MATIE 3

Bia we 'da Yoanɛ wi batisa winɔ

(Mar. 1.1-8; Luk. 3.1-18; Yoa. 1.19-28)

1Do 'da fala ni, nɛ nde Yoanɛ wi batisa winɔ hɔa zi tɛ li gba zɔ̃ tɛ ngɔ nù Yude i, nɛ a ma ngɔ be we hã winɔ na: 2“Nɛ kífí sila nɛ, we kɛ ngba soe Gale nɛ tɛ we dungu nwa ngɔ nù gɛ ni kɔla ia.”

3Yoanɛ gɛ a wele kɛ Ezai, mbe wi gba olo nu Gale kɔma zi we 'da a na:

“Mbe wele kpo tɛ he mɔ tɛ li gba zɔ̃ i na:

‘Nɛ 'dáfá li wala 'da Nwa, kɔ ma bɔlɔ!’ ”#3.3 Mɔ tɔ́lɔ́ Ezai 40.3.

4Yoanɛ hi'da tulu sala mbe sa'de kpo, li a a samo, nɛ a kpo 'dɛ̃ ndala 'dɛ tili a. Nɛ nyɔngɔmɔ nu a zi a odɔla do nɔ gɔlɔ. 5Nɛ owi Yeruzalɛmɛ, do owanɔ ngɔ nù Yude, do wanɔ kɔ lenɔ nu lì Yɔrdanɛ ni vɛ̃ wa tɛa 'da a, 6nɛ wa gbala 'dã mɛnɔ 'da wa dɛ li winɔ vɛ̃. Nɛ Yoanɛ batisa wa 'dɔ lì Yɔrdanɛ.

7Nɛ gba gili Ofariziɛnɔ do Osadisiɛnɔ wa tɛa 'da Yoanɛ na a batisa wa. Nɛ a tɔ̃ hã wa na: “Aa nɛ, kɛ nɛ ɔlɔ wele ɔ nɛ gɔ̃nɔ gɛ! Wi tɔ̃a hã nɛ na, nɛ yu 'bili we 'da Gale, kɛ ma kɔla ia gɛ a wio nde? 8Nɛ dɛ́ mɛnɔ kɛ ma be na, nɛ kifi sila nɛ do gbãlã we ni. 9Nɛ nɛ tɛ tɔ̃̀ na, lo a obe zã Abrahama iko gɔ, we kɛ mi tɔ̃ hã nɛ na, Gale wia tɛ kala otanɔ gɛ, nɛ a kifi do obe zã Abrahama! 10Wa 'dafa kpɛnɛmɛ ia! Tenɔ vɛ̃ kɛ wala nɛ dè gɔ ni, wa gɔmɔ sɛ ma dɛ gulu nɛ, nɛ wa da ma li we. 11Mi gɛ, mi batisa nɛ do lì, nɛ ma be na nɛ kifi sila nɛ. Nɛ nde wele kpo a hɔ sɛ 'do mi gɛ, nɛ a batisa sɛ nɛ do Hi Wi Santo fala nɛ kpo do we. A nɛa ngɔ mi do ngawi wena, nɛ mi hɔ̀ wi kɛ mi kala mɔ nyanga wi 'da a gɔ. 12A ba mɔ pɛpɛ do mɔ dɛ kɔ̃ a we pɛpɛ do tɛ gbãlã mɛ. A a sɛ dia gbãlã mɛ kɔ yangga 'da a, nɛ a a kɔa kɛ li we kɛ ma bí gɔ ni.”

Yoanɛ batisa Yezu

(Mar. 1.9-11; Luk. 3.21-22)

13Do ngba soe ni, nɛ Yezu yula tɛ Galile, nɛ a tɛ 'da Yoanɛ nu lì Yɔrdanɛ nga, takɔ Yoanɛ batisa a. 14Nɛ Yoanɛ bɛ̃a, nɛ a tɔ̃ hã a na: “Ɔ̃ ɔ̃, mɔ hã mɔ wia tɛ batisa mi, nɛ mɔ tɛ 'bɔ na, mi batisa mɔ nde?”

15Nɛ Yezu gese hã a na: “Mɔ dɛ́ kpa, we kɛ ma wia na, ma dɛ tɛ̃ ɛ ní, takɔ lɛ dɛ mɛ kɛ Gale kɔ̃a ni.” Nɛ Yoanɛ kɔ̃a, nɛ a batisa Yezu.

16Yoanɛ batisa Yezu do'do, nɛ Yezu hɔa nza 'dɔ lì do ti, nɛ do kpo fala ni, nɛ li nza hũi, nɛ a zɔ Hi Wi 'da Gale tɛ zĩlĩ dɛ ngɔ a ɔ nɛ gbakulĩ ni. 17Nɛ wala gɛlɛ wele wila li nza i na: “Wele kɛ gɛ a Be 'da mi, kɛ a ngɔ sila mi, nɛ mi do yangga wena we a.”

Currently Selected:

MATIE 3: NGB

Highlight

Copy