YOANƐ 3

Yezu do Nikodɛmɛ

1Mbe wele kpo sanga Ofariziɛnɔ, li a zi a Nikodɛmɛ. A zi a mbe nwa ngɔ Oyudanɔ. 2Nɛ a nɛa 'da Yezu do tũ, nɛ a to hã a na: “Wi be mɔ, lɛ ĩ na, Gale tumba mɔ we be we hã lɛ. Mba gɔ, fala kɛ Gale tòmbò wele gɔ, nɛ nde a wè tɛ dɛ gba sɔ̃ mɔ ɔ nɛ mɛnɔ mɔ dɛ gɛ gɔ.”

3Nɛ Yezu gisa hã a na: “Mi tɔ̃ hã mɔ do gbãlã we na, fala kɛ wa kò wele fala bɔa gɔ, nɛ nde a zɔ́ sɛ le nwa 'da Gale gɔ.”

4Nɛ Nikodɛmɛ aka a na: “Wa nɛ dɛ fala ko 'bɔ kpasa wele fala bɔa ni nɛ nde? A wia we kpolo tɛ̃ a kɔ zã naa a, nɛ a ko 'bɔ a fala bɔa nde?”

5Nɛ Yezu gese hã a na: “Mi tɔ̃ hã mɔ do gbãlã we na, fala kɛ wa kò wele do lì, do Hi Wi Santo gɔ, nɛ nde wi ni lé sɛ kɔ le nwa 'da Gale gɔ. 6Mba gɔ, wi kɛ wele kua a ni, a a wele iko, nɛ wi kɛ Hi Wi kua a ni, a do kpasi 'da Hi Wi. 7Kɔ mɔ tɛ ongbá do kɛ mi tɔ̃a na: ‘Ma wia na, wa ko wele fala bɔa’ ni gɔ. 8Bũi fi, nɛ ma la dɛ fala kɛ ma kɔ̃a ni. Nɛ mɔ zele giti kɛ ma fi ni, nɛ nde mɔ ĩ́ fala kɛ ma yolo tɛ nɛ, do fala kɛ ma la dɛ tɛ nɛ ni gɔ. Mɔ zɔ́, winɔ kɛ wa kua wa do Hi Wi ni, wa ɔ kpasaa na mɛ ni.”

9Nɛ Nikodɛmɛ aka a na: “Ma wia we dɛ tɛ̃ ɛ nɛ nde?”

10Nɛ Yezu gese hã a na: “Mɔ a gã wi be mbula tɛ ngɔ nù Israɛlɛ, nɛ mɔ ĩ̀ ti mɛnɔ gɛ gɔ nde? 11Mi tɔ̃ hã mɔ do gbãlã we na, lɛ tɔ̃ wenɔ kɛ lɛ ĩ ti nɛ ni, nɛ lɛ tɔ̃ 'bɔ lɛnggɛ mɛnɔ kɛ lɛ zɔa ni, nɛ nde nɛ kɔ̃̀ gɛnɛ kɛ lɛ tɔ̃ ni gɔ. 12Kɔ nɛ́ kɛ mi tɔ̃ we mɛnɔ ngɔ nù gɛ hã nɛ, nɛ nde nɛ kɔ̃́ gɛnɛ ma gɔ ni, nɛ nɛ dɛ sɛ fala kɔ̃ gɛnɛ lɛnggɛ mɛnɔ kɔ li nza i, kɛ mi tɔ̃ we nɛ ni nɛ nde? 13Gele wele kpo tɛ kũ̀li nza i gɔ, wi tati a mi Be 'da Wele, kɛ mi yula ngɔ i, nɛ mi zĩlĩ dɛ nù nga gɛ iko!

14“'Da fala Mɔizɛ zi tɛ li gba zɔ̃ i ni, nɛ a ia gɔ̃ tũ mɔ bolo zu te we kpasa do winɔ. Na mɛ ni, winɔ wa e sɛ tɛ mɛ 'bɔ mi Be 'da Wele dɛ ngɔ, 15takɔ winɔ vɛ̃ kɛ wa kɔ̃ sɛ zu li mi ni, wa kpa kpasi kɛ ma é sɛ gɔ ni. 16Gale kɔ̃a gɛnɛ winɔ ngɔ nù gɛ la li ngele, ma kɛ a hã kpo Be 'da a na, wi kɛ a kɔ̃ zu li a, nɛ nde a fé sɛ fio gɔ, nɛ a sɛ do kpasi kɛ ma é sɛ gɔ ni. 17Gale tòmbò Be 'da a, takɔ a 'bili we dɛ zu owinɔ ngɔ nù gɛ gɔ, nɛ nde a tumba a na, a kpasa wa kpasa.

18“Wi kɛ a kɔ̃a zu li Be 'da Gale ni, a do ngbangga bina. Nɛ wi kɛ a kɔ̃̀ zu li a gɔ ni, ngbangga tia ngɔ a ia. We duzu kɛ a kɔ̃̀ zu li kpo Be 'da Gale gɔ. 19Nɛ zɔ́, gulu kɛ ngbangga te ngɔ winɔ gɛ ma kɛ: Sa fala tɛa ngɔ nù gɛ, nɛ nde winɔ wa kɔ̃̀ gɛnɛ sa fala ni gɔ. Wa kɔ̃a gɛnɛ tũ fala nɛa ngɔ sa fala, we kɛ dɛa mɔ tɛ wa dè gɔ. 20Wi kɛ a dɛ 'dã mɔ ni, a sɛna sa fala, nɛ a kɔ́lɔ́ do sa fala gɔ, da dɛ kɔ Owele wa zɔ́ 'dã dɛa mɛnɔ 'dɛ ɛ gɔ. 21Nɛ wele kɛ a dɛ bɔlɔ zu dɛa mɔ ni, a le kɔ sa fala, takɔ winɔ vɛ̃ wa zɔ mɛnɔ a dɛ we dɔnggɔ do Gale ni.”

Yezu do Yoanɛ wi batisa winɔ

22Nɛ 'do nɛ, nɛ Yezu do Owi yambala mɛnɔ 'da a wa la dɛ ngɔ nù Yude. Nɛ wa ɔa zi i mɔ 'do wa nyɛla bi sĩ, nɛ wa batisa Owele. 23Nɛ Yoanɛ batisa tɛ mɛ 'bɔ winɔ tɛ Amoni dɔ̃ɔ do Salimɛ, we kɛ olì zi falanɔ ni wena. Owinɔ wa tɛ zi, nɛ a batisa wa. 24('Da fala ni, nɛ nde nwa Herodɛ tɛ fì zi Yoanɛ kɔ bɔlɔkɛ gɔ.)

25Nɛ ombe sanga wi yambala mɛnɔ 'da Yoanɛ, wa ma ngɔ ba kafi nu ngba wa do mbe Yuda kpo ngɔ tɛlɛ tɛ mbula fɔlɔ tɛ wi we hɔ sa wi li Gale. 26Nɛ wa nɛa 'da Yoanɛ i, nɛ wa aka a na: “Wi be mɔ, ta zu mɔ 'bana ngɔ wi zi lɛ fala nɛ kpo do a tɛ kulu Yɔrdanɛ i, kɛ mɔ tɔ̃a zi we 'da a hã lɛ ni nde? Mɔ zɔ́, ngangga gɛ, a tɛ batisa winɔ, nɛ winɔ vɛ̃ wa tɛ nɛ dɛ 'da a i!”

27Nɛ Yoanɛ gese hã wa na: “Mɛnɔ vɛ̃ kɛ wele kpa ni, wi a Gale a hã ma hã a. 28Nɛ ngboo, nɛ wia we tɔ̃ temɔɛ kɛ mi tɔ́a na, mi a Mɛsiya gɔ, nɛ nde Gale tumba mi dati a iko ni. 29Ma ɔ nɛ kɛ 'da fala ba ngba wi, nɛ wi wili dungu fala nɛ kpo do kɛnɛ a, nɛ yali ngba wi wili dungu dɛ kɛ zã a, tɛ zele gɛlɛ ngba a, te dɛ yangga nɛ ni. Kɔ mi ɔ nɛ yali ngba wi wili ni, mi do yangga la li ngele. 30Kɔ ma wia na, dɔ̃lɔ̃ li 'da a gã dɛ dati, nɛ kɛ 'da mi si nù.”

Wele kɛ a yula li nza i ni

31Wele kɛ a yula li nza i ni, a nɛa ngɔ winɔ vɛ̃. Nɛ wele kɛ a yula dɛ ngɔ nù gɛ ni, a a wi ngɔ nù, nɛ a tɔ̃ lɛnggɛ mɛ kɛ ma dɛ ngɔ nù gɛ ni. Nɛ nde wele kɛ a yula li nza i ni, 32a tɔ̃ lɛnggɛ mɛ kɛ a zila do zala a, nɛ a zɔ do li a ni. Nɛ nde Owele wa kɔ̃̀ gɛnɛ lɛnggɛnɔ a tɔ̃ ni gɔ. 33Kɔ wi kɛ a kɔ̃ gɛnɛ lɛnggɛnɔ 'da a ni, a be na, Gale tɔ̃ ngboo a gbãlã we. 34Wi kɛ Gale tumba a ni, a tɔ̃ wenɔ 'da Gale, we kɛ Hi Wi Santo 'da Gale dunu kɔ sila a. 35Gale Baa kɔ̃a gɛnɛ Be 'da a, nɛ a hã mɛnɔ vɛ̃ dɛ kɔ̃ a. 36Kɔ wele kɛ a kɔ̃ zu li Be 'da Gale ni, a do kpasi kɛ ma é sɛ gɔ ni. Nɛ wele kɛ a bɛ̃ gɛnɛ Be 'da Gale ni, a do kpasi ni bina, nɛ mãlã 'da Gale tia ngɔ a.

Currently Selected:

YOANƐ 3: NGB

Highlight

Copy