MATIE 18
18
Yezu bia tɛlɛ tɛ wi kɛ a nɛa ngɔ ongba a ni
(Mar. 9.33-37; Luk. 9.46-48)
1Do 'da fala ni, nɛ owi yambala mɛnɔ wa tɛa, nɛ wa aka Yezu na: “Kɔ le nwa 'da Gale, wi kɛ a nɛa ngɔ ongba a vɛ̃ ni a wio nde?”
2Nɛ Yezu sa mɔ hã mbe be kpo, nɛ a e a dɛ dati owi yambala mɛnɔ ni. 3Nɛ a tɔ̃ hã wa na: “Mi tɔ̃ hã nɛ do gbãlã we na, fala kɛ nɛ kìfì sila nɛ, kɔ nɛ ɔ nɛ obe ni gɔ, nɛ nde nɛ lé sɛ kɔ le nwa 'da Gale gɔ. 4Wi kɛ a nɛa ngɔ ongba a kɔ le nwa 'da Gale ni, wi a wele kɛ a ba tɛ̃ a dɛ nù, nɛ a ɔ nɛ be gɛ. 5Kɔ wi kɛ a kɔ̃ gɛnɛ obe ɔ nɛ wele kɛ gɛ kɔ tɔa 'da a do zu li mi, nɛ nde a kɔ̃a gɛnɛ mi kɔ tɔa 'da a.
Ma wè na wele dɛ 'dã mɔ gɔ
(Mar. 9.42-48; Luk. 17.1-2)
6“Wi kɛ a fa we fi mbe sanga benɔ, kɛ wa kɔ̃a zu li mi ni li 'dã wala, nɛ ma wia sɔ na, wa kpo gã ta gɛlɛ wi ni, nɛ wa bindi a 'dɔ gba lì. 7'Bako wena do nùi gɛ, we mɛnɔ ngɔ nɛ kɛ ma tombo wele we dɛ 'dã mɔ ni! Mɛnɔ ni ma sɛ fai boe, nɛ nde 'bako sɛ wena do wi kɛ a fa we fí ngba a kɔ nɛ ni.
8“Fala kɛ kɔ̃ mɔ, tabi nyanga mɔ fi mɔ li 'dã mɔ, nɛ mɔ 'bílí ma, nɛ mɔ dá ma nyɛlɛ do mɔ. We kɛ ma dia fɛ̃ na, mɔ ɔ do kpasi do mbee kɔ̃ mɔ tabi do mbee nyanga mɔ kpo, olo li kɛ na mɔ le li gba nyɛa we kɛ ma bí gɔ do kɔ̃ mɔ tabi do nyanga mɔ bɔa nɛ ni. 9Kɔ fala kɛ mbee gbali mɔ fi mɔ li 'dã mɔ, nɛ mɔ 'dɔ́ ma, nɛ mɔ dá ma nyɛla do mɔ. We kɛ ma dia fɛ̃ na, mɔ ɔ do kpasi do gbali mɔ kpo, olo li kɛ na mɔ le li gba nyɛa we do gbali mɔ bɔa nɛ ni.
Gba we ngɔ bata kɛ a yɔa, nɛ wa kpa a
(Luk. 15.3-7)
10“Nɛ dɛ́ zĩ na, da dɛ kɔ nɛ zɔ́ sanga mbe benɔ gɛ yala iko gɔ. We duzu kɛ mi tɔ̃ hã nɛ na, tɛ li nza i, oanzɛnɔ wa zɔ mɔ tɛ wa ni, wa yolo fai dɛ dati Baa mi kɛ a li nza i ni. [11Mba gɔ, mi Be 'da Wele, mi tɛa we kpasa owinɔ kɛ wa yɔa zi wala ni.]
12“Nɛ lengge na ge nde? Fala kɛ mbe wele kpo do obata kama, kɔ mbe kpo yɔ, nɛ a lá sɛ tala wanɔ 'bu wa kusi ngɔ wa kusi ni ngɔ kala i, nɛ a nɛ we fa wele kɛ yɔa ni gɔ nde? 13Mi tɔ̃ hã nɛ na, fala kɛ a kpa bata ni, nɛ a dɛ sɛ yangga wena do a nɛ ngɔ tala wanɔ 'bu wa kusi ngɔ wa kusi kɛ wa yɔ̀ gɔɛ ni. 14Ma tɛ mɛ 'bɔ na mɛ ni we Baa nɛ kɛ a li nza i ni, a kɔ̃̀ na, mbe kpo sanga benɔ gɛ yɔ gɔ.
'Dã mɛ 'da nya mɔ dɛ 'da mɔ
15“Fala kɛ mbe nya mɔ dɛ 'dã mɔ dɛ 'da mɔ nde, nɛ mɔ nɛ́, nɛ nɛ dungu do a zu nɛ bɔa, nɛ mɔ bé gulu 'dã mɛ ni hã a dɛ li a. Kɔ fala kɛ a zele we kɛ mɔ tɔ̃a hã a ni, hã a kɔ̃ gɛnɛ nɛ, nɛ nde ki ni nɛ 'dafa sanga tɛ ngba nɛ ia. 16Kɔ fala kɛ a bɛ̃ we zele mɔ, nɛ mɔ si, nɛ mɔ fa mbé wele kpo, tabi bɔa we dungu kɛ zã nɛ. We kɛ wa kɔma kɔ 'Buki 'da Gale na: ‘Fala kɛ wele da ngbɛ ɛ, nɛ ma wia na, otemɔɛ bɔa tabi talɛ wa tɔ̃ gulu nɛ do'do, sɛ nɛ nɛ 'bili ma de.’#18.16 Mɔ tɔ́lɔ́ Mbulanɔ 19.15. 17Kɔ fala kɛ a zèlè 'bɔ winɔ ni gɔ, nɛ mɔ fi we ni kɔ eklezia. Kɔ fala kɛ a bɛ̃ 'bɔ we zele wa, nɛ nɛ zɔ a nɛ́ a gele wi, tabi 'dã wele ni.
18“Mi tɔ̃ hã nɛ do gbãlã we na, mɛnɔ vɛ̃ kɛ nɛ bɛ̃ gɛnɛ nɛ ngɔ nù gɛ ni, nɛ Gale a bɛ̃ sɛ tɛ mɛ 'bɔ gɛnɛ nɛ li nza i. Nɛ mɛnɔ kɛ nɛ kɔ̃ gɛnɛ nɛ ngɔ nù gɛ ni, nɛ Gale a kɔ̃ sɛ tɛ mɛ 'bɔ gɛnɛ nɛ li nza i.
19“Mi tɔ̃ 'bɔ hã nɛ na, fala kɛ Owele bɔa sanga nɛ, wa ɔ ngɔ we kpo we gɔ mɔ kɔ̃ Gale, Baa mi kɛ a li nza i ni, nɛ a hã sɛ ma hã wa. 20Mba gɔ, fala kɛ Owele bɔa tabi talɛ, wa mba li ngba wa do zu li mi, nɛ nde mi sanga wa boe.”
Gba we ngɔ wi kɛ a bɛ̃a we la ku'da dɛ zu ngba a
21Nɛ Petro tɛa, nɛ a aka Yezu na: “Nwa, wi kɛ a dɛ 'dã mɔ dɛ 'da mi fai ni, nɛ mi mbɔkɔ a fala nɛ nde? Mi mbɔkɔ a fala sambo nde?”
22Nɛ Yezu gese hã a na: “Ɔ̃ ɔ̃. Mi tɔ̃ hã mɔ na, mɔ tɛ mbɔ̀kɔ̀ a fala sambo iko gɔ! Mɔ mbɔ́kɔ́ a gbaa 'bu nɛ sambo fala sambo. 23Mba gɔ, dɛa to nwa 'da Gale ma wia kɔ̃ do lengge 'da mbe nwa kpo, a sa zi mɔ hã owi dɛa tonɔ 'da a na, wa gese ku'danɔ 'da ɛ zu wa ni hã ɛ. 24Kɔ wa ma ngɔ gese ku'danɔ hã nwa, nɛ wa tɛ do mbe wele kpo, kɛ ku'da 'da nwa gã zu a wena, 25nɛ a do wala we gese ma bina ni. Nɛ nwa ni ba nu ɛ na, wa 'dɔlɔ a, do wuke 'da a, do benɔ 'da a do ngbá, nɛ wa tɛkɛ kpamɛnɔ 'da a vɛ̃, takɔ wa gese do ku'da ni. 26Nɛ wi toe ni gu gba zugolo dati nwa 'da ɛ, nɛ a ala nu a hã a na: ‘Mɔ é ta ngɔ sila mɔ, mi gese sɛ ku'da 'da mɔ vɛ̃!’ 27Nɛ nwa ĩ 'bako hã a, nɛ a la ku'da dɛ zu a, nɛ a da kɔ̃ a tɛ̃ a.
28“Kɔ a nɛa we hɔ nza, nɛ a kpa ngba a do mbe ngba a wi dɛa to, nɛ nde ku'da 'da a zu wele ki ni, mɛ a be mbili iko. Nɛ a tisi gɛlɛ ngba a ni riki, nɛ ma nɔ kiti kiti, nɛ a ma ngɔ tɔ̃ hã a na: ‘Mɔ gésé ku'da 'da mi!’ 29Nɛ ngba a ni gu gba zugolo dati a, nɛ a ala nu a hã a na: ‘Mɔ é ta ngɔ sila mɔ, mi gese sɛ ku'da 'da mɔ!’ 30Nɛ wi ni bɛ̃a, nɛ a fi ngba a ni bɔlɔkɔ gbaa na, a gese ku'da ni hã ɛ do'do sɛ.
31“Kɔ ongba a wi tonɔ wa nɛa we zɔ kɛ a dɛa ni, nɛ 'bako ba li wa wena. Nɛ wa nɛa, nɛ wa tɔ̃ 'da nɛ vɛ̃ hã nwa 'da wa. 32Nɛ nwa 'da wa sa mɔ hã wi toe ni, nɛ a tɔ̃ hã a na: ‘Mɔ a 'dã wele! Mɔ ala sɔ nu mɔ hã mi, nɛ mi la ku'da 'da mi vɛ̃ dɛ zu mɔ. 33Kɔ ma wia sɔ tɛ mɛ 'bɔ na, mɔ ĩ́ 'bako hã ngba mɔ, ɔ nɛ kɛ mi ĩ do 'bako hã mɔ ni.’ 34Nɛ zã nwa ni nɔ̃lɔ̃ wena, nɛ a ba wi toe 'da a ni, nɛ a fi a bɔlɔkɔ na, wa zɛlɛ tɛ̃ a gbaa, hã a gese ku'da ni vɛ̃ do'do sɛ nɛ de.”
35Nɛ Yezu tɔ̃ 'bɔ na: “Baa mi kɛ a li nza i ni, a dɛ sɛ do nɛ ní, fala kɛ nɛ mbɔ̀kɔ̀ ngba nɛ do sila nɛ vɛ̃ gɔ ni.”
Currently Selected:
MATIE 18: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
