LUKA 11

Yezu bia sambala hã winɔ 'da a

(Mat. 6.9-13; 7.7-11)

1Mbe tũ kpo, nɛ Yezu nɛa tɛ mbe fala kpo, nɛ a ma ngɔ sambala Gale. Kɔ a nɛa we fi nu a nu, nɛ mbe sanga Owi yambala mɛnɔ 'da a kpo aka a na: “Nwa, mɔ bé sambala hã lɛ, ɔ nɛ kɛ Yoanɛ wi batisa winɔ bia zi hã Owi yambala mɛnɔ 'da a ni.”

2Nɛ Yezu gese hã wa na: “Fala kɛ nɛ ma ngɔ sambala nɛ, nɛ nɛ tɔ̃ na:

Aa Baa lɛ,

e kɔ winɔ wa dɔnggɔ zu li mɔ kɛ ma santo.

Mɔ tɛ́, kɔ mɔ dungu nwa ngɔ nùi gɛ.

3Mɔ hã nyɔngɔmɛ kɛ ma wia ni hã lɛ tũ kpo kpo.

4Mɔ fó 'dã mɛnɔ 'da lɛ, nɛ mɔ mbɔ́kɔ́ lɛ,

we kɛ lɛ tɛ mɛ 'bɔ, lɛ mbɔkɔ ongba lɛ

we 'dã mɛnɔ wa dɛ do lɛ ni mbɔka.

Mɔ tɛ là lɛ, kɔ sila lɛ ɔkɔlɔ lɛ gɔ.”

5Nɛ Yezu tɔ̃ 'bɔ hã wa na: “Lɛ bá na, mbe wele kpo sanga nɛ gɛ do yali ngba a, nɛ a nɛ 'da ngba a ni do sanga tũ, nɛ a tɔ̃ hã a na: ‘Aa mbaa, mɔ gala mbe mi do mapa talɛ. 6We kɛ mbe ngba mi yula gɛnɛ, kɔ a hɔa 'da mi gɛ, nɛ mi do mɔ dɛ do gɛnɛ a bina.’ 7Kɔ fala kɛ ngba a kɔ tɔa i ni gese hã a na: ‘Mɔ é mi ni! We kɛ lɛ do obenɔ 'da mi, lɛ kpia nu tɔa, nɛ lɛ ɔa nù ia. Mi wè tɛ kulu ngɔ we hã mapa hã mɔ gɔ.’ 8Nɛ mi tɔ̃ hã nɛ na, a kulu sɛ ngɔ we hã mapa ni hã ngba a. A kúlú sɛ ngɔ we kɛ a a yali ngba a ni gɔ, nɛ nde a kulu sɛ ngɔ we kɛ a 'bana dɛ di ni tɛ gɔ gɔa fai ni.

9“Kɔ mi tɔ̃ hã nɛ na, nɛ gɔ́ mɔ kɔ̃ Gale, nɛ a hã sɛ hã nɛ. Nɛ fá mɔ, nɛ nɛ kpa sɛ. Nɛ ngbóló 'do nu tɔa, nɛ Gale a hũi sɛ hã nɛ. 10Mba gɔ, wi kɛ a gɔ mɔ, nɛ wa hã sɛ hã a, nɛ wi kɛ a fa mɔ, nɛ a kpa sɛ, nɛ wi kɛ a ngbolo 'do nu tɔa, nɛ wa hũi sɛ hã a. 11Sanga nɛ gɛ, baa be kɛ be 'da a aka a na, a hã kɔyɔ hã ɛ, nɛ a hã sɛ gɔ̃ hã a ni a wio nde? 12Tabi be aka we kuli kɔla, nɛ baa a a hã sɛ gbatɔalanga hã a nde? 13Nɛ a Owi dɛ 'dã mɔ, kɔ nɛ hã dia mɔ hã obenɔ 'da nɛ ni, ní a tɔlɔ wá do Baa nɛ Gale li nza i ni nde? Nɛ aka a we Hi Wi Santo, nɛ a hã sɛ a hã nɛ.”

Yezu dɛ́ to do ngawi 'da Satana gɔ

(Mat. 12.22-30; Mar. 3.20-27)

14Mbe wele kpo zi do 'dã hi wi kɔ a, nɛ 'dã hi wi ni lɔnda nu a do'do. Nɛ Yezu ndaka 'dã hi wi, kɔ 'dã hi wi nɛa we hɔ nza, nɛ wi ni ma ngɔ wele we. Nɛ gba gili winɔ wa ɔngbɔ do ma wena. 15Nɛ ombe wa tɔ̃ na: “A kpa ngawi ndaka 'dã hi winɔ gɛ kɔ̃ Beɛlzebulɛ, nwa ngɔ o'dã hi winɔ!”

16Nɛ ombe winɔ wa kɔ̃a we yamba a, nɛ wa aka a na, a dɛ́ mbe gba sɔ̃ mɔ kpo hã lo we be na, ngawi 'da a yula 'da Gale ni. 17Nɛ nde Yezu ĩ ti linggamɔ zã wa, nɛ a tɔ̃ hã wa na: “Fala kɛ nu fɛlɛ kula kpo gɔnɔ sanga tɛ ngbɛ ɛ do bolo, nɛ nde ma 'báná sɛ 'bɔ gɔ, nɛ lenɔ 'da wa ma kulu sɛ vɛ̃. 18Kɔ fala kɛ Satana bi do kpo ngba a 'dã hi winɔ, nɛ dɛa to nwa 'da a ma 'bana sɛ nde? Nɛ tɔ̃ na, mi ndaka o'dã hi winɔ kɔ winɔ, we kɛ Satana hã ngawi nɛ hã mi. 19Kɔ fala kɛ mi ndaka o'dã hi winɔ kɔ winɔ do ngawi 'da Beɛlzebulɛ,#11.19 Beelzebulɛ mɛ a mbee li Satana. ní a owinɔ 'da nɛ, wa ndaka o'dã hi winɔ kɔ winɔ do ngawi 'da wio nde? Owinɔ 'da nɛ ngboo wa bia na, nɛ tia do we. 20Gbãlã we, mi ndaka 'dã hi winɔ kɔ winɔ do ngawi 'da Gale. Ki ni ma be na, dɛa to nwa 'da Gale ma hɔa 'da nɛ nga ia.

21“Fala kɛ wele nganda wena, kɔ a do mɔ bi bolo we fɔmɔ do tɔa 'da a boe, nɛ nde fo wi 'danga sɛ mɛnɔ 'da a bina. 22Kɔ fala kɛ mbé gele wele hɔ, nɛ nde a nganda nɛa ngɔ wele tɔa ni, nɛ a kala sɛ mɔ bi bolonɔ, kɛ wele tɔa gbini zã ɛ do ma ni, do gele mɛnɔ kɔ̃ a vɛ̃, nɛ a kɛ̃ ma vɛ̃ hã ongba a.

23“Wi kɛ a a wi 'da mi gɔ ni, a a wi sɛnɛ mi. Nɛ wi kɛ a gálá mi tɛ ngɛmɛ li obatanɔ 'da mi gɔ ni, a pɛsɛ wa pɛsa.

'Dã hi wi wia tɛ kpolo tɛ̃ a do ongba a

(Mat. 12.43-45)

24“Fala kɛ 'dã hi wi hɔ nza kɔ wele, nɛ a la dɛ li go i, nɛ a yɛnggɛ we fa fala kpe do tɛ̃ a. Kɔ fala kɛ a kpà fala gɔ, nɛ a tɔ̃ do kɔ sila a na: ‘Mi nɛ kpolo tɛ mi dɛ kɔ tɔa 'da mi, kɛ mi la ma ni.’ 25Kɔ a nɛ kpolo tɛ̃ a, nɛ nde wa mili tɔa, nɛ wa 'dafa kɔ nɛ dia nɛ ge nde ni. 26Kɔ a nɛ zɔ ní, nɛ a la we kpa 'bɔ mbé o'dã hi wi zu wa sambo, kɛ wa 'danga nɛa ngɔ a wena ni, nɛ a si do wa dɛ kɔ tɔa ni. Nɛ dungi 'da wi ni 'danga nɛ ngɔ kɛ a zi do ma dati ni.”

Winɔ kɛ wa do ngbongbo yangga ni

27Kɔ Yezu nɛa we fi nu ɛ nù, nɛ mbe wuko kpo sanga winɔ ni tɔ̃ hã a na: “Yangga wena do wuke kɛ a ba zi zã mɔ, nɛ a ko mɔ, nɛ mɔ ɔmɔ bele a ni!”

28Nɛ Yezu gese tɛ mɛ 'bɔ na: “Owinɔ kɛ wa zele we nu Gale, nɛ wa dɛ ma ni, yangga 'da wa nɛa ngɔ mɛnɔ vɛ̃.”

Oyudanɔ wa kɔ̃a we zɔ gba sɔ̃ mɔ

(Mat. 12.38-42)

29Nɛ gba gili winɔ wa zi tɛ ngbolo ngba wa dɛ kɛ zã Yezu, nɛ wa dɛlɛ wena, nɛ a tɔ̃ hã wa na: “Winɔ kikina gɛ, wa a o'dã wele! Wa kɔ̃a we zɔ gba sɔ̃ mɔ, we ĩ na mi yula 'da Gale nde! Nɛ nde wa zɔ́ sɛ gele gba sɔ̃ mɔ gɔ, ma 'bana sɛ do kɛ zɛ́ 'da fala 'da Yonasi ni iko. 30Nɛ́ kɛ Gale bia zi mɔ hã Owi Ninivɛ do wala 'da Yonasi ni, a be sɛ 'bɔ mɔ hã winɔ kikina gɛ do wala 'da mi, Be 'da Wele. 31Do ngba soe kɛ Gale nɛ 'bili do ngbangga 'da owinɔ ni, nɛ wuko nwa#11.31 Mɔ tɔ́lɔ́ 1 Onwanɔ 10.1-10. kɛ a yula si ba gɔtɔ ni, a kulu sɛ ngɔ dɛ li owinɔ kikina gɛ, nɛ a 'bili ngbangga dɛ zu wa na, wa tia do we. Mba gɔ, a yula zɛ́ nyɛlɛ wena, nɛ a tɛa we zele lɛnggɛ hã zãnɔ 'da Salɔmɔ. Nɛ nde wele kɛ nɛ zɔ a gɛ, a gã nɛa ngɔ Salɔmɔ! 32Do ngba soe kɛ Gale nɛ 'bili do ngbangga 'da owinɔ ni, nɛ Owi Ninivɛ wa 'bili sɛ ngbangga dɛ zu owinɔ kikina gɛ na, wa tia do we. We kɛ owi Ninivɛ wa kifi zɛ́ sila wa, 'da fala kɛ Yonasi bia we 'da Gale hã wa ni. Nɛ nde wele kɛ nɛ zɔ a gɛ, a gã nɛa ngɔ Yonasi!

Mwinda kɔ kili tɛ wi

(Mat. 5.15; 6.22-23)

33“Wele tũ mwinda, nɛ nde a úsú ma, tabi a gú kpana zu nɛ gɔ. Nɛ nde a e ma ngɔ mɔ e do mwinda, takɔ owinɔ kɛ wa le tɔa nga ni, wa zɔ mɔ do dia nɛ. 34Gbali mɔ a mwinda kɔ kili tɛ mɔ. Fala kɛ gbali mɔ 'bana do dia nɛ, nɛ ma zɔ sɛ mɔ kɛ zã mɔ vɛ̃. Kɔ fala kɛ gbali mɔ 'danga do'do, nɛ kili tɛ mɔ vɛ̃ kɔ gba tũ. 35Ma wia na, li mɔ sɔ̃, dɔ mwinda kɔ kili tɛ mɔ bí, kɔ mɔ ɔ kɔ gba tũ gɔ. 36Kɔ fala kɛ kili tɛ mɔ kɔ sa fala do olo tɛ nɛ vɛ̃, nɛ mɔ 'bana sɛ dɛ sa fala, ɔ nɛ kɛ wa tũ mwinda, nɛ ma yele kɛ zã wele vɛ̃ ni.”

Yezu bia we ngɔ Ofariziɛnɔ do owi be mbulanɔ

(Mat. 23.1-36; Mar. 12.38-40)

37Yezu 'bana tɛ wele we ni, nɛ mbe Fariziɛ̃ kpo sa mɔ hã a na, a nɛ we nyɔngɔ mɔ 'da ɛ i. Nɛ Yezu nɛa kɔ tɔa 'da wi ni, nɛ a dungu nù we nyɔngɔ mɛ. 38Nɛ Fariziɛ̃ ni ɔngbɔ wena we zɔ na, dati nyɔngɔ mɛ, nɛ Yezu fɔ̀lɔ̀ kɔ̃ ɛ ɔ nɛ kɛ mbula olo oyaa lo tɔ̃a ni gɔ. 39Nɛ Nwa Yezu tɔ̃ hã a na: “Aa nɛ, Ofariziɛnɔ, nɛ fɔlɔ tati a tɛ nɛ, ɔ nɛ wele fɔlɔ do 'do bila do kpangbala sani ni iko, nɛ nde kɔ sila nɛ dunu do wɔ zũ, do o'dã linggamɔ. 40Aa nɛ, oyɔndɔ winɔ gɛ! Gale kɛ a dɛa 'do mɛnɔ ni, a dɛ̀ kɔ nɛ gɔ nde? 41Ma wia na, nɛ hã mɔ kɔ bilanɔ, do saninɔ 'da nɛ hã owi sãnɔ, nɛ mɔ dɛa tonɔ 'da nɛ vɛ̃, ma sɛ a sa li Gale.

42“'Bako do nɛ, Ofariziɛnɔ! We kɛ nɛ hã hã Gale mɛ a kpo mbee 'bu ngɔ nwá sanggonɔ kpi do kpi kɛ ma unu tɛ nyɔngɔmɛnɔ ni, nɛ nde nɛ kɔ̃̀ gɛnɛ Gale gɔ, nɛ nɛ dɛ́ mɔ kɛ ma ɔ bɔlɔ li a ni gɔ. Ĩ na, mɛ ma wia sɔ ngboo na nɛ dɛ gɛ, mɛ a kɔ̃ gɛnɛ Gale, do dɛ mɔ kɛ ma a bɔlɔ ni, sɛ nɛ nɛ dɛ tala gele mbulanɔ de.

43“'Bako do nɛ, Ofariziɛnɔ! Nɛ le kɔ tɔa mbula, nɛ nɛ fa we dungu ngɔ okpongbo nwa do dati winɔ vɛ̃. Nɛ nɛ kɔ̃a na, nɛ hɔ li gba fandanɔ, nɛ winɔ wa gu nù ti nɛ, nɛ wa hã balɛ hã nɛ ɔ nɛ nɛ a ogã wi ni. 44'Bako do nɛ, we kɛ nɛ ɔ nɛ zunu, kɛ winɔ wa ĩ́ we nɛ gɔ, nɛ wa la do ngɔ nɛ, nɛ wa hɔ wi ndi li Gale ni!”

45Nɛ mbe sanga Owi be mbulanɔ kpo tɔ̃ hã a na: “Wi be mɔ, kɛ mɔ tɔ̃ gɛ, mɔ kɔ̀'dɔ̀ tɛ mɛ 'bɔ lɛ gɔ nde?”

46Nɛ Yezu gese hã a na: “'Bako do nɛ, owi be mbulanɔ tɛ mɛ 'bɔ! Nɛ 'dafa gã tole, nɛ ogele winɔ wa ba, nɛ nde nɛ do tɛ nɛ, nɛ é mbe kɔ̃ nɛ tɛ nɛ gɔ. 47'Bako do nɛ! We kɛ nɛ 'dafa zunu owi gba olo nu Gale de wena, ĩ na, wi gbɛa zɛ́ wa wi a oyaa nɛ. 48Nɛ dɛ na mɛ ni, nɛ ma be na, nɛ kɔ̃a gɛnɛ 'dã mɛnɔ kɛ oyaa nɛ wa dɛa zɛ́ ni. We kɛ wa gbɛa owi gba olo nu Gale, nɛ nɛ 'dafa zunu wa! 49We duzu ma, Gale kɛ a ĩ ti mɛnɔ vɛ̃ ni tɔ̃a na: ‘Mi tombo sɛ owi nɛ tonɔ 'da mi, do owi gba olo nu mi hã owinɔ ni. Nɛ winɔ ni wa gbɛ sɛ ombe sanga wa, nɛ wa zɛlɛ sɛ tɛ ombe nɛ wena.’ 50Ma kɛ winɔ kikina gɛ, wa kpa sɛ etumbu olo tɔkɔ tɛ owi gba olo nu Gale, kɛ winɔ wa gbɛa a zɛ́ wa, yolo do 'da fala Gale dɛa zɛ́ do nùi ni, 51ndo do fie 'da Abɛlɛ, gbaa we hɔ tɛ kɛ 'da Zakaria, kɛ wa gbɛa zi a kɔ Tɛmpɛlo, dɛ ngbala Fala kɛ ma santo, do gbagala wa dɔ do sa'denɔ ni. Gbãlã we, mi tɔ̃ hã nɛ na, winɔ kikina gɛ wa kpa sɛ gã etumbu olo owi gbɛ winɔ ni!

52“'Bako do nɛ, owi be mbulanɔ! We kɛ nɛ usu gbãlã we 'da Gale do winɔ. Nɛ nɛ ngboo ni, nɛ kɔ̃̀ we ĩ ti gbãlã we ni gɔ, nɛ nɛ kpe 'bɔ wala ti winɔ na, wa tɛ ĩ̀ ti ma gɔ.”

53Kɔ Yezu nɛa we hɔ nza kɔ tɔa ni, nɛ zã Owi be mbulanɔ do Ofariziɛnɔ nɔ̃lã dɛ tɛ̃ a wena, nɛ wa ma ngɔ aka a do owe tɛ̃ ɛ do tɛ̃ ɛ. 54Nɛ wa gu kɔ̃ hã Yezu, takɔ wa kpa mbe 'dã mɔ kɔ wila we 'da a.

Currently Selected:

LUKA 11: NGB

Highlight

Copy