TOBITƐ 12
12
Rafaɛlɛ tɔ̃a tɛ̃ a
1Wa dɛa yangga ni gbaa kɔ ma nɛa we sɔkpɔ nɛ, nɛ Tobitɛ sa mɔ hã be 'da a, nɛ a tɔ̃ hã a na: “Be 'daa, mɔ fútá ngba mɔ wi gɔnɔ wala, nɛ mɔ é mbe ngɔ mbili ni hã a.”
2Nɛ Tobi gese hã baa a na: “Mi nɛ futa a nɛ nde? Gɛnɛ kɔ mi hã kpo mbe bɔa kɔ mɛnɔ kɛ a gala mi we si do ma gɛ hã a, nɛ nde ma tɛ wè gɔ. 3Mba gɔ, a si do mi do ba tɛ mi, a ndaka 'dã hi wi kɔ kɛnɛ mi, a gala mi we kpa mbili, nɛ a kpasa mɔ kɔ zɛlɛ 'da mɔ. Kɔ mbili kɛ mi wia we futa do a olo mɛnɔ ni vɛ̃ ni a mbili ge nde?”
4Nɛ Tobitɛ gese na: “Ma wia na, mɔ hã kpo mbe bɔa kɔ mɛnɔ vɛ̃ kɛ a gala mɔ we si do ma ni hã a.” 5Nɛ Tobi sa mɔ hã Rafaɛlɛ, nɛ a tɔ̃ hã a na: “Mɔ kɔ̃, nɛ mɔ kálá kpo mbe bɔa kɔ mɛnɔ kɛ mɔ gala mi we si do ma gɛ. Ki ni mɛ a si olo kɛ mɔ gala do mi ni, kɔ mɔ si wá do dia nɛ!”
6Kɔ Rafaɛlɛ nɛa we zele ni, nɛ a sa mɔ hã Tobi do baa a Tobitɛ dɛ nza i, nɛ a tɔ̃ hã wa na: “Nɛ dɔ́nggɔ́ Gale, nɛ nɛ tɔ̃ sako dia dɛa mɛnɔ kɛ a dɛa do nɛ ni hã owinɔ vɛ̃, sɛ a wa dɔnggɔ dɔ̃lɔ̃ li 'da a, nɛ wa ga zuma hã a de. Nɛ dɛ́ na, owinɔ vɛ̃ wa ĩ ti dia dɛa mɛnɔ 'da Gale. Nɛ nɛ tɛ là fala dɔnggɔ a fala kpo gɔ. 7Onwanɔ ngɔ nù gɛ wa dɛ usu mɔ, nɛ wele wè tɛ tɔ̃ lɛnggɛ nɛ dɛ nza gɔ. Nɛ nde ma wia na, wa tɔ̃ lɛnggɛ dia dɛa mɛnɔ 'da Gale dɛ nza do olo tɛ nɛ vɛ̃, nɛ sako nɛ yɛ'bɛ.
“Fala kɛ nɛ dɛ dia mɔ fai, nɛ 'dã mɔ kpo kpá sɛ nɛ gɔ. 8Ma dia fɛ̃ na, wele sambala Gale do sila a vɛ̃, nɛ a dɛ gbɛla hã Owi sãnɔ do bɔlɔ nɛ. Ki ni ma dia tɛ Gale nɛa ngɔ kɛ owinɔ wa ngɛmɛ gili kpamɛnɔ do 'dã wala ni. Dɛ gbɛla hã owi sãnɔ ma dia nɛa ngɔ ngɛmɛ gili mɔ mbali. 9Mba gɔ, dɛ gbɛla ma kpasa wele kɔ fio, nɛ ma fɔlɔ 'dã mɛnɔ 'da a vɛ̃. Winɔ kɛ wa dɛ gbɛla wena ni, wa fe fio belee gɔ. 10Nɛ nde winɔ kɛ wa dɛ 'dã mɛnɔ, do wanɔ kɛ wa dɛ́ mɛnɔ do bɔlɔ nɛ gɔɛ ni, wa fa fio dɛ tɛ wa.
11“Mi tɔ̃a sɔ di ni hã nɛ na, Onwanɔ ngɔ nù gɛ wa dɛ usu mɔ, nɛ wele wè tɛ tɔ̃ lɛnggɛ nɛ dɛ nza gɔ, nɛ nde ma wia na, wa tɔ̃ lɛnggɛ dia mɛnɔ 'da Gale dɛ nza do olo tɛ nɛ vɛ̃. Kɔ ngangga ni, mi nɛ tɔ̃ wenɔ vɛ̃ dɛ nza do ngbongbo nɛ, mi úsú sɛ we kpo do nɛ gɔ. 12Tobitɛ, mɔ ĩ́ na, 'da fala kɛ nɛ do Sara, nɛ zi tɛ sambala nɛ ni, nɛ mi a mi ba zi dɔnggamɛ 'da nɛ, nɛ mi nɛ do ma dɛ dati yele ngbala 'da NWA. Nɛ mi 'bɔ a mi tɔ̃a we dia dɛa mɛnɔ 'da mɔ hã a, tɛ kɛ mɔ mi zi ofionɔ ni. 13Ngba soe zi mɔ kulu ngɔ nu mɛsa nyɔngɔmɛ, nɛ mɔ dà'bà tɛ mɔ gɔ, nɛ mɔ nɛ we mi fie ni, mɛ a ngba soe kɛ Gale tumba zi do mi we yamba sila mɔ. 14Nɛ nde, a tumba 'bɔ mi we kpasa mɔ, fala nɛ kpo do konduka 'da mɔ Sara. 15Wi a mi Rafaɛlɛ, mbe kpo kɔ anzɛnɔ sambo kɛ wa yolo dɛ dati yele ngbala 'da NWA, nɛ wa dɛ toe hã a ni.”
16Kɔ Tobitɛ do be 'da a wa nɛa we zele ni, nɛ zu wa vĩ do'do, kili ba wa, nɛ wa ala nù. 17Nɛ anzɛ tɔ̃a hã wa na: “Nɛ tɛ dɛ kili gɔ! E kɔ nɛ kpa gɛ̃a dungu, nɛ nɛ dɔnggɔ Gale 'da fala fai! 18A wele nɛ a kɔ̃a zi na, mi tɛ we gala nɛ. Mi tɛ̀ do kɔ sila mi iko gɔ. Kɔ ma wia na, nɛ gese iɔ̃nae hã a, nɛ nɛ dɔnggɔ a kɔ dungu nza 'da nɛ vɛ̃! 19Nɛ zɔ zi mi ɔ nɛ kɛ mi tɛ nyɔngɔ mɛ do nɛ ni, ĩ na mi nyɔ̀ngɔ̀ zi mɔ gɔ, nɛ zɔ zi a hi mɔ iko. 20Kɔ ma wia na, nɛ dɔnggɔ NWA Gale kɔ dungu nza 'da nɛ vɛ̃, nɛ nɛ yɛ'bɛ sako gã wi 'da a. Di ngangga ni, mi nɛ si dɛ 'da wele kɛ a tumba zi mi ni. Nɛ kɔ́mɔ́ mɛnɔ vɛ̃ kɛ ma dɛa tɛ̃ ɛ ni kɔ mbɛti.” Anzɛ Rafaɛlɛ tɔ́a ni do'do, nɛ a kũ dɛ li nza i. 21Kɔ Tobitɛ do be 'da a wa nɛa we kulu ngɔ, nɛ wa zɔ̃ 'bɔ a gɔ. 22Nɛ wa ga zuma we dɔnggɔ do Gale, nɛ wa gese iɔ̃nae hã a we dia dɛa mɛnɔ kɛ a dɛa ni, do we kɛ anzɛ 'da Gale hɔa 'da wa ni.
Currently Selected:
TOBITƐ 12: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.