Yoane 5

Yesu ahusi boro pati munga Beteseda

1Fuo agi apai re pumbo ki du nga ga aYudo; Yesu ki ndu ku Yerusarema yo.

2Were munga du Yerusarema yo pati ngbadimo akandoro, i niya ti ni Beteseda pa aEbere yo, na gbanga ngbadimoho bisue. 3Yo rimbasa aboro apiki ni nga agu yo nadu na kaza, airavurari, na gbarĩgbarĩ aboro, na airauguda. [I ki nisungu tipa sungburasungbura ime. 4Bambiko maraika anizorõ ku munga yo ni gu rago, ki niwo ti ime: fuo wo ti ime, gu ni nanizorõ tie koyo mbata, ni anihu ahu be gu kaza nanizi ni.] 5Gu kumba ki du yo, garãko adu na gako kaza 38. 6Ho Yesu abi ko ni ko pi, ki ini ya ko naima ku ho gbe, ko ki ya fu ko, “Mo nakpi nyemu ka bata?” 7Gu kumba nakaza ko ki karaga ha fu ko ki ya, “Gbia, boro ti re ka moi re ku munga yo ho ime nasungbura ni te, mi nita ye aye kura boro ki ima zorã mbata fere.” 8Yesu ki ya fu ko, “Mo gúari, ki di ga ira, ki nita.” 9Kumba ki bati abata ni ba sa, ki di gako ira ki nita.

10Were ni gu rago re rago sabiti nadu. Si du aYudo aya ti ni fu gu ko i abatasi ko, “Rago sabiti du, ru nga dia mo ga ira te.” 11Ko ki karaga ha fu yo ki ya, “Gu ko nibatasi re, ko niya fere, ‘Mo dí ga ira, ki nita.’ ” 12I ki sana ko, “Gini kumba niya foro, ‘Mo dí ga ira, ki nita’?” 13Gu ko i ahusi ko ko aina nga gu boro nadu te, bambiko Yesu adi tiko ku sa yo, rimbasa nadu rogo gu ba re. 14Fuo gere Yesu ki bi ko rogo yekaru yo, ki ya fu ko, “Mo ngére, mo hu! Ka mo mángi nga gbegberẽpai berewe ya, gu ka manga ro gberẽ agberã susi gere.” 15Kumba ki ndu, ki gumba ha fu aYudo ya Yesu du nabatasi ko.

16AYudo ki nimo ka rungosi Yesu, bambiko ko amangi agi apai re rago sabiti. 17Yesu ki karaga ha fu yo ki ya, “Buba namanga sunge amanga kindi a wa du rago re, mi nimangi sunge a.” 18Si du aYudo amo ti ni ka kpi nyemu imo ko bakere ti gu nadu mbata, bambiko ko agu nga kina auru rago sabiti sa te, ko aya a Mbori nga Bako, ko ringbisi tiko na Mbori.

Gu tandu nga ga wiri Mbori

19Yesu ki nimo ka karaga ha fu yo ki ya, “Mi nagumba ha fu roni ni rengo, ni rengo, ka Wiri mangi nga pai ni tiko wa sa te, kina gu pai ko abi Mbori nga Ba nimangi he. Bambiko agu apai ko amanga, si Wiriko amanga a wo. 20Bambiko Ba nakpi nyemu Wiriko akpi, ki niyugu agu apai fu ko dũ ko amanga ni tiko. Ko ayugo bakere apai ayugo fu ko ki susi gere, si iriwo ti roni. 21Bambiko wa Ba nazingisa kangba aboro nifu unga fu yo, kina wo Wiriko afu unga a fu agu yo wa ko akpi nyemu he. 22Bambiko Ba asapa nga ngbanga boro wa sa te, ko fu pa sapangbanga dunduko fu Wiriko; 23aboro irisi Wiriko airisa dũ, wa kina gu i nairisa Mbori nga Ba. Gu ni airisa nga Wiriko ya ni airisa nga Bako nakedi ko te. 24Mi nagumba ha fu roni, ni rengo, ni rengo, gu ni ka gi gi pai, ki idi pa gu ko nakedi re, nyenye unga du adu be ni, ni ye nga sa sapangbanga te, ni kuru akura kpio yo ku rogo unga.

25“Mi nagumba ha fu roni, ni rengo, ni rengo, ragoho nada, si awere, ho kangba aboro ka gia fugo Wiri Mbori ni; agu yo ka gi he i du adu ni ungayo. 26Bambiko wa du unga ti Mbori nga Ba ni tiko, kina wo ko afu he fu Wiriko a unga du ti ko ni tiko. 27Ko aasia pa sapangbanga fu ko, bambiko Wiri boro nga ko. 28Ka gi iriwo nga ti roni re ya, bambiko ragoho nada, ho agu yo ka gia fugoko ni dunduko du rogo amurã yo, 29ki kuru; agu yo nanamanga wenepai sa gu zingabekpio nga ga unga; agu yo nanamanga gbegberẽpai, sa gu zingabekpio nga ga sapangbanga.

Adezire Yesu

30“Ka mi mangi nga pai ni tire te; mi nasapa ngbanga, wa mi agia ha; ru gi sapangbanga aru; bambiko mi agbata nga gu pai mi akpi nyemu he te, kina gu pai gu ko akpi nyemu he nakedi re. 31Ka mi du ni dezirere ni tire; gi dezire du nga ni rengo te. 32Kura boro kina ho nga dezirere; mi ini ya gu dezire ko nagumba tipa re si du ni rengo. 33Oni akedi sunge koyo du Yoane ni, ko ki du ni dezire rengo. 34Ono mi adia nga ga boro dezire te. Mi nagumba agi apai re, oni bati. 35Ko nangia gu we nakii ki nihasi rago. Oni akpi nyemu rago ngba ti roni ngbutuko rogo imako. 36Ono gu dezire du be re si susi ga Yoane; bambiko agu apai fu Buba fere mi nyasi he, kina agu apai mi amanga, si nga dezirere, ya Buba kedi re. 37Buba nakedi re, ko nangia dezirere. Oni agia nga fugoko ni gu rago wa sa te, oni abi nga kpiako a te. 38Gako pai anye nga kpotoroni yo te, bambiko gu ko ko akedi ko, oni aida nga pa ko te. 39Oni nawisiga Ziazia Kekeapai, bambiko oni naberã ha ya nyenye unga rogo yo; agu apai re si nga dezirere. 40Oni akpi nga nyemu ye kono du mi ni ka du ni ungaroni te. 41Mi adia nga taarimo be aboro te. 42Ono mi ini roni, ya nyemu Mbori kpotoroni yo te. 43Mi ye ni rimo Buba, oni adia nga re ku gume te; ka kura boro ye ni rimoni ni tini, ni ka oni di ni ku gume. 44Ka oni wiri pa ida pa re wãi, agu roni di irisa ku dagba roni, oni agbata nga gu irisa naye kina yo du bangisa Mbori ni te? 45Ka oni bérẽ nga ha ya mi akita ngbanga roni fu Buba ya. Gu ni kina ho nakita ngbanga roni, nga Mose, ko du bangironi koyo du ko ni. 46Bambiko si ngia oni aidi pa Mose, oni idi pa re; bambiko ko ake pa re. 47Ono ka oni aida nga pa gako kekeapai ya, oni wiri pa ida pa gimi apai wãi?”

Currently Selected:

Yoane 5: ZB1978

Highlight

Copy