MATIE 15

Ofariziɛnɔ do wi be mbulanɔ wa a wi ɔlɔ wi

(Mar. 7.1-13)

1Mbe ngba soe kpo, nɛ Ofariziɛnɔ do owi be mbulanɔ kɛ wa yula Yeruzalɛmɛ i ni, wa tɛa 'da Yezu, nɛ wa aka a na: 2“Gulu kɛ Owi yambala mɛnɔ 'da mɔ, wa dɛ́ mbula 'da oyaa lɛ gɔ we ge nde? Mba gɔ, fala kɛ wa nɛ nyɔngɔ mɔ, nɛ nde wa fɔ́lɔ́ kɔ̃ wa ɔ nɛ kɛ mbula 'da oyaa lɛ tɔ̃a ni gɔ.”

3Nɛ Yezu gese hã wa na: “Nɛ nɛ, gulu kɛ nɛ dɛ́ mbula 'da Gale gɔ, nɛ nɛ dɛ tati a kɛ 'da oyaa nɛ iko ni we ge nde? 4Mba gɔ, Gale tɔ̃a na: ‘Mɔ dɔ́nggɔ́ baa mɔ do naa mɔ.’ Nɛ a tɔ̃ 'bɔ na: ‘Kɔ fala kɛ wele tɔ̃ 'dã nu we hã baa a, tabi hã naa a nde, nɛ ma wia na, wa gbɛ wi ni do'do.’ 5Kɔ nɛ, nɛ tɛ be hã winɔ na, fala kɛ wele tɔ̃ hã baa a tabi hã naa a na: ‘Mɛ sɔ mi wia we gala do nɛ ni ni, mi ia ma hã Gale,’ 6nɛ ma hã wala hã wi ni na, a tɛ gàlà baa a, tabi naa a gɔ. Nɛ dɛ na mɛ ni, nɛ nde nɛ 'danga we nu Gale we dɛ tati a mbulanɔ 'da nɛ iko! 7Nɛ, owi ɔlɔ winɔ gɛ, Ezai tɔ̃a zɛ́ olo nu Gale ngɔ nɛ do gbãlã we na:

8‘Winɔ gɛ wa dɔnggɔ mi do nu wa iko,

nɛ nde sila wa ngɔ mi bina.

9Dɔngga wi wa dɔnggɔ do mi gɛ, ma yala iko,

we duzu kɛ mbulanɔ wa be ma ni,

mɛ a kɛ Owele wa ia ni iko,

nɛ wa tɔ̃ na, mɛ a mbulanɔ 'da mi Gale.’” #15.9 Mɔ tɔ́lɔ́ Ezai 29.13.

Mɛnɔ kɛ ma wia we 'danga wele ni

(Mar. 7.14-23)

10Do nɛ, nɛ Yezu sa mɔ hã ogba gili winɔ, nɛ a tɔ̃ hã wa na: “Nɛ vɛ̃, nɛ zélé mi sɛ! 11Nɛ ĩ́ na, mɔ kɛ wele nyɔngɔ, nɛ ma le dɛ kɔ zã a ni, ma wè tɛ 'danga kɔ sila a gɔ. Nɛ nde mɛ a linggamɔ kɔ zã wele, kɛ ma hɔ do nu a ni, sɛ nɛ ma 'danga sila a de.”

12Nɛ owi yambala mɛnɔ wa tɛa, nɛ wa aka Yezu na: “Mɔ ĩ̀ na, wenɔ mɔ tɔ̃a ni, ma zɛlɛ Ofariziɛnɔ wena ni gɔ nde?”

13Nɛ a gisa hã wa na: “Kpalɛnɔ vɛ̃ kɛ Baa mi li nza i, a mì ma gɔ ni, wa zu'du sɛ ma do'do. 14Kɔ nɛ lá wa ní, we duzu kɛ wa ɔ nɛ wi ba li kɛ a ba te ti ngba a wi lɔa li ni! Hã fala kɛ wi lɔa li ba te ti ngba a wi lɔa li, nɛ wa bɔa nɛ, wa ala sɛ kɔ kɔ̃.”

15Nɛ Petro tɔ̃ hã a na: “Mɔ tɔ̃́ gulu gba we ni hã lɛ.”

16Nɛ Yezu gisa hã a na: “Nɛ tɛ mɛ 'bɔ, nɛ tɛ ĩ̀ ti gulu wenɔ mi tɔ̃a ni gɔ nde? 17Nɛ ĩ̀ na, mɔ kɛ ma le kɔ nu wele, nɛ ma la dɛ kɔ zã a, nɛ 'do nɛ, nɛ a sɔ̃ ma iko ni gɔ nde? 18Nɛ nde mɛ a linggamɔ kɔ zã wele, kɛ ma hɔ do nu a ni, sɛ nɛ ma 'danga kɔ sila a de. 19Mba gɔ, 'dã linggamɔ yolo kɔ zã wele, sɛ nɛ ma tombo a we gbɛ wi, ɔ do kɛnɛ ngba a tabi wili mɔ́ ngba a, yɛnggɛ vĩ zu yali, zũ mɔ, 'bili bɛlɛ do zu li wele, do dã dɛla de. 20Nɛ zɔ́, mɛnɔ ma 'danga wele gɛ a ni! Nɛ nde gɛnɛ kɔ wele fɔ̃lɔ̃ kɔ̃ a dati nyɔngɔ mɔ ɔ nɛ kɛ mbula tɔ̃a ni gɔ, nɛ ma wè tɛ 'danga a gɔ.”

Mbe wuko kpo kɛ a a Yuda gɔ ni tɛa 'da Yezu

(Mar. 7.24-30)

21Nɛ Yezu yula di ni, nɛ a la dɛ kɛ zã le Tirɛ do Sidoni. 22Nɛ mbe wuko kpo zi di ni, a a Yuda gɔ, a a boko Kanana. A tɛa, nɛ a he mɔ na: “Nwa, Be 'da Davidi, mɔ ĩ́ 'bako hã mi! Boko be 'da mi do 'dã hi wi kɔ a, nɛ a zɔ ngamɔ wena!”

23Nɛ Yezu gèsè we kpo hã a gɔ. Nɛ owi yambala mɛnɔ 'da Yezu wa tɛa, nɛ wa tɔ̃ hã a na, a gésé wuke ni, we kɛ a he mɔ tɛ tɛ do 'do lo fai iko ni.

24Nɛ Yezu gese hã wa na: “Gale tumba mi tati nɛ hã wanɔ sanga obe Israɛlɛ, kɛ wa ɔ nɛ obatanɔ kɛ wa yɔa ni iko!”

25Nɛ wuke ni tɛ 'bɔ, nɛ a gu nù ti Yezu, nɛ a tɔ̃ na: “Nwa, mɔ gálá mi!”

26Nɛ Yezu gisa hã a na: “Ma wè na, wele ba nyɔngɔmɔ mɔ́ be, nɛ a hã ma hã otolo gɔ.”

27Nɛ wuke gisa tɛ mɛ 'bɔ hã a na: “Nwa, mɛ a gbãlã we! Gɛnɛ kɔ na mɛ ni, nɛ nde otolonɔ wa wia tɛ nyɔngɔ bi 'bulu nyɔngɔmɛnɔ kɛ ma ala kɔ̃ Owele wa ni.”

28Nɛ Yezu gisa hã a na: “Ee wuke gɛ, kɔ̃a we 'da mɔ gã wena! E kɔ ma dɛ tɛ̃ ɛ hã mɔ, ɔ nɛ kɛ mɔ kɔ̃a ni.” Nɛ do kpo 'da fala ni, nɛ boko be 'da wuke ni kpasa.

Yezu kpasa ogba gili wi zɛlɛ

29Yezu yula di ni, nɛ a la dɛ nu lì Galile. Nɛ a kũ dɛ ngɔ kala kpo, nɛ a dungu nù. 30Nɛ ogba gili wele wa tɛa do owi nɛa kũ, owi lɔa li, owi kala nyanga, do owi lɔnda nu, do ogele wi kunda tɛ̃ ɛ do tɛ̃ ɛ, nɛ wa a wa dɛ dati Yezu, nɛ a kpasa wa. 31Nɛ owinɔ wa nɛa we zɔ owi lɔnda nunɔ tɛ wele we, do Owi kala nyanganɔ wa tɛ nɛ nɔ, nɛ nyanga owi nɛa kunɔ bɔla, nɛ owi lɔa linɔ te zɔ mɔ ni, nɛ wa ɔngbɔ do ma wena, nɛ wa ma ngɔ dɔnggɔ Gale 'da obe Israɛlɛ.

Yezu hã nyɔngɔmɔ hã owele koto nalɛ

(Mar. 8.1-10)

32Yezu sa mɔ hã owi yambala mɛnɔ 'da a, nɛ a tɔ̃ hã wa na: “'Bako ba li mi dɛ tɛ owinɔ gɛ wena, we kɛ lɛ ɔa do wa tũ talɛ vɛ̃, nɛ nyɔngɔmɔ ia kɔ̃ wa do'do. Kɔ ma wè na mi gese wa do wɔ na mɛ ni gɔ, ní gɔ, nɛ wa ala sɛ wɛ dɛ li wala gɛ.”

33Nɛ owi yambala mɛnɔ wa aka na: “Lɛ nɛ dɛ fala kpa nyɔngɔmɔ dɛ li zɔ̃ɛ gɛ, we hã hã gba gili Owele ɔ na mɛ gɛ ni nɛ nde?”

34Nɛ Yezu aka wa na: “Nɛ do mapa nɛ nde?”

Nɛ wa gese hã a na: “Lɛ do gbãlã mapa sambo, do obe kɔyɔ sĩ.”

35Nɛ a tɔ̃ hã gba gili owinɔ ni na, wa dungu nù. Nɛ winɔ wa dungu nù vɛ̃. 36Nɛ a kala mapanɔ sambo ni, do kɔyɔnɔ, nɛ a hã iɔ̃nae hã Gale, nɛ a gbini sanga nɛ, nɛ a hã ma hã owi yambala mɛnɔ 'da a na, wa kɛ̃ hã gba gili owinɔ ni. Nɛ wa kɛ̃a, 37nɛ wele do wele nyɔnga, nɛ zã a hɛ̃a. Nɛ owi yambala mɛnɔ wa ngɛma tala kɛ ma 'bana ni, nɛ ma dunu sanggi sambo. 38Ĩ na, winɔ wa nyɔnga zi mɛ ni, wa zi a Owi wili koto nalɛ, nɛ wa tɔ̀lɔ̀ owukonɔ do benɔ gɔ. 39Wa nyɔngɔ mɛ ia do'do, nɛ Yezu gese wa na, wa si. Nɛ a kũ kɔ ga, nɛ a la dɛ ngɔ nù Magadanɛ.

Currently Selected:

MATIE 15: NGB

Highlight

Copy