Bambata Pai 22

Pa ya fu Abarayama ko tumo na Yisaka

1Fuo agi apai re Mbori ki asadi Abarayama, ki ya fu ko, “Abarayama!” Ko ki ya, “Mi du re.” 2Ko ki ya, “Mo dí wiro, nga kina bangisa wiro nga gu ko mo akpi nyemu ko gbe, nga Yisaka, mo ki ndu ku rogo gu ringara nga Moriya, ki tumo na ko ni zozo motumo ri gu bagangara mi ka yugo ho foro.” 3Abarayama ki zingi ngbatutu wiso, ki vo basunga ku ri gako dongi, ki rogo gako aparanga ue fuo ko, na Yisaka nangia wiriko. Ko ki kua nyake tipa zozo motumo, i ki guari ki ndu ku rogo gu ba yo Mbori agumba paha fu ko. 4Ti biata rame, Abarayama atuka bangiriko ki bi gu ba re tuturũ. 5Abarayama ki ya fu gako aparanga, “Oni nyé tigaoni erẽ na dongi; ani nandu na kina wire koyo, ka irisa Mbori yo, ki yega fuo roni berewe.” 6Abarayama ki di nyake tipa zozo motumo, ki moi he ku ri Yisaka nangia wiriko; ko ki di we ku beko na sape. I ki mongo nindu andu wa sa. 7Yisaka ki sana bako nangia Abarayama, ki ya, “Buba!” Ko ki ya, “Mi du re, wire.” Ko ki ya, “Mo ngére, we na nyake du re; ono wari du wiri kandoro ni tipa zozo motumo?” 8Abarayama ki ya, “Wire, Mbori afú wiri kandoro ni tiko tipa zozo motumo.” I ki mongo nindu andu wa sa.

9I ki kuru ku rogo gu ba Mbori agumba paha fu ko re, Abarayama ki dua bamotumo yo, ki mamoi nyake ku auru he, ki vo Yisaka nangia wiriko, ki moi ko ku ri bamotumo ku auru nyake. 10Abarayama ki taĩ beko, ki di sape ka imo wiriko. 11Ga Yekova maraika ngbangbaturũ yo ki yambu ko, ki ya, “Abarayama, Abarayama!” Ko ki ya, “Mi du re.” 12Ko ki ya, “Ka mo túmba nga bero kuti wiro ya, ka mo mángi nga ko na pai a ya; bambiko mi ini he awere ya mo nagunde ti Mbori, wa mo aka nga na wiro nga kina boro bangisa wiro, be re ya.” 13Abarayama ki tuka bangiriko, ki ya ngere. Were bakandoro adu gii ko yo nakongo ti gbangaru ti ngua; Abarayama ki ndu ki di gu bakandoro re, ki tumo na u ni zozo motumo ku ba wiriko. 14Abarayama ki yambu rimo gu rago re nga, “Yekovayire,” a wo i nayamba ha daku awere, “Rogo gu bagangara nga ga Yekova, yo i ka fu he ni.”

15Ga Yekova maraika ngbangbaturũ yo ki yambu Abarayama ni ue he, 16ki ya, “Mi ni tire zunga he, wo poi Yekova, bambiko wa mangi mo gi pai re, ka mo aka nga na wiro be re nga kina bangisa wiro ya, 17mi afú maku foro ni rengo, ki ngeesi ngbatungaro wa kina akerekuru ngbangbaturũ yo na wa kina ngume pangba baime. Angbatungaro aróga ringara avurayo ni gayo, 18rogo ngbatungaro i ka fu maku ni fu arikaaboro zegino dunduko, bambiko wa gi mo sangbare.” 19Were, Abarayama ki karaga tiko koyo du gako aparanga ni. I ki guari ki mongo nindu ku Bera-saba yo; Abarayama ki niraki Bera-saba yo.

Pa angbatunga Naora

20Fuo agi apai re i ki gumba ha fu Abarayama ya, “Mo ngére, Mireka abatika agude fu wiribamo nga Naora: 21Usa nga unvurua Buza ki du fuo ko, na Kemuere nga ba Arama, 22na Kesede, Azo, Piredasa, Yidirafa na Betuere.” 23Betuere ki batika Rebeka. Agi yo muambi re Mireka abatika yo fu Naora, wiriba Abarayama. 24Gako debadia rimori angia Ruma, ri ki batika aTeba, Gama, Tasa na Maka.

Currently Selected:

Bambata Pai 22: ZB1978

Highlight

Copy