MATIE 22
22
Gba we ngɔ dɛa mɔ dɔ ba ngba wi
(Luk. 14.15-24)
1Nɛ Yezu tɔ̃a 'bɔ ombé gba we hã owinɔ na: 2“Nɛ zélé, dɛa to nwa 'da Gale ma wia kɔ̃ do lɛnggɛ 'da mbe nwa kpo, kɛ a 'dafa zi gã mɔ dɔ ba ngba wi, we duzu zagbãlã be 'da a. 3Nɛ a tumba owi dɛa tonɔ 'da a na, wa nɛ́, kɔ wa sa mɔ hã owinɔ ɛ saka wa we mɔ dɔɛ ni. Nɛ wa nɛa, nɛ wa sa mɔ, nɛ nde winɔ ni wa kɔ̃̀ we tɛ nɛ gɔ. 4Nɛ a tumba 'bɔ ombé wi dɛa to na, wa nɛ hã wa tɔ̃ hã winɔ ni na: ‘Mi 'dafa nyɔngɔmɛ ia, mi gbɛa owili ngɔmbɔ do osa'de dɛ nɔ, kɔ ma 'bɔ 'da wi nyɔngɔ nɛ iko. Kɔ nɛ tɛ we nɛ!’ 5Nɛ gɛnɛ kɔ wa zila sa mɛ ni, nɛ wa lènggè nɛ gɔ. Nɛ wele do wele la dɛ fala kɛ zã a kɔ̃a ni iko. Ombe wa la safɔ, nɛ ombe wa la we be golenɔ 'da wa. 6Nɛ ombe wa kala owi dɛa tonɔ 'da nwa ni, nɛ wa zɛ wa gbaa, nɛ wa gbɛ wa. 7Kɔ nwa ni nɛa we zele ní, nɛ zã a nɔ̃lɔ̃ wena, nɛ a tombo osodanɔ 'da a na, wa nɛ́, kɔ wa gbɛ́ winɔ ni vɛ̃, nɛ wa dɔ tɔanɔ 'da wa. 8'Do nɛ, nɛ a sa mɔ hã ombé gele wi dɛa tonɔ 'da a, nɛ a tɔ̃ hã wa na: ‘Wa 'dafa nyɔngɔmɛ ia, nɛ nde owinɔ kɛ mi sa mɔ hã wa ni, wa hɔ̀ wi kɛ wa nyɔngɔ ma gɔ. 9Kɔ nɛ nɛ́ li gba walanɔ i, nɛ nɛ sa mɔ hã owinɔ vɛ̃ kɛ nɛ kpa sɛ wa ni, kɔ wa tɛ we nyɔngɔ mɛ.’ 10Nɛ owi dɛa tonɔ wa la, nɛ wa ngɛmɛ li owinɔ vɛ̃ kɛ wa kpa wa ni, odia wele, do o'dã wele, nɛ kɔ tɔa mɔ dɔɛ dunu.
11“Nɛ nwa ni lia kɔ tɔa i, we zɔ owinɔ kɛ wa tɛa we nyɔngɔ mɛ ni, nɛ a zɔ mbe wele kpo kɛ a hè'dè tulu ɛngga gɔ ni. 12Nɛ nwa ni aka a na: ‘Nyae, kɔdɛ kɛ mɔ lia i nga, nɛ nde mɔ hè'dè tulu ɛngga gɔ ni nɛ nde?’ Nɛ ma ba we nu wi ni do'do. 13Nɛ nwa ni hã nu ɛ hã Owi tonɔ 'da a na: ‘Nɛ ɛ́nzɛ́ kɔ̃ a do nyanga a, kɔ nɛ dá a nza kɔ gba tũ, tɛ fala kɛ a he sɛ kɔ̃a, nɛ a nyɔngɔ li gogo a ni.’ ”
14Nɛ Yezu tɔ̃ hã wa na: “Gale sa mɔ hã Owele wena, nɛ nde wanɔ a saka wa ni, wa dɛ̀lɛ̀ gɔ.”
Takoe 'da gã nwa ngɔ nu Roma
(Mar. 12.13-17; Luk. 20.20-26)
15Nɛ Ofariziɛnɔ wa nɛa, nɛ wa mba li ngba wa, nɛ wa ba zã zu we, we le do ti nu Yezu, we ba a. 16Nɛ wa tumba mbe winɔ 'da wa, do mbe winɔ 'da Herodɛ hã Yezu we aka a na: “Wi be mɔ, lɛ ĩ na, mɔ tɔ̃ gbãlã we fai, nɛ mɔ be tati a wala kɛ ma a bɔlɔ li Gale ni. Nɛ mɔ dɛ́ kili wele gɔ, nɛ mɔ sɔ́nzɔ́ do mɔ mɔ́ wele gɔ. 17Kɔ mɔ tɔ̃́ hã lɛ sɛ! Mbula 'da lɛ kɔ̃a na, lɛ futa tako hã gã nwa ngɔ nù Roma, tabi lɛ tɛ fùtà gɔ nde?”
18Nɛ nde Yezu ĩ sɔ ti 'dã hã 'da wa ia, nɛ a tɔ̃ hã wa na: “Nɛ, Owi ɔlɔ winɔ gɛ, gulu kɛ nɛ le ti nu mi we ge nde? 19Nɛ bé mbe mbili kɛ wa futa do takoe ni hã mi sɛ!” Nɛ wa ba ma hã a. 20Nɛ a aka wa na: “Kɛ li mbili gɛ, mɛ a kpongbolo zu wio nde? Nɛ kɛ wa kɔma ti nɛ gɛ, mɛ a li wio nde?”
21Nɛ wa gese hã a na: “Mɛ a kpongbolo zu gã nwa ngɔ nù Roma.”
Nɛ Yezu tɔ̃ hã wa na: “Na mɛ ni, nɛ gésé mɛ 'da nwa ngɔ nù Roma hã a, nɛ nɛ hã́ kɛ 'da Gale tɛ mɛ 'bɔ hã Gale.”
22Yezu nɛa we gese hã wa na mɛ ni, nɛ wa ɔngbɔ do ma wena. Nɛ wa la a dɛ di ni, nɛ wa si.
Wa aka Yezu ngɔ tunu kɔ fio
(Mar. 12.18-27; Luk. 20.27-40)
23Do kpo ngba soe ni, nɛ ombe Sadisiɛnɔ wa tɛa 'da Yezu. (Sadisiɛnɔ wa a owinɔ kɛ wa tɔ̃ na, wele fe ia, nɛ nde a túnú 'bɔ kɔ fio gɔ ni.) Nɛ wa aka a na: 24“Aa wi be mɔ, Mɔizɛ tɔ̃a zɛ́ na: ‘Fala kɛ wi wili fe, kɔ a kò be gɔ nde, nɛ ma wia na, nya a wele kɛ 'bana ni ba wuko olo a, takɔ a ko be hã a.’ 25Kɔ mɔ zɔ́, ombe wi wili sambo, wa zi sanga lɛ gɛ, wa vɛ̃ a onya wi dɛ kɔ zã kpo. Nɛ kuti be ba wuko, nɛ a kò do a gɔ, nɛ a fe, nɛ a la wuke ni hã nya a. 26Nɛ nya a ba wuke ni, nɛ ma dɛ 'bɔ tɛ̃ ɛ ni. 'Do nɛ, nɛ ma dɛ 'bɔ tɛ̃ ɛ na mɛ ni we wele kɛ talɛ, ní do ní gbaa, nɛ ma kpa zu wa sambo ni vɛ̃. 27Nɛ 'do kɛ wa fia vɛ̃ ni, nɛ wuke fe tɛ mɛ 'bɔ. 28Ní a do ngba soe kɛ ofionɔ wa tunu sɛ kɔ fio ni, nɛ wuke ni sɛ a wuke 'da wio nde? We duzu kɛ wa vɛ̃ ni, wa zi a wili a!”
29Nɛ Yezu gisa hã wa na: “Nɛ yɔa, we duzu kɛ nɛ ĩ̀ ti 'Buki 'da Gale gɔ, nɛ nɛ ĩ̀ 'bɔ ti ngawi 'da a gɔ. 30Do ngba soe kɛ ofionɔ wa tunu sɛ kɔ fio ni, nɛ nde ba ngba wi sɛ bina, nɛ winɔ vɛ̃ wa ɔ sɛ nɛ oanzɛnɔ 'da Gale tɛ li nza i, kɛ wa bá ngba wa gɔɛ ni. 31Nɛ tɔ̀lɔ̀ mbe we kɛ Gale tɔ̃a zɛ́ ma ngɔ ofionɔ, kɛ wa nɛ tunu sɛ kɔ fio ni gɔ nde? A tɔ̃a zɛ́ na, 32ɛ a Gale 'da Abrahama, do Izaka do Yakɔbɔ.#22.32 Mɔ tɔ́lɔ́ Kulu Tɔa 3.6. Ĩ na, Gale a Gale 'da ofio gɔ, nɛ nde a Gale 'da owinɔ wa do tunu li wa ni.” 33Nɛ gba gili winɔ wa zila we ni, wa ɔngbɔ do bia wenɔ 'da a wena.
Mbula kɛ ma nɛa ngɔ ngbɛ ɛ ni
(Mar. 12.28-34; Luk. 10.25-28)
34Ofariziɛnɔ wa nɛa we zele na Yezu kpia nu Osadisiɛnɔ ni, nɛ wa mba li ngba wa. 35Nɛ nde mbe sanga wa ni zi a wi be mbula, nɛ a kɔ̃a zi we aka Yezu we yamba a. Nɛ a aka Yezu na: 36“Wi be mɔ, mbula kɛ ma nɛa ngɔ ngbɛ ɛ ni a ki nge nde?”
37Nɛ Yezu gisa hã a na: “ ‘Mɔ kɔ̃́ gɛnɛ Nwa Gale 'da mɔ do sila mɔ vɛ̃, mɔ ha tɛ mɔ hã a, nɛ mɔ dɛ́ to hã a do hã zã 'da mɔ vɛ̃.’ 38Mɔ zɔ́ mbula kɛ ma nɛa ngɔ ngbɛ ɛ vɛ̃ gɛ a ni. 39Nɛ bɔa mbula kɛ ma wia kɔ̃ do ki ni, mɛ a kɛ ma tɔ̃a na: ‘Mɔ kɔ̃́ gɛnɛ ngba mɔ ɔ nɛ kɛ mɔ kɔ̃a do gɛnɛ kili tɛ mɔ wele nɛ ni.’ 40Nɛ mbulanɔ 'da Mɔizɛ vɛ̃, do bia wenɔ 'da owi gba olo nu Gale vɛ̃, ma yula dɛ ngɔ mbulanɔ bɔa ni.”
Mɛsiya nɛa ngɔ Davidi
(Mar. 12.35-37; Luk. 20.41-44)
41'Da fala kɛ Ofariziɛnɔ wa mba li ngba wa, nɛ Yezu aka wa na: 42“Nɛ lengge na, Mɛsiya a wio nde? A a be zã wio nde?”
Nɛ wa gisa hã a na: “A a be zã Davidi.”
43Nɛ Yezu tɔ̃ hã wa na: “Kɔ gulu kɛ 'da fala Hi Wi Santo lia zɛ́ kɔ Davidi, nɛ a sa zɛ́ li Mɛsiya na Nwa ni we ge nde? Davidi tɔ̃a zɛ́ na:
44‘Nwa Gale tɔ̃a hã Nwa 'da mi na,
Mɔ tɛ́, hã mɔ dúngú tɛ ngɔ ngawili kɔ̃ mi,
kɔ mi a owi sɛnɛ mɔ nù ti nyanga mɔ.’#22.44 Mɔ tɔ́lɔ́ Zumanɔ 110.1.
45Kɔ Davidi ngboo sa zi li Mɛsiya na, a a Nwa 'da ɛ ni, nɛ kɔdɛ kɛ Mɛsiya nɛ ɔ tati a be zã Davidi iko ni nɛ nde?”
46Nɛ wele kpo wè zi we gese nu nɛ hã a gɔ. Nɛ ndo do ngba soe ni, mbé wele zi 'bɔ do ngawi we aka Yezu do lɛnggɛ bina.
Currently Selected:
MATIE 22: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
