MATIE 12

Yezu na ɛ a wele tũ ɔmɔ tɛ wi

(Mar. 2.23-28; Luk. 6.1-5)

1Do ngba soe ni, nɛ Yezu do owi yambala mɛnɔ 'da a wa la do kɔ mbe fɔ ble,#12.1 Ble ma ɔ nɛ fo ni. nɛ nde mɛ zi a kɔ̃ tũ ɔmɔ tɛ wi. Nɛ wɔ ba owi yambala mɛnɔ 'da a wena, nɛ wa ma ngɔ 'bi wala nɛ dɛ nu wa. 2Kɔ Ofariziɛnɔ wa nɛa we zɔ ni, nɛ wa tɔ̃ hã Yezu na: “Owi yambala mɛnɔ 'da mɔ wa de mɛ kɛ mbula 'da lɛ bɛ̃a na, wele tɛ dɛ̀ ma do tũ ɔmɔ tɛ wi gɔ ni!”

3Nɛ Yezu gese hã wa na: “Nɛ tɔ̀lɔ̀ mbe we mɛ Davidi do owi dɛa tonɔ 'da a wa dɛa zi, do 'da fala wɛ ba zi wa ni gɔ nde?#12.3 Mɔ tɔ́lɔ́ 1 Samuɛlɛ 21.1-6. 4A lia zi do wa kɔ tɔa Gale, nɛ wa nyɔnga mapanɔ kɛ winɔ wa hã ma we dɔnggɔ do Gale ni. Mɛ ni nɛ nde mbula 'da lɛ tɔ̃a na, tati a onganganɔ hã wa nyɔngɔ ma iko. 5Nɛ nɛ tɔ̀lɔ̀ mbe we 'da onganganɔ kɔ 'buku mbula 'da Mɔizɛ gɔ nde? Wa kɔma na, 'da fala wa dɛ to kɔ Tɛmpɛlo do tũ ɔmɔ tɛ wi, nɛ nde wa gbini mbula ɛngga. Gɛnɛ kɔ na mɛ ni, nɛ nde wa dɛ̀ 'dã mɔ gɔ. 6Kɔ mi tɔ̃ hã nɛ na, mi gɛ, mi nɛa ngɔ Tɛmpɛloe nɛa. 7Ɔ do kɛ nɛ ĩ sɔ ti gulu we wa kɔma kɔ 'Buki 'da Gale na: ‘Mi kɔ̃̀ gɛnɛ sa'denɔ nɛ dɔ hã mi ni gɔ, nɛ nde mi kɔ̃a na, nɛ ĩ 'bako hã ongba nɛ’ ni ĩ, nɛ nde nɛ 'bílí sɔ we mɔ́ Owele gɔ. 8Nɛ ĩ́ na, mi Be 'da Wele, mi a wele tũ ɔmɔ tɛ wi.”

Yezu kpasa wi kungga kɔ̃

(Mar. 3.1-6; Luk. 6.6-11)

9Nɛ Yezu yula fala ni, nɛ a le kɔ tɔa mbula 'da Oyudanɔ. 10Nɛ nde mbe wi kungga kɔ̃ zi di ni. Nɛ owinɔ di ni ni wa kɔ̃a we fi ngbangga zu Yezu, nɛ wa aka a do 'dã hã na: “Mbula 'da lɛ ma hã wala na, lɛ kpasa wele do tũ ɔmɔ tɛ wi nde?”

11Nɛ Yezu gese hã wa na: “Sanga nɛ gɛ, wi kɛ a do bata mɔ́ a kpo, kɔ bata ni te kɔ 'du kɔ̃ do tũ ɔmɔ tɛ wi, nɛ a nɛ́ sɛ we ba a dɛ nza gɔ ni a wio nde? 12Wele nɛa ngɔ bata! Na mɛ ni, mbula 'da lɛ ma hã wala we gala owele do tũ ɔmɔ tɛ wi.” 13Nɛ a tɔ̃ hã wi zɛlɛ ni na: “Mɔ bɔ́lɔ́ kɔ̃ mɔ!” Nɛ a bɔlɔ kɔ̃ a, nɛ ma de ɔ nɛ mbee ki ni. 14Kɔ Fariziɛnɔ wa nɛa we hɔ nza kɔ tɔa ni, nɛ wa mba ngba wa, takɔ wa fa wala we gbɛ Yezu.

Wi dɛa to kɛ Gale saka a

15Nɛ Yezu zila we nɛ, nɛ a fua tɛ̃ a di ni do'do, nɛ a la dɛ gele fala, nɛ gba gili Owele wa nɛa 'dɔkɔlɔ a. Nɛ a kpasa owi zɛlɛnɔ vɛ̃, 16nɛ a dala nu a hã wa nganda wena na, wa tɛ tɔ̃̀ we 'dɛ ɛ hã Owele gɔ. 17A dɛa na mɛ ni, takɔ we kɛ Gale tɔ̃a zɛ́ do wala 'da wi gba olo nu a Ezai ni, ma dɛ tɛ̃ ɛ. Ezai tɔ̃a zɛ́ olo nu Gale na:

18“Nɛ zɔ́ wi dɛa toe 'da mi kɛ mi saka ni, a kɛ!

Mi kɔ̃ gɛnɛ a wena, nɛ mi dɛ 'bɔ yangga we duzu a.

Mi tombo sɛ hi wi 'da mi dɛ kɔ a, nɛ a tɔ̃ sɛ hã owinɔ vɛ̃ na, mi nɛ dɛ bɔlɔ zu dɛa mɔ hã wa.

19A mɔ̃́lɔ̃́ sɛ do wele gɔ, nɛ a tɔ̃́ sɛ we do nga gɛlɛ gɔ. Wele zélé sɛ gɛlɛ a tɛ wele we do li walanɔ gɔ.

20A zɔ wi kɛ a bili ɔ nɛ sala tɔ̃, nɛ nde a lá a iko gɔ, a zɔ wi kɛ a ɔ nɛ nyɛa we mwinda kɛ ma nɛ bi bi ni, nɛ nde a bɛ̃́ gɛnɛ a gɔ, gbaa ndɔti nɛ a kɛ bɔlɔ zu dɛa mɔ nɛ ngɔ, sɛ nɛ de.

21Nɛ onu kpala winɔ ngɔ nù gɛ vɛ̃ wa gbini sɛ zã wa do a.” #12.17-21 Mɔ tɔ́lɔ́ Ezai 42.1-4.

Yezu gisa nu wenɔ wa tɔ̃a dɛ ngɔ a ni

(Mar. 3.22-30; Luk. 11.14-23)

22Wa tɛa do mbe wele kpo hã Yezu, nɛ nde a zɔ́ mɔ gɔ, nɛ nu a lɔ lɔnda, we kɛ a do 'dã hi wi kɔ a. Nɛ Yezu kpasa wi ni, nɛ a ma ngɔ wele we, nɛ li a hũi. 23Nɛ gba gili winɔ ni wa ɔngbɔ do ma wena, nɛ wa tɔ̃ na: “Wi gɛ a Be 'da Davidi gɔ nde?”

24Kɔ Ofariziɛnɔ wa nɛa we zele ní, nɛ wa tɔ̃ na: “Wi gɛ a ndaka o'dã hi winɔ kɔ owinɔ, we kɛ Beɛlzebulɛ, #12.24 Beɛlzebulɛ, mɛ a mbee li Satana. nwa ngɔ o'dã hi winɔ hã ngawi nɛ hã a.”

25Nɛ nde Yezu ĩ sɔ ti linggamɔ zu wa ia, nɛ a tɔ̃ hã wa na: “Fala kɛ nu fɛlɛ kula kpo gɔnɔ sanga tɛ ngbɛ ɛ do bolo, nɛ nde ma 'báná sɛ 'bɔ gɔ, nɛ le 'da wa ma 'danga sɛ vɛ̃. Fala kɛ owi kɔ le kpo, tabi onya wi dɛ kɔ zã kpo wa kɛ̃ sanga tɛ ngba wa, nɛ nde wa 'báná sɛ gɔ. 26Fala kɛ Satana fo 'dã hi wi, nɛ nde a bi bolo do kpo kpo kili tɛ̃ a wele nɛ, nɛ dɛa to nwa 'da a ma 'bana sɛ nde? 27Fala kɛ mi ndaka o'dã hi winɔ kɔ winɔ do ngawi 'da Beɛlzebulɛ, ni a owinɔ 'da nɛ wa ndaka o'dã hi winɔ do ngawi 'da wio nde? Owinɔ 'da nɛ ngboo wa bia na, nɛ tia do we. 28Gbãlã we, mi ndaka o'dã hi winɔ kɔ wi ni do ngawi 'da Hi Wi 'da Gale. Ki ni ma be na, Gale ndua dɛa to nwa 'da a ngɔ nù gɛ ia.

29“Wele nɛ le we zũ mɔ kɔ tɔa mɔ́ wi ngawi, nɛ ma wia na a ba wi ngawi ni, kɔ a ɛnzɛ a kiti kiti do'do, sɛ nɛ a le we zũ mɛnɔ 'da a de.

30“Wi kɛ a a wi 'da mi gɔ ni, a a wi sɛnɛ mi. Nɛ wi kɛ a gálá mi tɛ ngɛmɛ li owinɔ 'da mi gɔ ni, a pɛsɛ wa pɛsa. 31Ma kɛ mi tɔ̃ hã nɛ na, Gale wia tɛ fo ku'da 'dã mɛnɔ 'da owinɔ, do ku'da 'dã wenɔ vɛ̃ wa tɔ̃ ma ni zu wa do'do. Nɛ nde wi kɛ a dã zu li Hi Wi Santo ni, Gale fó sɛ ku'da nɛ zu a gɔ. 32Wi kɛ a dã zu li mi Be 'da Wele, nɛ Gale a fo sɛ ku'da 'dã mɛ ni zu a. Nɛ nde wi kɛ a dã zu li Hi Wi Santo ni, gɛnɛ kɔ sɔɛ gɛ tabi do 'do, nɛ nde Gale fó sɛ ku'da nɛ zu a fala kpo gɔ.

Wa ĩ ti te we wala nɛ

(Luk. 6.43-45)

33“Fala kɛ te a dia te, nɛ wala nɛ sɛ tɛ mɛ 'bɔ a dia. Kɔ fala kɛ te a 'dã te, nɛ wala nɛ sɛ tɛ mɛ 'bɔ a 'dã. Wa ĩ ti te we wala nɛ. 34Aa nɛ, kɛ nɛ ɔlɔ wele ɔ nɛ gɔ̃nɔ gɛ! Nɛ a o'dã wi, nɛ nɛ nɛ dɛ fala tɔ̃ gbãlã we ni nɛ nde? Mba gɔ, nu wele tɔ̃ wenɔ kɛ ma yolo kɔ sila a ni. 35Dia wi dɛ dia mɔ, nɛ dia mɛnɔ ni yolo kɔ sila a. Nɛ 'dã wi dɛ 'dã mɔ, nɛ 'dã mɛnɔ ni yolo kɔ sila a. 36Mi tɔ̃ hã nɛ na, do ngba soe kɛ Gale nɛ 'bili do ngbangga 'da winɔ ni, nɛ a tɔ̃ sɛ we wenɔ kɛ winɔ wa wele zi ma mbukuluu ni vɛ̃. 37Kɔ yolo dɛ ngɔ lɛnggɛ nu mɔ, nɛ Gale a 'bili sɛ we 'da mɔ na, mɔ tia do we, tabi mɔ tè do we gɔ.”

Oyudanɔ wa kɔ̃a we zɔ gba sɔ̃ mɔ

(Mar. 8.11-12; Luk. 11.29-32)

38Nɛ ombe wi be mbulanɔ, do ombe Fariziɛnɔ wa aka Yezu na: “Wi be mɔ, lɛ kɔ̃a na mɔ dɛ mbe gba sɔ̃ mɔ kpo hã lɛ, kɔ lɛ zɔ!”

39Nɛ Yezu gese hã wa na: “Winɔ kikina gɛ, wa a o'dã wele! Nɛ wa kɔ̃̀ 'bɔ gɛnɛ Gale gɔ. Wa kɔ̃a we zɔ gba sɔ̃ mɔ we ĩ na mi yula 'da Gale nde! Nɛ nde wa zɔ́ sɛ gele gba sɔ̃ mɔ gɔ, ma 'bana sɛ do kɛ zɛ́ 'da fala 'da Yonasi, wi gba olo nu Gale ni iko. 40Ɔ nɛ kɛ Yonasi ɔa zi kɔ zã gã kɔyɛ tũ talɛ ni, mi Be 'da Wele, mi ɔ sɛ ti zunu tũ talɛ. 41Do ngba soe kɛ Gale nɛ 'bili do ngbangga 'da owinɔ ni, nɛ Owi Ninivɛ wa 'bili sɛ ngbangga dɛ zu owinɔ kikina gɛ na, wa tia do we. We kɛ Owi Ninivɛ wa kifi zɛ́ sila wa, 'da fala kɛ Yonasi bia we 'da Gale hã wa ni. Nɛ nde wele kɛ nɛ zɔ a gɛ, a gã nɛa ngɔ Yonasi! 42Do ngba soe kɛ Gale nɛ 'bili do ngbangga 'da owinɔ ni, nɛ wuko nwa #12.42 Mɔ tɔ́lɔ́ 1 Onwanɔ 10.1-10. kɛ a yula zi si ba gɔtɔ ni, a kulu sɛ ngɔ dɛ li owinɔ kikina gɛ, nɛ a 'bili ngbangga dɛ zu wa na, wa tia do we. Mba gɔ, a yula zi nyɛlɛ wena, nɛ a tɛa we zele lɛnggɛ hã zãnɔ 'da Salɔmɔ. Nɛ nde wele kɛ nɛ zɔ a gɛ, a gã nɛa ngɔ Salɔmɔ!

'Dã bi wi wia tɛ kpolo tɛ̃ a do ongba a

(Luk. 11.24-26)

43“Fala kɛ 'dã hi wi hɔ nza kɔ wele, nɛ a la dɛ li go i, nɛ a yɛnggɛ we fa fala kpe do tɛ̃ a. Kɔ fala kɛ a kpà fala gɔ, 44nɛ a tɔ̃ do kɔ sila a na: ‘Mi nɛ kpolo tɛ mi dɛ kɔ tɔa 'da mi, kɛ mi la ma ni.’ Kɔ a nɛ kpolo tɛ̃ a, nɛ nde wa mili tɔa, nɛ wa 'dafa kɔ nɛ dia nɛ ge nde ni. 45Kɔ a nɛ zɔ ní, nɛ a la we kpa 'bɔ mbé o'dã hi wi zu wa sambo, kɛ wa 'danga nɛa ngɔ a wena ni, nɛ a si do wa dɛ kɔ tɔa ni. Nɛ dungi 'da wi ni 'danga nɛ ngɔ kɛ a zi do ma dati ni. Kɔ ma ɔ sɛ 'bɔ na mɛ ni, we o'dã winɔ kikina gɛ.”

Naa Yezu do onya a a wio nde?

(Mar. 3.31-35; Luk. 8.19-21)

46Yezu 'bana tɛ wele we do gili winɔ ni, nɛ naa a do onya a wa hɔ, nɛ wa yolo do tɛ̃ ɛ, nɛ wa fa we wele we do a. 47Nɛ mbe wele kpo tɔ̃ hã Yezu na: “Mɔ zɔ́, naa mɔ do onya mɔ wa hɔa dɛ, kɔ wa kɔ̃a we wele we do mɔ.”

48Nɛ Yezu gisa hã wi ni na: “Naa mi do onya mi a wio nde?” 49Nɛ a be kɔ̃ a tɛ owi yambala mɛnɔ 'da a, nɛ a tɔ̃ na: “Nɛ zɔ́ naa mi do onya mi, wi a winɔ kɛ zã mi gɛ! 50Bulu nya mi, tabi boko nya mi, tabi naa mi, wi a wele kɛ a dɛ mɛnɔ zã baa mi, kɛ a li nza i kɔ̃a ni.”

Currently Selected:

MATIE 12: NGB

Highlight

Copy