MATIE 24

Yezu tɔ̃a na wa gbini sɛ tɔa Tɛmpɛloe

(Mar. 13.1-2; Luk. 21.5-6)

1Yezu hɔa nza kɔ Tɛmpɛloe. Kɔ a ma ngɔ la nɛ, nɛ owi yambala mɛnɔ 'da a wa tɛa dɛ kɛ zã a, takɔ wa be tɛlɛ tɛ kɛ winɔ wa dɛa zi do Tɛmpɛloe dia nɛ ge nde ni hã a. 2Nɛ Yezu tɔ̃a hã wa na: “Nɛ zɔa mɛnɔ tɛ tɔa gɛ vɛ̃ nde? Mi tɔ̃ hã nɛ do gbãlã we na, wa 'danga sɛ ma vɛ̃, nɛ gbãlã ta kpo 'báná sɛ ngɔ ngbɛ ɛ gɔ, ma gbini sɛ vɛ̃.”

Ngamɛnɔ kɛ ma hɔ sɛ dati a ndɔti nùi

(Mar. 13.3-13; Luk. 21.7-19)

3Nɛ Yezu dungu nù dɛ ngɔ kala Olivɛ, nɛ owi yambala mɛnɔ 'da a wa tɛa tati a wa iko, nɛ wa aka a na: “Mɔ tɔ̃́ hã lɛ sɛ! Mɛnɔ mɔ tɔ̃a we nɛ gɛ, ma dɛ sɛ tɛ̃ ɛ soe ki nge nde? Nɛ mɛ ma be sɛ na, mɔ kɔla fala tɛ nɛ, nɛ nùi kɔla 'danga nɛ ia ni a ge nde?”

4Nɛ Yezu gese hã wa na: “Li nɛ sɔ̃́, da dɛ kɔ owele wa ɔ́lɔ́ nɛ gɔ. 5We duzu kɛ owele wena wa hɔ sɛ do zu li mi, nɛ wa tɔ̃ sɛ na, lo a Mɛsiya! Nɛ wa ɔlɔ sɛ owele wena. 6Kɔ fala kɛ nɛ ma sɛ ngɔ zele sako bolonɔ kɛ winɔ wa tɛ bi nɛ, do kɛnɔ wa tɛ 'dafa we bi nɛ ni, nɛ nde nɛ tɛ dɛ̀ kili gɔ, we kɛ ma wia na, mɛnɔ ni ma dɛ tɛ̃ ɛ. Kɔ gɛnɛ kɔ ma dɛ tɛ̃ ɛ, nɛ nde mɛ sɛ a ndɔti nùi a ni gɔ. 7Do 'da fala ni, nwa kpo a kulu sɛ ngɔ do owinɔ 'da a, nɛ a bi do nwa kɔ gele le. Nɛ owinɔ tɛ ngɔ nù kpo, wa bi sɛ kpo ngba wa. Gba wɔ ma te sɛ, nɛ nùi ma tana sɛ falanɔ kpi do kpi. 8Nɛ nde mɛnɔ ni vɛ̃ sɛ a ndo nyanga ngamɛnɔ iko.

9“Owele wa kala sɛ nɛ, nɛ wa hã nɛ hã winɔ na, wa zɛlɛ tɛ nɛ, nɛ wa gbɛ sɛ nɛ. Nɛ owinɔ vɛ̃ wa sɛnɛ sɛ nɛ, we kɛ nɛ a winɔ 'da mi. 10Do 'da fala ni, Owele wena wa la sɛ fala kɔ̃a we 'da wa. Wa vũ sɛ to tɛ ngba wa, nɛ wa sɛnɛ sɛ ngba wa wena. 11Nɛ gili Owi gba olo nu Gale do bɛlɛ wa hɔ sɛ, nɛ wa ɔlɔ sɛ Owele wena. 12'Dã mɔ ma dɛlɛ sɛ wena, nɛ kɔ̃a zã 'da ogba gili winɔ dɛ 'da ngba wa ma mbɔkɔ sɛ. 13Kɔ wele kɛ sila a nɔ tɛ kɔ̃a we 'da a gbaa we hɔ ndɔti nɛ, nɛ Gale a kpasa sɛ a. 14Nɛ nde dati, wa be sɛ Dia Sakoe gɛ ngɔ dɛa to nwa 'da Gale ngɔ nù gɛ vɛ̃, takɔ onu kpala winɔ vɛ̃ wa zele ma do'do, sɛ nɛ nùi 'danga de.

Sɔkpɔ tala mɔ sape

(Mar. 13.14-23; Luk. 21.20-24)

15“Nɛ zɔ sɛ sɔkpɔ tala mɔ sape kɛ Daniɛlɛ, wi gba olo nu Gale tɔ̃a zɛ́ we nɛ ni. #24.15 Mɔ tɔ́lɔ́ Daniɛlɛ 11.31. Ma yolo tɛ fala kɛ ma santo ni. (Wi kɛ a tɔlɔ we gɛ, nɛ ma wia na, a fa gulu nɛ!) 16Nɛ winɔ kɛ wa sɛ ngɔ nù Yude ni, ma wia na, wa yu dɛ ngɔ kalanɔ i. 17Wele kɛ a dungu ngɔ tɔa i ni, dɔ a zĩ́lĩ́ we kala tolenɔ kɔ tɔa 'da a, sɛ nɛ a yu de gɔ. 18Nɛ wele kɛ safɔ i ni, dɔ a sí gbaa le nga we ba tuli 'da a, sɛ nɛ a yu de gɔ.

19“Do ngba soe ni, 'bako sɛ wena we wukonɔ kɛ wa do zã, do wanɔ wa tɛ ɔmɔ be ni. 20Kɔ ma wia na, nɛ aka Gale na, da dɛ kɔ mɛnɔ ni hɔ́ do zɔlɔ lì kolo, tabi do tũ ɔmɔ tɛ wi gɔ. 21Mba gɔ, do ngba soenɔ ni, gã 'bako sɛ wena. Yolo do kɛ Gale dɛa zi do nùi ni gbaa we hɔ sɔɛ gɛ, 'bako ɔ na mɛ ni dɛ̀ zi mbe tɛ̃ ɛ gɔ, nɛ ma dɛ́ sɛ 'bɔ tɛ̃ ɛ do 'do gɔ. 22Kɔ Nwa Gale tɛ 'bìlì sɔ mbe nu tũnɔ ni gɔ, nɛ nde wele kpo kpásá sɔ gɔ. Kɔ a 'bili mbe nu nɛ, we kɛ a lingga do owinɔ kɛ a saka zɛ́ wa ia ni.

23“Kɔ fala kɛ wele hɔ, hã a tɔ̃ hã nɛ na: ‘Nɛ zɔ́, Mɛsiya a tɛ dɛ,’ tabi ‘Mɛsiya a i mɔ ni,’ nɛ nɛ tɛ kɔ̃̀ gɔ. 24We duzu kɛ ombe wele wa hɔ sɛ, nɛ wa dɛ ogã ɔngbamɔ do ogba sɔ̃ mɔ we ɔkɔlɔ winɔ na, lo a Mɛsiya, tabi lo a Owi gba olo nu Gale. Nɛ mbe gɔ, hã ma we, nɛ wa ɔlɔ sɛ winɔ kɛ Gale saka wa ni. 25Ma hã mi tɔ̃a hã nɛ dati ia ni.

26“Kɔ fala kɛ wele hɔ, kɔ a tɔ̃ hã nɛ na: ‘Nɛ zɔ́, Mɛsiya a li zɔ̃ gɛ!’ Nɛ nɛ tɛ nɛ gɔ. Tabi a tɔ̃ na: ‘Nɛ zɔ́, a usu tɛ̃ a tɛ dɛ!’ Nɛ nɛ tɛ kɔ̃̀ gɔ. 27Mba gɔ, tɛa 'da mi Be 'da Wele, ma ɔ sɛ nɛ kɛ kolo nyɛ li ɛ si 'biti gba wese, nɛ ma la fala kpo, nɛ ma sɔkpɔ si 'biti gɛ̃a wese ni.

28“Fala wɔlɔ tɛ nɛ ni, nɛ oziki wa ngɛmɛ sɛ ngba wa dɛ di ni.

Yezu a tɛ sɛ 'bɔ

(Mar. 13.24-27; Luk. 21.25-28)

29“Kɔ ngba soe ngamɛnɔ ni la do'do, nɛ 'do nɛ, nɛ li wese ma tũ sɛ mbĩi do ti, nɛ zɛkɛ tó sɛ 'bɔ gɔ. Nɛ sɔlanɔ wa ala sɛ dɛ nù nga, nɛ ngawi 'da mɛnɔ li ngɔ gɛ, ma vĩ sɛ zu ngbɛ ɛ. 30Nɛ mɛ kɛ ma be sɛ na, mi Be 'da Wele, mi tɛ tɛ nɛ ni, ma hɔ sɛ li nza i. Nɛ nu kpala winɔ ngɔ nù gɛ vɛ̃, wa he sɛ kɔ̃a, nɛ wa zɔ sɛ mi Be 'da Wele, nɛ nde mi hɔa do ngawi, do dɔ̃lɔ̃ li vɛ̃ dɛ sanga kutunɔ. 31Nɛ gã mɔtũlũ ma dɔ̃lɔ̃ sɛ, nɛ mi tombo sɛ anzɛnɔ, nɛ wa yɛnggɛ nyanga nza gɛ vɛ̃, we ngɛmɛ li owinɔ kɛ Gale saka zɛ́ wa ia ni ngɔ nù gɛ vɛ̃.

Yezu bia we ngɔ te figɛ

(Mar. 13.28-31; Luk. 21.29-33)

32“Te figɛ be mɔ hã nɛ, kɔ nɛ yámbálá ma sɛ! Ngba soe kɛ ombé gbakɔ̃ nɛ ma kunu, hã nwá nɛ 'bɔ, nɛ nɛ ĩ na, zɔlɔ lì kolo kɔla ia. 33Na mɛ ni, fala kɛ nɛ zɔ mɛnɔ mi tɔ̃a sɔ we nɛ ni tɛ dɛ tɛ̃ ɛ, nɛ nɛ ĩ sɛ na, mi Be 'da Wele, mi kɔla tɛ hɔ nɛ ia. 34Mi tɔ̃ hã nɛ do gbãlã we na, mɛnɔ ni ma dɛ sɛ tɛ̃ ɛ, nɛ nde mbe winɔ sɔɛ gɛ wa 'bana nza. 35Li nza do nùi ma 'danga sɛ, nɛ nde we nu mi ma 'bana sɛ fai.

Gale zu a kpo a ĩ ti tũi kɛ nùi nɛ 'danga nɛ ni

(Mar. 13.32-37; Luk. 17.26-30,34-36)

36“Nɛ nde we duzu ngba soe ni, do sa kɛ ma dɛ sɛ do tɛ̃ ɛ ni, wele kpo ĩ̀ ma gɔ. Gɛnɛ kɔ oanzɛnɔ li nza i, do mi ngboo kɛ mi a Be 'da Wele ni, mi ĩ̀ 'bɔ ma gɔ. Nɛ nde wi a Baa mi zu a kpo a ĩ ma. 37Nɛ kpo mɛ ma dɛa zɛ́ tɛ̃ ɛ 'da fala 'da Nowe ni, ma dɛ sɛ 'bɔ tɛ̃ ɛ do 'da fala tɛa 'da mi Be 'da Wele. 38We kɛ do 'da fala 'da Nowe, dati kɛ na gba kole tɛ, kɔ lì gulu zu mɛnɔ vɛ̃ ni, nɛ nde winɔ wa zi tɛ nyɔngɔ mɔ, do nɔ dɔ̃, do ba ngba wa, do ba wuko do wili hã benɔ 'da wa, gbaa we hɔ tɛ ngba soe Nowe lia nɛ kɔ masua ni. 39Nɛ nde ta zu wa zi ngɔ mɔ kpo bina, gbaa ndɔti nɛ a kɛ kole tɛa, nɛ lì dunu falanɔ vɛ̃, nɛ ma gbɛa winɔ vɛ̃. Tɛa 'da mi Be 'da Wele, ma ɔ sɛ 'bɔ kpasaa na mɛ ni. 40Owele bɔa wa sɛ tɛ wa fɔ fala nɛ kpo, nɛ oanzɛnɔ wa ba sɛ mbe kpo, nɛ wa la mbe kpo. 41Owuko bɔa wa sɛ tɛ to tula fala nɛ kpo, nɛ oanzɛnɔ wa ba sɛ mbe kpo, nɛ wa la mbe kpo.

42“Kɔ li nɛ sɔ̃́! We kɛ nɛ ĩ̀ ti ngba soe Nwa 'da nɛ a tɛ sɛ nɛ ni gɔ. 43Nɛ ĩ́ na, ɔ do kɛ wele tɔa ĩ sɔ ti sa kɛ wi zũi nɛ tɛ do tũi we zũ mɛnɔ 'da a ni, nɛ nde a ɔ́ sɔ yala gɔ na, dɔ wi zũi ni gbíní nu tɔa, kɔ a le gɔ. 44Nɛ tɛ mɛ 'bɔ, li nɛ sɔ̃́! We kɛ mi Be 'da Wele, mi hɔ sɛ do ngba soe kɛ winɔ wa lénggé nɛ gɔ ni.”

Dia wi dɛa to do 'dã wi dɛa to

(Luk. 12.41-48)

45Nɛ Yezu tɔ̃ na: “Wi dɛa toe kɛ li a sɔ̃ wena, nɛ a dɛ olo nu wele a, nɛ wele a wia we e a na, a zɔ mɔ tɛ tɔa 'da ɛ, nɛ a kɛ̃ pɔsɔ hã ongba a wi dɛa tonɔ do 'da fala ma wia ni a wio nde? 46Yangga wena we wi dɛa toe ni, 'da fala kɛ wele a kpolo tɛ̃ ɛ, hã a kpa a dɛ tɛ toe 'da a ni. 47Mi tɔ̃ hã nɛ do gbãlã we na, wele tɔa ni a e sɛ wi ni ngɔ mɛnɔ 'da a vɛ̃. 48Nɛ nde fala kɛ wi dɛa toe ni a 'dã wele, kɔ a tɔ̃ do kɔ sila a na: ‘Wele mi kpóló sɛ tɛ̃ a dɔ̃ gɔ.’ 49Kɔ a ma ngɔ zɛ ongba a wi dɛa tonɔ, kɔ a dungu nù we nyɔngɔ mɔ, do nɔ dɔ̃ fala nɛ kpo do owi bá dɔ̃nɔ, 50ko ngba soe wele a hɔ do gbanga nɛ, hã a mbala a tɛ dɛ na mɛ ni, 51nɛ a hã sɛ etumbu hã a nganda wena. Nɛ a dɛ sɛ do a ɔ nɛ kɛ wa dɛ do owi 'bili bɛlɛnɔ ni. A ndaka sɛ a, nɛ a e a tɛ fala kɛ a he sɛ kɔ̃a, tɛ nyɔngɔ li gogo a ni.”

Currently Selected:

MATIE 24: NGB

Highlight

Copy