YOANƐ 8
8
Wuko kɛ wa kpa a do gele wili
1Nɛ Yezu la dɛ ngɔ kala Olivɛ.
2Nɛ fala nɛa we sa nɛ do titole belee, nɛ a kpolo tɛ̃ a dɛ kɔ tɔa Tɛmpɛloe, nɛ a le, nɛ a dungu nù. Nɛ gba gili winɔ wa tɛa 'da a, nɛ a ma ngɔ be we hã wa. 3Nɛ ombe wi be mbulanɔ do Ofariziɛnɔ wa tɛ do mbe wuko kpo, wa kpa a do gele wili, nɛ wa e a dɛ dati winɔ vɛ̃. 4Nɛ wa to hã Yezu na: “Wi be mɔ, mɔ zɔ́, lɛ kpa wuke gɛ do gele wili. 5Kɔ Mɔizɛ kɔma zɛ́ kɔ 'buku mbula 'da a na, fala kɛ wuko ɔ do gele wili, nɛ wa lo a do ta, nɛ wa gbɛ a. Kɔ mɔ tɔ̃ kɛ 'da mɔ na ge nde?” 6Wa tɔ̃a ní we gu kɔ̃̀ hã a, takɔ wa hã ngbangga hã a. Nɛ Yezu bili zu ɛ nù, nɛ a ma ngɔ kɔmɔ mɔ do zu kɔ̃ a dɛ nù ni.
7Nɛ wa 'bana tɛ aka Yezu na mɛ ni, nɛ a bɔlɔ tɛ̃ a, nɛ a tɔ̃ hã wa na: “Wi sanga nɛ gɛ, kɛ a dɛ̀ mbe 'dã mɔ fala kpo gɔ ni, nɛ a bá ta, kɔ a lo wuke gɛ dati.” 8A tɔ̃a ní do'do, nɛ a bili 'bɔ zu a nù, nɛ a ma 'bɔ ngɔ kɔmɔ mɔ dɛ nù ni. 9Kɔ wa nɛa we zele ní, nɛ wa ma ngɔ la ma kpo do kpo, ndo do ngɔ okpasa winɔ gbaa nɛ wa e vɛ̃. Nɛ wa la Yezu zu a kpo, do wuko dɛ dati a ni.
10Nɛ Yezu bɔlɔ tɛ̃ ɛ, nɛ a aka wuke na: “Wa a ni do nde? Wele kpo sanga wa 'bìlì 'dã gulu we hã mɔ gɔ nde?”
11Nɛ a gese hã Yezu na: “Gɔ, nwa!”
Nɛ Yezu tɔ̃ hã a na: “Mi tɛ mɛ 'bɔ ni, mi 'bílí sɛ 'dã gulu we hã mɔ gɔ. Kɔ mɔ sí, nɛ da dɛ kɔ mɔ dɛ́ 'bɔ mbé 'dã mɛ ni gɔ.”]
Yezu a sa fala ngɔ nù gɛ
12Nɛ Yezu bia 'bɔ mbé we hã ogili winɔ na: “Mi a sa fala kɛ ma sa ngɔ nù gɛ ni. Kɔ wele kɛ a tɛ 'dɔkɔlɔ mi ni, a yɛ́nggɛ́ sɛ 'bɔ kɔ gba tũ gɔ. A yɛnggɛ sɛ kɔ sa fala, nɛ ma be wala kpasi hã a.”
13Kɔ Ofariziɛnɔ wa nɛa we zele ní, nɛ wa tɔ̃ hã a na: “Kɛ mɔ tɔ̃ gɛ a gbãlã we gɔ, we kɛ mɔ a mɔ tɔ̃ we ngɔ mɔ do tɛ mɔ wele nɛ.”
14Nɛ Yezu gese hã wa na: “Gɛnɛ kɔ mi tɔ̃ we ngɔ mi do tɛ mi wele nɛ, nɛ nde wenɔ mi tɔ̃ ni, mɛ a gbãlã we. Mba gɔ, mi ĩ ti fala mi yula nɛ ni, do kɛ mi la sɛ dɛ tɛ nɛ ni. Kɔ nɛ, nɛ ĩ̀ ti fala mi yula nɛ ni gɔ, nɛ nɛ ĩ̀ 'bɔ ti fala mi la sɛ dɛ te nɛ ni gɔ. 15Nɛ 'bili we 'da winɔ we bula li wa, nɛ nde kɛ 'da mi, mi 'bílí we mɔ́ wele gɔ. 16Gɛnɛ kɔ na mɛ ni, fala kɛ ma we sɔ na, mi 'bili we mɔ́ wele nde, nɛ mi 'bili sɔ ma do bɔlɔ nɛ. We kɛ mi 'bílí sɔ ma zu mi kpo gɔ, lɛ 'bili sɔ do Baa mi, kɛ a tumba mi ni fala nɛ kpo. 17Wa kɔma kɔ 'buku mbula 'da nɛ na, fala kɛ nu owele bɔa si ngɔ ngbɛ ɛ kpo, nɛ nde we 'da wa a gbãlã we. 18Ní a gɛnɛ kɔ mi tɔ̃ we ngɔ mi do tɛ mi wele nɛ, nɛ nde Baa mi, kɛ a tumba mi ni, a tɔ̃ 'bɔ we ngɔ mi tɔ̃a.”
19Nɛ wa aka a na: “Baa mɔ a do nde?”
Nɛ Yezu gese na: “Nɛ ĩ̀ ti mi gɔ, nɛ nɛ ĩ̀ 'bɔ ti Baa mi gɔ. Ɔ do kɛ nɛ ĩ sɔ ti mi, nɛ nɛ ĩ sɔ ti Baa mi.”
20Yezu tɔ̃a wenɔ ni, do 'da fala a zi tɛ be we kɔ Tɛmpɛloe, tɛ fala wa a do osanduku da do mbilinɔ ni. Nɛ wele kpo bà zi a gɔ, we kɛ ngba soe kɛ Gale saka we a ni tɛ wè zi gɔ.
Yezu tɔ̃a na ɛ yula li nza
21Nɛ Yezu tɔ̃ 'bɔ hã wa na: “Mi la sɛ, nɛ nɛ fa sɛ mi, nɛ nde nɛ kpá sɛ mi gɔ. Nɛ nɛ fe sɛ do 'dã mɛnɔ dɛ zu nɛ. Nɛ wé sɛ tɛ hɔ fala mi nɛ la dɛ tɛ nɛ ni gɔ.”
22Nɛ onwa Yudanɔ wa aka na: “Nɛ́ kɛ a tɔ̃a na, lɛ kpá sɛ ɛ gɔɛ ni, a nɛ gbɛ tɛ̃ a gbɛa nde?”
23Nɛ Yezu gese hã wa na: “Nɛ a Owi ngɔ nù gɛ, nɛ nde kɛ 'da mi, mi yula li nza i. 24Mi tɔ̃ hã nɛ na, fala kɛ nɛ kɔ̃̀ na, mi a wi kɛ mi boe fai gɔ,#8.24Mɔ tɔ́lɔ́ Kulu Tɔa 3. 14-15. nɛ nɛ fe sɛ do 'dã mɔ dɛ zu nɛ.”
25Nɛ wa aka a na: “Ní nɛ nde mɔ wá a wio nde?”
Nɛ Yezu gese na: “Yolo 'da fala kɛ mi ma zi ngɔ dɛ toe 'da mi ni, mi tɛ tɔ̃ gulu mi hã nɛ tɔ̃a fai. 26Nɛ nde kɛ 'da nɛ, mi wia sɔ we tɔ̃ we do 'bili 'bɔ we dɛ ngɔ nɛ wena. Nɛ nde Wi tombo mi tɔ̃ fai a gbãlã we, nɛ mi tɔ̃ hã winɔ ngɔ nù gɛ tati a kɛ a tɔ̃a hã mi ni iko.”
27Nɛ nde onwa Oyudanɔ wa ĩ̀ kɛ na, a tɔ̃ we 'da Baa a ngɔ i ni gɔ. 28Ma kɛ Yezu tɔ̃a 'bɔ hã wa na: “'Da fala kɛ nɛ ba sɛ mi Be 'da Wele dɛ ngɔ#8.28 “Nɛ ba sɛ mi dɛ ngɔ.” Gulu nɛ na, nɛ bɛ̃lɛ̃ sɛ mi ngɔ finda te. ni, sɛ nɛ nɛ ĩ sɛ ti mi na, mi a wi kɛ mi boe fai ni de. Nɛ nɛ ĩ sɛ na, mi dɛ́ mɔ do ngawi 'da mi iko gɔ, nɛ nde mi dɛ tati a kɛ Baa mi be hã mi ni. 29Baa mi kɛ a tumba mi ni, a do mi boe. A là mi zu mi kpo gɔ, we kɛ mi dɛ fai a mɔ kɛ ma de tɛ̃ a ni.” 30Fala Yezu bia wenɔ ni hã owinɔ, nɛ Owele wena wa kɔ̃a zu li a.
Owinɔ kɛ wa a ongbá do wanɔ kɛ wa a ongbá gɔ ni
31'Do nɛ, nɛ Yezu tɔ̃ hã Oyudanɔ kɛ wa kɔ̃a zu li a ni na: “Fala kɛ nɛ dɛ olo nu mi, nɛ nɛ sɛ a ngbongbo winɔ 'da mi. 32Nɛ nɛ ĩ sɛ ti gbãlã we 'da Gale, nɛ gbãlã we ni ma fo sɛ nɛ kɔ ngbá.”
33Kɔ wa nɛa we zele ní, nɛ wa aka a na: “Lɛ a nu kpala Abrahama, nɛ lɛ hɔ̀ mbe ngbá mɔ́ Owele fala kpo gɔ. Kɔ gulu kɛ mɔ tɔ̃ hã lɛ na: ‘Gbãlã we ma fo sɛ lɛ kɔ ngbá ni we ge nde?’ ”
34Nɛ Yezu tɔ̃ hã wa na: “Mi tɔ̃ hã nɛ do gbãlã we na, wele vɛ̃ kɛ a dɛ 'dã mɔ ni, nɛ nde a a ngbá 'da 'dã mɔ. 35Ngbá 'báná dɛ kɔ tɔa 'da wele a fai gɔ, nɛ nde be wele tɔa 'bana wele tɔa 'da baa a fai. 36Kɔ fala kɛ mi Be 'da Gale, mi fo nɛ kɔ ngbá do'do, nɛ nɛ sɛ 'bɔ a ongbá gɔ. 37Mi ĩ na, nɛ a nu kpala Abrahama. Nɛ nde nɛ fa we gbɛ mi, we kɛ nɛ kɔ̃̀ gɛnɛ bia wenɔ 'da mi gɔ. 38Mi tɔ̃ lɛnggɛ mɛnɔ kɛ Baa mi bia hã mi ni. Nɛ nɛ, nɛ dɛ tɛ mɛ 'bɔ a mɛ kɛ baa nɛ tɔ̃a hã nɛ ni.”
39Nɛ wa gese hã a na: “Baa lɛ, wi a Abrahama.”
Nɛ Yezu tɔ̃ hã wa na: “Fala kɛ nɛ ɔ sɔ do benɔ 'da Abrahama ngboo, nɛ nɛ dɛ sɔ tɛ mɛ 'bɔ mɛnɔ kɛ Abrahama dɛa zɛ́ ni. 40Ngangga ni, gɛnɛ kɔ mi tɛ tɔ̃ gbãlã wenɔ kɛ Gale be hã mi ni hã nɛ, nɛ nde nɛ fa we gbɛ mi iko. Abrahama dɛ̀ zɛ́ mbe mɔ ɔ nɛ kɛ 'da nɛ gɛ gɔ. 41Kɛ nɛ dɛ gɛ a dɛa mɔ tɛ baa nɛ.”
Kɔ wa nɛa we zele ní, nɛ wa gese hã a na, lo a ogele be gɔ, Baa lo kpo a Gale iko.
42Nɛ Yezu tɔ̃ hã wa na: “Fala kɛ Gale sɔ a Baa nɛ ngboo, nɛ nɛ kɔ̃ sɔ gɛnɛ mi, we kɛ wi a Gale hã a tumba mi, ma kɛ mi tɛa ngɔ nù gɛ ni. Mi tɛ̀ do linggamɛ 'da mi iko gɔ, nɛ nde Gale a tumba mi. 43Kɔ gulu kɛ nɛ zélé gulu wenɔ mi tɔ̃ hã nɛ gɛ gɔ we ge nde? Nɛ zélé gɔ, we kɛ nɛ kɔ̃̀ we zele wenɔ 'da mi gɔ. 44Baa nɛ, wi a Satana, nɛ nɛ kɔ̃a we dɛ mɛnɔ kɛ zã Satana kɔ̃a ni. Zɛ́ belee, a a wi gbɛ wi fai, nɛ a kɔ̃̀ mbe gɛnɛ gbãlã we fala kpo gɔ, we kɛ fo gbãlã we kɔ a bina. Kɔ fala kɛ a 'bili bɛlɛnɔ, nɛ nde mɛ a tɛlɛ tɛ̃ a hã ni, we kɛ a a wele bɛlɛ. Bɛlɛnɔ vɛ̃ yula kɔ a. 45Nɛ nde kɛ 'da mi, mi tɔ̃ a gbãlã we, ma kɛ nɛ kɔ̃̀ wenɔ mi tɔ̃ ni gɔ ni. 46Wi sanga nɛ gɛ, kɛ a wia we be na, mi dɛa 'dã mɔ ni a wio nde? Mi tɔ̃ fai a gbãlã we, kɔ gulu kɛ nɛ kɔ̃̀ gɛnɛ wenɔ 'da mi gɔ we ge nde? 47Wi kɛ a a wi 'da Gale ni, a zele sɛ wenɔ 'da Gale. Kɔ nɛ a winɔ 'da Gale gɔ, ma kɛ nɛ zélé wenɔ 'da a gɔɛ ni.”
Yezu nɛa ngɔ Abrahama
48Nɛ Oyudanɔ wa na: “Kɛ lɛ tɔ̃a na, mɔ a wi Samaria, nɛ mɔ 'bɔ do 'dã hi wi kɔ mɔ ni, mɛ a gbãlã we gɔ nde?”
49Nɛ Yezu gese hã wa na: “Mi do 'dã hi wi kɔ mi bina. Mi dɔnggɔ Baa mi, nɛ nɛ, nɛ kɔ̃̀ we dɔnggɔ mi gɔ. 50Mi fà na, Owele wa dɔnggɔ mi gɔ, nɛ nde wele kɛ a 'bili wenɔ ni, a a fa na, owele wa dɔnggɔ mi. 51Mi tɔ̃ hã nɛ do gbãlã we na, wele kɛ a dɛ olo nu mi, nɛ a fé sɛ fio gɔ.”
52Nɛ wa tɔ̃ hã a na: “Ngangga ni, lɛ ĩ wá na, mɔ do 'dã hi wi kɔ mɔ boe! Mba gɔ, Abrahama fia, nɛ Owi gba olo nu Gale wa fe 'bɔ, nɛ mɔ gɛ, mɔ tɔ̃ na, wele kɛ a dɛ olo nu mɔ ni, a fé sɛ fio gɔ nde! 53Mɔ lengge na, mɔ nɛa ngɔ baa lɛ Abrahama, kɛ a fia zɛ́ ni nde? Nɛ owi gba olo nu Gale wa fia zɛ́ 'bɔ ia. Kɔ mɔ kɔ̃a we ba tɛ mɔ na, mɔ a wio nde?”
54Nɛ Yezu gese na: “Fala kɛ mi dɔnggɔ tɛ mi wele nɛ, nɛ nde dɔ̃lɔ̃ li 'da mi ma yala. Kɔ wele kɛ a dɔnggɔ mi ni, wi a Baa mi, kɛ nɛ sa li a na Gale 'da nɛ ni. 55Nɛ nde nɛ ĩ́ ti a gɔ. Nɛ mi, mi ĩ ti a ĩ. Kɔ mi tɔ̃ na, mi ĩ̀ ti a gɔ, nɛ mi hɔ sɛ 'bɔ wi bɛlɛ ɔ nɛ nɛ ni. Mi ĩ ti a, nɛ mi dɛ olo nu a dɛa. 56Baa nɛ Abrahama dɛa zɛ́ yangga, we kɛ a zɛ́ do linggamɔ zɔ ngba soe 'da mi, nɛ Gale bia ma hã a, nɛ a dɛ yangga nɛ wena.”
57Nɛ Oyudanɔ wa tɔ̃ hã a na: “Mɔ tɛ wè 'bu sabɛlɛ mɔlɔ gɔ, nɛ mɔ tɔ̃ na, mɔ zɔa Abrahama nde?”
58Nɛ Yezu gese hã wa na: “Mi tɔ̃ hã nɛ do gbãlã we na, dati kɛ na wa ko Abrahama ni, nɛ nde mi zɛ́ boe.”
59Kɔ wa nɛa we zele ní, nɛ wa kala ta, takɔ wa lo do a. Nɛ a vĩ wa, nɛ a hɔ nza kɔ tɔa Tɛmpɛloe do'do.
Currently Selected:
YOANƐ 8: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
