Ruka 24

Yesu azingi be kpio

(Mt. 28:1-10; Mk. 16:1-8; Yo. 20:1-10)

1Pamanangba wiso ti gu bambata uru nga ga poso, ade ki ye ku pati murã na gu wene fuõangua i ambakadi he. 2I ki bi mbia i naima wiriga ha ku sa yo. 3I ki rimi ku murã yo ka i abi nga kangba Gbia Yesu ya. 4Si ki ta du wa gere, wa i abaka bangiriyo ti gi pai re, mo ngére, akumba ue aru pati yo na ngenzerengenzere remu. 5Wa i agunde agunde, ki vagadi ku sande; akumba ki ya fu yo, “Tipagine oni nagbata unga boro ti ni dagba kangba aboro yo? 6Ko etere, ko zingi be kpio. Oni tíngidi he wa ko agumba ha fu roni ho ko ata du ni Gariraya yo, 7niya i ka fu Wiri boro ku be gbegberẽ aboro, i ki wagi ko, biata uru ko ki zingi be kpio.” 8Ade ki tingidi gako pai, 9ki karaga tiyo pati murã yo, ki gumba agi apai re dunduko fu agu yo nadu bawe na sa, na fu kura aboro dunduko. 10Were agu yo nagumba agi apai re fu amokedi i nangia aMaria Magadara, na Yoana, na gu Maria nga na Yakoba; na gu kura ade nadu na yo. 11Agi apai re ki niwiri kina wia bangiri amokedi; i ki nibasa ha. 12Ono Petero aguari ki nioro ku murã yo; ko ki nugadi ki ningere koyo, ko ki bi kina remu ni sa ha; ko ki ga ku kpuko vo, ki baki bangiriko ti gu pai namangi re.

Abawiriki ngba gene Emau

(Mk. 16:12-13)

13Were, agu yo ue dagba yo andu ni kina gu rago re ku kporo yo rimoho nangia Emau, si turũ na Yerusarema wa akirometere bawe. 14I ki fura dagba yo tipa agu apai nadu ni mangimangi he. 15Si ki ta du wa gere, wa i afura nibaki bangiriyo, Yesu ki mbedi na yo tigako, ki mongo nindu na yo. 16Ono i aina nga ko te bangiriyo adu ni kina tataita ha. 17Ko ki ya fu yo, “Gini pai oni nagumba dagba roni, wa oni andu?” I kiru, kinirungo. 18Gu ni sa, rimoko nangia Kereopa ki karaga ha niya fu ko, “Mo nata ni sa ro rogo Yerusarema mo ata ina nga agu apai i amangi yo re ni gi rago te re?” 19Ko ki ya fu yo, “Gini pai?” I ki ya fu ko, “Pai tipa Yesu nga boro Nazareta, gu ko nangia nebi, ki du na tandu rogo agu apai ko amanga na gu ko agumba barangba Mbori na barangba aboro dunduko! 20Na wa abairamotumo na abazogorani afu ko i gbarasi ngbanga ko ka imo ko, ki niwagi ko. 21Ono ani aberẽ tigaani ya ko nangia gu ko nikatumo aYisaraere. Ii, gbia kuti gere dunduko areme nga biata uru fuo manga yo agi apai re. 22Ono kura pai nairiwosi rani, bambiko agu ade dagba agu yo du na ani andu pamanangba wiso ku Dati murã. 23Ho i abi nga kangbako ni ya, i ki ye, niya, i nibi amaraika, nagumba ya ko du ni ungako. 24Agu yo nadu dagba rani ki ndu ku murã yo, ki bi he wa kina gu ade agumba ha; ono i abi nga ko te.” 25Ko ki ya fu yo, “Ako airamungo, oni naida pa agu apai Kokorokokoro anebi naagumba ha! 26Si ru Kristo ka hi agi apai re, ki nirimi ku rogo gako taarimo te?” 27Ko ki tona yugo agu apai fu yo dunduko tona ti ga Mose apai na ga anebi, na rogo Ziazia Kekeapai dunduko nga gu du tipa ko tigako.

28I ki mbedi na gu kporo, yo i andu ku ho ni; ko ki ndu wa ka ko nikasusa. 29I ki zúngadi ko, niya, “Ani súngu na mo; bambiko uru nandu gbe, uru nikati.” Ko ki rimi ka sunga na yo. 30Si ki ta du wa gere, ho ko asungu ni na yo ka ri riahe, ko Ki di kpokuta, ki fu tambuahe, ki kuadi he, ki nifu he fu yo. 31Bangiriyo ki ha, i ki ini ko; ko ki nibirikpo ni ba sa. 32I ki ya dagba yo, “Ani akigi akiga, ho ko afura ni na ani gene, wa ko ayugu Ziazia Kekeapai fu rani te?” 33I ki guari ni ba sa, ki karaga tiyo ku Yerusarema yo, ki nibi agu yo nadu bawe na sa i naima dungura tiyo, na agu yo nadu na yo. 34I ki ya, “Gbia zingi be kpio ni rengo, ko yugu tiko fu Simona!” 35Agu yo ki pe agu apai namangi gene, na wa i aini Gbia ho ko akuadi kpokuta ni.

Yesu ayugo tiko fu abawiriki

(Mt. 28:16-20; Mk. 6:14-18; Yo. 20:19-23)

36Wa i agumba agi apai re, Yesu ki kuru ku dagba yo tigako ki niya fu yo, “Oni dú zezeredi.” 37Ono i agunde agunde ngbaduyo ki nikua akua gbe, i ki berẽ he ya toro nadu. 38Ko ki ya fu yo, “Tipagine kigi oni ti ni? Tipagine saki oni he ti ni ngbaduroni yo? 39Oni bí kpabere na kpendure ya mi du ni rengo; oni zádi re, ki nibi re; bambiko pasio na meme ti toro te, a wa du mi awere.” [ 40Ho ko agumba gi ni re, ko ki yugu kpabeko fu yo na kpenduko.] 41Wa i aida nga pa ko mbiko gayo ngbarago ya, si ki niiriwo ti yo, ko ki ya fu yo, “He be roni erẽ karihe?” 42I ki fu pasipasi tĩo fu ko. 43Ko ki di ru, ki niri ru ku bangiriyo.

44Ko ki ya fu yo, “Gi nga gu gimi apai mi agumba fu roni re, wa mi adu na oni, ya i ka digisa apai dunduko, nga gu du ni keke he rogo ga Mose Rugute yo na anebi na Atambuahe yo tipa re.” 45Ko ki uru gayo berã, i ki rugu tiyo na Ziazia Kekeapai. 46Ko ki ya fu yo, “I ake he ya Kristo ka hi pai, biata uru ko ki zingi be kpio; 47ya i ka tungusa pa sa berã na vu aboro ti ingaapai ni rimoko fu rika aboro dunduko, tona Yerusarema yo. 48Adezire agi apai re nga oni. 49Oni ngére, mi akéda ga Buba kidohe fu roni. Oni sungu bakporo yo, da kina ho i ka ukadi roni ni na tandu ari yo.”

Yesu aga ku ngbangbaturũ yo

(Mk. 16:19-20; Amo. 1:9-11)

50Yesu ki ndu na yo ki da ku pati Betania yo. Ko ki tumba beko, ki nifu maku fu yo. 51Si ki ta du wa gere, wa ko afu maku fu yo, ko ki guari pati yo, Mbori ki di ko ku ngbangbaturũ yo. 52Gako abawiriki ki irisi ko, ki nikaraga tiyo ku Yerusarema yo na bakere ngbarago. 53I ki nidu yekaru yo nisambua Mbori kindi.

Currently Selected:

Ruka 24: ZB1978

Highlight

Copy