Ndo Nyanga Dɛ Mɔ 9
9
Gale gba tɔkɔ do Nowe
1Nɛ Gale wila nu ɛ tɛ Nowe, do obenɔ 'da a, nɛ a tɔ̃ na: “Nɛ kó hã nɛ dɛlɛ, nɛ nɛ yɛ'bɛ ngɔ nù gɛ. 2Nɛ kili nɛ ma ba sɛ ogã sa'denɔ, do obe wanɔ, do onɔɛnɔ, do okɔyɔnɔ vɛ. Mi ia wa vɛ ti mbula 'da nɛ. 3Nɛ wia we nyɔngɔ wa vɛ, mba do onwá sanggonɔ kɛ mi hã zi hã nɛ dati ni. Mi hã mɛnɔ ni vɛ hã nɛ na, nɛ nyɔngɔ ma. 4'Bali mɔ kpo, nɛ tɛ nyɔngɔ sa'de kɛ tɔkɔ tɛ a sì nù gɔ ni gɔ. We duzu kɛ tɔkɔ ma do kpasi kɔ nɛ boe. 5Ma ɔ kpasaa nɛ tɔkɔ tɛ nɛ ngboo, kɛ ma 'bɔ do kpasi kɔ nɛ boe ni. Na mɛ ni, wi kɛ a gbɛ ngba a, nɛ a kpa sɛ etumbu fio. Ma ɔ tabi do sa'de hã a gbɛ wele nde, nɛ mi hã sɛ etumbu fio hã sa'de ni. 6Fala kɛ wele a tɔkɔ tɛ ngba a nù, nɛ ngba a wele a a sɛ tɛ mɛ 'bɔ tɔkɔ tɛ a nù. We kɛ mi dɛa wele ɔ nɛ mi, nɛ a ba tɛlɛ tɛ mi ngboo. 7Nɛ nde we duzu nɛ, nɛ ko hã nɛ dɔ, nɛ nɛ yɛ'bɛ ngɔ nùi vɛ.”
8Nɛ Gale tɔ̃ 'bɔ hã Nowe do obenɔ 'da a na: 9“Mi nɛ gba tɔkɔ do nɛ, do obe zã nɛ. 10Mi gba sɛ 'bɔ tɔkɔ do omɛnɔ vɛ kɛ ma do tunu li ɛ ni, onɔɛnɔ do osa'denɔ vɛ kɛ wa zi fala nɛ kpo do nɛ kɔ masua, do owanɔ wa sɛ ngɔ nù gɛ do 'do nza ni. 11Gba tɔkɛ ni, ma ɔ sɛ nɛ kɛ gɛ: Mi kúmú sɛ 'bɔ omɛnɔ kɛ ma do tunu li ɛ ngɔ nù gɛ do gba hɛ̃a lì gɔ. Nɛ gba hɛ̃a lì 'dángá sɛ 'bɔ nùi gɛ fala kpo gɔ.”
12Nɛ Gale tɔ̃ 'bɔ na: “Gba tɔkɛ kɛ mi gba do nɛ, do omɛnɔ vɛ kɛ ma do tunu li ɛ ni, ma 'bana sɛ 'bana fai. Nɛ mɛ kɛ ma be sɛ na, mi gba tɔkɔ do nɛ ni, ma kɛ: 13Mi dɛ sɛ na, ndumbe hɔ lì nza, nɛ ma be sɛ gba tɔkɛ kɛ mi gba ma do owinɔ ni. 14Nɛ 'da fala fai, kɛ mi dɛ na, li nza ma kpe do lĩ kolo, hã ndumbe ma hɔ nde, 15nɛ ta zu mi ma gba sɛ ngɔ gba tɔkɛ kɛ mi gba do nɛ, do osa'denɔ vɛ̃ ni. Nɛ gba hɛ̃a lì kúmú sɛ 'bɔ omɛnɔ kɛ ma do tunu li ɛ ngɔ nù gɛ fala kpo gɔ. 16Fala kɛ ndumbe hɔ, nɛ ta zu mi ma gba sɛ ngɔ gba tɔkɛ, kɛ ma 'bana sɛ fai ngbala lɛ do Otunu li omɛnɔ ngɔ nù gɛ ni.”
17Nɛ Gale dala 'bɔ nu ɛ hã Nowe na: “Ndumbe ma be gba tɔkɛ kɛ mi gba ma do omɛnɔ kɛ ma do tunu li ɛ ngɔ nù gɛ ni vɛ.”
Nowe do obenɔ 'da a talɛ ni
18Obenɔ 'da Nowe kɛ wa hɔa nza kɔ masua do a ni, wi zi a Sɛmɛ, Kamɛ do Yafɛtɛ. Kamɛ zi a baa Kanana. 19Yolo dɛ ngɔ obenɔ talɛ ni, nɛ Owele wa yɛ'bɛ zi ngɔ nù gɛ.
20Nowe zi a wi wa fɔ, a zi a wi dati we mi te vinɔ. 21Nɛ mbe tũ kpo, nɛ Nowe nɔa dɔ̃, nɛ ma ba a, nɛ a hɔlɔ tulu tɛ a, nɛ a ɔ yala dɛ kɔ tɔa tande 'da a do wila tɛ a iko. 22Nɛ be 'da a, Kamɛ, kɛ a baa Kanana ni, a zɔ kũlĩ tɛ baa a Nowe, nɛ a hɔ nza, nɛ a tɔ̃ we nɛ hã onya a 23Sɛmɛ do Yafɛtɛ. Wa nɛa we zele ní, nɛ wa kala gbau tulu, nɛ wa zɛ ma ngɔ 'baka wa, nɛ wa le kɔ tɔa tande, nɛ wa siki 'do wa dɛ 'da baa wa na, dɔ lo zɔ kũlĩ tɛ baa lo gɔ. Wa tili ni gbaa, nɛ wa gu tuli ni ngɔ a. 24'Da fala kɛ Nowe tunu, nɛ li a sa tɛ bá dɔ̃ɛ 'da a ni, nɛ a zele we mɛ kɛ zagbãlã be 'da a dɛa do a ni, 25nɛ a tɔ̃ na:
“E kɔ fɔmba zĩlĩ ngɔ mɔ Kanana!
Mɔ sɛ a tala ngɔ go'do ngbá 'da onya mɔ.”
26Nɛ Nowe tɔ̃ 'bɔ na:
“Lɛ dɔnggɔ NWA Gale 'da Sɛmɛ,
nɛ Kanana dúngú ngbá 'da Sɛmɛ.
27Aa Gale, mɔ dɛ na,
Yafɛtɛ kpa de mɔ a gã,
nɛ onu fɛlɛ a wa ɔ́ fala nɛ kpo do nu fɛlɛ Sɛmɛ.
Nɛ Kanana dúngú ngbá 'da Yafɛtɛ.”
28'Do gba hɛ̃a lì ni, nɛ Nowe ɔa 'bɔ sabɛlɛ kama talɛ do 'bu nɛ mɔlɔ. 29A ɔa zi ngɔ nù gɛ vɛ sabɛlɛ kama kusi do 'bu nɛ mɔlɔ, nɛ a fe.
Currently Selected:
Ndo Nyanga Dɛ Mɔ 9: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
