene kobua chianga. 24Rigereria ebigonkoru, tibiri gosimeka, tibiri kogesa, tibiri nemonga gose ekiage, korende Nyasae nigo akobirageria. Na inwe imobuete rigori rie chinyoni! 25Ning’o ore ase more oranyare gwechanda komenta ekerengo gi’okoboko okomo ase obotambe bwaye? 26Ase ayio, onye timori konyara gokora nonya ne ring’ana erire riike buna eri, nase ki mogwechandera amang’ana ande? 27#1 Abar 10:4-7; 2 Amg 9:3-6Rigereria ebisicha buna bigokina; tibiri gokora emeremo gose gwesisa, korende nabateebirie, nonya n’Sulemani ase obonene bwaye bwonsi tabegete chianga buna ekemo ki’ebi. 28Onye Nyasae okoboyia obonyansi bw’egetii oboreo reero, na ankio botugutwe ase omorero, Inee, takomenta kobaboyia inwe abamore nokwegena ogoke? 29Inwe, timorigia eki morarie, gose eki moranywe; gose timoba nomoyo bw’ogwechanda. 30Naki abanto b’ebisaku bi’ense nigo bakorigia ebinto ebio bionsi, korende Iso oino omanyire ng’a moganetie ebio bionsi, 31Korende rigia oborwoti bwa Nyasae, na ebinto ebio namomenterwe inwe.

32“Timoiroka inwe abamore omoganda omoke, ekiagera Iso oino ororire buya kobaa oborwoti. 33Oonia ebio more nabio, morue ebiegwa; mwekorere ebimoya bitari kogota amo nenibo etari gokea igoro, aase omoibi atagoika, gose ebigwankwa gosaria. 34Ekiagera aase chinibo chiaino chire nao chinkoro chiaino chikoba.

Okogania gw’okorenda, na omoreng’anio bw’abasomba abegenwa na abatari abegenwa

35 # Mat 25:1-13 “Tiga ebinema biaino biboyigwe, ne chitaaya chiaino chioke; 36#Mar 13:34-36na inwe mobe buna abanto baganyete omonene obo, gakoirana korwa ase omoyega bw’enyangi, erinde kagocha na gotura, erio kegima bamoigorere. 37Mbasesenirie abasomba baria ekero omonene obo agocha abanyore barendete. Ekeene nabateebirie: Neboyie, abaikaransie ase endagera, ache abakorere. 38Naende karache ase oborendi bwa kabere gose oborendi bwa gatato, abanyore barendete, mbare nomogooko abasomba baria. 39#Mat 24:43,44Korende manya aya, onye omonyene enyomba namanyete ensa omoibi agocha, anga narendete, taiberwa. 40Nainwe nabo, mobe ang’e, ekiagera ensa motakagereti, nero Omwana‐o‐Mwanyabaanto arache.”

41Petero akamobooria, “Omonene, nintwe ogoteebia omoreng’anio oyo, gose nase abanto bonsi?”

42Omonene akabora, “Ning’o rende ore omosomba omwegenwa, naende ore omong’aini, omonene oye arabeeke igoro ase enyomba yaye yonsi, ae abanto endagera ekerengo kiabo ase ekero kegwenerete? 43Nasesenirie omosomba oria ekero omonene oye arache amonyore ogokora bo. 44Ekeene nabateebirie, namobeke igoro ase ebi abwate bionsi. 45Korende omosomba oria karateebe ase omoyo oye ime: Omonene one otebanire gocha, naende achake goaka abasomba bande, abasacha na abakungu, na koria, na konywa, na gotinda, 46omonene bw’omosomba oria nachiche rituko atakagereti, na ensa atamanyeti, nigo aramonachane abe ebing’ese, namoe ensemo yaye amo nabategeneti. 47Naende omosomba oria omanyete ogwancha kw’omonene oye, na tebeka ang’e, gose gokora ogwancha kwaye, naakwe ebiranya ebiroro, 48korende oria otamanyeti, ko ere okorire ayagwenerete ogoakwa, naakwe ebiranya ebiororo. Kera oyoeirwe ebinge, korwa asare ere nabiganigwe ebinge; na ere oyoeirwe ebinge kobua, korwa asare nabiganigwe ebinge kobua.

Ebimanyererio bi’ebiro

(Mat 10:34-36; 16:1-4; Mar 8:11-13)

49“Nigo nachire gotongia omorero ase ense; onye ngwoka ore, anga ninki ndigetie naende? 50#Mar 10:38Ninde nebatiso nkobatiswa, naende ninchandeke mono goika eikeranigwe! 51Inee! Mokagete ng’a nigo nachire ng’ee ense omorembe? Nabatebirie, taibo, korende nogwatanana. 52Naki korwa bono ase enyomba nababe abanto batano baatananeke, batato ase babere, naende babere ase batato. 53#Mika 7:6Mbaatananeke, ise na omwana omomura, na omwana omomura na ise, ng’ina na omwana omoiseke, na omwana omoiseke na ng’ina; ng’ina biara, na moka momura oye, moka momura oye na ng’ina biara.”

54Naende agateebia emeganda, “Ekero mokorora riire rikoimoka bosongo, erio mwateeba bwango: Embura netwe; yaba bo. 55Naende ekero mokorora embeo ekorwa Irianyi mwabora. Nebe eguru‐gura; yaba bo. 56Inwe abang’ainereria! Imomanyete ense na igoro, buna bikororekana, korende naki rende, motamanyeti ekero eke?

57“Naende naki ase emioyo yaino motari gwatanana ayare boronge? 58Nabo ekero okogenda nomogosoeri oo ase omogambi, kora omokia kobwatana nere komore ’nchera, tachicha kogokurura ase omogambi, na omogambi oria akobeke ase amaboko ’omorendi bw’echela, na omorendi oria akorute echela. 59Nagotebirie, tokorwa agwo nonya ng’ake goika oakane kegima ebesa y’omoerio.”

Currently Selected:

Luka 12: EKGE

Highlight

Copy