Ruka 1
1
Sanango Teofiro
1Bambiko wa dungu aboro atona ka ke pa agu apai nzunzu nadu ni mangimangi he dagba rani, 2kina wa agu yo afu he fu rani, nabi he ki ngia adezirehe ti tonatona rago na abatungusipai, 3si angba ti re a ka ke pai ni tangaratangara ha foro, wene Teofiro, a wa mi apeke he nzunzu ti tonatona ha dunduko, 4ya mo ini he ya rengo nangia agu apai i arugu ro kuti ni.
Maraika ayugu pa batika Yoane Babapatiza
5Ni gu rago Erode adu ni bakindo aYudo boromotumo adu ho, rimoko angia Zakaraya, nangia ngbatunga Abiya. Diako nangia tita Arona, rimori nangia Erizabeta. 6I ue adu ni ruru aboro bangiri Mbori, nita rogo ga Gbia rugute na gako andika nizanga pai ku ri yo. 7Gude adu nga be yo te, bambiko Erizabeta nangia irazangada, dungu agarã asaki yo gbe.
8Si ki ta du wa gere, wa Zakaraya amanga ga boromotumo sunge barangba Mbori ti gako rago, 9wa sino boromotumo anidu, gako sunge nangia rima ku vuru ga Gbia yekaru yo ka zo fuõngua. 10Rago zo fuõngua rimbasa aboro adu zegi yo nikpari akpara dunduko. 11Ga Gbia maraika ki yugu tiko fu ko niru ku kumbabe pati gu bamotumo nga ga fuõngua. 12Ho Zakaraya abi ko ni, ko ki kigi akiga, gunde ki zi ko. 13Ono maraika ki ya fu ko, “Zakaraya, ka mo gúnde nga ya; bambiko i gi ga kpe, diaro nga Erizabeta abátika gude foro, mo ki yambu rimoko nga Yoane.
14Rago angbá angba ti ro, mo ki wasa;
rago batika ko rago ki ngba angba ti dungu aboro;
15tiparimowe ko adú ni bahe bangiri Gbia,
ko ambíra nga imekakue na baripiro te,
Mbori ahísa ko ni Ziazia Toro,
ti kina gu rago nako ka vunga ko.
16Ko asá dungu awiri aYisaraere fu Gbia nga gayo Mbori,
17ko atá ku bangiri Gbia ni toro Eriya na tanduko,
ka sa kpoto abaagude yo fu awiriyo,
na keretukeretu aboro i peke gu tatamana nga ga ruru aboro,
ka ringbisa aboro tipa Gbia ni mbakadimbakadi yo.”
18Zakaraya ki ya fu maraika, “Mi awíra pa ina gere wãi? Bambiko gbinza boro nga mi, dungu garã saki diare a.” 19Maraika ki ta karaga ha fu ko, niya, “Gabariere nga mi, naru barangba Mbori; i nikedi re mi gumba pai foro, ka yugo gi wene pangbanga foro re. 20Mo ngére, mo adú ni kisikisi ngbaro, ka si adu nga wa ka mo fura ya, dati gu rago agi apai ka manga re, bambiko mo aida nga pa gu gimi apai nikadu ni digisidigisi he rago ho te.” 21Aboro ki nisungudi Zakaraya, si ki niiriwo ti yo wa ko aima vuru yekaru yo. 22Ho ko akuru ni, ka si adu nga wa ka ko gumba pai fu yo ya. I ki ini he ya ko nibi yuguyugu pai yekaru yo. Ko ki niringbisi pai fu yo ni beko, ki nimangi pai kina ku kukiri. 23Si ki ta du wa gere, ho rago gako sunge anyasi ni, ko ki ga ku kpuko yo.
24Fuo agi arame re Erizabeta ki du na mobara nangia diako. Ri ki oko tiri diwi ki du bisue, niya, 25“Gbia amangi he fere wo ni gu rago ko abi re, ka dia gi gbarasarimo ti re dagba aboro.”
Maraika ayugu pa batika Yesu
26Were i akedi gu maraika nga Gabariere yo du Mbori ni ni sita diwi ku rogo gu bakporo du Gariraya yo, i niya ti ni Nazareta, 27koyo du ngasu de ni i apazua ri fu kumba rimoko angia Yosefa, nangia ngbatunga Dawidi; rimo gu ngasu de re nangia Maria. 28Maraika ki rimi koyo du ri ni, ki ya, “Ako, mo gu Gbia du na mo, ki fu maku foro.” 29Ngbaduri ki nikua akua be gi pai re, ri ki baki bangiriri ya ngbatunga gini paakuti boro nga gere. 30Maraika ki ya fu ri, “Ka mo gunde nga ya, Maria, bambiko Mbori ngba na mo. 31Mo ngere, mo nikadu na mobara rukumburo yo, ki batika gude, ki yambu rimoko nga Yesu.
32Ko adú ni bahe, i ayá ti ko Wiri Mbori nga Bahe;
Gbia Mbori amáa ko ni bakindo a wa titako adu nangia Dawidi,
33ko ki zogo ngbatunga Yakoba azoga kindi;
gako ngbi adiga nga te.”
34Maria ki ya fu maraika, “Gi pai awíra pa du wãi re wa mi aina nga pa kumba ya?” 35Maraika ki karaga ha fu ri ki ya,
“Ziazia Toro nikaye sa ro,
gu tandu nga ga gu ko zogo aboro dũ nikadada ro;
si du i ka ya ti ni ti gu gude mo ka vunga ko, Ziazia ko, nga Wiri Mbori.
36Mo ngére, gu gumero nga Erizabeta, ri na kumbagude ni gbinza ri. Diwiri du awere sita nga gu ri i aya ti ri irazangada. 37Bambiko a nga ga Mbori pai ho sa ka zanga tandu te.” 38Maria ki ya, “Mo ngére, ga Gbia kanga nga mi; i mángi he fere wa gu mo agumba.” Maraika ki guari pati ri.
Maria andu koyo du Erizabeta ni
39Maria ki guari ni gu rago re ki ndu ku ngbi bagangara yo, ku rogo gu bakporo du Yuda yo ni ngarã; 40ki rimi ku rogo ga Zakaraya bambu yo ki poi kuti Erizabeta. 41Si ki ta du wa gere, ho Erizabeta agi fugo Maria ni, fogo gude ki gu rukumburi yo; Erizabeta ki hi be Ziazia Toro. 42Ri ki poi ku ari ni bakere fugo, ki ya, “Irisiirisi boro nga mo dagba ade, irisiirisi he nga zuzu rukumburo! 43Gere si niye wari fere nga na gi Gbia ye kono du mi ni? 44Mo ngére, ho ga paakuti re ati ku ture yo ni, fogo gude ki gu rukumbure yo ni ngbarago. 45De maku nga gu ri naidi pai; bambiko i amánga agu apai amanga i agumba ha fu ri yo du Gbia ni.”
Ga Maria kpetambuahe
46Maria ki ya,
“Mbisimore nataasa rimo Gbia,
47rago ngba ti torore mbiko Mbori nga Batasire,
48bambiko ko ngere koyo du gako rungorungo kanga ni.
Oni ngére, bambiko arika aboro ayámba re ayamba dunduko ya, de maku;
49bambiko gu ko du na tandu apai mangi bakere pai fere,
ziazia he nga rimoko.
50Gako weneringise du fu rika aboro gbia kuti gu rika aboro,
nga agu yo nagunde ti ko.
51Ko yugu ome ni beko;
ko gbandaka airarekangose ni agu apai i aberã kpotoyo yo,
52ko rogo akindo auru gayo mbata,
ki moi rungorungo aboro;
53ko mbisi aboro gomoro ni wene ahe,
ko ki dandi airakumuko ni ku beyo.
54Ko unda Yisaraere nga vuruko,
ko tingidi pa weneringise,
55wa ko agumba fu abarani,
fu Abarayama na arikako kindi.”
56Maria ki raki koyo du ri ni diwi ki du wa biata, ri ki ga ku kpuri yo.
Batika Yoane Babapatiza
57Were rago Erizabeta ki rengbe ri vungu, ri ki batika kumbagude. 58Agu aboro ri aini yo ki gi he na agumeri ya Gbia ataasi gako weneringise fu ri; rago ki ngba angba ti yo na ri. 59Si ki ta du wa gere rame ki du muambi, i ki ye ka yera gude ni yerati; i ki idi ka yamba rimoko nga Zakaraya wa du rimo bako. 60Nako ki karaga ha ki ya, “Wo te; ono i yámbu rimoko nga Yoane.” 61I ki ya fu ri, “A nga boro sa dagba agumero yo yambu yo gi rimo kuti ni te re.” 62I ki niringbisi he fu bako, ya gini rimo ko akpi nyemu i yambu he kuti ko. 63Ko ki sana yo tipa gu waraga i nake pai ti ni, ko ki ke he ya, “Rimoko nga Yoane.” Si ki iriwo airiwo ti yo dunduko. 64Ngbako ki za ni ba sa, giri mirako ki zaki, ko ki ta fura ni sambua Mbori. 65Gunde ki zi agu yo kpuyo adu pati yo kirikiri dunduko. I ki taki pande agi apai re ku rogo gu ngbi bagangara du Yuda yo dunduko. 66Agu yo nagi he i ki ta ka kuti he kpotoyo yo dunduko, niya, “Gi gude adú ni ngbatunga gine re?” Bambiko be Mbori adu na ko.
Ga Zakaraya kpetambuahe
67Bako ki hi be Ziazia Toro nangia Zakaraya, ko ki ta gumba pai niya,
68“I támbua Gbia, nga ga Yisaraere Mbori,
bambiko ko ye ki tumo avuruko,
69Ki fu nyanyaki bata fu rani
dagba atita Dawidi yo nga vuruko,
70wa ko agumba ku ngba gako ziazia anebi naenge ho rago aenge ni,
71ya ani bati be avurarani,
na be agu aboro dunduko nasoga rani;
72ka yugo weneringise fu abarani,
ka tingida gako wene ndika,
73na gako zungahe ko azunga fu Abarayama nga barani,
74ka ida fu rani ani bati be avurarani
ka amanga pa ko zezeredi,
75ani ki du ni ziazia rani na ni ruru rani bangiriko wa du ani ni ungarani.
76Na mo, gude, i ayámba ro nebi nga ga gu ko du ni Bahe;
bambiko mo nikandu mbata fu Gbia ka mbakada gako agene,
77ka fu ina pa bata fu avuruko
nigbandaka gayo ingaapai,
78mbiko ngbadu weneringise nga ga gaani Mbori,
yo girarago ka ye ni fu rani ari yo,
79ka hasa rago fu agu yo sungu bitimo na rogo kirima kpio;
ka maa ndurani ngba gene zereda.”
80Gude ki sono, ki ninyaki ti toroko, ki nisusungu kina ngbakungba yo dati rago yugo ko fu Yisaraere.
Currently Selected:
Ruka 1: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
