ลูกา 3
3
ยอน ไล พซาซน เตียม ใจ ตอนฮับ เยซู
มัดทิว 1:1-12, ลูกา 1:1-8, ยอน 1:19-28
1-2เจ็นเน ก็ เป็น เลือง ยอน ควัน เซคารียา นัน เลือง นำ ก็ ฮุนเน ดาย มี มี วาง นัน แญง เอาซาง ก็ เล็ห ตัก ยอน ญาม เอาซาง โตะ ไล ยอน นัน ยอน ก็ อุ ตัก ตี แลง วาง ตี เอาซาง โตะ ไล ยอน นัน อานาด เคิบ คายาฟัด ก็ เป็น มอ เอาซาง จ็อง ญาม นัน ก็ มี ดก ล็อง ปกคอง เมือง นัน เมือง เน ทีเบรีอัด เป็น พะเจายูฮัว เมือง โรม ซิบฮา ปี แลว ปอนทีอัด ปีลาด ก็ เป็น พูวา จังวัด ยูเดีย เฮโรด อันทิปา ก็ ปกคอง จังวัด กาลิลี ญาม นัน ฟีลิบ ตัก เป็น ควน เฮโรด นัน นำ ก็ ปกคอง จังวัด อีทูเรีย เคิบ จังวัด ตาโคนีตัด ลีซาเนีย ก็ ปกคอง จังวัด อาบีเลน แญง เอาซาง ก็ เล็ห ตัก ยอน ญาม นัน
3แลว เอาซาง ไล ยอน แลว ยอน ก็ เริล ไล อัห ทัว ลงลุก นอก จอแดน นำ ไล อัห คือเน “แป ต็อง แอง พิที จุบ นอก ดาย แป ต็อง เอิด ใจ แมะ แป ต็อง ญอม ฮับ เค็ย นัง ออ ลุห ระ เอาซาง ญ็อก แอ็ม ตี ลุห แป ระ เอาซาง ไอ มี ทือ ลุห แป วัล ดาย” ยอน อัง
4เลือง ยอน เน นำ ก็ กิว โตะ มอก อิซยา ลาม เอาซาง เพีย ไล อน เจ็น อิง นัน ตัก อิง อิซยา เพีย เคียน ระ อน เค็ย “ต็อง มี ครำ มี ล็อง ญ็อง อุ เคิง ตี แลง บัดนะ” อิซยา อัง อิซยา ก็ เค็ย “ล็อง นัน ต็อง ไล พซาซน เตียม ใจ ตอนฮับ เอาซาง ล็อง นัน ต็อง ไล คือเน ‘แป ต็อง เพีย แอง รวง ระ กรัลๆ ระ เลียบลอย อน ตัก งกีจ็อง ดาย” อิซยา อัง 5อิซยา เพีย ไล อน คือเน วัล “ล็อง นัน ต็อง ไล คือเน วัล เคิง นเดย ตัก เป็น งกวบ เป็น ญวัง ก็ ต็อง ทม แอ็ม เลาะๆ ระ นเซิงๆ ซะ รวง งก นโดน งก นแด็ห ก็ ต็อง แอง ระ กรัลๆ ซือๆ รวง ทุล ลุก ปุก ปัก ก็ ต็อง แอง ระ นเซิงๆ” 6“แป ต็อง แอง เลาะๆ นเซอะ ครำ จู ล็อง จู นัง เม็จจึด เอาซาง โตะ จวย ระ อัห ปน แอ็ม เจ็น ลุห ฮัก” อิซยา เพีย ไล เลือง ยอน คือนะ อิซยา 40:3-5
7ทาเน ยอน ก็ ไล แญง เอาซาง อน ตัก พซาซน ติกๆ นำ ไล อัห ตี โตะ และ นำ ตัก เปล นอก จอแดน นัน อัห ก็ รูบ โตะ และ นำ ตัก นอก นัน อัห ระ นำ แอง พิที จุบ นอก อน ออ แต ยอน เม็จ อัห แกด ล็อง ไอ มี กิว เอิด ใจ แมะ นำ ก็ โป ซิห อัห คือเน “แป เน ดุ มอก มาล ปิด แป ไอ มี กิว เอิด ใจ แมะ ออ แป ต็อง กุญ โทด ซีเละ เอาซาง บัก และ ลงโทด แป แลว แป อำ จบ กึด เค็ย แอง พิที จุบ นอก แลว ไอ มี กุญ โทด ซีเอ ไล แป กึด คือนะ 8กัน แป ซีรอก ปน แอ็ม ซีเละ แป ก็ ต็อง กิว เอิด ใจ แมะ ต็อง กิว แอง เลาะ แอง ซือ มอก ครำ ตี กิว เอิด ใจ แมะ ซีเละ นัน
แป อำ กึด เค็ย เป็น ควัน งา อับราฮัม แลว เอาซาง ไอ มี ลงโทด แป เอิญ ไล แป ซีเละ นะ ดาย เอาซาง เอิด ง็อล เกียง พาเน แอง เป็น ควัน งา อับราฮัม ก็ กุญ มด แอ เป็น ควัน งา อับราฮัม ก็ ตึก ไอ มี จบ ซำคัน
9กัน แป แอง ไอ มี เลาะ เอาซาง ก็ ต็อง ลงโทด แป ซีเละ ดาย นังเลาะ นะ เอาซาง บัก และ ลงโทด แป แลว แป ก็ เป็น มอก เกาลำ ตัก ไอ มี งกน แพละ นัน อัห ก็ เอิด ควาล บัก และ เคิล แอ็ม แลว เกา นเดย ตัก ไอ มี เลาะ แพละ#ค 9 เกาลำ ตัก ไอ มี แพละ เลาะ นัน ก็ มอก ครำ ตี ไอ มี เจือ เยซู ไอ มี ญอม ฮับ เยซู อัห ก็ เคิล แอ็ม มอก เกาลำ ไอ มี เลาะ นัน อัห ก็ เคิล แอ็ม โทจ แอ็ม ตัก กวัห โอด แป ก็ มอก เกาลำ นัน แป ต็อง เจิม นัง ออ เลาะๆ ดาย” ยอน อัง
10ปึง พซาซน เม็จ ยอน จ็อก ฮุนนัน อัห ก็ ซ็วน นำ คือเน “กัน ฮุนนะ อิห แอง จังนัก เลาะ บ็อห ซัง ปน แอ็ม เจ็น ลุห” อัห อัง 11ยอน ก็ ซวัล อัห คือเน “ซีเอ มี โกบ เปียะ พลัห แป ปัน อน ตัก ครำ ตี ไอ มี ซัก มี พลัห ก็ เลาะ เลือง ซะ ป็อง ก็ เมือนนอย กัน ซีเอ มี ซะ ป็อง ก็ ต็อง ปัน อน ตัก ครำ ตี ไอ มี” ยอน อัง
12ครำ เก็บ พาซี#ค 12 “ครำ เก็บ พาซี” อัห เก็บ พาซี ตัก ครำ อิซราเอล อน ตัก รัดทะบาน โรม อัห ซอบ เก็บ ดก เกิน กำนด ครำ อิซราเอล ลด ไอ มี เปาะ อัห เตาะ อัห กึด เค็ย ครำ เก็บ พาซี นัน เป็น ครำ ฮักลัง ปะเทด ออ อัห ก็ โตะ และ ยอน ระ นำ จุบ ออ ตัก นอก อัห ก็ ซ็วน ยอน เมือนนอย “อิห ดุห อิห แอง จังนัก ซัง เลาะ” อัห อัง 13ยอน ก็ ไล อัห ฮุนเน “แป ตี เป็น ครำ เก็บ พาซี ก็ อำ เก็บ เกิน ตี รัดทะบาน โรม ไล นัน อำ จบ โกง อัห เตาะ” นำ อัง เค็ย อัห
14ทาเน ก็ มี ทฮาน แกด ล็อง โตะ ซ็วน ยอน คือเน “อิห ดุห อิห ต็อง แอง จังนัก ซัง เลาะ บ็อห” อัห อัง ยอน ก็ ไล อัห คือเน “แป ก็ อำ คู เอิด เงิน พซาซน อำ และ เลือง จุ เอิด เงิน อัห เตาะ ต็อง ปอใจ เคิบ เงิน เดือน คอง ออ ฮัก ซัง เลาะ” ยอน อัง
15ทาเน ปึง พซาซน ตัก ปัง แญง ยอน อุ นัน อัห ก็ เลาะใจ ซีเละ อัห ก็ ลด ซงไซ เค็ย ยอน เนๆ เป็น เมซียา ฮุ 16ยอน เม็จ อัห กึด คือนัน นำ ก็ ลด ไล อัห คือเน “เอิญ ไล แป นังเลาะ นะ เอิญ ไอ แมน ล็อง นัน ตี เอาซาง ซันญา ระ อน เอิญ ไอ มี เป็น ซะ แกะ ซีวะ เตาะ เอิญ เป็น ครำ แย็ด ทีซุด เอิญ จุบ แป ตัก นอก มาลือ แต มี มี ล็อง วัล โตะ แทะ เอิญ ล็อง นะ ซัง เป็น ครำ ตี เอาซาง ซันญา ระ อน นัน ล็อง นะ นำ แกะ กวา เอิญ ดก เตา ทาล แค็บ นำ เอิญ ก็ ไอ มี วาดซนา อีด เตาะ ล็อง นะ นำ ไอ มี ตัน โตะ กัน โตะ นำ แลว นำ ก็ อน ซีมาล เอาซาง ตัก แป มอก นำ จุบ แป ตัก ซีมาล เอาซาง นัน แกด ล็อง นำ ก็ โทจ แอ็ม มอก นำ จุบ แป ตัก โอด นัน
17ล็อง ตี เอาซาง ซันญา โตะ จวย แอ นะ นำ บัก และ โตะ ตัดซิน แอ แลว นำ โตะ มอก ครำ ก็อง วี โตะ วี ซา กัน แลว นำ วี ซา แลว นำ ก็ เอิด ซา เลาะ ซิห ระ อน ตัก ราน แต คาบ นัน นำ ก็ โทจ แอ็ม ตัก โอด เป็น โอด ตี ไอ มี จางรู มเพิด” ยอน ไล อัห จังนะ
18จู ลบ ตี ยอน ไล คาว เลาะ อน ตัก พซาซน นัน นำ ก็ ไล มอก นัน ตลอด นำ ไล ดก มบลึ ตัก อัห ระ อัห เอิด ใจ แมะ
ยอน โป เฮโรด
19-20แต แทะ นัน วัล ยอน ก็ โป พะเจายูฮัว เฮโรด เพาะวา เฮโรด เน นำ เอิด ยัห ควน ออ นำ เอิด เฮโรเดีย ยัห ฟีลิบ ฟีลิบ เน เป็น ควน เฮโรด นัน ยอน ก็ โป เฮโรด เลือง นัน ยอน โป เลือง ซะ ซอ ตี เฮโรด แอง ลุห ดก มบลึ วัล เฮโรด เม็จ ยอน โป ออ คือนัน นำ ก็ ไอ มี ปอใจ เตาะ นำ แอง ลุห ดก มบลึ แลว ก็ ไอ มี ปอ นำ ก็ ซำ เญ็บ เอิด ยอน เติล ลุก ตี นำ เญ็บ ยอน เติล ลุก นัน นำ ก็ เฮง แอง ลุห จ็อง วัล
เลือง เยซู จุบ นอก
มัดทิว 3:13-17, มาระโก 1:9-11
21-22ญาม ยอน ควะ จุบ อัห อุ ตัก นอก นัน เยซู ก็ โตะ และ ยอน ตัก นอก นำ ไล ยอน แอง พิที จุบ นอก อน ตัก ออ แลว ยอน จุบ เยซู ตัก นอก แลว เยซู ก็ ลด ครอ วอน เคิบ เอาซาง ญาม นำ ครอ วอน เอาซาง อุ นัน วาง ก็ พลาง ซิห ทาเน ก็ พด โตะ ซีมาล เอาซาง จูล โตะ เจ็น วาง ทึห อุ เคิบ นำ ซีมาล นะ อี อังกัด เซ็ม งกรุก แลว ก็ มี แญง จ็อก โตะ เจ็น วาง ทึห คือเน วัล “มัห เป็น ควัน ตี เอา รัก ดก ทีซุด เอา ปอใจ อัง มัห ซีเละ ดาย ควัน” แญง นัน อัง
เจือ ซาย คอง เยซู คริด
มัดทิว 1:1-17
23แลว เยซู จุบ ตัก นอก แลว นำ ก็ เลิม แองกาน คอง ออ ญาม นัน นำ อาญุ ปะมาน ซามซิบ ปี แลว อัห จู ล็อง ก็ กึด เค็ย เยซู เน เป็น ควัน โยเซบ เจ็นเน ก็ เป็น เจือ ซาย คอง เยซู เอา โยเซบ ซือ ตัก เฮลี 24เอา เฮลี ตัก มาทัด เอา มาทัด ตัก เลวี เอา เลวี ตัก เมคี เอา เมคี ตัก ยันนาย เอา ยันนาย ตัก โยเซบ มี ล็อง วัล
25เอา โยเซบ ตัก มาทาทีอัด เอา มาทาทีอัด ตัก อาโมด เอา อาโมด ตัก นาฮูม เอา นาฮูม ตัก เอซะลี เอา เอซะลี ตัก นักกาย
26เอา นักกาย ตัก มาอาด เอา มาอาด ตัก มาทาทีอัด เอา มาทาทีอัด ตัก เซเมอิน เอา เซเมอิน ตัก โยเซก เอา โยเซก ตัก โยดา
27เอา โยดา ตัก โยอานัน เอา โยอานัน ตัก เรซา เอา เรซา ตัก เซรูบาเบล เอา เซรูบาเบล ตัก เซอาทีเอล เอา เซอาทีเอล ตัก เนรี
28เอา เนรี ตัก เมคี เอา เมคี ตัก อัดดี เอา อัดดี ตัก โคซำ เอา โคซำ ตัก เอมาดาม เอา เอมาดาม ตัก เออ
29เอา เออ ตัก โยซูวา เอา โยซูวา ตัก เอลีเอเซอ เอา เอลีเอเซอ ตัก โยริม เอา โยริม ตัก มาทัด เอา มาทัด ตัก เลวี
30เอา เลวี ตัก ซีเมโอน เอา ซีเมโอน ตัก ยูดา เอา ยูดา ตัก โยเซบ เอา โยเซบ ตัก โยนาม เอา โยนาม ตัก เอลียาคิม
31เอา เอลียาคิม ตัก เมเลอา เอา เมเลอา ตัก เม็นนา เอา เม็นนา ตัก มัดตะทา เอา มัดตะทา ตัก นาทัน เอา นาทัน ตัก ดาวิด
32เอา ดาวิด ตัก เจซี เอา เจซี ตัก โอเบด เอา โอเบด ตัก โบอาด เอา โบอาด ตัก ซัลโมน เอา ซัลโมน ตัก นาโซน
33เอา นาโซน ตัก อำมีนาดับ เอา อำมีนาดับ ตัก อัดมิน เอา อัดมิน ตัก อานี เอา อานี ตัก เฮดโรน เอา เฮดโรน ตัก เปเรด เอา เปเรด ตัก ยูดา
34เอา ยูดา ตัก ยาโคบ เอา ยาโคบ ตัก อิซอัก เอา อิซอัก ตัก อับราฮัม เอา อับราฮัม ตัก เทรา เอา เทรา ตัก นาโฮ
35เอา นาโฮ ตัก เซรุก เอา เซรุก ตัก เรอู เอา เรอู ตัก เปเลก เอา เปเลก ตัก เอเบอ เอา เอเบอ ตัก ซาลา
36เอา ซาลา ตัก ไคนาน เอา ไคนาน ตัก อาฟากซาด เอา อาฟากซาด ตัก เซม เอา เซม ตัก โนอา เอา โนอา ตัก ลาเมก
37เอา ลาเมก ตัก เมทูเซลา เอา เมทูเซลา ตัก เอโนก เอา เอโนก ตัก ยาเรด เอา ยาเรด ตัก มาฮะลาเลล เอา มาฮะลาเลล ตัก เคนัน
38เอา เคนัน ตัก เอโนด เอา เอโนด ตัก เซด เอา เซด ตัก อาดาม เอา อาดาม ตัก เอาซาง
Currently Selected:
ลูกา 3: Prai
Highlight
Share
Copy
Want to have your highlights saved across all your devices? Sign up or sign in
Global Partners
