Yoane 14

Yesu nga gene ku Mbori yo nga Ba

1“Kaoni rúngo nga kpotoroni yo ya; oni ídi pa Mbori, oni ídi pa re a. 2Rogo ga Buba bambu dungu banye du yo; ka si nadu nga wo ya, ka mi agumba ha fu roni; bambiko mi nandu ka mbakada ba fu roni. 3Ka mi ndu ka mbakada ba fu roni, mi ayé berewe, ki rogo roni fuo re; ho du mi ni, oni du a ho. 4Ho mi andu ku ho ni, oni ini gene ku ho.” 5Toma ki ya fu ko, “Gbia, ani aina nga ho mo andu ku ho ni te; ani wiri pa ina gene wãi?” 6Yesu ki ya fu ko, “Mi nga gene, nga rengo, nga unga a; a nga boro sa ka ye koyo du Buba ni gbua te, kina mbiko re. 7Ka oni aini re, ka oni aini Buba a; oni ini ko wa du rago re, ki bi ko.”

8Firipo ki ya fu ko. “Gbia, mo yúgu Bamo fu rani, si ki rengbe bangirani.” 9Yesu ki ya fu ko, “Wa mi aima diga niima na oni, mo aina nga re te, Firipo? Gu ni bi re ni bi Buba; wiri mo pa ya wãi, ‘Mo yúgu Bamo fu rani’? 10Mo aida nga pa re ya mi rogo Buba yo, Buba ki du rogo re yo te? Agu apai mi agumba fu roni mi agumba nga ha ni tire te; kina Buba nye rogo re yo namanga gako apai. 11Watadu gu pai nga mi rogo Buba yo, Buba ki du rogo re yo; na agu apai re, oni ídi pa re mbiko gu.

12“Mi nagumba ha fu roni, ni rengo, gu ni ka idi pa re, agu apai mi amanga ni mangi he amanga a; ni mangi apai amanga bakere susi gere; bambiko mi nandu koyo du Buba ni. 13Gu he oni ka nikpari pa ha ni rimore, mi animangi gu amanga re, Buba du ni taasitaasi ko rogo Wiriko yo. 14Ka oni kpari pa gu he fere ni rimore, mi mangi gu amanga re.

Ga Yesu kidohe tipa fu Ziazia Toro

15“Si ngia oni nakpi nyemu re, oni ka kuti girugute. 16Mi akpara fu Buba, ko fu kura Mounda fu roni, ko nye anye na oni kindi, 17nga gu Ziazia Toro nga irarengo; gu ko ka aboro adia nga ko ku gume zegino dunduko ya; bambiko i abi nga ko te, i aina nga ko a te. Oni ini ko; bambiko ko nye na oni, ko adú rogo roni yo.

18“Mi ahe nga roni ni awirinyaure te; mi ayé aye kono du oni ni. 19Mi naima ngbutuko, ka aboro abi nga re zegino berewe ya; oni nikabi re abi; bambiko mi ni ungare, oni adú ni ungaroni a. 20Ni gu rago re oni aína aina ya mi rogo Buba yo, oni ki du rogo re yo, mi ki du rogo roni yo. 21Gu ni du gi rugute be ni ni ki ka kuti ni, kina ni nakpi nyemu re; gu ni du nyemu re ti ni Buba akpi nyemu ni akpi, mi akpi nyemu ni akpi a, ki yugu tire fu ni.” 22Yudakiyafu ko (Keriota te), “Gbia, gine du mo ka yugo tiro ti ni fu rani, ka mo ayugo nga tiro fu aboro zegino dũ ya?” 23Yesu ki karaga ha fu ko ki ya, “Si ngia boro nakpi nyemu re, ni ka kuti gi pai. Buba akpi nyemu ni akpi, ani aye koyo du ni ni, ki nye na ni. 24Gu ni ka kpi nga nyemu re ya ni ka nga kuti gimi apai te. Gu pai oni agia gimi nga ha te, kina ga Buba nakedi re.

25“Agi apai gumba mi fu roni re, wa du ani na oni kindi re. 26Gu Mounda, nga Ziazia Toro, gu ko Buba ka keda ko ni rimore, ko ayugo apai dunduko fu roni, ki ye na agu apai ku bangironi dunduko mi agumba fu roni. 27Zereda mi ahe na oni; gi zereda mi afu fu roni. Mi afu nga ha fu roni, wa aboro nafu he fu roni zegino te. Ka oni rúngo nga kpotoroni yo ya, ka oni gúnde nga a ya. 28Oni agi he wa mi aya fu roni, ‘Mi namerã, ki ye kono du oni ni.’ Ka oni nakpi nyemu re, ka rago nangba angba ti roni, bambiko mi nandu koyo du Buba ni; bambiko Buba susi re. 29Gumba mi he fu roni awere mbata si nikada, ya ho si ka da ni, oni ki idi pa re aida. 30Mi afu nga na oni bakere berewe te, bambiko kindo zegino naye, ka tandu adu nga be ko auru re ya. 31Aboro ini aina zegino ya mi nakpi nyemu Buba, wa Buba afu rugute fere, kina wo mi amanga. Oni gúari, ani gúari erẽ.”

Currently Selected:

Yoane 14: ZB1978

Highlight

Copy