TOBITƐ 10
10
Sila Owi ko Tobi ma ɔ ngɔ wena
1Ĩ na, tũ kpo kpo, Tobitɛ tɛ tɔlɔ tũ gɛnɛ 'da Tobi, kɛ we nɛ nɛa, do kɛ we si nɛ ni. Nɛ kɔ̃ tũnɔ ni vɛ̃ ma ia, nɛ nde be 'da a sì gɔ. 2Nɛ a lingga na: “Mbe gɔ, nɛ nde wa dula a i mɔ nde? Tabi Gabaɛlɛ fia do'do, kɔ wi hã mbili hã a bina nde?” 3Nɛ sila a ɔ ngɔ wena. 4Nɛ kɛnɛ a Ana tɔ̃ hã a na: “Be 'daa fia do'do, a 'bànà nza gɔ!” A lingga be 'da a, nɛ a ma ngɔ he ma do zɛ nu a na: 5“'Bakoe 'daa! Nae bulu be 'daa! Mi zɔ zi mɔ, sɛ nɛ mi dɛ yangga de! Kɔ gulu kɛ mi kɔ̃a zi na, mɔ nɛ nɔɛ ni we ge nde?”
6Nɛ Tobitɛ fa we mbɔkɔ sila a, nɛ a na: “Kɛnɛ mi, mɔ tɛ tɔ̃̀ ni gɔ. Sila mɔ tɛ ɔ̃ ngɔ gɔ, a vɛ̃ a dia. Mbe gɔ nɛ nde gele mɔ ma dula wa, tua kɛ ngba a wi gɔnɔ wala, a a nya lɛ, nɛ a 'bɔ a saka wele. Kɛnɛ mi, sila mɔ tɛ ɔ̃ ngɔ gɔ, a kɔlɔ fala hɔ nɛ ia.”
7Nɛ wuke gese na: “Mɔ tɛ tɔ̃̀ ni gɔ! Mɔ lá fala ɔkɔlɔ mi do'do! Be 'da mi fia do'do!” Nɛ tũ kpo kpo a tɛ hɔ nza we ka mɔ li wala be 'da a la zi nɛ ni, we kɛ a kɔ̃̀ zi 'bɔ we zele wele kpo gɔ. Fala kɛ wese gɛ̃ ia, nɛ a si tɔa, nɛ a he gbaa sa fala, nɛ a ɔ́ yala gɔ.
Tobi si dɛ 'da baa a
8Pɔsɔnɔ bɔa Raguɛlɛ wia zi we dɛ do gbalimɛ ni nɛa we sɔkpɔ nɛ, nɛ Tobi nɛa, nɛ a tɔ̃ hã kɛfɛ a Raguɛlɛ na: “Mɔ kɔ̃, nɛ mi si, tua kɛ mi ĩ na, baa mi do naa mi wa 'bɔ do mbé linggamɔ na, lo zɔ sɛ 'bɔ tɛ mi ni bina. Kɔ mɔ kɔ̃, nɛ mɔ la mi hã mi si 'da baa mi i. Mi tɔ̃a zi tɛlɛ tɛ kɛ mi la zi do wa ni hã mɔ ia.”
9Nɛ nde Raguɛlɛ dala nu ɛ na: “Tobi be 'daa, mɔ ɔ mbe do lɛ sɛ. Mi tombo sɛ owele 'da baa mɔ Tobitɛ i we tɔ̃ Sakonɔ 'da mɔ hã a.” Nɛ Tobi gese na: “Ma wé sɛ gɔ, mɔ kɔ̃ nɛ mɔ la mi, kɔ mi si 'da baa mi i.”
10Raguɛlɛ zila ni, nɛ a ba Sara hã Tobi, nɛ a kala kpo mbe bɔa kɔ kpamɛnɔ 'da a vɛ̃, nɛ a hã ma hã a. Mɛ zi a kpo mbe bɔa 'da Owi wilinɔ do owuko wi dɛa tonɔ, ongɔmbɔnɔ do obatanɔ, opundanɔ do osamonɔ, otulunɔ, omɔ kɔ tɔa, do ombili. 11Nɛ Raguɛlɛ ufu zala Tobi, nɛ a tɔ̃ hã wa na, wa nɛ do dia nɛ. A na: “Be 'daa, mɔ si a dia, nɛ tɛ mɔ ɔ do nga. E kɔ NWA kɛ a li nza i ni, a fɔmɔ nɛ do Sara! E kɔ NWA dɛ na, mi zɔ sɛ be zã nɛ, sɛ nɛ mi fe de.” 12'Do nɛ, nɛ a tɔ̃ hã be 'da a Sara na: “Mɔ si do wili mɔ dɛ 'da okɛfɛ mɔ i. Yolo do sɔɛ gɛ, Owi ko wili mɔ wa ɔ di nɛ ngbongbo Owi ko mɔ ni! Be 'daa, mɔ lá do dia nɛ! E kɔ mi zele dɛ ngɔ mɔ tati a dia sako fai.” A fana wa do'do, nɛ a ba wala hã wa na, wa si.
13Nɛ Edna tɔ̃a tɛ mɛ 'bɔ hã Tobi na: “Be 'daa, e kɔ NWA kã mɔ tɛ li wala si! E kɔ a a mbé tũ ngɔ kɔ̃ tũnɔ 'da mi, kɔ mi zɔ obenɔ kɛ nɛ do Sara, nɛ nɛ ko wa ni, sɛ nɛ mi fe de. Mi hã be 'da mi hã mɔ dɛ dati NWA, takɔ mɔ zɔ mɔ tɛ̃ a. Nɛ kɔ dungu nza 'da mɔ vɛ̃, da dɛ kɔ mɔ zɛlɛ tɛ̃ a gɔ. Be 'daa, mɔ si do dia nɛ! Yolo do sɔɛ gɛ, mɔ zɔ mi ɔ nɛ naa mɔ, nɛ mɔ zɔ Sara ɔ nɛ boko nya mɔ ni. E kɔ lɛ do nɛ, lɛ kpa dia dungu kɔ dungu nza 'da lɛ vɛ̃.” Nɛ Edna ufu zala wa do'do, nɛ a la wa na wa si do yangga. 14Nɛ Tobi kulu ngɔ tɛ nu tɔa 'da Raguɛlɛ do yangga, nɛ a gese iɔ̃nae hã NWA kɛ a li nza i, do ngɔ nù nga, NWA ngɔ mɔ nyanga nza vɛ̃, we kɛ a dɛa na, gɛnɛ 'da a la vɛ̃ do dia nɛ ni. Nɛ Raguɛlɛ tɔ̃a 'bɔ hã Tobi na: “E kɔ mɔ dɔnggɔ Owi ko mɔ kɔ dungu nza 'da wa vɛ̃.”
Currently Selected:
TOBITƐ 10: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.