YOANƐ 18

Wa ba Yezu

(Mat. 26.47-56; Mar. 14.43-50; Luk. 22.47-53)

1Yezu wila we do Baa a do'do, nɛ a kulu ngɔ do Owi yambala mɛnɔ 'da a, nɛ wa la, nɛ wa kũ lì Sedroni, nɛ wa le kɔ mbe fɔ te di ni. 2Nɛ nde Yudasi, wele kɛ a 'dɔlɔ sɛ Yezu ni, a ĩ zi tɛ mɛ 'bɔ ti fala ni ĩ. Mba gɔ, Yezu do owi yambala mɛnɔ 'da a, wa nɛ zi di ni nɛa fai. 3Ma kɛ Yudasi nɛa i mɔ, mba do ogili soda do owi zɔ mɔ tɛ nu tɔa Tɛmpɛloe kɛ onwa nganganɔ do Ofariziɛnɔ, wa tumba wa ni. Owinɔ ni wa kala zi obolo, do omwinda, do otanda dɛ kɔ̃ wa. 4Kɔ nɛ́ kɛ Yezu ĩ gulu mɛnɔ ma nɛ dɛ a ni vɛ̃ ĩ ni, nɛ a ngbɔa dɛ 'da wa i, nɛ a aka wa na: “Nɛ fa wio nde?”

5Nɛ wa gese hã a na, lo fa Yezu, wi Nazarɛtɛ.

Nɛ Yezu tɔ̃ hã wa na: “Wi a mi!” Mɛ ni nɛ nde Yudasi, wi 'dɔlɔ Yezu yula zi fala nɛ kpo do wa. 6Yezu nɛa we tɔ̃ na, wi a ɛ ni, nɛ wa ngbɔ dɛ 'do, nɛ wa ala nu vɛ̃. 7Nɛ Yezu aka 'bɔ wa na: “Nɛ fa wio nde?” Nɛ wa gese na: “Lɛ fa Yezu, wi Nazarɛtɛ.”

8Nɛ Yezu gese hã wa na: “Mi tɔ̃a sɔ hã nɛ ia na, wi a mi. Kɔ fala kɛ nɛ fa mi nde, nɛ nɛ lá wanɔ gɛ, kɔ wa si kɛ 'da wa.” 9A tɔ̃a na mɛ ni, takɔ lɛnggɛ a tɔ̃a zi hã Baa a na: “Wele kpo sanga owinɔ kɛ mɔ hã wa hã mi ni yɔ̀ gɔ” ni, ma dɛ tɛ̃ ɛ.

10Mɛ ni nɛ nde Simɔ Petro zi do du kɔya, nɛ a gbɔtɔ ma li foko nɛ haɔɔ, nɛ a 'bili zala ngbá 'da gã nwa nganga kɛ si ngɔ ngawili kɔ̃. Li ngbá ni a Malkusi. 11Nɛ Yezu tɔ̃ hã Petro na: “Mɔ gésé kɔya 'da mɔ dɛ li foko nɛ. Mɔ kɔ̃̀ na, mi kunu bila ngamɛ kɛ Baa mi hã hã mi gɛ gɔ nde?”

Wa nɛa do Yezu 'da Anɛ

12Nɛ gili osodanɔ do wi ngɔ wa, do owi zɔ mɔ nu tɔa Tɛmpɛloe 'da Oyudanɔ, wa ba Yezu, nɛ wa ɛnzɛ a, 13nɛ wa nɛ do a dati Anɛ. Anɛ zi a wili kɛfɛ 'da Kaifɛ, kɛ a zi a gã nwa nganga do sabɛlɛ ni. 14Nɛ Kaifɛ ni a wi kɛ a tɔ̃a zi mbula hã Oyudanɔ na, ma dia fɛ̃ na, wele kpo fe we duzu nu kpala lo ni.

Petro kafa Yezu

(Mat. 26.69-70; Mar. 14.66-68; Luk. 22.55-57)

15Nɛ Simɔ Petro, do mbe wi yambala mɛ 'da Yezu kpo, wa nɛ 'dɔkɔlɔ Yezu. Nɛ nde gele wi yambala mɛ ni, wa ĩ ti ngba wa do gã nwa nganga ĩ. Ma kɛ a lia kɔ ngboe 'da gã nwa i fala nɛ kpo do Yezu. 16Nɛ Petro 'bana dɛ 'do nu ngbo nga. Nɛ wi yambala mɛ kɛ gã nwa ĩ ti a ni hɔ, nɛ a tɔ̃ we 'da Petro hã wuke zɔ mɔ nu ngboe ni, nɛ a le do Petro. 17Nɛ wuke ni aka Petro na: “Mɔ gɛ, mɔ a mbe sanga winɔ 'da wi wa ba a gɛ gɔ nde?”

Nɛ Petro gese hã a na: “Ɔ̃ ɔ̃, wi a mi gɔ.”

18Do tũi ni, nɛ nde gɛ̃ɛ ba zi wena, nɛ owi tonɔ, do owi zɔ mɔ nu tɔanɔ wa dã we, kɔ wa tɛ ɔ ma. Nɛ Petro nɛ tɛ mɛ 'bɔ we ɔ we ni do wa.

Gã nwa nganga aka gulu we 'da Yezu

(Mat. 26.59-66; Mar. 14.55-64; Luk. 22.66-71)

19Nɛ gã nwa nganga ni aka Yezu ngɔ we 'da owi yambala mɛnɔ 'da a, do ngɔ we kɛ a be ma ni. 20Nɛ Yezu gese hã a na: “Mi be zi wenɔ dɛ wila fala, dɛ li gba dɔ. Mi be zi wenɔ fai tɛ kɔ tɔa mbulanɔ, do kɔ Tɛmpɛlo, kɛ Oyudanɔ vɛ̃ wa mba do li ngba wa ni. Mi bè mbe we do usu nɛ gɔ. 21Kɔ gulu kɛ mɔ aka mi ní we ge nde? Mɔ áká winɔ kɛ wa zila zi wenɔ mi bia ni, we kɛ wa ĩ ti lengge kɛ mi tɔ̃a zi hã wa ni.”

22Yezu nɛa we gese ní, nɛ mbe sanga owi zɔ mɔ nu tɔanɔ, kɛ a yolo dɛ kɛ zã Yezu ni zɛ li a, nɛ a aka Yezu na: “Ki ni a we gese hã gã nwa nde?”

23Nɛ Yezu gese hã a na: “Fala kɛ mi tɔ̃̀ de gɔ, nɛ mɔ be 'dã we ngboo mi tɔ̃a ni. Kɔ mi tɔ̃ a dia, nɛ gulu kɛ mɔ zɛa li mi ni we ge nde?”

24'Do nɛ, nɛ Anɛ tombo a do ɛnza nɛ dɛ 'da Kaifɛ, gã nwa nganga.

Petro kafa 'bɔ mbé nɛ na ɛ ĩ ti Yezu gɔ

(Mat. 26.71-75; Mar. 14.69-72; Luk. 22.58-62)

25'Da fala ni, nɛ nde Petro 'bana zi tɛ yolo dɛ fala a ɔ do we ni. Nɛ wa aka 'bɔ a na: “Mɔ a mbe sanga owinɔ 'da wi gɛ gɔ nde?”

Nɛ Petro kafa na: “Ɔ̃ ɔ̃, wi a mi gɔ.”

26Nɛ mbe sanga Owi tonɔ 'da gã nwa ni kpo, kɛ a a nya wi kɛ Petro 'bili sɔ zala a ni aka Petro na: “Mi zɔ̀ sɔ mɔ do wa kɔ fɔ te i gɔ nde?”

27Nɛ Petro kafa 'bɔ mbé nɛ. Nɛ do kpo fala ni, nɛ kɔla he mɔ.

Wa nɛa do Yezu dati Pilatɛ

(Mat. 27.1-2,11-14; Mar. 15.1-5; Luk. 23.1-5)

28Do titole belee, nɛ onwa Yudanɔ wa kulu ngɔ nu tɔa 'da Kaifɛ, nɛ wa nɛ do Yezu 'da Pilatɛ, gã wi fɔmɔ le. Nɛ nde wa lè zi kɔ tɔa 'da gã wi ni gɔ na, dɔ lo hɔ́ wi ndi li Gale gɔ, sɛ a lo nyɔnga ɛngga Hɔ Nza kɔ Ngbá de. 29Kɔ Pilatɛ zɔa ní, nɛ a hɔ nza we kpa ngba a do wa. Nɛ a aka wa na: “Nɛ da wi gɛ we ge nde?”

30Nɛ wa gese hã a na: “A tɛ ɔ̀ sɔ do 'dã wi gɔ, nɛ nde lɛ tɛ́ sɔ we da a hã mɔ gɔ.”

31Nɛ Pilatɛ tɔ̃ hã wa na: “Nɛ lá do a, nɛ nɛ 'bílí we 'da a do tɛ nɛ, ɔ nɛ kɛ mbula 'da nɛ tɔ̃a ni.”

Nɛ Oyudanɔ wa gese hã a na: “Mbula 'da Oroma ha wala hã lɛ na, lɛ 'bili we na, wa gbɛ wi gɔ.” 32Ma la na mɛ ni, takɔ lɛnggɛ kɛ Yezu tɔ̃a zi we tɛlɛ tɛ fie 'da a ni, ma dɛ tɛ̃ ɛ.

33Kɔ Pilatɛ nɛa we zele ní, nɛ a kpolo tɛ̃ a dɛ kɔ tɔa 'da a i, nɛ a sa mɔ hã Yezu dɛ i mɔ, nɛ a aka a na: “Mɔ a nwa 'da Oyudanɔ nde?”

34Nɛ Yezu aka tɛ mɛ 'bɔ a na: “Mɔ aka ni do kɔ sila mɔ, tabi Owele wa tɔ̃a we 'da mi hã mɔ tɔ̃a nde?”

35Nɛ Pilatɛ gese hã a na: “Mɔ zɔ mi ɔ nɛ be Yuda ni nde? Onya mɔ ngboo, do onwa nganganɔ wa tɛa do mɔ hã mi, kɔ mɛ mɔ dɛa ni a ge nde?”

36Nɛ Yezu gese na: “Fala dɛa to nwa 'da mi, ma a ngɔ nù gɛ gɔ. Ɔ do kɛ ma sɔ dɛ ngɔ nù gɛ, nɛ owinɔ 'da mi wa bi sɔ zu mi na, dɔ Oyudanɔ wa bá mi gɔ. Nɛ nde fala dɛa to nwa 'da mi, ma a ngɔ nù gɛ gɔ.”

37Nɛ Pilatɛ aka 'bɔ a na: “Ní a mɔ a nwa nde?”

Nɛ Yezu gese hã a na: “Mɔ a mɔ tɔ̃ na, mi a nwa. Wa kua mi dɛ ngɔ nù gɛ, takɔ mi be gulu gbãlã we hã winɔ. Kɔ winɔ vɛ̃ kɛ wa kɔ̃a gbãlã we ni, wa zele we mi tɔ̃ gɛ zila.”

38Nɛ Pilatɛ aka a na: “Gbãlã we gɛ a ge nde?”

Wa 'bili we 'da Yezu na a wia do fio

(Mat. 27.15-31; Mar. 15.6-20; Luk. 23.13-25)

Pilatɛ tɔ̃a wenɔ ni do'do, nɛ a hɔ nza mbé nɛ, nɛ a tɔ̃ hã Oyudanɔ na: “Mi kpà 'dã gulu we 'da wi gɛ gɔ. 39Kɔ ɔ nɛ kɛ sabɛlɛ kpo kpo do 'da fala ɛngga Hɔ Nza kɔ Ngbá, mi da kɔ̃ mi tɛ wi bɔlɔkɔ kpo hã nɛ fai ni, nɛ kɔ̃a na, mi da kɔ̃ mi tɛ nwa 'da nɛ nde?”

40Nɛ wa he mɔ fuu na: “Wi a a gɔ, wi a a gɔ! Mɔ dá kɔ̃ mɔ tɛ Barabasi!” Ĩ na, Barabasi wa sa li a gɛ, a a wi zũ.

Currently Selected:

YOANƐ 18: NGB

Highlight

Copy