LUKA 2

Kula 'da Yezu

(Mat. 1.18-25)

1Do 'da fala ni, nɛ Ogustɛ, gã nwa ngɔ nù Roma ba nu a na, wa tɔ́lɔ́ owinɔ ngɔ nùi 'da ɛ vɛ̃. 2Kuti tɔlɔ winɔ ni dɛa zi tɛ̃ ɛ do 'da fala kɛ Kiriniusi zi a wi fɔmɔ nù Siri ni. 3Nɛ wele do wele si zi dɛ kɔ le 'da ɛ ngboo ni, takɔ wa kɔmɔ li a.

4Nɛ Yozɛfu kulu tɛ mɛ 'bɔ ngɔ tɛ Nazarɛtɛ, tɛ ngɔ nù Galile, nɛ a si dɛ Bɛtleɛmɛ, tɛ ngɔ nù Yude. Mba gɔ, Bɛtleɛmɛ a le 'da nwa Davidi, nɛ Yozɛfu zi a wi nu fɛlɛ Davidi. 5Yozɛfu nɛa zi fala nɛ kpo do wuke 'da a Maria, kɛ zã a dɛla zi kporr ni. 6Kɔ wa hɔa Bɛtleɛmɛ i, nɛ kula to a, 7nɛ a ko kuti kula 'da a do bulu be. Nɛ a kasa tulu tɛ be ni, nɛ a fi a kɔ mɛ wa a do nyɔngɔmɛ hã onadalamɛnɔ ni. Mba gɔ, wa kpà zi fala ɔi tɛ kɔ tɔa gɛnɛ i gɔ.

Anzɛ hɔa dati owi fɔmɔ batanɔ

8Do tũi ni, owi fɔmɔ bata wa zi tɛ li zɔ̃nɔ 'do le ni, tɛ fɔmɔ batanɔ 'da wa. 9Nɛ mbe anzɛ 'da Nwa Gale hɔa 'da wa, nɛ yele ngbala 'da Gale yele dɛ ngɔ wa, nɛ ma hɔa zu wa hau, nɛ kili ba wa wena. 10Nɛ anzɛ ni tɔ̃ hã wa na: “Nɛ tɛ dɛ̀ kili gɔ, we kɛ mi tɛa do dia sako we tɔ̃ hã nɛ, nɛ sakoe ni ma hã sɛ yangga hã owinɔ 'da nɛ vɛ̃. 11Tũi gɛ, wa kua wi kpasa nɛ tɛ kɔ le 'da Davidi. Wi ni a Nwa Kristo. 12Hã nɛ zɔ́, mɛ kɛ nɛ ĩ sɛ do ti a ni ma kɛ: Nɛ kpa sɛ be nzɔ be, nɛ nde wa kasa tulu dɛ tɛ̃ a, nɛ wa fi a dɛ kɔ mɛ wa a do nyɔngɔmɛ hã onadalamɛnɔ ni.”

13Kɔ anzɛ ni nɛa we fi nu ɛ nù, nɛ mbé gba gili oanzɛ wa yolo li nza i, nɛ wa tɛ hirr, nɛ wa mba do a, nɛ wa ma ngɔ dɔnggɔ Gale na:

14“Dɔngga wi hã Gale tɛ li nza i,

nɛ dungu fio ɔ do winɔ

kɛ a kɔ̃a gɛnɛ wa ngɔ nù gɛ ni!”

Owi fɔmɔ batanɔ wa nɛa Bɛtleɛmɛ

15Anzɛnɔ wa nɛa we kpolo tɛ wa dɛ ngɔ i, nɛ Owi fɔmɔ batanɔ wa tɔ̃ hã ngba wa na: “Lɛ nɛ́ Bɛtleɛmɛ i, kɔ lɛ zɔ mɛ ma dɛa tɛ̃ ɛ, hã Nwa Gale bia ma hã lɛ gɛ.” 16Nɛ wa la dɛ i mɔ do gbɛnga tɛ̃.

Wa hɔa, nɛ wa kpa Maria, do Yozɛfu, do nzɔ be kɛ wa fi a dɛ kɔ mɛ wa a do nyɔngɔmɛ hã onadalamɛnɔ ni. 17Wa nɛa we zɔ nzɔ be, nɛ wa yɔlɔ gulu we kɛ anzɛ tɔ̃a hã wa ngɔ nzɔ be ni hã Maria do Yozɛfu vɛ̃. 18Nɛ winɔ vɛ̃ kɛ wa zila we owi fɔmɔ batanɔ wa tɔ̃a ni, wa ɔngba do ma wena. 19Nɛ Maria usu wenɔ ni vɛ̃ dɛ kɔ sila ɛ, nɛ a tɛ lengge ma fai. 20Nɛ owi fɔmɔ batanɔ wa kpula tɛ wa. Nɛ wa dɔngga Gale, nɛ wa hã iɔ̃nae hã a we wenɔ vɛ̃ kɛ wa zila, nɛ wa zɔa 'bɔ do li wa ni. Mba gɔ, mɛnɔ ni dɛa zi tɛ̃ ɛ vɛ̃, ɔ nɛ kɛ anzɛ tɔ̃a do gulu nɛ hã wa ni.

Wa ia li Yezu

21'Do kula la pɔsɔ kpo, nɛ ma hɔ ngba soe gɔnɔ be do gaza, nɛ wa e li a na Yezu, li kɛ anzɛ ia zi ma, dati kɛ Maria tɛ bà zi zã a gɔ̃ ni.

Wa nɛa do Yezu kɔ tɔa Tɛmpɛlo

22Ngba soe kɛ na, Maria fɔlɔ tɛ̃ a olo kula we hɔ sa wi li Gale, ɔ nɛ kɛ mbula 'da Mɔizɛ tɔ̃a ni ma wia, nɛ wa do Yozɛfu wa nɛa tɛ Yeruzalɛmɛ i. Nɛ wa nɛa fala nɛ kpo do be, takɔ wa e a hã Nwa Gale. 23Mba gɔ, wa kɔmɔ kɔ 'buku mbula na: “Nɛ la sɛ Okuti bulu be Israɛlɛ vɛ̃ hã mi we dɔnggɔ do mi.”#2.23Mɔ tɔ́lɔ́ Kulu Tɔa 13.2-12. 24Nɛ Maria do Yozɛfu wa nɛa 'bɔ do dɔnggamɔ hã nganga, takɔ a dɔ we dɔnggɔ do Gale, ɔ nɛ kɛ wa kɔmɔ kɔ 'buku mbula na: “Nɛ ha gbakulĩ bɔa, tabi be pizɔ̃ bɔa” #2.24Mɔ tɔ́lɔ́ Levitɛnɔ 12.8. ni.

25Do 'da fala ni, mbe wele zi tɛ Yeruzalɛmɛ ni, li a a Simeoni. A zi a wi bɔlɔ zu, a dɔnggɔ zi Nwa Gale wena, nɛ a zi tɛ 'bɔ we zɔ wi kɛ a nɛ fo sɛ obe Israɛlɛ kɔ ngamɛ ni. Nɛ Hi Wi Santo zi fala nɛ kpo do a. 26Nɛ Hi Wi Santoe ni tɔ̃a zi hã a na, a fé sɛ do ti gɔ, gbaa kɔ a zɔ Mɛsiya, wele kɛ Nwa tumba a ni do'do sɛ nɛ de. 27Yozɛfu do Maria wa hɔa kɔ tɔa Tɛmpɛlo i do nzɔ Yezu, takɔ wa dɛ mɛ kɛ mbula 'da wa tɔ̃a ni, nɛ Hi Wi Santo tombo tɛ mɛ 'bɔ Simeoni dɛ di ni. A nɛa we zɔ be, 28nɛ a ba a dɛ kɔ̃ a, nɛ a ma ngɔ hã iɔ̃nae hã Gale na:

29“Nwa Gale, mbuli kɛ mɔ kpua zi ni,

ma dɛa tɛ̃ ɛ ia.

Kɔ mɔ e mi wi toe 'da mɔ

hã mi fe do dia nɛ.

30Mba gɔ, mi zɔa wi kpasa wi do li mi ngboo.

31Mɔ tumba a takɔ a 'dafa wala kpasi,

nɛ ma be tɛ̃ ɛ li winɔ vɛ̃.

32Kpasi ni ma ɔ nɛ wese

kɛ ma to dɛ ngɔ ogele winɔ vɛ̃,

nɛ ma be li wala hã wa ni.

Nɛ owele wa dɔnggɔ sɛ owinɔ 'da mɔ,

obe Israɛlɛ we duzu a.”

Simeoni gba olo nu Gale

33Nɛ baa Yezu do naa a, wa ɔngba do we kɛ Simeoni tɔ̃a ngɔ Yezu ni wena. 34-35Nɛ Simeoni wila nu ɛ tɛ wa, nɛ a tɔ̃ hã Maria na: “Gale saka be gɛ, takɔ do wala 'da a, nɛ ombe Yudanɔ wena wa te li ngbangga, nɛ ombe wena wa kpasa 'bɔ. Nɛ a be sɛ mɛ kɛ Gale kɔ̃a we dɛ nɛ ni dɛ li Owele, nɛ owinɔ wena wa bɛ̃ sɛ gɛnɛ a. Na mɛ ni, a be sɛ linggamɛ 'da owinɔ, kɛ ma usu tɛ̃ ɛ usu ni dɛ nza. Nɛ 'bako ma dunu sɛ kɔ sila mɔ, nɛ ma zɛlɛ mɔ ɔ nɛ wa dumu sila mɔ do kɔya ni.”

Wuko wi gba olo nu Gale

36Do 'da fala ni, nɛ nde Ana, wuko wi gba olo nu Gale zi tɛ mɛ 'bɔ boe. A zi a be 'da Fanuɛlɛ, wi nu fɛlɛ Asɛrɛ, nɛ a dɛ zi gbɛlɛ wena. A ba zi wili kɔ be zɔnga tɛ̃ a, nɛ wa ɔa do wili a sabɛlɛ sambo iko, 37nɛ wili a fe. Nɛ a ɔa olo wili a ni gbaa, nɛ a hɔ 'bu sabɛlɛ ngbɛ'dɛ'dɛ ngɔ nɛ nalɛ. A ngbí zi kɔ tɔa Tɛmpɛloe gɔ, nɛ a dɔnggɔ Gale tũ do gba wese, tɛ sambala a do bɛ̃ nyɔngɔmɔ. 38Nɛ a hɔa do 'da fala ni, nɛ a gese iɔ̃nae hã Nwa Gale, nɛ a ma ngɔ tɔ̃ we 'da be ni hã winɔ vɛ̃, kɛ wa 'bɔ zi 'da Gale na, a fo Owi Yeruzalɛmɛ kɔ ngamɛ ni.

Yozɛfu do Maria wa kpula tɛ wa dɛ Nazarɛtɛ

39Yozɛfu do Maria wa dɛa mɛnɔ vɛ̃ kɛ mbula 'da Gale tɔ̃a ni do'do, nɛ wa kpolo tɛ wa dɛ kɔ le olo wa Nazarɛtɛ, tɛ ngɔ nù Galile. 40Nɛ be gã do sɔ̃a gbãlã tɛ, nɛ a 'bɔ do hã zã wena, nɛ Gale bia dia zã 'da ɛ hã a.

Yezu do sabɛlɛ 'bu ngɔ nɛ bɔa

41Sabɛlɛ kpo kpo, nɛ Owi ko Yezu wa nɛ zi tɛ Yeruzalɛmɛ i, we dungu ɛngga Hɔ Nza kɔ Ngbá. 42Kɔ Yezu nɛa we ɔ sabɛlɛ 'bu ngɔ nɛ bɔa, nɛ a nɛ tɛ mɛ 'bɔ we dungu ɛngga ni, ɔ nɛ kɛ wa dungu ma fai ni. 43Kɔ ɛngga ni ia, nɛ owinɔ wa si, nɛ Yezu 'bana dɛ Yeruzalɛmɛ i, nɛ nde owi ko a wa ĩ̀ fala nɛ gɔ. 44Nɛ wa lingga na, Yezu sanga owinɔ lo si do wa gɛ boe. Nɛ wa ɔa sanga wala, nɛ fala sa, nɛ wa ma ngɔ aka we a tɛ 'da wi nanɔ 'da wa, do oyali ngba wa, 45nɛ nde wa kpà a gɔ. Nɛ wa kpula tɛ wa Yeruzalɛmɛ i we fa a. 46Nɛ wa fa a gbaa 'do tũ talɛ, nɛ wa kpa a tɛ kɔ tɔa Tɛmpɛloe, nɛ nde a dungu nù dɛ sanga Owi be mbulanɔ, kɔ a tɛ zele wenɔ wa tɔ̃ ni, do aka wa do we. 47Nɛ winɔ kɛ wa zele zi a ni, wa ɔngbɔ wena we zɔ hã zã 'da a, do wenɔ kɛ a gese ni. 48Kɔ owi ko a wa nɛa we zɔ a, nɛ wa ɔngbɔ do a wena, nɛ naa a tɔ̃ hã a na: “Be 'daa, gulu kɛ mɔ dɛa do lɛ ní we ge nde? Lɛ do baa mɔ, lɛ fia tɛ fa mɔ.”

49Nɛ Yezu gese hã wa na: “Gulu kɛ nɛ fa mi we ge nde? Nɛ ĩ̀ na, mi wia we dungu kɔ tɔa 'da Baa mi ni gɔ nde?” 50Nɛ nde wa ĩ̀ gulu wenɔ kɛ a tɔ̃a hã wa ni gɔ.

51Nɛ Yezu si do wa dɛ Nazarɛtɛ i, nɛ a zila we nu wa do dia nɛ. Nɛ naa a usu wenɔ ni vɛ̃ dɛ kɔ sila ɛ. 52Nɛ Yezu gã, nɛ hã zã 'da a gã 'bɔ dɛ dati. Nɛ dɛa mɔ tɛ̃ a ma hã yangga hã Gale do owinɔ wena.

Currently Selected:

LUKA 2: NGB

Highlight

Copy