MATIE 20
20
Owi dɛa to kɔ fɔ
1Nɛ Yezu tɔ̃ hã wa na: “Dɛa to nwa 'da Gale ma wia kɔ̃ do lɛnggɛ 'da mbe wele fɔ kpo, a kulu ngɔ do titole belee, nɛ a ma ngɔ fa owele we dɛ to kɔ fɔ vinɔ 'da a. 2A kpa wa, nɛ a tɔ̃ hã wa na, ɛ futa sɛ wa ɔ nɛ kɛ wa futa do winɔ tũ kpo kpo fai ni. Nɛ wa kɔ̃a, nɛ a tombo wa kɔ fɔ i. 3Nɛ wese nɛ hɔ tɛ sa kusi, nɛ a nɛ 'bɔ li gba fanda i, nɛ a kpa Owele kɛ wa dungu iko ni. 4Nɛ a tɔ̃ hã wa na: ‘Aa nɛ, nɛ nɛ́ kɔ fɔ vinɔ 'da mi i, nɛ mi futa sɛ nɛ ɔ nɛ kɛ ma wia ni.’ 5Nɛ winɔ ni wa nɛa. Nɛ wese nɛ hɔ midi, nɛ a tombo ombé wele, nɛ do sa talɛ 'do midi, nɛ a tombo 'bɔ ombé nɛ. 6Kɔ ma nɛa we hɔ 'bɔ sa mɔlɔ 'do midi, nɛ a nɛ, nɛ a kpa 'bɔ ombé wele li gba fanda i, nɛ a aka wa na: ‘Gulu kɛ li wese sɔɛ gɛ vɛ̃, nɛ dungu dɛ dɛ iko, nɛ nɛ kɔ̃̀ we dɛ to gɔ we ge nde?’ 7Nɛ wa gese hã a na: ‘Wele ha to hã lɛ gɔ!’ Nɛ wi ni tɔ̃ hã wa na: ‘Ní, nɛ nɛ nɛ́ kɔ fɔ vinɔ 'da mi i!’
8“Kɔ wese nɛa we gɛ̃ yilili, nɛ wele fɔɛ sa mɔ hã kapita 'da a, nɛ a tɔ̃ hã a na: ‘Mɔ sá mɔ hã owi dɛa tonɔ, kɔ mɔ futa wa. Mɔ ndo futa wa do ngɔ wanɔ 'do gɛ, gbaa we hɔ ngɔ wanɔ sɔ dati ni!’ 9Nɛ kapita ndua futa winɔ do ngɔ wanɔ wa ndua sɔ toe 'da wa do sa mɔlɛ 'do midi ni. Wele do wele kpa mbili ɔ nɛ kɛ wa futa do winɔ tũ kpo kpo fai ni. 10Kɔ wanɔ kɛ wa ndua sɔ toe dati ni wa nɛa we zɔ ní, nɛ wa lingga na, ɔ nɛ kɛ wanɔ 'do gɛ wa kpa na mɛ ni, lo kpa sɛ mbili gã nɛ ngɔ wa. Nɛ kapita ni futa 'bɔ wa kpasaa na mɛ ni. 11Kɔ wa nɛa we kpa mbili ni, nɛ wa ma ngɔ lungu we dɛ tɛ wele fɔɛ. 12Nɛ wa tɔ̃ hã a na: ‘Mɔ kala owi dɛa tonɔ gɛ dɛ 'do lɛ, nɛ wa dɛa toe sa kpo iko, nɛ mɔ futa wa wia kɔ̃ do lɛ, kɛ lɛ dɛa toe li gba tua wese gbaa ni we ge nde?’
13“Nɛ wele fɔɛ gisa hã mbe kpo sanga wa ni na: ‘Nyae, mi dɛ̀ mɔ 'danga gɔ. Lɛ zila sɔ ngba lɛ do mɔ na, mi futa sɛ mɔ ɔ nɛ kɛ wa futa do winɔ tũ kpo kpo fai ni, nɛ mɔ kɔ̃̀ sɔ gɔ nde? 14Mɔ kálá mbili olo dɛa toe 'da mɔ, kɔ mɔ lá. Mi kɔ̃a we futa wanɔ mi kala wa 'do gɛ, ɔ nɛ kɛ mi futa do mɔ ni. 15Mi wè we dɛ do mbili 'da mi ɔ nɛ kɛ zã mi kɔ̃a ni gɔ nde? Tabi mɔ dɛ 'dã sila we duzu kɛ mi a dia wele ni nde?’ ”
16Nɛ Yezu tɔ̃ na: “Na mɛ ni, winɔ kɛ wa a owi ngɔ go'do ni, wa sɛ a owi dati. Nɛ owinɔ kɛ wa a owi dati ni, wa sɛ a owi ngɔ go'do.”
Yezu tɔ̃a 'bɔ mbé we fie do za'da nza kɔ fie 'da a
(Mar. 10.32-34; Luk. 18.31-34)
17Mbe ngba soe kpo, nɛ Yezu ma ngɔ nɛ dɛ Yeruzalɛmɛ i, nɛ a sa mɔ hã Owi yambala mɛnɔ 'da a 'bu ngɔ wa bɔa ni dɛ gele fala, nɛ a tɔ̃ hã wa na: 18“Nɛ ĩ́ na, lɛ tɛ kũ dɛ Yeruzalɛmɛ i. Kɔ lɛ hɔ i mɔ, nɛ wa ba sɛ mi Be 'da Wele, nɛ wa 'dɔlɔ mi hã onwa nganganɔ do Owi be mbulanɔ. Nɛ wa 'bili sɛ we 'da mi na mi fe. 19Nɛ wa 'dɔlɔ sɛ mi hã owinɔ kɛ wa a Oyuda gɔ ni. Nɛ winɔ ni wa yɔndɔ sɛ mi, nɛ wa zɛ mi do zufa ndala, nɛ wa bɛ̃lɛ̃ mi ngɔ finda te. Nɛ do talɛ tũi, nɛ mi za'da sɛ nza kɔ fio.”
Naa Zake do Yoanɛ aka Yezu we benɔ 'da a
(Mar. 10.35-45)
20Nɛ 'do nɛ, nɛ wuke 'da Zebede kala obenɔ 'da a, Zake do Yoanɛ, nɛ a tɛ do wa, nɛ a gu nù dɛ dati Yezu ni we aka a do we. 21Nɛ Yezu aka a na: “Mɔ kɔ̃a ge nde?”
Nɛ a gese hã Yezu na: “Mɔ kɔ̃́, nɛ mɔ ba nu mɔ na, 'da fala kɛ mɔ dungu sɛ nwa ni, nɛ mɔ a sɛ obenɔ 'da mi bɔa gɛ fala dɔ̃lɔ̃ li, mbe kpo ngɔ ngawili kɔ̃ mɔ, nɛ mbee nɛ ngɔ gale.”
22Nɛ Yezu tɔ̃ na: “Nɛ ĩ̀ gulu mɛ kɛ nɛ aka ni gɔ. Nɛ we sɛ we kunu bila ngamɛ kɛ wa nɛ hã hã mi ni nde?”
Nɛ wa gese na: “Lɛ we sɛ do ma.”
23Nɛ Yezu tɔ̃ hã wa na: “Do gbãlã we, nɛ zɔ sɛ ngamɛ kɛ mi nɛ zɔ nɛ gɛ. Nɛ nde we saka wi kɛ a dungu sɛ ngɔ ngawili kɔ̃ mi, tabi ngɔ gale kɔ̃ mi ni, mɛ a we 'da mi gɔ. We duzu kɛ falanɔ ni, mɛ a fala 'da winɔ kɛ Baa mi 'dafa ma we wa ni.”
24Kɔ tala Owi yambala mɛnɔ 'bu ni wa nɛa we zele we ni, nɛ zã wa nɔ̃lã dɛ tɛ wanɔ bɔa ni wena. 25Nɛ Yezu sa mɔ hã wa vɛ̃, nɛ a tɔ̃ hã wa na: “Nɛ ĩ́ na, Onwanɔ ngɔ nùi gɛ, wa kɔ̃a we be ngawi 'da wa hã winɔ ti wa ni. Nɛ ogã winɔ wa hɛ̃lɛ̃ winɔ ti wa ni na, wa dɛ olo nu lo. 26Nɛ nde kɛ 'da nɛ, ma wè tɛ ɔ ni gɔ. Fala kɛ mbe kpo sanga nɛ gɛ kɔ̃ we hɔ gã wi nde, nɛ ma wia na a ɔ wi dɛa to 'da nɛ. 27Kɔ fala kɛ mbe kpo sanga nɛ kɔ̃ we ɔ wi dati nde, nɛ ma wia na a ɔ ngbá 'da nɛ. 28We duzu kɛ mi Be 'da Wele, mi tɛ̀ na Owele wa dɛ to hã mi gɔ, nɛ nde mi tɛa we dɛ to hã Owele, nɛ mi hã 'bɔ tɛ mi hã fio, takɔ mi gɔnɔ zu ogba gili wele.”
Yezu kpasa owi tandu bɔa
(Mar. 10.46-52; Luk. 18.35-43)
29Kɔ wa nɛa we la le Yeriko, nɛ gba gili Owele wa nɛa 'do Yezu. 30Nɛ owi tandu bɔa wa dungu dɛ kɛ zã wala ni. Kɔ wa nɛa we zele na, Yezu tɛ la do di ni ni, nɛ wa ma ngɔ he mɔ na: “Nwa, Be 'da Davidi, mɔ ĩ́ 'bako hã lɛ!”
31Nɛ winɔ wa ma ngɔ o dã zu wa na: “Nɛ kpé nu nɛ!” Nɛ wa hia 'bɔ mbé mɔ dɛ ngɔ nganda wena na: “Nwa, Be 'da Davidi, mɔ ĩ́ 'bako hã lɛ gɔ nde?”
32Nɛ Yezu yula nù, nɛ a sa mɔ hã wa, nɛ a aka wa na: “Mɛ nɛ kɔ̃a na mi dɛ hã nɛ ni a ge nde?”
33Nɛ wa gese hã a na: “Nwa, mɔ dɛ́ na, gbali lɛ zɔ mɔ.”
34Nɛ Yezu ĩ 'bako hã wa, nɛ a ndɔ kɔ̃ a tɛ gbali wa. Nɛ do ti, nɛ wi tandunɔ bɔa ni wa zɔa mɔ, nɛ wa la 'dɔkɔlɔ Yezu.
Currently Selected:
MATIE 20: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
