ลูกา 4
4
เลือง ซาตาน ลอง ใจ เยซู
มัดทิว 4:1-11, มาระโก 1:12-13
1ทาเน เยซู ก็ มี ซีมาล เอาซาง อุ เลิม เคิบ นำ อน แร็ง ตัก นำ ซีมาล เอาซาง ก็ ซับรวง นำ เริล อุ ตัก ตี แลง นำ ก็ ทอก เจ็น นอก จอแดน เริล ตัก ตี แลง งคม ตัก ตี แลง นัน ไอ มี ครำ อุ เตาะ 2เยซู ก็ เริล อุ ตี แลง นัน นำ อุ ตัก นัน ซีซิบ งิ ซีซิบ งิ นัน นำ ก็ ไอ มี กุญ ป็อง ซีวะ นำ ก็ แร็ง โซะ จะ ซีเละ ทาเน ปรอง ซาตาน ก็ โตะ ซุย นำ ลอง ใจ นำ อุ นัน เย็ห ซีรอก ซุย ระ นำ แอง ลุห 3เย็ห ก็ โตะ ซุย นำ ฮุนเน “มัห เป็น ควัน เอาซาง นอ กัน มัห โซะ จะ มัห ก็ แอง ระ ง็อล เกียง เน เป็น เล็ห คนมปัง ก็ กุญ มัห แอง นทึห กา” ปรอง อัง
4เยซู ก็ ซวัล เย็ห คือเน “ไอ เตาะ ตัก แญง เอาซาง ก็ เคียน ไล อน แลว เค็ย ‘ครำ อิห เน รีด อุ ก็ ไอ แมน ญอน ป็อง คนมปัง มี มบลึ เดียว’ แญง เอาซาง ไล ฮุนนะ” เยซู อัง กด ลบ ซอง 8:3
5เจ็นนัน ปรอง ซาตาน ก็ ลบ วัล ซับรวง เยซู ก็อห เริล ญวัง ทึหๆ ซะ เล็ห ตี ทึห นัน แลว มี ซีรึบ มัด นัน เย็ห ก็ แอง ระ เยซู เม็จ จู งวัล จู เมือง ทัว โลก แพนซิก เน 6เย็ห ก็ ไล เยซู คือเน “ซะ จู มบลึ จู มบลัก ตัก มี กา มี ญิม ตี เอิญ ระ มัห เม็จ เน เป็น คอง เอิญ มด แลว ซะ มู เน เอิญ ญ็อก อน ตัก มัห ก็ กุญ ครำ ทัว โลก ตัก มี แร็ง มี อำนาด ก็ เป็น คอง เอิญ มด แลว 7กัน มัห กราบ ไว เอิญ เอิญ ก็ ญ็อก อน ตัก มัห มด ดาย” เย็ห อัง
8แต เยซู ไอ มี จบ ปัง แญง เย็ห เตาะ นำ ก็ ซวัล เย็ห คือเน “ตัก แญง เอาซาง อัห ก็ เคียน ไล อน แลว เค็ย ‘อิห ต็อง กราบ ไว เอาซาง งกีจ็อง คอง อิห มี ล็อง เดียว ต็อง ทือ นำ มี ล็อง เดียว ฮัก แญง เอาซาง อัง” เยซู ซวัล ปรอง ฮุนนะ กด ลบ ซอง 6:13
9เจ็นนัน ปรอง ซาตาน ก็ ซับรวง เยซู โตะ ตัก เมือง เยรูซาเล็ม ระ นำ ก็อห ญ็อง อุ ตัก ดาดฟา วิฮาน ตัก ทึห ทีซุด นำ ญ็อง อุ ตี ทึหๆ ซะ นัน ปรอง ก็ ไล นำ กะโดด “กัน มัห เป็น ควัน เอาซาง ซีเละ มัห ก็ กะโดด ตัก ซิก นเซ็บ ดาย กัน มัห เป็น ควัน เอาซาง ซีเละ นำ ก็ ไอ มี ระ มัห โซะ นอ 10เพาะวา แญง เอาซาง เคียน ระ อน แลว เค็ย เอาซาง ระ เทวาดา คอง ออ ดอม มัห รักซา มัห เลาะๆ 11เทวาดา ก็ ราบ ฮับ มัห ไอ มี ระ เจ็ง มัห มเพิม ซิห ตัก เกียง ซัก มี ติด เตาะ นำ ไอ มี ระ มัห โซะ เตาะ แญง เอาซาง ไล คือนะ แลว นอ มัห ก็ มบุด มพลิห นเซ็บ กา” ปรอง อัง เพลง เอาซาง 91:11-12
12เยซู ก็ ซวัล เย็ห คือเน “เอิญ ไอ มี มบุด เตาะ แญง เอาซาง ก็ ไล อน แลว เค็ย ‘อำ มัห ลอง ใจ เอาซาง ตัก เป็น งกีจ็อง คอง แป ดาย’ แญง เอาซาง ไล ฮุนเน นอ” เยซู อัง เยซู ไอ มี จบ ปัง แญง ปรอง เตาะ กด ลบ ซอง 6:16
13แลว ปรอง ลอง ใจ เยซู แลว เย็ห ก็ พระ แอ็ม นำ วาล เย็ห เพา โตะ ซุย เยซู ลบ แมะ วัล
เยซู เลิม ซอน อัห
มัดทิว 4:12-17, มาระโก 1:14-15
14แลว ปรอง จุ เยซู แลว เยซู ก็ ลบ วัล โตะ ตัก จังวัด กาลิลี วัล นำ ก็ มี แร็ง คอง ซีมาล เอาซาง อุ เลิม เคิบ นำ อัห จู งวัล พานัน ก็ เลอะ เม็จ คาว เลือง เยซู มด 15นำ ก็ นเจ็น อัห ตัก ฮ็อง พซุม ครำ ยิว ดก ตี ดก งวัล อัห จู ล็อง ตี เม็จ แญง นำ อัห ก็ อวด นำ ลือ นำ ซีเละ
ครำ งวัล นาซาเร็ด ไอ มี ตอนฮับ เยซู
มัดทิว 13:53-58, มาระโก 6:1-6
16ทาเน นำ ก็ เริล แอว งวัล ออ ตัก งวัล นาซาเร็ด งวัล นาซาเร็ด นัน เป็น งวัล ตี เยซู อุ เจ็น แย็ด เจ็นนัน ก็ เล็ห งิ มโบละ ครำ ยิว ตัก วัน เซา นัน นำ ก็ เริล ฮ็อง พซุม ครำ ยิว มอก จู ลบ นัน นำ ก็ ญ็อง อาน นังซือ เอาซาง อน อัห ปัง มอก จู ลบ นัน
17งิ นัน อัห ก็ อน นังซือ ตัก นำ มี มวน อัห อน นังซือ อิซยา ลาม เอาซาง ตัก อิง นัน อัห ก็ ระ นำ อาน ทาเน นำ ก็ รึห อาน นังซือ อิซยา นัน มี ตี นัน ก็ ไล คือเน
18 “‘ซีมาล งกีจ็อง อุ เคิบ เอิญ ซีเละ เพาะวา นำ เลือก เอิด เอิญ ระ เอิญ โตะ ไล คาว เลาะ อน ตัก ครำ ตุก ครำ ญาก นำ ก็ ระ เอิญ โตะ ไล ครำ เติล ลุก เค็ย อัห ทอก เจ็น ลุก กุญ
นำ ก็ ระ เอิญ โตะ ไล ครำ บอด มัด เค็ย อัห ดอม ซะ ตาด กุญ นำ ระ เอิญ โตะ ไล ครำ ตี เป็น ทาด อัห เค็ย อัห ปน กุญ 19นำ ก็ ระ เอิญ ไล อัห มด เค็ย งกีจ็อง โตะ จวย แอ แลว นำ ใจ ดัว ซิห แอ ซีเละ’” เยซู อาน อน อัห ปัง มอก เน อิซยา 61:1-2
20ญาม เยซู อาน อน อัห ปัง จบ แลว นำ ก็ เพล็ว นังซือ นัน นำ ก็ อน นังซือ มวน นัน ตัก พูจวย ตัก ฮ็อง พซุม เจ็นนัน นำ ก็ คุด นำ คุด อุ นัน ครำ จู ล็อง ตัก ฮ็อง พซุม นัน อัห ก็ เงอ ดอม นำ อุ นัน 21เยซู ก็ ไล อัห คือเน “ล็อง นัน ตี อิซยา เพีย ไล อน นัน งิ นะ เน แป เม็จ นำ เคิบ มัด ออ แลว” เยซู อัง
อัห ไอ มี มัก ปัง แญง ครำ งวัล เลิม
22ครำ ตัก ฮ็อง พซุม นัน อัห ก็ เลาะใจ ปัง นำ อัห เค็ย นำ จ็อก เลาะ ซีเละ อัห ก็ งึด อัง นำ อัห เค็ย “เอ เยซู เน นำ เป็น ครำ งวัล แอ เน ฮัก นอ นำ เป็น ควัน โยเซบ นำ ไอ มี เป็น ครำ พิเซด ซีวะ แต ซีวะ นำ จ็อก เลาะ จ็อก เก็ง มอก เน” อัห อัง
23เยซู เม็จ อัห ไอ มี ปอ เจือ ออ นำ ก็ จ็อก เคิบ อัห วัล “แป เม็จ เคิบ มัด ออ แลว แป ก็ ไอ มี ตัน เจือ เอิญ นอ แป ก็ มเบิด ซิห เอิญ ฮุนเน ‘มอ เฮย มัห รักซา นัง ออ นทึห วาล ดาย’ แป อัง เค็ย เอิญ แป จ็อก จังนัน ก็ ซีแล็ม เค็ย แป ซีรอก ระ เอิญ แอง ซะ แปลก ตัก งวัล แอ เน มอก แป เม็จ เอิญ แอง ตัก งวัล คาเปอนาอุม แลว นัน 24เอิญ ไล แป นังเลาะ นะ กัน ลาม เอาซาง เริล ไล ปะเทด ซอ อัห ก็ ปัง กัน นำ ไล ตัก งวัล ออ อัห ก็ ไอ มี จบ เจือ นำ เตาะ มอก เอิญ เน เอิญ เป็น ครำ งวัล แป เน ฮัก เอิญ แอง ซะ แปลก ซีวะ ก็ ตึก แป ก็ ไอ มี จบ เจือ เอิญ
25ครำ แอ เน ไอ มี ซอบ ปัง ครำ งวัล ออ นอ ดอม ตัวยาง ตัก ปะวัด อิซราเอล ซะไม เอลียา#ค 25 เอลียา เป็น ลาม เอาซาง นำ อุ วาล เยซู เกิด 850 ปี ตัก อิง นัน ครำ งวัล นำ ก็ ไอ มี เจือ นำ นอ แพะ วาง เคิบ ฮก ซัวะ นัน ก็ ไอ มี เล็ห เมียะ เตาะ ครำ จู ล็อง ก็ เกิ๊ด ซีอ็อจ มด นังเลาะ แลว มี แมมาย อิซราเอล ดก ล็อง ตี ไอ มี ซีวะ ป็อง 26แต เอาซาง ไอ มี ระ เอลียา จวย แมมาย ครำ อิซราเอล แอ เน เตาะ ญอน อัห ไอ มี เจือ ลาม นำ นัน นำ ก็ ระ เอลียา เริล จวย แมมาย งวัล เซเรฟัด ตัก อุ ปะเทด ไซดอน ฮัก แมมาย นัน เป็น ครำ กรอก ซอ ไอ แมน ครำ อิซราเอล แอ เน เตาะ แต เอาซาง จวย นำ ญอน นำ เจือ แญง ลาม นัน
27ครำ แอ เน ไอ มี ซอบ ปัง ลาม งวัล ออ ซีเละ ครอ ดอม เอลีซา วัล#ค 27 เอลีซา เป็น ลาม เอาซาง มี ล็อง วัล ตี โตะ แตน เอลียา เอลีซา ก็ เป็น ลาม เอาซาง เมือนนอย นำ ก็ เป็น ครำ อิซราเอล มี กรอก เดียว เลิม เคิบ แอ เน ญาม นัน ก็ มี ครำ คีเฮือน ดก ล็อง อุ ตัก ปะเทด อิซราเอล แอ เน แต อัห ไอ มี เจือ เอลีซา เอลีซา ก็ ไอ มี รักซา อัห เตาะ แต นำ จวย รักซา ลุง นามาน ตัก เป็น ครำ ปะเทด ซีเรีย ฮัก ครำ ปะเทด ซอ เจือ เอลีซา นำ ก็ จวย ครำ กรอก ซอ นัน ฮัก” เยซู ไล อัห จังนะ
28ทาเน ครำ ตัก ฮ็อง พซุม เม็จ เยซู จ็อก คือนัน อัห ก็ ไอ มี เลาะใจ ปัง เตาะ อัห ก็ อ็อด ซีเละ 29ทาเน งวัล อัห นัน อุ ตัก กึ รัง อัห ก็ มบรึห เยซู เจ็น งวัล ซับ นำ ตัก รัง เล็ห ตัก กึ รัง แลว อัห บัก และ ญ็อห แอ็ม นำ ตัก รัง 30แต อัห ไอ มี กุญ ญ็อห นำ เตาะ นำ ก็ นจาง ทอก เริล ออ นำ นจาง ทอก เริล เคิง ล็อง ปึง อัห นัน
เยซู มบรึห ปรอง ปัด
มาระโก 1:21-28
31เจ็นนัน เยซู ก็ เริล งวัล คาเปอนาอุม นเซอะ งวัล คาเปอนาอุม ก็ อุ ตัก จังวัด กาลิลี นัน เล็ห วัน เซา ตัก เป็น งิ มโบละ อัห นัน นำ ก็ นเจ็น อัห ตัก ฮ็อง พซุม ครำ ยิว นัน 32อัห เม็จ นำ นเจ็น อัห เลาะ นัน อัห ก็ ญ็อก งึด อัง นำ เพาะวา ตี นำ นเจ็น อัห นัน นำ มี อำนาด นำ เม็จ ออ ฮัก
33ตัก ฮ็อง พซุม นัน ก็ มี ครำ ปรอง กุด มี ล็อง อุ ตัก นัน ปรอง นัน ก็ ราย ซีเละ ล็อง ตัก ปรอง กุด นัน เม็จ เยซู นำ ก็ นซาก แร็งๆ คือเน 34“เยซู ครำ นาซาเร็ด เฮย มัห โตะ ญุง เคิบ อิห อังวะ เน มัห โตะ มเบิล อิห ก้า เอิญ เม็จจึด แลว มัห เป็น ครำ ซักซิด คอง เอาซาง ฮัก” ปรอง อัง 35เยซู ก็ ไล ปรอง ฮุนเน “มัห เค็ด อุ มัห ทอก ปัด แอ็ม เจ็น ล็อง เน มานะ เน” เยซู อัง ปรอง ก็ ลด แอง ระ ล็อง นัน ปลุม กิล กาง มัด อัห จู ล็อง ตัก อุ ตัก นัน เย็ห ก็ ลด ทอก ปัด แอ็ม เจ็น นัง ล็อง นัน เย็ห ไอ มี แอง ซีวะ ซิห ล็อง นัน วัล เตาะ
36อัห เม็จ เยซู มบรึห ปรอง คือนัน อัห ก็ งึด ซีเละ “เอิ๊ก แญง ซีวะ จังนะ ปิด ไบ ปิด เบอ นำ ไล ปรอง ดุ ปรอง ราย ปัด เย็ห ก็ ปัด แอ็ม มด” อัห อัง 37อัห ก็ เลอะ เม็จ คาว เลือง เยซู เน ทัว จู งวัล พานัน มด
38แลว เยซู มบรึห ปรอง แลว นำ ก็ ทอก เจ็น ฮ็อง พซุม เริล เจิง ซีโมน#ค 38 ซีโมน ล็อง เน นำ ซือ ตัก เปโตร วัล ทาเน ก็ พวม โซะ เมเทา ซีโมน นำ เป็น คัด แร็ง ซีเละ อัห ก็ ครอ ระ เยซู จวย นำ 39เยซู ก็ ติ โตะ ญ็อง อุ นดิ เมเทา ซีโมน นัน เยซู ก็ ไล คัด นัน คือเน “มัห งาล นทึห เตาะ” นำ อัง คัด นัน ก็ ลด งาล แอ็ม เมเทา ซีโมน งาล คัด แลว นำ ก็ คุล ร็อห ลด แอง ซะ ป็อง อน อัห ป็อง วัล
40แมด ซะ งิ นัน บัก และ เทิ๊บ งิ แลว ครำ งวัล นัน อัห ก็ เลอะ ซับ ครำ โซะ มด จู ล็อง โตะ และ เยซู ระ เยซู จวย อัห นำ ก็ พระ ซิห ที ออ เคิง อัห อัห จู ล็อง ก็ งาล โซะ 41แลว ก็ มี ปึง ปรอง ทอก แอ็ม เจ็น อัห ดก ล็อง ญาม ปรอง ทอก นัน เย็ห ก็ นซาก งกรอ คือเน “มัห เป็น ควัน เอาซาง” เย็ห อัง เยซู ก็ มบราง เย็ห จ็อก ไอ มี ระ เย็ห จ็อก เตาะ เพาะวา ปรอง นัน ก็ เม็จจึด แลว เค็ย เยซู เป็น เมซียา นัน
42ปัห ซะ คือ งิ กรัก เยซู ก็ ทอก เริล เจ็น เมือง นำ เริล เคิง ตี เค็ด งาล ซะ ตี ไอ มี ครำ ทาเน ปึง พซาซน ก็ โละ และ นำ อัห โละ และ นำ จำปอ เม็จ อัห เม็จ นำ แลว อัห ก็ ครอ ระ นำ อุ เคิบ ออ อัห ไอ มี ซีรอก ระ นำ เริล ตี ซอ เตาะ 43แต เยซู ก็ ไล อัห คือเน “เอิญ ต็อง เริล ไล คาว เลาะ เลือง เอาซาง อน อัหซอ ปัง วัล ดาย เอิญ ต็อง ไล อัห เค็ย เอาซาง โตะ ปกคอง โลก เน แลว เอิญ ต็อง เริล ไล อัห ตัก งวัล ซอ ดก ตี เพาะวา เอาซาง ไล เอิญ จังนะ” เยซู อัง 44แลว เยซู ไล อัห แลว นำ ก็ เริล ออ นำ ก็ เริล นเจ็น อัห ตาม ฮ็อง พซุม ครำ ยิว ทัว จังวัด ยูเดีย มด นัน
Currently Selected:
ลูกา 4: Prai
Highlight
Share
Copy
Want to have your highlights saved across all your devices? Sign up or sign in
Global Partners
